དེ་རིང་སྔ་དྲོའི་ཆུ་ཚོད་ ༩།༣༠ ཐོག་བོད་ཀྱི་སྨན་རྩིས་ཁང་གི་མཐོ་སློབ་ཚོགས་ཁང་དུ། སྨན་རྩིས་ཁང་གི་ངོས་ནས་ཕྱི་མི་རྣམས་ལ་དུས་ཡུན་ལོ་ ༦ རིང་སྨན་རྩིས་བཀའ་བཅུ་པའི་སློབ་གཉེར་གནང་བའི་ལས་གཞི་ཞིག་མགོ་འཛུགས་ཀྱི་མཛད་སྒོ་སྟབས་བདེ་ཞིག་བསྡུས་སོང་།
མཛད་སྒོའི་སྟེང་འགན་འཛིན་བཀྲ་ཤིས་ཚེ་རིང་ལགས་ཀྱིས། སྤྱིར་སྨན་རྩིས་ཁང་ངོས་ནས་གཙོ་བོ་བོད་ཕྲུག་རྣམས་ལ་གསོ་བ་རིག་པ་སློབ་གཉེར་གི་མཐུན་རྐྱེན་སྦྱོར་གྱི་ཡོད་ཀྱང་། དེ་དང་ལྷན་དུ་ལོ་རེར་རྒྱ་གར་གྱི་ཧི་མ་ལ་ཡའི་རི་བརྒྱུད་ཁུལ་གྱི་སློབ་ཕྲུག་གཉིས་ལ་ཟུར་དུ་དམིགས་བསལ་རྐུབ་བཀྱག་གཉིས་བཞག་ཡོད་པས། ད་བར་དེའི་ཁུལ་ནས་ཡིན་པའི་སློབ་ཕྲུག་ ༢༢ སྨན་རྩིས་ཁང་ནས་མཐར་ཕྱིན་ཡོད་སྐོར་དང་། ད་ཐེངས་ཀྱི་ཕྱི་མི་ལ་གསོ་བ་རིག་པ་སློབ་འཁྲིད་བྱ་རྒྱུའི་ལས་གཞི་དེ་ནི་༧གོང་ས་རྒྱལ་བ་རིན་པོ་ཆེ་མཆོག་ནས་ཕྱི་ལོ་ ༡༩༦༡ ལོར། ད་ལྟ་སྨན་རྩིས་ཁང་ལ་མི་ཆ་དང་དཔལ་འབྱོར་གྱི་ཐོག་ནས་ཉག་ཕྲ་བར་གྱུར་ཡོད་ཀྱང་། ལོ་ངོ་ ༤༠ ལྷག་གི་རྗེས་ནས་བོད་ཀྱི་གསོ་བ་རིག་པ་དེ་ཉིད་གོང་འཕེལ་དུ་འགྲོ་ངེས་ཡིན་སྐོར་གྱི་བཀའ་སློབ་དེ་ཉིད་མངོན་སུམ་དུ་གྱུར་བའི་བདེན་དཔང་ཞིག་ཡིན་སྐོར་འགྲེལ་བརྗོད་གནང་སོང་།
ཡང་ཁོང་གིས་འགྲེལ་བརྗོད་གནང་བ་ལྟར་ན། བཞུགས་སྒར་དྷ་སའི་སྨན་རྩིས་མཐོ་སློབ་ཀྱི་སློབ་མ་རྣམས་རྒྱ་གར་ལྷོ་ཕྱོགས་བྷེང་ལོང་དུ་གསར་འཛུགས་བྱས་པའི་སྨན་རྩིས་མཐོ་སློབ་ཏུ་སྤོས་ཟིན་པ་ལྟར། དྷ་སའི་མཐོ་སློབ་ཏུ་གསོ་བ་རིག་པར་དོན་གཉེར་ཡོད་པའི་ཕྱི་མི་རྣམས་ལ་བཀའ་བཅུ་པའི་ལག་འཁྱེར་ཐོག་སྨན་རྩིས་སློབ་འཁྲིད་བྱ་རྒྱུ་ཡིན་པ་དང་། ལས་གཞི་འདིར་རྒྱ་གར་དང་། ཨུ་རུ་སུ། སོག་པོ། ཁལ་མིག ཐུ་ཝ། ཨ་རི། ཀེར་གྷི་སི་ཐན། ཡུ་ཁེ་རེན་བཅས་ནས་སློབ་ཕྲུག་གྲངས་ ༣༢ གྱིས་འཚང་སྙན་ཕུལ་ཡོད་ཀྱང་། མཐར་སློབ་ཕྲུག་ ༢༧ སློབ་ཞུགས་བྱས་ཐུབ་ཡོད་ཅིང་། སློབ་ཕྲུག་དེ་དག་ཁྲོད་ཕལ་ཆེ་བས་སཱ་ར་མཐོ་སློབ་སོགས་ནས་བོད་ཀྱི་སྐད་ཡིག་ཐོག་སློབ་གཉེར་བྱས་མྱོང་འདུག་ཀྱང་། སྐོར་ཞིག་ལ་བོད་ཡིག་གི་རྨང་གཞི་ཙམ་ཡང་མེད་ཅིང་། བཀའ་བཅུ་པའི་བསླབ་གཞི་རྣམས་བོད་ཡིག་ཐོག་འཁྲིད་རྒྱུ་ཡིན་སྟབས། སློབ་མ་རྣམས་ནས་ཟླ་བ་ ༦ རིང་བོད་སྐད་ཡིག་གི་འཛིན་གྲྭ་ལེན་དགོས་ཀྱི་ཡོད་འདུག་ལ། ལོ་རེར་སློབ་རིན་ཧིན་སྒོར་ ༣༣༠༠༠ རེད་འདུག 
ཐེངས་འདིའི་བཀའ་བཅུ་པའི་སློབ་གཉེར་ནང་ཞུགས་པའི་ཨ་རི་ནས་ཡིན་པའི་སློབ་མ་ཞིག་གིས། རང་ཉིད་ལྟ་བུར་མཚོན་ན། ནང་ཆོས་དང་བོད་སྨན་ལ་སློབ་གཉེར་བྱ་རྒྱུའི་འདུན་པ་ཡོད་པའི་རྒྱུ་མཚན་གྱིས། བོད་ཡིག་ལ་སློབ་གཉེར་བྱས་ཡོད་སྐོར་དང་། རང་ཉིད་ཀྱི་མཐོང་ཚུལ་ལ་ནུབ་གླིང་གི་སྨན་བཅོས་རིག་པ་དེས་རྨ་རས་གཡོག་པ་ལྟར་ནད་ཀྱི་ཕྱིའི་རྣམ་པ་ཙམ་བཅོས་ཀྱི་ཡོད་ནའང་། བོད་ཀྱི་གསོ་བ་རིག་པས་ནད་ཀྱི་རྐྱེན་དང་རྩ་བ་འཇོམས་ཐབས་བྱེད་ཀྱི་ཡོད་པས། ནད་གཞི་དྲག་སྐྱེད་ཡོང་རྒྱུར་དུས་ཡུན་རིང་པོ་འགོར་གྱི་ཡོད་ནའང་ཕུགས་རྒྱང་རིང་པོར་ཕན་ཐོགས་ཆེ་བ་ཡོད་སྐོར་འགྲེལ་བརྗོད་གནང་སོང་། ཡང་ཨུ་རུ་སུ་ནས་ཡིན་པའི་སློབ་མ་ཞིག་གིས་རང་ཉིད་ཀྱི་བོད་རིགས་དགེ་རྒན་གྱིས་སྐུལ་སློང་འོག་བོད་ཀྱི་གསོ་བ་རིག་པར་སློབ་གཉེར་བྱ་རྒྱུའི་འདུན་པ་སླེབས་ཡོད་སྐོར་འགྲེལ་བརྗོད་གནང་བྱུང་།
གསར་འགོད་པ། པ་སངས་ཚེ་རིང་།
ཐེངས་འདིའི་བཀའ་བཅུ་པའི་སློབ་
