སྔ་འགྱུར་རྙིང་མའི་སྨོན་ཆེན་མོའི་རྒྱུན་མི་ཆད་པའི་སླད་དུ་ལོ་རྗེས་མར་རྡོ་རྗེ་གདན་དུ་གནས་པའི་དགེ་འདུན་པ་བརྒྱ་མ་ཟིན་ཙམ་གྱིས་རྡོར་གདན་དུ་སྨོན་ལམ་འཚོག་རྒྱུ་ཡིན་འདུག
དེ་རིང་རྡོར་གདན་སྔ་འགྱུར་རྙིང་མའི་སྨོན་ལམ་ཆེན་མོའི་རྒྱུན་ལས་ནས་སྔ་འགྱུར་རྙིང་མའི་ཆོས་བརྒྱུད་འཛིན་པའི་དགོན་སྡེ་ཁག་གི་བསྟན་པའི་བདག་པོ་ྋསྐྱབས་རྗེ་རིན་པོ་ཆེ་རྣམ་པས་དབུས་འབྲེལ་ཡོད་འདུས་མང་ཡོངས་ལ་གསལ་བསྒྲགས་ཤིག་སྤེལ་ཏེ། ལོ་རྒྱུན་བཞིན་གནས་མཆོག་རྡོ་རྗེ་གདན་དུ་ཚོགས་སྲོལ་ཡོད་པའི་ཕྱི་ལོ་ ༢༠༢༠ ལོའི་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་ ༣༢ པ་དེ་ཏོག་དབྱིབས་གཉན་རིམས་འགོས་ཁྱབ་དང་འབྲེལ་ནས་ཕར་འགྱངས་བྱེད་དགོས་བྱུང་ཡོད་སྐོར་བསྒྲགས་འདུག
དགོན་པའི་གསལ་བསྒྲགས་ནང་། དེང་གི་ནད་ཡམས་གདུག་པ་ཅན་Covid19འདིས་འགྲོ་བའི་ཚེ་སྲོག་ལ་ཉེ་བར་འཚེ་བའི་དབང་གིས་རྒྱལ་སྤྱི་དང་། རྒྱལ་ནང་གི་ཕར་འགྲོ་ཚུར་འོང་དང་འདུ་འཛོམས་རིགས་སོགས་ལ་ཤིན་ཏུ་ཡིད་གཟབ་གནང་དགོས་པའི་དུས་འདིར། གནས་མཆོག་རྡོ་རྗེ་གདན་དུ་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་ ༣༢ པ་འཚོགས་རྒྱུ་ཕར་འགྱངས་མི་བྱེད་ཀ་མེད་དུ་གྱུར། ཞེས་འཁོད་འདུག
ཡང་གསལ་བསྒྲགས་ནང་། འདི་ལོར་རྡོར་གདན་དུ་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་ ༣༢ པ་ཚོགས་མ་ཐུབ་པར་བརྟེན། ལོ་རྗེས་མའི་ཟླ་ ༡ ཚེས་ ༡༤ ནས་ ༢༣ བར་གནས་མཆོག་རྡོ་རྗེ་གདན་གྱི་སྨོན་ལམ་ཆེན་མོའི་རྒྱུན་མི་ཆད་པའི་སླད་དུ་རྡོར་གདན་མཆོད་སྡོང་ཆེན་མོའི་ལྷོ་ཕྱོགས་བྱང་ཆུབ་ལྗོན་ཤིང་གི་མདུན་དུ་མཆོད་སྤྲིན་མཆོད་འབུལ་དང་། གནས་དེར་གནས་པའི་དགེ་འདུན་པ་བརྒྱ་ཕྲག་མ་ཟིན་ཙམ་ལ་སྨོན་ལམ་ཚོགས་པས་ཡོན་ཕུལ་ཏེ་སྨོན་ལམ་ཚོགས་གནང་རྒྱུ་ཡིན་པ་དང་། དེ་བཞིན། ཕྱི་ཟླ་ ༡ ཚེས་ ༢༡ དང་༢༢ དེ་བཞིན། ༢༣ བཅས་ཉིན་གྲངས་གསུམ་རིང་སྔ་འགྱུར་རྙིང་མའི་ཆོས་བརྒྱུད་འཛིན་པའི་དགོན་སྡེ་ཡོངས་ཀྱིས། ས་གནས་གཞུང་གི་ནད་ཡམས་སྔོན་འགོག་གི་ལམ་སྟོན་འོག་རང་དགོན་ནས་སྨོན་ལམ་ཚོགས་ཐབས་གནང་དགོས་སྐོར་སོགས་བརྗོད་འདུག
གསར་འགོད་པ། སྐལ་བཟང་སྦྱིན་པ།
