རྣམ་པ་གསར་བའི་ཏོག་དབྱིབས་ནད་འབུ་འགོས་ཁྱབ་ཀྱི་དཀའ་ངལ་འོག་དབྱིན་ཡུལ་གྱི་སློབ་གྲྭ་ཁག་སྒོ་བརྒྱབ་སྟེ་མི་མང་ཡོངས་ཁྱིམ་སྡོད་བྱ་དགོས་འཁེལ་གྱི་ཡོད་པ་རེད། 
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ནས་དབྱིན་ཡུལ་གཞུང་གིས་ཏོག་དབྱིབས་གཉན་རིམས་འགོས་ཁྱབ་ཤུགས་ཆེན་བྱུང་བའི་དཀའ་ངལ་འོག རྒྱལ་ཁོངས་ཀྱི་མཐོ་སློབ་དང་སློབ་གྲྭ་ཁག་ཡོངས་སྒོ་རྒྱག་གི་ཡོད་པ་དང་སང་ཉིན་ནས་མི་མང་ཡོངས་ཕྱི་ཟླ་ ༢ པའི་ཟླ་དཀྱིལ་བར་དུ་ཁྱིམ་སྡོད་བྱེད་དགོས་པའི་བཀའ་རྒྱ་བཏང་འདུག་ལ། འཆར་ཅན་ལོ་རེའི་དབྱར་ཁར་ཡིག་རྒྱུགས་གཏོང་སྲོལ་ཡོད་པའི་འདི་ལོའི་རྒྱལ་ཡོངས་ཡིག་རྒྱུགས་ཆེན་མོ་ལོ་མཇུག་ཏུ་གཏང་འཆར་བྱས་ཡོད་པ་རེད།
ཐེངས་འདིའི་ཁྱིམ་སྡོད་བཀའ་རྒྱ་གཏོང་དགོས་དོན་གཙོ་བོ་ནི། འདས་ལོའི་ཕྱི་ཟླ་ ༡༢ ཚེས་ ༢༡ ཉིན་ནས་དབྱིན་ཡུལ་ནང་རྣམ་པ་མི་འདྲ་བའི་ཏོག་དབྱིབས་གཉན་རིམས་ཀྱི་ནད་འབུ་ཞིག་ངོས་འཛིན་བྱུང་སྟེ། ད་བར་དབྱིན་ཡུལ་ནང་གི་ཉིན་རེའི་ཏོག་དབྱིབས་ནད་པའི་གྲངས་འབོར་ལྡབ་གཅིག་ཙམ་ཡར་འཕར་ཞིང་ནད་པའི་བརྒྱ་ཆ་ ༦༠ ནི་རྣམ་པ་གསར་པའི་ཏོག་དབྱིབས་འབུ་ཕྲ་དེ་ཡིན་འདུག
དབྱིན་ཡུལ་གྱི་སྲིད་བློན་བྷོ་རི་སེ་ཇོན་སོན་ (Boris Johnson) ལགས་ཀྱིས། དབྱིན་ཡུལ་མི་མང་གིས་ཁྱིམ་སྡོད་བཀའ་རྒྱ་དེ་ལག་བསྟར་བྱ་དགོས་པ་དང་། སྤྱི་དམངས་ཁྲོད་ཀྱི་གལ་གནད་ཆེ་བའི་ཚོགས་སྡེ་བཞི་ལ་ཟླ་རྗེས་མའི་ཟླ་དཀྱིལ་ཙམ་ལ་ཏོག་དབྱིབས་སྨན་ཁབ་ཐོག་མར་རྒྱག་ཐུབ་ཐབས་བྱ་རྒྱུ་ཡིན་སྐོར་བརྗོད་ཡོད་པ་དང་། ཚོགས་སྡེ་ཁག་བཞི་ནི། ལྟ་སྐྱོང་འོག་གནས་པའི་མི་མང་དང་། ལོ་ ༧༠ ཡན་གྱི་རྒན་གོག དེ་བཞིན་སྤྱི་ཚོགས་ཞབས་ཞུའི་རིགས་དང་སྨན་པ་སྨན་ཞབས་བཅས་ཡིན་པ་རེད།
དེ་མཚུངས་བཞིན། དེ་རིང་སི་ཁོ་ཊི་ལན་ཌི་གཞུང་གིས། ཏོག་དབྱིབས་ནད་འབུ་གསར་བ་ཁྱབ་བརྡལ་གྱི་གནས་སྟངས་འོག་རྒྱལ་ཡོངས་ཁྱིམ་སྡོད་བཀའ་རྒྱ་བཏང་ཞིང་། སི་ཁོ་ཊི་ལན་ཌིའི་སྲིད་བློན་ནེ་ཁའོ་ལ་ (Nicola Sturgeon) ལགས་ཀྱིས། དེ་རིང་མཚན་དཀྱིལ་ནས་རྣམ་པ་གསར་བའི་ཏོག་ནད་འགོས་ཁྱབ་ཚོད་འཛིན་སླད་ཁྱིམ་སྡོད་བཀའ་རྒྱ་བཏང་བ་ཡིན། མི་མང་གིས་རང་ཁྱིམ་དུ་བསྡད་ནས་ལས་ཀ་བྱ་དགོས་ཡོད། ཅེས་བརྗོད་ཡོད་པ་རེད།
བྷི་བྷི་སི་གསར་ཁང་གི་གནས་ཚུལ་ལྟར་ན། དབྱིན་ཡུལ་ཁོངས་གཏོགས་ཀྱི་རྒྱལ་ཁབ་ཝ་ལི་སིའི་ (Wales) ནང་སློབ་གྲྭ་ཁག་ཕྱི་ཟླ་ ༡ ཚེས་ ༡༨ བར་སྒོ་རྒྱག་གི་ཡོད་པ་དང་། སློབ་ཕྲུག་ཚོས་དྲ་ལམ་ནས་སྦྱོང་བ་བྱེད་དགོས་པའི་འབོད་སྐུལ་ཞུས་ཡོད་འདུག་པ་དང་། དེ་བཞིན་ཨ་རི་ལན་ཌའི་ (Northern Ireland)ནང་གི་དྲ་ཐོག་སློབ་ཁྲིད་མུ་མཐུད་གནང་རྒྱུ་དང་། མི་མང་ཁྱིམ་སྡོད་བྱེད་དགོས་པའི་བཀའ་ཁྱབ་བཏང་ཡོད་པ་རེད་ལ། ཁ་སང་གཅིག་པུར་ཨ་རི་ལན་ཌའི་ནང་ཏོག་དབྱིབས་གཉན་རིམས་ཕོག་པའི་མི་གྲངས་ ༡༨༠༡ དང་རྐྱེན་འདས་སུ་ཕྱིན་པའི་མི་གྲངས་ ༡༢ བྱུང་ཡོད་པ་དང་། སྲིད་བློན་ཨར་ལི་ནེ་ (Arlene Foster) ལགས་ཀྱིས། ཁྱིམ་སྡོད་བཀའ་རྒྱ་མི་གཏོང་ཐབས་མེད་བྱུང་སོང་། ཞེས་བརྗོད་ཡོད་པ་རེད།
ད་བར་དུ་དབྱིན་ཡུལ་དུ་ཏོག་དབྱིབས་ནད་རྟགས་ཐོན་པའི་མི་གྲངས་ས་ཡ་ ༢།༣༤ དང་རྐྱེན་འདས་སུ་ཕྱིན་པའི་མི་གྲངས་སྟོང་ཕྲག་ ༦༥༨༤༢ རེད་འདུག སི་ཀོ་ལན་ཌི་ལ་ཏོག་དབྱིབས་ནད་རྟགས་ཐོན་པའི་མི་གྲངས་སྟོང་ཕྲག་ ༡༣༦ དང་རྐྱེན་འདས་སུ་ཕྱིན་པའི་མི་གྲངས་ ༤༥༧༨ བྱུང་ཡོད་འདུག་ལ། འཛམ་གླིང་ཡོངས་ནང་ཏོག་དབྱིབས་ནད་རྟགས་ཐོན་པའི་མི་གྲངས་ས་ཡ་ ༨༥།༧ དང་རྐྱེན་འདས་སུ་ཕྱིན་པའི་མི་གྲངས་ས་ཡ་ ༡།༨༥། དེ་བཞིན་དྲག་སྐྱེད་བྱུང་བའི་མི་གྲངས་ས་ཡ་ ༤༨།༢ བྱུང་ཡོད་པ་རེད།
བསྟན་འཛིན་ཕུར་བུ།
