ཁ་སང་ཕྱི་ཚེས་ ༡༦ ཉིན། ༧གོང་ས་རྒྱལ་བ་རིན་པོ་ཆེ་མཆོག་གི་བོད་ཡིག་གི་དྲ་རྒྱ་ལེགས་བཅོས་གྲུབ་སྟེ་ཤར་གཏོང་གནང་ཡོད་པ་དང་། ད་ལྟ་དྲ་རྒྱའི་ནང་དོན་ཕུན་སུམ་ཇེ་ཚོགས་དང་སྟབས་ཇེ་བདེར་བཏང་ཡོད་སྟབས། ལག་ཐོགས་ཁ་པར་དང་iPad སོགས་ཀྱི་ནང་ལྟ་ཀློག་ཞུ་བདེ་བོ་བཟོས་གནང་འདུག 
དགའ་ལྡན་ཕོ་བྲང་གི་བོད་ཡིག་དྲ་བའི་རྩོམ་སྒྲིག་པ་འཇིགས་མེད་ཚེ་རིང་ལགས་སུ་ཞལ་པར་བརྒྱུད་དྲ་རྒྱ་ལེགས་བཅོས་གནང་བའི་དགོས་དམིགས་དྲིས་པར་ཁོང་གིས། དྲ་རྒྱ་ཚང་མ་དུས་ནས་དུས་སུ་ཡར་རྒྱས་གཏོང་དགོས་པ་དང་། ཐོན་རིམ་གསར་བརྗེ་བྱེད་དགོས་པ་ཞིག་རེད། བོད་ཡིག་གི་དྲ་རྒྱ་རྙིང་པའི་ནང་ཐེངས་འགར་དྲ་འབུ་འཛུལ་ཡོད་པར་བརྟེན། དྲ་རྒྱ་ལྕི་མོ་ཆགས་པ་དང་འཆར་ངོས་ཤར་དལ་བ་སོགས་ཀྱི་དཀའ་ངལ་ཡོད་པ་རེད། ད་ལྟའི་དྲ་རྒྱ་གསར་པ་དེ་ཕྱི་རྒྱལ་གྱི་དྲ་རྒྱའི་ལག་རྩལ་ཆེད་ལས་པས་གསར་བཟོ་བྱས་པ་དང་། དྲ་རྒྱའི་བདེ་འཇགས་སྲུང་སྐྱོབ་ཡང་ཡག་པོ་ཡོད་སྐོར་བརྗོད་བྱུང་།
ཡང་བོད་ཡིག་དྲ་བའི་ནང་དོན་ལ་འགྱུར་བ་ག་རེ་ཐེབས་ཡོད་མེད་སྐོར་ལ་ཁོང་གིས། དྲ་རྒྱའི་ནང་དོན་གྱི་ཆ་ནས་ཁ་སྣོན་ཁག་ཅིག་བྱས་ཡོད་པའི་ནང་། ༧གོང་ས་མཆོག་གི་གསུང་རྩོམ་གྱི་སྡེ་ཚན་གསར་པ་ཞིག་བསྣན་ཡོད་པ་དང་། དེའི་ནང་རྒྱལ་བ་རིན་པོ་ཆེ་མཆོག་གི་བཀའ་རྩོམ་གྱི་སྐོར་ཁག་ཅིག་དང་མཛད་རྣམ་རྒྱ་ཆེན་སྙིང་རྗེའི་རོལ་མཚོ། དེ་བཞིན་ཕྱག་དེབ་རིགས་མང་པོ་ ePub དང་PDF འཕྲུལ་དེབ་ཐོག་ཕབ་ལེན་ཐུབ་པ་བཟོས་ཡོད། དེ་བཞིན་བརྙན་དང་འབྲེལ་ནས། དེ་སྔོན་བརྙན་ཆ་ཚང་དཀྱུས་གཅིག་ཏུ་བརྙན་གྱི་ཚན་པའི་ནང་བཞག་ཡོད་ནའང་། ད་ལྟ་བརྙན་དབྱེ་བ་བཅུ་གཉིས་སུ་བཀར་ཏེ་བཀའ་དབང་དང་རྗེས་གནང་། བཀའ་ཆོས། བཀའ་སློབ། ཚོགས་ཕེབས། གསུང་འཕྲིན། བགྲོ་གླེང་སོགས་སུ་དབྱེ་སྟེ། དྲ་རྒྱར་མཇལ་མཁན་རྣམས་ལ་སོ་སོར་གང་དགོས་པ་དེར་སྟབས་བདེའི་ངང་མཇལ་ཐུབ་པ་ཞིག་བཟོས་ཡོད་པ་སོགས་གསར་པ་ཡིན་སྐོར་བརྗོད་བྱུང་།
༧གོང་ས་རྒྱལ་བ་རིན་པོ་ཆེ་མཆོག་གི་དགོངས་གཞིའི་སྡེ་ཚན་ནང་དུ། དབུ་མའི་ལམ་གྱི་དགོངས་གཞིའི་བྱུང་རིམ་སྐོར་གྱི་གལ་ཆེའི་བཀའ་སློབ་དང་། དབུ་མའི་ལམ་གྱི་སྲིད་བྱུས་དང་དེའི་བྱུང་རབས་ངོ་སྤྲོད། དེ་བཞིན་༧རྒྱལ་བ་རིན་པོ་ཆེ་མཆོག་གི་ཡང་སྲིད་སྐོར་དང་། ཐུགས་སྐྱེད་དམ་བཅའ་བཞི། འཛམ་གླིང་ཞི་བདེ་དང་བྱམས་བརྩེ། འཚེ་བ་མེད་པ། ནང་ཆོས་དང་ཚན་རིག་སོགས་ཀྱི་དགོངས་གཞི་བཅས་བཀོད་གནང་འདུག དེ་བཞིན། བཀའ་སློབ་ནང་དུ་ཁོར་ཡུག་དང་ཤེས་ཡོན། རིག་གཞུང་། ནང་ཆོས། ཚན་རིག བོད་དོན། དོལ་རྒྱལ་སོགས་སུ་དབྱེ་བ་ཕྱེས་ཡོད་པ་མ་ཟད། སྡེ་ཚན་རེ་རེའི་ནང་དུ་དེ་འབྲེལ་གྱི་བཀའ་སློབ་དང་གསུང་བཤད་མང་པོ་སྐུ་པར་དང་བཅས་མཇལ་རྒྱུ་འདུག་ལ། འཚོལ་བཤེར་གྱི་ནང་དུ་ཤེས་ཡོན་ཅེས་བྲིས་པ་ཡིན་ན། ༧རྒྱལ་བ་རིན་པོ་ཆེ་མཆོག་གིས་ཤེས་ཡོན་དང་འབྲེལ་བའི་བཀའ་སློབ་གནང་བ་རྣམས་བརྙན་དང་པར། གསུང་ཆ་ཚང་མཇལ་ཐུབ་པ་སོགས་འཚོལ་བཤེར་གྱི་ནུས་པ་ཆེ་ཞིང་སྤྱོད་བདེ་པོ་ཞིག་འདུག
སྤྱིར་༧གོང་རྒྱལ་བ་རིན་པོ་ཆེ་མཆོག་གི་བོད་ཡིག་གི་དྲ་རྒྱ་གསར་པ་དེ་ཟླ་ཤས་གོང་ནས་ཤར་གཏོང་གནང་འཆར་ཡོད་འདུག་ནའང་། རྒྱ་ནག་ནས་མཆེད་པའི་ཏོག་དབྱིབས་གཉན་རིམས་འཛམ་གླིང་གང་སར་ཁྱབ་པར་བརྟེན། འབྲེལ་ཡོད་ལས་མི་ལས་ཞུགས་མ་ཐུབ་པ་སོགས་ལ་བརྟེན། ལས་གཞི་འཕར་འགྱངས་ཕྱིན་ཡོད་འདུག ད་ལྟའི་ཆར་༧གོང་ས་རྒྱལ་བ་རིན་པོ་མཆོག་གི་དྲ་རྒྱ་དེ་དབྱིན་སྐད་དང་། རྒྱ་སྐད། ཧིན་དྷིའི་སྐད། ཉི་ཧོང་གི་སྐད། ཨི་ཊ་ལིའི་སྐད། འཇར་མན་གྱི་སྐད། སོག་སྐད། ར་ཤཱི་ཡའི་སྐད། ཧྥ་རན་སིའི་སྐད། ཝེ་ཏི་ནམ་གྱི་སྐད་སོགས་འཛམ་གླིང་གི་སྐད་ཡིག་མི་འདྲ་བ་ ༡༢ ཡི་ནང་འདུག
གསར་འགོད་པ། ཀླུ་མགོན་ཐར།
ཡག་པོ་བྱུང་།