ན་ཚ་བྱུང་ན་དང་པོར་ཁ་པར་གཏོང་རོགས་གསུང་གི་འདུག

དྷ་ས་མེག་གྷན་ཁུལ་ནས་བོད་མི་ ༧ ཚུད་པའི་ཏོག་དབྱིབས་ནད་རྟགས་ཅན་མི་ ༡༣ ཙམ་བྱུང་ཡོད་པས་ཁྲོམ་གཞུང་དཀྱིལ་གྱི་འགྲོ་སྐྱོད་ལ་དམ་དྲག་བྱེད་བཞིན་འདུགཁ་སང་བོད་མིའི་སྒྲིག་འཛུགས་ཀྱི་ཝུ་ཧན་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༣༧ པའི་སྟེང་།  ད་ལྟ་བཞུགས་སྒར་དྷ་སའི་མེག་གྷན་ཁྲོམ་གཞུང་གི་གཡས་ཕྱོགས་སྲང་ལམ་དེ་ཏོག་དབྱིབས་གཉན་རིམས་བྱུང་སའི་ས་ཆ་ལ་ངོས་འཛིན་གྱིས། མི་མང་འགྲོ་འོང་སོགས་དམ་དྲག་བྱེད་བཞིན་ཡོད་པ་མ་ཟད། མེག་གྷན་ཁྱོན་ཡོངས་ཏོག་དབྱིབས་གཉན་རིམས་འགོས་ཁྱབ་ཀྱི་ས་ཁུལ་དང་འབྲེལ་འདྲིས་ཡོད་པའི་ཁོངས་སུ་ངོས་འཛིན་བྱས་ཡོད་པ་དང་། ཕྱི་ཚེས་ ༩ ཉིན་མེག་གྷན་(Macleod Ganj)དང་པོ་ཏ་ལ་གཞུང་ལམ་ཉེ་ཁུལ་ནས་ཏོག་དབྱིབས་ནད་རྟགས་ཅན་ཁྱོན་ ༡༣ བྱུང་ཡོད་པ་དང་། དེའི་ནང་ནས་མི་ ༧ བོད་པ་ཡིན་འདུག  

དེང་སྐབས་དགུན་དུས་བསླེབ་པ་དང་བསྟུན་གནམ་གཤིས་འགྱུར་ལྡོག་གི་དབང་གིས་མི་མང་པོ་ཞིག་ལ་ཆམ་རིམས་ཕོག་གི་ཡོད་སྟབས། དྷ་ས་ཁུལ་གྱི་བོད་མིའི་ནང་ཆམ་རིམས་ཕོག་ནས་སྨན་རྩིས་ཁང་དང་བདེ་ལེགས་སྨན་ཁང་སོགས་སུ་སྨན་པར་བསྟེན་གཏུག་བྱེད་དུ་འགྲོ་མཁན་གང་ཙམ་མང་པོ་ཡོད་པ་དང་། ཆམ་རིམས་ཕོག་རིགས་ཕལ་ཆེ་བ་རྒྱ་གར་གཞུང་གི་ཛོ་ནོར(Zonal)་སྨན་ཁང་དུ་ཏོག་དབྱིབས་ནད་གཞི་བརྟག་དཔྱད་བྱེད་པར་གཏོང་གི་འདུག་ལ། རྒྱ་གར་སྨན་ཁང་དུ་ནད་པ་མང་དྲགས་པ་སོགས་ཀྱི་དཀའ་ངལ་འོག་བརྟག་དཔྱད་གྲུབ་འབྲས་དག་དག་མ་ཐོན་པར་འགོར་བ་དང་། བརྟག་འབྲས་མ་ཐོན་ཚེ་སྨན་ཁང་ནས་ནད་པར་སྨན་སྤྲོད་ཀྱི་མེད་པའི་དཀའ་ངལ་འཕྲད་ཀྱི་འདུག

འདི་གའི་གསར་འགོད་པས་ཁ་པར་བརྒྱུད་འཕྲོད་བསྟེན་ལས་ཁུངས་ཀྱི་དྲུང་ཆེ་དཔལ་ལྡན་དོན་འགྲུབ་ལགས་སུ་བོད་མིར་འཕྲད་བཞིན་པའི་དཀའ་ངལ་དང་འབྲེལ་བའི་སྐོར་བཀའ་འདྲི་ཞུས་པར་ཁོང་གིས། བོད་མི་ཞིག་ན་ཡི་ཡོད་ཚེ་ལམ་སང་བདེ་ལེགས་སྨན་ཁང་ལ་འབྲེལ་བ་བྱེད་དགོས་ཀྱི་ཡོད། བདེ་ལེགས་སྨན་ཁང་གི་སྨན་པ་བརྩོན་འགྲུས་ལགས་ཀྱི་ཞལ་པར་ཨང་གྲངས་ 9882770828དང་། འཕྲོད་བསྟེན་ལས་ཁུངས་ཀྱི་དྲུང་གཞོན་ཀུན་བཟང་ལགས་ཀྱི་ཨང་གྲངས་8351011865 ། ངག་དབང་ལགས་ཀྱི་ 6360813397 བཅས་གསལ་བསྒྲགས་རིམ་པའི་ནང་སྤེལ་ཡོད། ཅེས་གསུངས་བྱུང་།

བོད་མི་ཞིག་ན་ཡི་ཡོད་ཚེ་ཛོ་ནལ་སྨན་ཁང་དུ་འགྲོ་མི་དགོས་པར་འཕྲོད་བསྟེན་ལས་ཁུངས་རང་ནས་ཏོག་དབྱིབས་བརྟག་དཔྱད་ཡོང་བར་ཆ་རྐྱེན་གསུམ་འདུག གཅིག་ཆམ་ནད་བྱུང་སྟེ་མགོ་ན་བ་དང་ཚ་བ་རྒྱས་པ། སྣ་ཆུ་ཐོན་གྱི་ཡོད་པ་ཡིན་དགོས་པ་དང་། གཉིས་སྣེ་ལེན་ཁང་དུ་ཟུར་བཀག་འོག་བསྡད་ཡོད་པ། གསུམ་ནད་རྟགས་ཐོན་པའི་མིར་འབྲེལ་འདྲིས་བྱུང་བ་རྣམས་རྗེས་འདེད་གཏོང་གི་ཡོད་པ་བཅས་ཡིན་འདུག་ལ། འཕྲོད་བསྟེན་ལས་ཁུངས་ཀྱིས་ད་སྔ་བར་བཞུགས་སྒར་ཁུལ་གྱི་བོད་མི་ཁྱོན་ ༡༥༩༨ ལ་ཏོག་དབྱིབས་ནད་གཞིའི་བརྟག་དཔྱད་གནང་ཡོད་འདུགདེའི་རྗེས་ང་ཚོས་བདེ་ལེགས་སྨན་ཁང་གི་སྨན་པ་བརྩོན་འགྲུས་ལགས་སུ་ཁ་པར་བརྒྱུད་བཀའ་འདྲི་ཞུས་སྐབས། མི་ཞིག་ན་ཡི་ཡོད་ཚེ་ཐད་ཀར་སྨན་ཁང་དུ་མ་ཡོང་བར་འཕྲོད་བསྟེན་ལས་ཁུངས་ཀྱིས་བསྐོ་གཞག་བྱས་པའི་འབྲེལ་ཡོད་སྨན་ཞབས་ཉི་མ་དབྱངས་འཛོམས་ལགས་སུ་འབྲེལ་བ་ཞུས་ཏེ། ཉི་མ་དབྱངས་འཛོམས་ལགས་ཀྱི་འཚམས་འཕྲིན་ (whatsapp) སྟེང་རང་ཉིད་ཀྱི་ནད་རྟགས་དང་། རྒྱ་གར་གྱི་ཐོབ་ཐང་ལག་འཁྱེར་(Aadhar Card) པར་བཏབས་ཏེ་བསྐུར་དགོས་ཀྱི་ཡོད། དེ་ནས་ང་ཚོས་ནད་རྟགས་གཞིར་བཟུང་སྨན་སྤྲོད་པ་དང་ཏོག་དབྱིབས་ནད་གཞི་བརྟག་དཔྱད་གཏོང་དགོས་རིགས་ལ་བརྟག་དཔྱད་གནང་གི་ཡོད། དེ་མིན་སྡེབ་གཅིག་ཏུ་མི་མང་པོ་སྨན་ཁང་དུ་ཡོང་བ་ཡིན་ན་ཕན་ཚུན་གཉི་གའི་ལས་ཀ་མི་འགྲུབ་པ་མ་ཟད། ནད་ཡམས་འགོས་ཁྱབ་ཏུ་འགྲོ་བའི་རྒྱུ་ཆགས་ཀྱི་ཡོད། ཅེས་དང་། བོད་མི་སུ་ཞིག་ལ་ན་ཚ་བྱུང་ཚེ་ཐད་ཀར་བདེ་ལེགས་སྨན་ཁང་གི་ཁ་པར་ཨང་གྲངས་ཐོག་འབྲེལ་བ་གནང་རྒྱུ་གལ་ཆེན་པོ་ཡིན་སྐོར་བརྗོད་བྱུང་།བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་བར་བོད་ནང་ཏོག་དབྱིབས་ནད་པ་ཁྱོན་ ༡༠༧ བྱུང་ཡོད་པ་ལས་མི་ ༡ རྐྱེན་འདས་དང་། ཕྱི་རྒྱལ་ཡུལ་གྲུ་ཁག་ཏུ་བོད་མི་ནད་པ་གྲངས་ ༢༡༣ ལས་མི་ ༩ རྐྱེན་འདས་དང་༡༦༥ དྲག་སྐྱེད། དེ་བཞིན། རྒྱ་གར་དང་བལ་ཡུལ་ནང་མི་གྲངས་ ༡༣༦༥ བྱུང་བའི་ནང་མི་ ༣༥ རྐྱེན་འདས་དང་མི་ ༡༡༧༥ དྲག་སྐྱེད་བཅས་བྱུང་ཡོད་འདུག

གསར་འགོད་པ། སྐལ་བཟང་སྦྱིན་པ།