བོད་ལྗོངས་སློབ་གྲྭ་ཆེན་མོའི་ནང་སློབ་གཉེར་གནང་བཞིན་པའི་ཀུན་བཟང་རྒྱལ་མཚན་ཞུ་བ་ཞིག་རྒྱ་ནག་གཞུང་གིས་འཛིན་བཟུང་བྱས་ཏེ་ལོ་ཕྱེད་ལྷག་འགྲོ་བཞིན་ཡོད་ཀྱང་ད་དུང་གང་དུ་ཡོད་མེད་ཙམ་ཡང་ཤེས་ཀྱི་མི་འདུག
བོད་ནས་མིང་བརྗོད་འདོད་མེད་པའི་བོད་མི་ཞིག་གིས་རྒྱ་གར་ནང་གནས་སྡོད་འབྲེལ་ཡོད་ཅིག་ལ་གནས་ཚུལ་མཁོ་སྤྲོད་གནང་བ་ལྟར་ན། མཚོ་སྔོན་ཞིང་ཆེན་མཚོ་ལྷོ་ཁུལ་མང་ར་རྫོང་མགོ་མང་གྲོང་རྡལ་འབྲོག་རུ་སྡེ་བའི་རང་ལོ་ ༢༥ ཡས་མས་ཤིག་ཡིན་པའི་མཐོ་རིམ་སློབ་མ་ཀུན་བཟང་རྒྱལ་མཚན་ཞུ་བ་ཞིག འདི་ལོའི་ཕྱི་ཟླ་༦ པའི་ནང་ཁོང་གི་དཔེ་དེབ་ཅིག་ཆབ་སྲིད་དང་འབྲེལ་བ་ཡོད་སྐོར་བསྙད་དེ། རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་ནས་འཛིན་བཟུང་བཀག་སྐྱིལ་བྱས་ཏེ་ཟླ་བ་དྲུག་ལྷག་འགྲོ་བཞིན་ཡོད་ཀྱང་། ད་ལྟའི་ཆར་ཁོང་གང་དུ་བཙོན་འཇུག་བྱས་ཡོད་མེད་དང་ཁོང་གི་གནས་སྟངས་སོགས་གནས་ཚུལ་ཅི་ཡང་ཤེས་རྟོགས་ཐུབ་ཀྱི་མེད་པར་བརྟེན། ཁོང་གི་ནང་མི་དང་ཉེ་འབྲེལ་སོགས་ནས་བློ་འཚབ་ཆེན་པོ་བྱེད་བཞིན་ཡོད་འདུག
ཀུན་བཟང་རྒྱལ་མཚན་ལགས་ད་ལྟ་རང་ལོ་ ༢༥ ཡས་མས་ཤིག་ཡིན་པ་དང་། ཁོང་གི་ཕ་མིང་ལ་གདུགས་དཀར་རྒྱལ་ཞུ་ཡི་ཡོད་དང་། ཀུན་བཟང་རྒྱལ་མཚན་ལགས་ཆུང་དུས་ནས་འབྲོག་རུ་སྡེ་བའི་སློབ་ཆུང་དང་མགོ་མང་གྲོང་རྡལ་གྱི་ཆ་ཚང་སློབ་གྲྭར་ཞུགས་ཏེ། རིམ་གྱིས་དམའ་འབྲིང་དང་མཐོ་འབྲིང་གཉིས་ནས་ཐོན་རྗེས། བོད་ལྗོངས་སློབ་གྲྭ་ཆེན་མོར་ཚུད་ནས་དེ་རུ་སློབ་གཉེར་གནང་བཞིན་པའི་སྐབས་སུ་འཛིན་བཟུང་བྱས་ཡོད་འདུག
