ཨ་རིའི་སྲིད་འཛིན་ཞེ་དྲུག་པ་ཇོ་བྷའེ་ཌིན་མཆོག་གིས་སྲིད་འཛིན་དམ་བཅའ་ཕུལ།

ཨ་རིའི་སྲིད་འཛིན་ཞེ་དྲུག་པ་ཇོ་བྷའེ་ཌིན་མཆོག་གིས་སྲིད་འཛིན་དམ་བཅའ་ཕུལ་བ་དང་བསྟུན་ཨ་རི་འཛམ་གླིང་འཕྲོད་བསྟེན་སྒྲིག་འཛུགས་དང་པེ་རི་སི་གནམ་གཤིས་སྤྱི་ཆིངས་ནང་བསྐྱར་དུ་ཞུགས་རྒྱུའི་བཀའ་ཁྱབ་དང་ཆོད་ཡིག་གསར་པ་ ༡༧ ལ་མཚན་རྟགས་བསྐྱོན་ཡོད་འདུག

ཁ་སང་ཕྱི་ཚེས་ ༢༠ ཉིན་ཨ་རིའི་གྲོས་ཚོགས་ཁང་གི་མདུན་དུ། ཨ་རིའི་འདེམས་ཐོན་སྲིད་འཛིན་སྐུ་ཞབས་ཇོ་བྷའེ་ཌིན་མཆོག་གིས་ཨ་རིའི་སྲིད་འཛིན་ ༤༦ པའི་དམ་འབུལ་མཛད་སྒོ་ཚོགས་ཡོད་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ནས་འཚམས་འདྲིའི་གསུང་འཕྲིན་ཞིག་སྩལ་བའི་ནང་། སྐུ་ཞབས་ཇོ་བྷའེ་ཌིན་ལགས་ཀྱིས་འདས་པའི་དུས་ཡུན་རིང་པོ་ནས་བོད་མིར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་བ་དང་འབྲེལ། ཐུགས་ཐག་ཆོད་པོའི་ཐོག་ནས་བྷའེ་ཌིན་མཆོག་ནས་འཛམ་གླིང་འདི་སྔར་བས་ཞི་བདེ་བག་ཕེབས་ཡོང་རྒྱུར་གཞོགས་འདེགས་གནང་སྟེ་མནར་བཞིན་པའི་སྐྱེ་འགྲོ་རྣམས་ལ་སྐྱབས་དང་མགོན་འཐོབ་སྲིད་པའི་ཡིད་ཆེས་མཛད་བཞིན་ཡོད་སྐོར་གསུངས་འདུག

དེ་ཡང་གསུང་འཕྲིན་ནང་༧གོང་ས་མཆོག་གིས། ངོས་རང་ང་ཚོའི་གོ་ལ་འདིའི་སྣོད་བཅུད་ལ་འཕྲད་བཞིན་པའི་དཀའ་རྙོག་དག་ལ་བློ་འཚབ་ཆེན་པོ་བྱེད་མཁན་ཞིག་ཡིན་པའི་ཆ་ནས། ཁྱེད་ཀྱིས་འཛམ་གླིང་གི་གནམ་གཤིས་འགྱུར་ལྡོག་དེ་གལ་ཆེའི་གནད་དོན་ཞིག་ཏུ་བརྩིས་པ་མ་ཟད། ཨ་རི་པེ་རི་སིའི་གནམ་གཤིས་སྤྱི་ཆིངས་ནང་བསྐྱར་དུ་ཞུགས་གཏན་ཁེལ་བ་དེར་ངོས་རང་ཧ་ཅང་དགའ་པོ་བྱུང་། གོ་ལའི་ཚ་དྲོད་འཕེལ་བཞིན་པ་དེ་ནི་འཛམ་གླིང་ཡོངས་དང་། ང་ཚོ་མིའི་རིགས་ཀྱི་འཚོ་གནས་ལ་འཕྲད་བཞིན་པའི་ཉེན་ཁ་ཞིག་རེད། ཅེས་དང་། དེ་བཞིན་ཨ་རི་ཡར་རྒྱས་ཀྱི་ཕྱོགས་སུ་སྐྱོད་པར་ཁྱེད་ཀྱིས་ཐབས་ཇུས་གཞན་ཁག་ལག་བསྟར་བྱ་འཆར་ཡོད་པར་བསྔགས་བརྗོད་ཞུ་ཡི་ཡོད། ངོས་ནི་སྔར་ནས་ཁྱེད་ཀྱི་རྒྱལ་ཁབ་ཆེན་མོ་དེར་ཡི་རང་བྱེད་མཁན་ཞིག་ཡིན། ཨ་རི་ནི་རང་དབང་དང་། དམངས་གཙོ། ཆོས་དད་རང་དབང་། ཁྲིམས་ཀྱི་དབང་བསྒྱུར་བཅས་ཀྱི་སྲུང་མ་ལྟ་བུ་ཞིག་ཡིན། འཛམ་གླིང་ཡོངས་ཀྱིས་ཨ་རིའི་དམངས་གཙོའི་ཕུགས་བསམ་དང་མགོ་འཁྲིད་ཀྱི་ནུས་པར་རེ་བ་བཅོལ་ནས་ཡོད། ཉག་ཕྲ་བའི་དུས་སྐབས་འདིར། ངོས་རང་གིས་སེམས་ཐག་ཆོད་པོའི་ངང་ནས་བཤད་ཐུབ་པ་ནི། ཁྱེད་ཀྱིས་འཛམ་གླིང་འདི་སྔར་བས་ཞི་བདེ་བག་ཕེབས་ཡོང་རྒྱུར་གཞོགས་འདེགས་གནང་སྟེ། ལྟོགས་སྐོམ་དང་། ནད་རིགས། འཚེ་སྤྱོད་བཅས་ཀྱིས་མནར་བཞིན་པའི་སྐྱེ་འགྲོ་རྣམས་ལ་སྐྱབས་དང་མགོན་འཐོབ་སྲིད་པའི་ཡིད་ཆེས་བྱེད་ཀྱི་ཡོད། ཅེས་གསུངས་འདུགགཞན་ཡང་གསུང་འཕྲིན་ནང་། ངོས་ཀྱིས་བསྐྱར་དུ་གོ་སྐབས་འདི་བརྒྱུད་ཁྱེད་ཀྱིས་འདས་པའི་དུས་ཡུན་རིང་པོ་ནས་བཟུང་བོད་མིར་རྒྱབ་སྐྱོར་ཤུགས་ཆེན་པོ་གནང་བར་ཐུགས་རྗེ་ཆེ་ཞུ་རྒྱུ་དང་། ཨ་རིའི་མགོ་འཁྲིད་དང་མི་མང་ལྷན་དུ་གྲོགས་འདྲིས་བྱུང་བ་མ་ཟད། ཁྱེད་རྣམ་པས་ང་ཚོར་སྲོལ་རྒྱུན་ནང་བསྟན་རིག་གཞུང་སྲུང་སྐྱོབ་དང་ཉར་ཚགས་བྱ་རྒྱུའི་སྐུལ་བ་གནང་བ་དེ་ནི་སྐལ་བ་བཟང་པོ་ཞིག་ཏུ་སྒོམ་གྱིན་ཡོད། ཅེས་དང་། མཇུག་ཏུ་སྲིད་འཛིན་ལ་འགལ་རྐྱེན་བར་ཆད་མི་ཡོང་བའི་ཐུགས་སྨོན་བཅས་མཛད་འདུག

ཨ་རིའི་སྲིད་འཛིན་དང་སྲིད་འཛིན་གཞོན་པའི་དམ་འབུལ་མཛད་སྒོའི་ཐོག་ཨ་རིའི་སྲིད་འཛིན་གསར་པ་ཇོ་བྷའེ་ཌིན་མཆོག་གི་ཆེས་ཐོག་མའི་སྲིད་འཛིན་གྱི་གཏམ་བཤད་ནང་། དེ་རིང་ནི་དམངས་གཙོའི་ཉིན་མོ་ཞིག་ཡིན། དེ་རིང་ང་ཚོས་འོས་མི་ཞིག་གི་རྒྱལ་ཁ་སྲུང་གཙི་བྱེད་ཀྱི་མེད། དེ་རིང་ང་ཚོས་དམངས་གཙོའི་གནད་དོན་ཞིག་སྲུང་གཙི་བྱེད་ཀྱི་ཡོད། ཅེས་དང་། ད་ཐེངས་ང་ཚོས་བསྐྱར་དུ་དམངས་གཙོ་ཟེར་བ་དེ་གལ་ཆེན་ཡིན་པ་གང་ཞིག་ལ་གས་ཆག་སླ་བ་ཞིག་ཡིན་པའང་ཤེས་ཡོད། འོན་ཀྱང་ད་ལྟའི་དུས་ཚོད་འདིར་དམངས་གཙོ་རྣམ་པར་རྒྱལ་ཟིན། ཞེས་དང་། ཡང་ཁོང་གིས། ཆབ་སྲིད་ཀྱི་ཐལ་ཆ་དང་། མི་རིགས་དཀར་པོ་མཆོག་འཛིན་གྱི་རིང་ལུགས། རྒྱལ་ནང་གི་དྲག་སྤྱོད་ལས་འགུལ་རྣམས་ལས་རྣམ་པར་རྒྱལ་བ་དང་། ཨ་རིའི་གསོན་ཤུགས་སྔར་བས་རྒྱས་པ། ཨ་རིའི་མ་འོངས་པ་སྲུང་སྐྱོབ་བཅས་ཀྱི་ཆེད་དུ་ང་ཚོར་ཚིག་སྐམ་པོ་ཞིག་གིས་མི་ཕན་པར། དམངས་གཙོའི་ལམ་ལུགས་ནང་ཆེས་རྙེད་པར་དཀའ་བའི་ཆིག་སྒྲིག་ཟེར་བ་དེ་ཡིན་སྐོར་དང་། ཨ་རིའི་སྡེ་གཟར་དང་། དཔལ་འབྱོར་ཉམས་རྒུད་ཆེན་མོ། འཛམ་གླིང་དམག་ཆེན། དགུ་པའི་བཅུ་གཅིག་བཅས་ཀྱི་དུས་སྐབས་སུ་ཆིག་སྒྲིལ་བྱས་ཡོད་པ་ལྟར། ད་ཐེངས་ཀྱང་ཆིག་སྒྲིལ་བྱ་རྒྱུ་དུས་ལ་བབས་ཡོད་པ་དང་། ཨ་རིས་ནམ་ཡང་ཆིག་སྒྲིལ་སྐབས་ཕམ་ཁ་མྱངས་མེད་པ་སོགས་ཆིག་སྒྲིལ་རྐང་དུ་བཟུང་སྟེ་སྲིད་འཛིན་གྱི་ལས་ཡུན་མགོ་བརྩམས་ཡོད་འདུག

ད་ཐེངས་སྔར་དང་མི་འདྲ་བར་ཏོག་དབྱིབས་གཉན་རིམས་ཀྱི་རྐྱེན་པས་མང་ཚོགས་ཀྱི་འདུ་འཛོམས་ཆེན་པོ་མེད་པར་ཚད་མཐོའི་བདེ་འཇུགས་སྲུང་སྐྱོབ་ཀྱི་འོག་ནས་སྲིད་འཛིན་དམ་འབུལ་མཛད་སྒོ་གྲུབ་ཡོད་ཅིང་། མཛད་སྒོའི་ཐོག་སྲིད་འཛིན་ཟུར་པ་ཨོ་བྷ་མ་མཆོག་དང། བྷིལ་ཁི་ལིན་ཊོན་ (Bill Clinton)མཆོག ཇོར་ཇི་བྷུ་ཤི་ (George W Bush)མཆོག་གི་དབུས་པའི་ཆེས་མཐོའི་དཔོན་རིགས་མང་པོ་བཅར་ཡོད་འདུག སྲིད་འཛིན་སྦྲེལ་པོའི་དམ་འབུལ་མཛད་སྒོ་གྲུབ་མཚམས། ཇོ་བྷའེ་ཌིན་མཆོག་གིས་ཕོ་བྲང་དཀར་པོའི་ནང་གསར་འགོད་པའི་མདུན་དུ་འཛིན་སྐྱོང་བཀའ་ཁྱབ་དང་ཆོད་ཡིག་གསར་པ་ ༡༧ ལ་མཚན་རྟགས་བསྐྱོན་ཏེ། སྲིད་འཛིན་གོང་མ་ཊོམ་ཕུ་མཆོག་གི་བཀའ་རྒྱ་མི་ཉུང་བ་ཞིག་ནུས་མེད་དུ་བཏང་ཡོད་འདུག དེ་ཡང་ཏོག་དབྱིབས་གཉན་རིམས་དང་འབྲེལ་ནས་ཨ་རིའི་གཉན་རིམས་འབྲེལ་མཐུད་ལས་ཁུངས་གསར་འཛུགས་དང་། གཞུང་གི་ལས་ཁུངས་ཁག་ནང་སྤྱི་ཚོགས་རྒྱང་བཀྱེད་དང་ཁ་རས་ངེས་པར་དུ་གྱོན་དགོས་པ། གཞན་ཡང་ཨ་རི་འཛམ་གླིང་འཕྲོད་བསྟེན་སྒྲིག་འཛུགས་ནང་བསྐྱར་དུ་ཞུགས་རྒྱུའི་བརྒྱུད་རིམ་མགོ་འཛུགས་དགོས་པའི་བཀའ་ཁྱབ་དང་། ཨ་རི་ཕྱི་ལོ་ ༢༠༡༥ ལོའི་པེ་རི་སི་གནམ་གཤིས་སྤྱི་ཆིངས་ནང་བསྐྱར་ཞུ་ཞུགས་རྒྱུའི་བཀའ་ཁྱབ། དེ་བཞིན་གཞིས་སྤོས་དང་འབྲེལ་ནས་ཊོམ་འཛིན་སྐྱོང་གིས་ཁ་ཆེ་རྒྱལ་ཁབ་ཀྱི་མི་སེར་རྣམས་ཨ་རིའི་ནང་ཡོང་རྒྱུར་བཀག་སྡོམ་གྱི་བཀའ་རྒྱ་དེ་རྩིས་མེད་བཏང་ཡོད་འདུག་པ་མ་ཟད། ཊོམ་ཕུ་འཛིན་སྐྱོང་གིས་ཨ་རི་དང་མེག་སི་ཁོའི་བར་ལ་རྩིག་གྱང་འཛུགས་རྒྱུའི་ལས་གཞི་མཚམས་འཇོག་དགོས་པའི་བཀའ་རྒྱ་བཏང་ཡོད་འདུག གཞན་ཡང་མི་རིགས་དབྱེ་འབྱེད་དང་དཔལ་འབྱོར་སོགས་ཀྱི་གནད་དོན་ཚུད་པའི་བཀའ་རྒྱ་དང་ཆོད་ཡིག་ལ་མཚན་རྟགས་བསྐྱོན་ཡོད་འདུག

སྲིད་འཛིན་ཟུར་པ་ཊོམ་ཕུ་མཆོག་གིས་དེ་སྔ་ནས་བྷའེ་ཌིན་མཆོག་གི་དམ་འབུལ་མཛད་སྒོར་བཅར་རྒྱུ་མིན་སྐོར་བརྗོད་པ་ལྟར། ཁ་སང་ཞོགས་པར་ཁོང་ཕོ་བྲང་དཀར་པོ་ནས་གཏན་དུ་ཐོན་ཏེ་མཛད་སྒོར་ཞུགས་མེད་ལ། སྲིད་འཛིན་གྱི་མཇུག་མཐའི་གཏམ་བཤད་ནང་ཊོམ་ཕུ་མཆོག་གིས། ཁོང་གི་སྲིད་འཛིན་ལས་ཡུན་རིང་གྲུབ་པའི་ལས་དོན་རྣམས་བགྲངས་བ་དང་འབྲེལ། ང་ལ་ཁྱེད་ཚོའི་སྲིད་འཛིན་བྱ་རྒྱུའི་གོ་སྐབས་ཐོབ་པ་དེར་དགའ་སྤོབས་སྐྱེ་བཞིན་ཡོད། ངས་ནམ་ཡང་ཁྱེད་ཚོའི་ཆེད་དུ་འཐབ་རྩོད་བྱ་རྒྱུ་ཡིན། ངས་འབྱུང་འགྱུར་གྱི་གནས་སྟངས་ལ་ལྟ་ཉན་བྱ་རྒྱུ་ཡིན། ཞེས་དང་། ངས་འཛིན་སྐྱོང་གསར་པར་བཀྲ་ཤིས་པ་དང་ལས་དོན་ལེགས་གྲུབ་ཡོང་རྒྱུའི་རེ་སྨོན་བྱེད་ཀྱི་ཡོད། ཅེས་གསུངས་ཡོད་འདུག འོན་ཀྱང་ད་བར་སྲིད་འཛིན་ཟུར་པ་ཊོམ་ཕུ་མཆོག་གིས་གཞུང་འབྲེལ་ཐོག་ནས་སྲིད་འཛིན་འོས་བསྡུའི་གྲུབ་འབྲས་ངོས་ལེན་བྱས་མེད་པ་མ་ཟད། ཕྱི་ལོ་ ༡༨༦༩ ནས་བཟུང་ཨ་རིའི་སྲིད་འཛིན་ཞིག་མཇུག་སྐྱོང་སྲིད་འཛིན་གྱི་དམ་འབུམ་མཛད་སྒོར་མ་བཅར་པ་ཐེངས་དང་པོ་དེ་ཡིན་འདུག

གསར་འགོད་པ། པ་སངས་ཚེ་རིང་།