སྲིད་འཛིན་ཊོམ་ཕུ་མཆོག་གིས་བོད་དོན་རྒྱབ་སྐྱོར་གྱི་ཁྲིམས་འཆར་ལ་མཚན་རྟགས་བསྐྱོན་ཏེ་༧གོང་ས་མཆོག་ཡང་སྲིད་ངོས་འཛིན་གྱི་འགན་དབང་གཙོས་པའི་ཆོས་དད་རང་དབང་དང་བོད་ཀྱི་ཆུ་དང་ཁོར་ཡུག་སོགས་བོད་དོན་ལ་རྒྱབ་སྐྱོར་སྔར་ལྷག་བྱེད་རྒྱུ་ཡིན་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་ཨ་རིའི་སྲིད་འཛིན་ཊོམ་ཕུ་མཆོག་གིས་རྩིས་ལོ་ ༢༠༢༡ ལོའི་ཨ་རིའི་སྔོན་རྩིས་ཁྲིམས་འཆར་ཁག་ལ་མཚན་རྟགས་བསྐྱོན་པ་དང་བསྟུན། ཨ་རིའི་སྔོན་རྩིས་ཀྱི་ཁོངས་སུ་མཉམ་སྦྱར་ཡོད་པའི་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དངོས་སུ་ཨ་རིའི་ཁྲིམས་ལ་བཟོས་ཡོད་པ་རེད།
གནས་ཚུལ་འདི་དང་འབྲེལ་ནས་སྲིད་སྐྱོང་བློ་བཟང་སེང་གེ་མཆོག་གིས། སྲིད་འཛིན་ཊོམ་ཕུ་མཆོག་གིས་བོད་དོན་རྒྱབ་སྐྱོར་གྱི་ཁྲིམས་འཆར་ལ་མཚན་རྟགས་བསྐྱོན་འདུག ༧གོང་ས་མཆོག་དང་བོད་མི་རྒན་རབས་པ་རྣམ་པ། དེ་བཞིན། བོད་ནང་གི་བོད་མི་ས་ཡ་དྲུག་གིས་སྐུ་ངལ་བསྐྱོན་པའི་བཀའ་དྲིན་ལ་བརྟེན་ནས། བོད་དོན་ཐོག་ལོ་རྒྱུས་རིང་བཞིན་ལྡན་པའི་ཁྲིམས་འཆར་ཞིག་གཏན་འབེབས་བྱུང་སོང་། ཞེས་གསུངས་འདུག
ཟླ་འདིའི་ཕྱི་ཚེས་ ༢༢ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཞོན་བུ་ཆུང་ཚེ་རིང་གཉིས་ཀྱིས། ཁྲིམས་འཆར་འདིའི་འཕེལ་རིམ་སྐོར་ལ་ངོ་སྤྲོད་གནང་སྐབས། རྒྱལ་སྤྱིའི་བོད་དོན་ལས་འགུལ་ཁང་དེ་ཕྱི་ལོ་ ༡༩༨༨ ལོ་ནས་༧གོང་ས་མཆོག་གི་བཀའ་དགོངས་དང་རླབས་ཆེན་གྱི་མཛད་པ་ཁག་སྒྲུབ་རྒྱུའི་ཆེད་དུ་བཙུགས་པ་དང་། དུས་དེ་ནས་བཟུང་ནས་༧གོང་ས་མཆོག་གི་སྐུ་ཚབ་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པའི་ཕྱག་ལས་ལ་གང་ཐུབ་ཀྱིས་རྒྱབ་སྐྱོར་ཞུས་ཡོད། འདས་པའི་ལོ་ཁ་ཤས་རིང་ཕྱི་ལོ་ ༢༠༠༢ ལོའི་བོད་ནང་འཛིན་པའི་ཁྲིམས་དང་ཕྱི་ལོ་ ༢༠༠༧ ལོར་༧གོང་ས་མཆོག་ལ་གསེར་གྱི་གཟེངས་རྟགས་འབུལ་བཞེས། དེ་བཞིན། ཕྱི་ལོ་ ༢༠༡༨ ལོར་བོད་ནང་འགྲོ་འོང་འདྲ་མཉམ་གྱི་སྲིད་བྱུས་དང་ཕྱི་ལོ་ ༢༠༢༠ ལོར་བོད་དོན་རྒྱབ་སྐྱོར་གྱི་སྲིད་བྱུས་སོགས་གཏན་འབེབས་བྱེད་ཐུབ་པ་བྱུང་ཡོད། དེ་ཚོ་ཚང་མ་ཨ་རིའི་བོད་དོན་རྒྱབ་སྐྱོར་བ་དང་ཨ་རིའི་ནང་འཕེལ་བཞིན་པའི་བོད་རིགས་སྤྱི་མཐུན་ཚོགས་པ་ཁག་ཚང་མས་སྐུ་ལས་བསྐྱོན་པའི་ཐུན་མོང་གི་གྲུབ་འབྲས་ཤིག་ལ་ངོས་འཛིན་བྱེད་དགོས་ཡོད། ཅེས་དང་། ཁྲིམས་འདིའི་ཐོག་ནས་བོད་ནང་གི་ཆོས་དད་རང་དབང་དང་༧གོང་ས་མཆོག་གི་ཡང་སྲིད་སོགས་ཨ་རིའི་ཁྲིམས་ལ་བཟོས་ཏེ། ༧གོང་ས་མཆོག་གི་བཀའ་དགོངས་ལྟར་གནང་གི་ཡོད་སྐོར་དང་། དེ་བཞིན་བོད་ཀྱི་ཆུ་བོ་ཁག་དང་ཁོར་ཡུག་སྲུང་སྐྱོབ་བྱ་རྒྱུའི་སྲིད་བྱུས་སོགས་ཁྲིམས་དེའི་ནང་གསལ་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༢༢ ཉིན་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་འཆར་ཞེས་པ་ཨ་རིའི་གྲོས་ཚོགས་ནང་ཚད་མཐོའི་རྒྱབ་སྐྱོར་ཐོབ་སྟེ་གཏན་འབེབ་བྱུང་ཡོད་པ་དང་། ཤོག་ངོས་ ༢༡ ཅན་གྱི་ཁྲིམས་ཡིག་དེའི་ནང་༧གོང་ས་མཆོག་གི་སྐུའི་ཡང་སྲིད་ངོས་འཛིན་བྱ་རྒྱུའི་འགན་དབང་མགོན་པོ་གང་ཉིད་མཆོག་དང་བོད་མི་ཚོར་ཡོད་པ་དང་། བོད་བརྒྱུད་ནང་བསྟན་གྱི་བླ་སྤྲུལ་འདེམས་སྲོལ་སྔར་རྒྱུན་བཞིན་བོད་མི་དང་། མགོན་པོ་གང་ཉིད་མཆོག་གི་ལམ་སྟོན་གཞིར་བཟུང་བྱ་རྒྱུ་ལས་རྒྱ་ནག་གཞུང་གིས་ཐེ་གཏོགས་བྱས་མི་ཆོག་པ་དང་། རྒྱ་ནག་གི་མགོ་འཁྲིད་སུ་ཞིག་གིས་༧གོང་ས་མཆོག་གི་ཡང་སྲིད་བསྐོ་བཞག་གི་བྱ་སྤྱོད་སྤེལ་ཚེ། ཨ་རིའི་གཞུང་ནས་ཁོ་ཚོའི་རྒྱུ་དངོས་དང་ཨ་རིར་ཡོང་རྒྱུ་བཀག་འགོག་བྱ་རྒྱུ་མ་ཟད། རྒྱ་ནག་གཞུང་གིས་༧གོང་ས་མཆོག་གི་ཡང་སྲིད་ལ་ཐེ་གཏོགས་བྱ་རྒྱུ་མཚམས་འཇོག་དང་བོད་མི་ཚོས་༧གོང་ས་མཆོག་གི་ཡང་སྲིད་འདེམས་སྒྲུག་གི་རང་དབང་སྲུང་སྐྱོབ་སླད་ཨ་རིའི་གཞུང་གིས་རྒྱལ་སྤྱིའི་རྒྱབ་སྐྱོར་འཐོབ་ཐབས་བྱ་རྒྱུ་ཡིན་པ་རེད།
དེ་བཞིན། བོད་རྒྱ་འབྲེལ་མོལ་ཡོང་ཐབས་དང་། བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཡན་ལག་མ་བཙུགས་གོང་ཨ་རིར་རྒྱ་ནག་གཞུང་ཚབ་ཡན་ལག་གསར་པ་འཛུགས་མི་ཆོག་པ་དང་། བོད་མིའི་སྒྲིག་འཛུགས་ཀྱི་འཛིན་སྐྱོང་དང་འབྲེལ། བོད་ཕྱི་ནང་གཉིས་ལ་དཔལ་འབྱོར་རོགས་དངུལ་གྱི་སྔོན་རྩིས་དང་། སློབ་ཡོན་རོགས་དངུལ་སོགས་ཕྱི་ལོ་ ༢༠༢༥ བར་གཏན་འབེབས་གནང་འདུག་པ་མ་ཟད། བོད་ཀྱི་ཆུ་དང་ཁོར་ཡུག་སྲུང་སྐྱོབ་དང་དམངས་གཙོའི་ལམ་སྲོལ་ལས་གྲུབ་པའི་བོད་མིའི་སྒྲིག་འཛུགས་ནི་བོད་མིའི་སྒྲིག་འཛུགས་ལ་ངོས་འཛིན་བྱ་རྒྱུ་ཡིན་པའི་དོན་ཚན་གསར་པ་གཉིས་ཁ་སྣོན་བྱས་ཡོད་པ་རེད།
སྤྱིར་བཏང་ཕྱི་ལོ་ ༢༠༢༠ ལོའི་བོད་དོན་རྒྱབ་སྐྱོར་གྱི་སྲིད་བྱུས་དེ་འདས་ལོའི་ཕྱི་ཟླ་ ༩ ཚེས་ ༡༣ ཉིན་ཐོག་མར་ཨ་རིའི་གྲོས་ཚོགས་འཐུས་མི་ཇིམ་སི་མེག་གྷོ་ཝན་(James McGovern) ལགས་ཀྱིས་བཏོན་གནང་ཞིང་། འདི་ལོའི་ཕྱི་ཟླ་ ༥ ཚེས་ ༢༡ ཉིན་འོག་མའི་ནང་རྒྱབ་སྐྱོར་ཐོབ་ཡོད་ནའང་། རྒྱ་ནག་གི་ཏོག་དབྱིབས་གཉན་རིམས་རྐྱེན་བྱས་ཏེ། ཟླ་འདིའི་ཕྱི་ཚེས་ ༢༢ བར་གྲོས་ཚོགས་གོང་མའི་ནང་གཏན་འབེབ་བྱེད་ཐུབ་མེད་པ་རེད།
གསར་འགོད་པ། སྐལ་བཟང་སྦྱིན་པ།
