ཤི་ཧྲང་པན་ན་ཚ་ཁུལ་གྱི་རྩི་ཤིང་བརྟག་དཔྱད་ཁང་དང་སྒལ་རུས་ཅན་གྱི་སྲོག་ཆགས་དང་གདོད་མའི་མི་རིགས་ཞིབ་འཇུག་ལྟེ་གནས་ཁང་གཉིས་ཀྱིས་རྙེད་པའི་བོད་ཀྱི་འགྱུར་རྡོ་ལྟར་ན་ལོ་ངོ་ས་ཡ་ ༤༧ སྔོན་གྱི་བོད་མཐོ་སྒང་གི་མཐོ་ཚད་དེ་སྨི་ ༡༥༠༠ དང་སྤྱི་སྙོམས་གྲང་ཚད་ ༡༩ (celsius) ཙམ་ལས་མེད་པའི་ཚོད་དཔག་བྱས་འདུག
ཁ་སང་རྒྱ་ནག་གི་གཞུང་འབྲེལ་གོ་ལའི་བརྙན་འཕྲིན་ཁང་གིས་གནས་ཚུལ་སྤེལ་བ་ལྟར་ན། རྒྱ་རིགས་འགྱུར་རྡོ་བརྟག་དཔྱད་བྱེད་མཁན་སྐོར་ཞིག་གིས་བོད་ཀྱི་ས་ཁུལ་ནས་རྙེད་པའི་འགྱུར་རྡོ་ལ་བརྟག་དཔྱད་ཞིབ་འཇུག་བྱས་པ་བརྒྱུད། བོད་མཐོ་སྒང་ལ་ལོ་ས་ཡ་ ༤༧ སྔོན་ནས་ཚ་ཁུལ་གྱི་ནགས་ཚལ་(subtropical forest)ཆགས་ཡོད་པ་ཤེས་རྟོགས་བྱུང་ཡོད་འདུག
ད་ཐེངས་ཀྱི་གྲུབ་དོན་སྙན་ཐོ་འབྲི་མཁན་དང་ཞིབ་འཇུག་པ་སུ་ཐའོ་(Su Tao) ཡིས། ང་ཚོས་འདས་པའི་ལོ་ ༥ རིང་གསར་རྙེད་བྱས་པའི་གྲུབ་འབྲས་སུ། ང་ཚོར་ལོ་མ་དང་། མེ་ཏོག ཤིང་ཏོག རྩི་ཤིང་གི་རྩ་བ་སོགས་སྐྱེས་དངོས་རིགས་ཀྱི་འགྱུར་རྡོ་ཕོན་ཆེན་པོ་རྙེད་ཡོད་པ་དང་། དེའི་ཐོག་ད་དུང་ཉ་དང་བྱ་སྒྲོའི་འགྱུར་རྡོ་ཡང་རྙེད་ཡོད། ང་ཚོར་བཟོ་དབྱིབས་འདྲ་མིན་ ༧༠ ལྷག་ཡོད་པའི་རྩི་ཤིང་གི་འགྱུར་རྡོ་ཆིག་སྟོང་ལྷག་ཐོབ་ཡོད། དེ་དག་ཀྱང་སྣ་ཚོགས་པ་རེད། ཅེས་བརྗོད་འདུག
ད་ཐེངས་ཀྱི་ཚན་རིག་ཞིབ་འཇུག་དེ་རྒྱ་ནག་གཞུང་གི་ཚན་རིག་ཁང་ (Chinese Academy of Sciences) གི་ཁྱབ་ཁྱོངས་སུ་ཡོད་པའི་ཤི་ཧྲང་པན་ན་ཚ་ཡུལ་གྱི་རྩི་ཤིང་བརྟག་དཔྱད་ཁང་ (Xishuangbanna Tropical Botanical Garden) དང་། སྒལ་རུས་ཅན་གྱི་སྲོག་ཆགས་དང་གདོད་མའི་མི་རིགས་ཞིབ་འཇུག་ལྟེ་གནས་ཁང་ (Institute of Vertebrate Paleontology and Paleoanthropology) གཉིས་ཀྱིས་མཉམ་འབྲེལ་ཐོག་བསྒྲུབས་པ་ཞིག་ཡིན་པ་དང་། གྲུབ་དོན་སྙན་ཐོ་དེ་ཨ་རིའི་རྒྱལ་ཡོངས་ཚན་རིག་ཁང་གི་དུས་དེབ་ཐོག་བཀོད་སྤེལ་ཡོད་འདུག
འགྱུར་རྡོ་དབྱེ་ཞིབ་པས་བརྗོད་པ་ལྟར་ན། ད་ལན་རྙེད་སོན་བྱུང་བའི་རྩི་ཤིང་གི་འགྱུར་རྡོ་ཕལ་ཆེ་བ་ད་ལྟ་གོ་ལའི་དམར་ཐིག་(Equator)དང་ཉེ་བའི་ཁུལ་(Tropical) དུ་ཡོད་པའི་སྐྱེ་དངོས་དང་འདྲ་བས། ད་ལྟ་བོད་མཐོ་སྒང་དེ་གྲང་ངར་ཆེ་ཡང་། ལོ་ངོ་ས་ཡ་ ༤༧ སྔོན་དུ་བོད་ནང་ཚ་ཁུལ་གྱི་ནགས་ཚལ་བྱུང་ཡོད་པའི་སྡོམ་ཚིག་བཀོད་འདུག་ལ། ཞིབ་འཇུག་པས་འཚོལ་རྙེད་རྣམས་གཅིག་ཏུ་བསྡུས་ཏེ་ལོ་ངོ་ས་ཡ་ ༤༧ སྔོན་གྱི་བོད་མཐོ་སྒང་གི་མཐོ་ཚད་དེ་སྨི་ ༡༥༠༠ དང་སྤྱི་སྙོམས་གྲང་ཚད་དེ་ ༡༩ (celsius) ལས་མེད་པའི་ཚོད་དཔག་བྱས་ཡོད་འདུག
འགྱུར་རྡོ་དབྱེ་ཞིབ་པ་སུ་ཐའོ་ཟེར་བ་དེས། ད་ཐེངས་ཀྱི་གསར་རྙེད་འདིས་བོད་མཐོ་སྒང་གི་སྣ་མང་རང་བཞིན་ལ་སྒོ་མོ་གསར་པ་ཞིག་ཕྱེས་ཡོད་ལ། རྩི་ཤིས་ཀྱི་འགྱུར་རྡོས་མཚོན་ཐུབ་པ་ནི། བོད་མཐོ་སྒང་གིས་ཨེ་ཤ་ཡ་ཙམ་དུ་མ་ཟད་གོ་ལའི་བྱང་ཕྱོགས་ཁུལ་དུ་སྣ་མང་རང་བཞིན་གྱི་རྩི་ཤིང་ཆགས་རྒྱུར་ཤུགས་རྐྱེན་གང་འཚམ་བྱིན་ཡོད་སྐོར་ཡང་བརྗོད་འདུག
གསར་འགོད་པ། པ་སངས་ཚེ་རིང་།
