ཁ་སང་ཕྱི་ཚེས་ ༢༤ ཉིན་རྒྱ་གར་གྱི་ཧིན་རྡུ་གསར་ཁང་ (Hindustan Times) གི་རྩོམ་སྒྲིག་པའི་གཏམ་གྱི་ནང་། རྒྱ་གར་གཞུང་གིས་ཀྱང་ཨ་རི་གཞུང་ལྟར་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཐད་སྲིད་ཇུས་བཟུང་སྟེ། བོད་མི་མ་གཏོགས་རྒྱ་ནག་གཞུང་ལ་སྐུའི་ཡང་སྲིད་ཐོག་ཐག་གཅོད་ཀྱི་དབང་ཆ་མེད་པ་གསལ་པོ་བཟོ་དགོས་སྐོར་བཀོད་འདུག
རྩོམ་སྒྲིག་པའི་གཏམ་དེའི་ནང་། རྒྱ་གར་གཞུང་གིས་དུས་དང་འཚམ་པའི་སྲིད་ཇུས་ཤིག་བཟུང་སྟེ། གཞུང་འབྲེལ་གྱི་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་དང་རྒྱ་ནག་གི་ཕྱི་ཕྱོགས་ན་ཡོད་པའི་ཆོས་བརྒྱུད་ཁག་གི་དབུ་འཁྲིད་རྣམས་ལ་༧སྐུའི་ཡང་སྲིད་ཐོག་མཐའ་མའི་ཐག་གཅོད་ཀྱི་དབང་ཆ་ཡོད་པ་དང་། རྒྱ་གར་གཞུང་གིས་གྲངས་ཀ་མགྱོགས་མྱུར་ངང་ཆུང་དུ་འགྲོ་བཞིན་པའི་བཙན་བྱོལ་བོད་མིར་འཛིན་པའི་སྲིད་ཇུས་ལ་བསྐྱར་ཞིབ་དགོས་པ། དེ་བཞིན་སྲིད་གཞུང་གཞན་དང་མཉམ་དུ་ཡང་སྲིད་ཀྱི་སྲིད་ཇུས་ཐོག་མཉམ་འབྲེལ་དགོས་སྐོར་བཀོད་འདུག
ཉེ་ལམ་ཨ་རིའི་གྲོས་ཚོགས་ཀྱིས་ཕྱི་ལོ་ ༢༠༢༠ ལོའི་བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་འཆར་སྤྱི་མོས་ཀྱིས་གཏན་འབེབ་གནང་སྟེ། སྲིད་གཞུང་གཞན་གྱིས་ཀྱང་གཅིག་མཚུངས་ཀྱི་སྲིད་ཇུས་འཛིན་དགོས་པར་བསྐུལ་ཡོད་པ་དང་། དེ་ནི་ཨ་རི་གཞུང་གིས་རྒྱ་ནག་ཕྱོགས་ལ་ཧ་ཅང་མཁྲེགས་པའི་སྲིད་ཇུས་འཛིན་བཞིན་པ་གསལ་སྟོན་བྱས་པ་མ་ཟད། གོ་ལའི་ཐོག་༧གོང་ས་རྒྱ་མཆོག་གི་སྐུའི་ཡང་སྲིད་དང་འབྲེལ་འཐབ་རྩོད་ཅིག་བྱེད་བཞིན་པ་མཚོན་གྱི་ཡོད་སྐོར་དང་། དེ་བཞིན། མ་འོངས་པར་རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཐག་གཅོད་བྱེད་ངེས་པ་དང་། སྐབས་དེར་རང་ཉིད་ཀྱི་དཔལ་འབྱོར་དང་ཆབ་སྲིད་ཀྱི་དབང་ཤུགས་སྤྱད་དེ། སྲིད་གཞུང་གཞན་ལའང་རང་ཉིད་ཀྱི་ཡང་སྲིད་དེར་ངོས་འཛིན་ཞུ་རྒྱུའི་གནོན་ཤུགས་སྤྲོད་རྒྱུ་ཡིན་སྟབས། ཨ་རིའི་ཁྲིམས་འཆར་གསར་པ་དེ་ནི་༧སྐུའི་ཡང་སྲིད་དང་འབྲེལ་བའི་ཡང་དག་པའི་སྲིད་ཇུས་ཤིག་ཡིན་སྐོར་བཀོད་འདུག
དེ་བཞིན་གསར་ཁང་དེའི་རྩོམ་སྒྲིག་པས། རྒྱ་གར་གཞུང་གི་ལངས་ཕྱོགས་ནི་༧གོང་ས་མཆོག་ལ་སྣེ་ལེན་ཞུ་བ་དང་། བཙན་བྱོལ་བོད་གཞུང་དང་བོད་མི་བཙན་བྱོལ་བ་མང་ཤོས་ལ་གནས་ཚང་གཡར་ཡོད་པ་དང་། རྒྱ་གར་ནང་བོད་མིའི་མགོ་ཁྲིད་ཚོར་ཆབ་སྲིད་ཀྱི་ཐོག་ནས་རྒྱ་ནག་གཞུང་ལ་ལྟ་ཚུལ་མི་བརྗོད་པར་བསྐུལ་བཞིན་ཡོད་ནའང་། ཉེ་ལམ་ལ་དྭགས་སུ་རྒྱ་དཀར་ནག་གཉིས་ཀྱི་བར་ས་མཚམས་དཀའ་རྙོག་འབྱུང་སྐབས། རྒྱ་ནག་གཞུང་གིས་རྒྱ་གར་གྱི་བྱེད་བབས་དེ་དག་ལ་རྩིས་མེད་བྱེད་ཀྱི་ཡོད་པ་མཚོན་གྱི་ཡོད་སྟབས། ༧གོང་ས་མཆོག་གི་སྐུའི་ཡང་སྲིད་ཀྱི་གནད་དོན་ནི་རྒྱ་ནག་གཞུང་གི་གལ་གནད་ཆེ་བའི་གནད་དོན་ཞིག་དང་། རྒྱ་ནག་གི་སྣང་མེད་འཇོག་མི་སྲིད་པ་ཞིག་ཡིན་སྐོར་བཀོད་འདུག
ཟླ་འདིའི་ཕྱི་ཚེས་ ༢༢ ཉིན་ཨ་རིའི་གྲོས་ཚོགས་གོང་མའི་ནང་ཕྱི་ལོ་ ༢༠༢༠ ལོའི་བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་འཆར་སྤྱི་མོས་གཏན་འབེབས་བྱུང་ཡོད་པ་དང་། དེའི་ནང་ཨ་རི་གཞུང་གིས་བོད་ནང་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་སྲུང་སྐྱོབ། ༧གོང་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ངོས་འཛིན་ཞུ་རྒྱུའི་འགན་དབང་ནི་མགོན་པོ་གང་ཉིད་མཆོག་དང་བོད་མི་ཚོར་ཡོད་པ། དེ་བཞིན་གལ་སྲིད་རྒྱ་ནག་གཞུང་གིས་༧སྐུའི་ཡང་སྲིད་ངོས་འཛིན་གནང་ཕྱོགས་ལ་ཐེ་བྱུས་བྱས་ཚེ། འབྲེལ་ཡོད་དཔོན་རིགས་རྣམས་ཨ་རིའི་ནང་ཡོང་རྒྱུར་བཀག་འགོག་དང་ཉེས་ཆད་གཅོད་རྒྱུ་ཡིན་པ་དང་། བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཁང་འཛུགས་རྒྱུའི་ཆོག་མཆན་མ་གནང་བར་དུ་ཨ་རིའི་ནང་རྒྱ་ནག་གི་གཞུང་ཚབ་ཁང་གསར་པ་འཛུགས་རྒྱུའི་ཆོག་མཆན་གནང་མི་ཆོག་པ་སོགས་བཀོད་ཡོད་པ་རེད་ལ། མི་འགྱངས་བར་ཨ་རིའི་སྲིད་འཛིན་གྱིས་མཚན་རྟགས་བསྐྱོན་གནང་ཚེ་ཨ་རིའི་ཁྲིམས་སུ་འགྱུར་གྱི་ཡོད་པ་རེད།
གསར་འགོད་པ། ཀླུ་མགོན་ཐར།
ཝཻ དུས་བབ་ཚང་ རྒྱ་གར་དང་ཨ་རིའི་གཡོ་ངན་དཀྲུག་ཤིང་བཀོད་ཀྱི་སྡད་མ་སྡད།