ཏོག་དབྱིབས་ཞིབ་འཇུག་ཚོགས་ཆུང་རྒྱ་ནག་ནང་བསྐྱོད་རྒྱུ་ཡིན་འདུག

རྒྱ་ནག་འཕྲོད་བསྟེན་ལྷན་ཁང་དང་མཉམ་འབྲེལ་གྱིས་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཏོག་དབྱིབས་ཞིབ་འཇུག་ཚོགས་ཆུང་གིས་གྲོང་ཁྱེར་ཝུ་ཧན་ནང་ཏོག་དབྱིབས་ཀྱི་འབྱུང་ཁུངས་རྩད་ཞིབ་བྱ་རྒྱུ་ཡིན་པ་རེད།

ཁ་སང་རྒྱ་ནག་གཞུང་གིས་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཞིབ་འཇུག་ཚོགས་ཆུང་རྒྱ་ནག་ནང་བསྐྱོད་རྒྱུར་ཆོག་མཆན་སྤྲད་ཡོད་པ་དང་། ཐེངས་འདིའི་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཞིབ་འཇུག་ལས་དོན་དེ་རྒྱ་ནག་འཕྲོད་བསྟེན་ལྷན་ཁང་དང་མཉམ་འབྲེལ་ཐོག་ནས་བྱ་གཏན་འཁེལ་ཡོད་པ་མ་ཟད། རྒྱ་ནག་དང་འཕྲོད་བསྟེན་སྒྲིག་འཛུགས་བར་གྲོས་བསྡུར་རིམ་པ་བྱས་ཏེ། ཞིབ་འཇུག་ཚོགས་ཆུང་དེ་ཏོག་དབྱིབས་གཉན་རིམས་ཐོག་མར་བྱུང་སའི་གྲོང་ཁྱེར་ཝུ་ཧན་ནང་འགྲོ་བཅུག་རྒྱུ་ཡིན་སྐོར་སོགས་བརྗོད་འདུག

དེ་འབྲེལ་ཐད་རྒྱ་ནག་འཕྲོད་བསྟེན་ལྷན་ཁང་གིས། ཟླ་འདིའི་ཕྱི་ཚེས་ ༡༤ ཉིན་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཞིབ་འཇུག་ཚོགས་ཆུང་ཞིག་རྒྱ་ནག་ནང་ཡོང་སྟེ་ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་ཞིབ་བྱ་རྒྱུ་རེད། ཅེས་བརྗོད་ཡོད་པ་དང་། རྒྱ་ནག་འཕྲོད་བསྟེན་ལྷན་ཁང་གི་འགན་འཛིན་གཞོན་པ་ཀྲང་ཡེ་ཤིན་ (Zeng Yixin) གྱིས། རྒྱ་ནག་གཞུང་དང་འཕྲོད་བསྟེན་སྒྲིག་འཛུགས་བར་བརྙན་ལམ་ཚོགས་འདུ་ཐེངས་ ༤ རིང་འཚོགས་ཏེ། ད་རེས་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཞིབ་འཇུག་ཚོགས་ཆུང་རྒྱ་ནག་ནང་བསྐྱོད་གཏན་འཁེལ་བ་དང་། དམིགས་བསལ་གྲོང་ཁྱེར་ཝོ་ཧན་ནང་ཏོག་དབྱིབས་ཀྱི་འབྱུང་ཁུངས་བརྩད་ཞིབ་བྱ་བར་ཕྱོགས་གཉིས་ནས་གྲོས་མཐུན་བཞག་ཡོད་སྐོར་བརྗོད་འདུག

རྒྱ་གར་གྱི་དཔལ་འབྱོར་དུས་བབ་ཀྱི་གནས་ཚུལ་ནང་། ཐེངས་འདིའི་ཞིབ་འཇུག་ཚོགས་ཆུང་དེར་ནད་ཡམས་དང་འབྲེལ་བའི་ཆེད་མཁས་ཞིབ་འཇུག་པ་སོགས་ཁྱོན་མི་གྲངས་ ༡༠ ཡོད་པ་དང་། ཉེ་སྔོན་ཕྱི་ཚེས་ ༦ ཉིན་རྒྱ་ནག་གིས་འཕྲོད་བསྟེན་སྒྲིག་འཛུགས་ཀྱི་ཞིབ་འཇུག་ཚོགས་ཆུང་བཀག་འགོག་བྱས་ཏེ། ད་བར་ཕྱོགས་གཉིས་ནས་གྲོས་བསྡུར་གྱིས། འཆར་གཞི་ལྡན་པའི་ཐོག་ནས་ཐེངས་འདིའི་ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་ཞིབ་ཀྱི་ལས་དོན་ཕན་ཚུན་མཉམ་འབྲེལ་གྱིས་བྱ་གཏན་འཁེལ་ཡོད་སྟབས། མཇུག་འབྲས་ཁ་གསལ་ཞིག་ཡོང་རྒྱུ་ཁག་པོ་ཡིན་པ་དང་འཕྲོད་བསྟེན་སྒྲིག་འཛུགས་ཀྱི་འགན་འཛིན་དྷི་རོ་སི་ཨ་དྷི་ནོམ་ (Tedros Adhanom) ནི་རྒྱ་ནག་ལ་འབྲེལ་འདྲིས་ཆེ་བའི་མི་ཞིག་ཡིན་སྐོར་སོགས་བརྗོད་འདུག

ཉེ་སྔོན་ཕྱི་ཚེས་ ༦ ཉིན་རྒྱ་ནག་གཞུང་གིས་འཕྲོད་བསྟེན་སྒྲིག་འཛུགས་ཀྱི་ཚོགས་ཆུང་རྒྱ་ནག་ནང་བསྐྱོད་རྒྱུར་ཆོག་མཆན་སྤྲད་མེད་སྟབས། སྐབས་དེར་འཕྲོད་བསྟེན་སྒྲིག་འཛུགས་ཀྱི་འགན་འཛིན་དྷི་རོ་སི་ཨ་དྷི་ནོམ་ (Tedros Adhanom) གྱིས། རྒྱ་ནག་གཞུང་གི་བྱེད་ཕྱོགས་དེར་བློ་ཕམ་ཆེན་པོ་ཡོད་པའི་སྐྱོན་བརྗོད་བྱས་ཡོད་པ་དང་། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་མ་ཧྭ་ཁྲིན་ཡེན་ (Hua Chunying) གྱིས། རྒྱ་ནག་ནི་དུས་རྟག་ཏུ་གུ་ཡངས་དང་ཕྱི་གསལ་ནང་གསལ། ཚན་རིག་དང་མཐུན་པའི་འཕྲོད་བསྟེན་སྒྲིག་འཛུགས་ཀྱི་ཞིབ་འཇུག་ལ་འགན་ལེན་བྱེད་མཁན་ཞིག་ཡིན་པས། སྐབས་དེར་ཕྱོགས་གཉིས་བར་གོ་ནོར་ཐེབས་ཡོད་པའི་ལན་འདེབས་བྱས་ཡོད་པ་རེད།

འདས་ལོའི་ཕྱི་ཟླ་ ༤ ནང་རྒྱལ་ཚོགས་ཀྱི་འཛམ་གླིང་འཕྲོད་བསྟེན་ལྷན་ཚོགས་ཀྱི་ཁོངས་གཏོགས་འཛམ་གླིང་རྒྱལ་ཁབ་ ༡༩༤ ནས་ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་ཞིབ་སླད། རང་དབང་ལྡན་པའི་ཞིབ་འཇུག་ཚོགས་ཆུང་ཞིག་འཛུགས་དགོས་པའི་དགོས་འདུན་བཏོན་པ་ལྟར། འཕྲོད་བསྟེན་སྒྲིག་འཛུགས་ཀྱིས་འགན་འཁུར་བའི་ཐོག་ཏོག་ནད་ཀྱི་འབྱུང་ཁུངས་དང་མིའི་རིགས་ལ་འགོས་ཁྱབ་ཇི་ལྟར་བྱུང་བ། དེ་བཞིན། འཕྲོད་བསྟེན་སྒྲིག་འཛུགས་ནས་ཏོག་ནད་ཐད་འགན་འཁུར་དང་ལག་བསྟར་གང་བྱས་སོགས་ལ་རྩད་ཞིབ་བྱེད་པའི་གཏན་འབེབས་བྱས་ཡོད་པ་རེད།

གསར་འགོད་པ། སྐལ་བཟང་སྦྱིན་པ།