རྒྱ་ཡིག་རྩོམ་པ་པོ་སངས་རྒྱས་སྐྱབས་ལགས་ལ་བསམ་བློ་བརྗེ་རེས་ཀྱི་གཟེངས་རྟཊ་ཐོབ།

ཁ་སང་ཕྱི་ཚེས་ ༡ ཉིན་རྩོམ་པ་པོ་སངས་རྒྱས་སྐྱབས་ལགས་ཀྱི་རྩོམ་ཡིག་གཅེས་བསྡུས་དུར་ཁྲོད་ཅེས་པའི་དེབ་ལ་ཨོ་གླིང་དུ་རྟེན་གཞི་བྱས་ཡོད་པའི་རྒྱ་བོད་དམངས་ཁྲོད་བསམ་བློ་བརྗེ་རེས་འཕེལ་རྒྱས་ཚོགས་པས་རྒྱ་བོད་དམངས་ཁྲོད་བསམ་བློ་བརྗེ་རེས་གཟེངས་རྟགས་ཐེངས་དགུ་པ་སྤྲད་འདུགརྒྱ་བོད་དམངས་ཁྲོད་བསམ་བློ་བརྗེ་རེས་འཕེལ་རྒྱས་ཚོགས་པའི་གསལ་བསྒྲགས་ནང་། འདས་པའི་མི་ལོ་ ༢༠ ལྷག་གི་རིང་སངས་རྒྱས་སྐྱབས་ལགས་ཀྱིས་བོད་ཀྱི་རང་དབང་དང་དམངས་གཙོའི་འཐབ་རྩོད་ཆེད། རྒྱ་བོད་དམངས་ཁྲོད་བསམ་བློ་བརྗེ་རེས་འཕེལ་རྒྱས་ཚོགས་པའི་དགོས་དམིགས་དང་མཐུན་པར་ལྷག་བསམ་ཟོལ་མེད་ཀྱིས་ཞབས་འདེགས་ཞུས་པར་བརྟེན་གཟེངས་རྟགས་དེ་སྤྲད་པ་ཡིན་ལ། གཟེངས་རྟགས་དེར་ཨོ་སྒོར་སུམ་སྟོང་གནང་ཡོད་པ་བཀོད་འདུག

གཟེངས་རྟགས་དེ་དང་འབྲེལ་སངས་རྒྱས་སྐྱབས་ལགས་ཀྱིས། གཟེངས་རྟགས་དེ་ཐོབ་པར་དགའ་བོ་བྱུང་བ་དང་། རྒྱ་ནག་གཞུང་གིས་བོད་ཀྱི་ལོ་རྒྱུས་དངོས་ལ་འཁྱོག་བརྗོད་བྱེད་བཞིན་པར་བརྟེན། རྒྱ་རིགས་ཕལ་མོ་ཆེའི་སེམས་སུ་བོད་ནི་ཞིང་བྲན་དང་ལོག་སྤྱོད་པ་ཞིག་ཡིན་པའི་ངོས་འཛིན་ལས་མེད་སྟབས། བཙན་བྱོལ་གྱི་མི་ལོ་ ༢༡ ཙམ་གྱི་རིང་བོད་ཀྱི་ལོ་རྒྱུས་དང་ཆོས་རིག ད་ལྟའི་གནས་སྟངས། ལྷག་པར་དུ་ད་ལྟའི་བོད་ནང་གི་གནས་སྟངས་དང་བོད་མི་ཚོའི་མངོན་འདོད་རྣམས་རྒྱ་རིགས་ཚོར་ངོ་སྤྲོད་བྱེད་པར་ཟིན་བྲིས་དང་སྤྱི་ཚོགས་དྲ་ལམ་སོགས་བརྒྱུད་འབད་བརྩོན་བྱས་ཡོད་པ་དང་། རྩོམ་ཡིག་གཅེས་བསྡུས་དུར་ཁྲོད་ཅེས་པའི་དེབ་ནི་དེའི་ཁྲོད་ཀྱི་གཅིག་ཡིནལཔ། དེ་བཞིན་རྒྱ་རིགས་རྩོམ་པ་པོ་དང་མཁས་དབང་། འགྲོ་བ་མིའི་ཐོབ་ཐང་འཐབ་རྩོད་པ་སོགས་དང་ལྷན་བསམ་བློ་བརྗེ་རེས་རིམ་པ་བྱས་པ་ལ་བརྟེན། བོད་དོན་ལ་ཤ་ཚ་མཁན་མུ་མཐུད་མང་དུ་འགྲོ་བཞིན་ཡོད་པ་དང་། བོད་ལ་བཟུང་བའི་ལྟ་ཚུལ་འགྱུར་ཏེ་བོད་དོན་ལ་རྒྱབ་སྐྱོར་བྱེད་མཁན་ཀྱང་འབྱུང་གི་ཡོད་སྐོར་བརྗོད་འདུག

སངས་རྒྱས་སྐྱབས་ལགས་ནི་ཕྱི་ལོ་ ༡༩༩༨ ལོར་ནུབ་བྱང་མི་རིགས་སློབ་གྲྭ་ཆེན་མོ་ནས་སློབ་མཐར་ཕྱིན་པ་དང་། ཕྱི་ལོ་ ༡༩༩༩ ལོར་རྒྱ་གར་དུ་བཙན་བྱོལ་དུ་འབྱོར་ཞིང་། ཕྱི་ལོ་ ༢༠༠༠ ནས་ ༢༠༡༤ ལོ་བར་དུ་བོད་མིའི་སྒྲིག་འཛུགས་ཕྱི་དྲིལ་རྒྱ་ཡིག་སྡེ་ཚན་དུ་ཡིག་བསྒྱུར་བ་དང་གསར་འགོད་པ། སྤྱི་ཁྱབ་རྩོམ་སྒྲིག་པ་དང་ཕྱི་དྲིལ་རྒྱ་ཡིག་ཚན་པའི་མགྲིན་ཚབ་པ་སོགས་ཀྱི་ཕྱག་ལས་གནང་། ཁོང་གིས་ཚགས་པར་དང་དྲ་རྒྱ་འདྲ་མིན་ཐོག་བོད་དོན་དང་འབྲེལ་བའི་རྩོམ་ཡིག་བརྒྱ་ལྷག་འགྲེམས་སྤེལ་དང་། ཕྱི་ལོ་ ༢༠༡༥ ལོ་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་རྒན་པ་དང་ཡིག་བསྒྱུར་བ། རྩོམ་སྒྲིག་པ་བཅས་ཀྱི་འགན་འཁུར་གྱི་ཡོད་པ་རེད། ཕྱི་ལོ ༢༠༡༦ ལོར་ཁོང་གི་རྩོམ་ཡིག་གཅེས་བསྡུས་དུར་ཁྲོད་ཅེས་པ་དེབ་གཟུགས་སུ་དཔར་བསྐྲུན་གནང་། ཁོང་གིས་རྒྱལ་ཁབ་འདྲ་མིན་ནང་བོད་དོན་མཁས་པའི་བགྲོ་གླེང་ནང་མཉམ་ཞུགས་དང་གོ་སྒྲིག་ཞུས་ཡོད་པ་དང་། ད་ལྟ་སི་པན་རྒྱལ་ཁབ་ནང་རང་དབང་གི་རྩོམ་འབྲིའི་ལས་ལ་འབད་བཞིན་ཡོད་འདུག

གསར་འགོད་པ། ཀླུ་མགོན་ཐར།