རྫ་དབོན་པོ་ཡུལ་ཚོ་རུ་མི་བདུན་གྱིས་བོད་རང་བཙན་སྐོར་གྱི་ཡིག་ཆ་འགྲེམས་སྤེལ་བྱས་པར་བརྟེན་མི་དྲུག་ལ་ལོ་གཅིག་ནས་ལྔ་བར་གྱི་ཁྲིམས་ཐག་བཅད་ཡོད་པ་དང་དེའི་ཁྲོད་ཀྱི་གྲྭ་རྟ་མེ་ལགས་ནད་མནར་རྐྱེན་གྱིས་འདས་གྲོངས་སུ་ཕྱིན་ཡོད་འདུག
ཕྱི་ལོ་ ༢༠༡༩ ཟླ་ ༡༡ ཚེས་ ༩ ཉིན་རྫ་དཔོན་པོ་ཡུལ་ཚོའི་གྲོང་བརྡལ་གྱི་ས་གནས་རྒྱ་གཞུང་གི་གཞུང་ལས་ར་སྐོར་ནང་དུ་བོད་རང་བཙན་དགོས་སྐོར་གྱི་ཡིག་ཆ་བརྒྱ་ཕྲག་མང་པོ་བཀྲམས་པ་ལ་བརྟེན་ནས། སྐབས་དེར་རྒྱ་གཞུང་ཉེན་རྟོག་པས་སྔ་གཞུག་ཏུ་ཁྱོན་བོད་མི་ ༧ འཛིན་བཟུང་བཀག་ཉར་བཞག་སྟེ་ཕྱིས་སུ་མི་ ༥ ལ་ལོ་གཅིག་ནས་ལྔ་བར་གྱི་བཙོན་འཇུག་ཁྲིམས་ཐག་བཅད་ཡོད་པ་དང་། སྐབས་དེར་ཁྲིམས་ཆད་ཕོག་པའི་གྲྭ་བསྟན་འཛིན་ཉི་མའམ་ཡང་རྟ་མེ་ལགས་སུ་བཙོན་ཁང་དུ་རྒྱ་ནག་གི་འབྲེལ་ཡོད་ལས་བྱེད་ཚོས་རྡུང་རྡེག་དྲག་པོ་བཏང་བའི་རྐྱེན་གྱིས་ཡུན་རིང་ན་མནར་བྱུང་བ་དང་། ཁོང་གི་ནང་མི་ཚོས་གྲྭ་རྟ་མེ་ལགས་ས་གནས་རིམ་པའི་སྨན་ཁང་དང་སྨན་པར་བསྟེན་གཏུགས་གང་ཐུབ་བྱས་ཡོད་ནའང་བཅོས་ཐབས་མེད་པའི་དཀའ་ངལ་འོག འདས་ལོའི་ཕྱི་ཟླ་ ༡༢ ཚེས་ ༡ ཉིན་རང་ཁྱིམ་ནས་འདས་གྲོངས་སུ་ཕྱིན་ཡོད་འདུག
བསྟན་འཛིན་ཉི་མ་ལགས་འདས་གྲོངས་སུ་ཕྱིན་པའི་ཐད་རྒྱལ་སྤྱིའི་འགྲོ་བ་མིའི་ཐོབ་ཐང་གིས་སྤེལ་གནས་ཚུལ་ནང་། འདས་ལོའི་ཕྱི་ཟླ་ ༤ ནང་ས་གནས་སྲིད་གཞུང་གིས་བསྟན་འཛིན་ཉི་མ་ལགས་ཀློད་གྲོལ་བཏང་ཡོད་ཀྱང་། ཁོང་གིས་རང་ཉིད་འཛིན་བཟུང་བྱས་པའི་གནས་ཚུལ་རྣམས་བརྒྱུད་སྐུལ་བྱས་པ་དང་རྒྱ་གར་ནང་ཡོད་པའི་བོད་མིར་འབྲེལ་བ་བྱས་པའི་ཉེས་མིང་འོག འདས་ལོའི་ཕྱི་ཟླ་ ༨ ཚེས་ ༡༡ ཉིན་སླར་ཡང་འཛིན་བཟུང་བྱས་ཡོད་པ་དང་། འདས་ལོའི་ཕྱི་ཟླ་ ༡༠ ནང་རྒྱ་ནག་གིས་ཁོང་གི་ནང་མིར་འབྲེལ་བ་བྱས་ཏེ། བསྟན་འཛིན་ཉི་མ་ལགས་ཀྱི་གཟུགས་གཞི་བདེ་ཐང་མིན་པའི་དཀའ་ངལ་འོག་བཙོན་ཁང་ནས་ལེན་དགོས་པའི་བཀའ་བཏང་ཡོད་སྐོར་བརྗོད་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་གི་གནས་ཚུལ་ལྟར་ན། རྒྱ་ནག་གཞུང་གིས་བསྟན་འཛིན་ཉི་མ་ལགས་བཙོན་འཇུག་ཐེངས་གཉིས་རིང་བྱས་པ་དང་། བཙོན་ཁང་དུ་རྒྱ་གཞུང་ཉེན་རྟོག་པས་ཁོང་ལ་རྡུང་རྡེག་དྲག་པོ་བཏང་སྟེ་ན་མནར་བྱུང་རྗེས་ནང་མིར་རྩིས་སྤྲོད་བྱས་ཡོད་པ་དང་། སྐབས་དེར་ཁོང་གིས་དབུགས་གཏོང་ལེན་དང་སྐད་ཆ་བཤད་མི་ཐུབ་པ་སོགས་འཕྲོད་བསྟེན་གྱི་གནས་སྟངས་ཛ་དྲག་ཡིན་པ་དང་། ཕྱི་ཟླ་ ༡༠ ཚེས་ ༩ ཉིན། གྲྭ་བསྟན་འཛིན་ཉི་མ་ལགས་ཀྱི་ནང་མི་ཚོས་ཁོང་དྲན་པ་ཉམས་པའི་གནས་སྟངས་འོག་ཁྲི་ཏུ་གྲོང་ཁྱེར་གྱི་སྨན་ཁང་ཞིག་ཏུ་སྐྱེལ་ཡོད་པ་དང་། སྨན་ཁང་གྱི་བརྟག་དཔྱད་སོགས་ལ་ཞིབ་འཇུག་བྱས་པ་ལྟར་ན། གྲྭ་རྟ་མེ་ལགས་ནང་མིར་རྩིས་སྤྲོད་མ་བྱོས་སྔོན་གྱི་ཉིན་གྲངས་ ༡༠ ཙམ་ནས་ཁོང་གི་ལུས་པོའི་གནས་སྟངས་ཛ་དྲག་ཆགས་ཡོད་པའི་ར་སྤྲོད་བྱུང་ཡོད་འདུག
དེ་བཞིན། ཁོང་སྨན་ཁང་དུ་སྐྱེལ་རྗེས་སྨན་རིན་གྱི་དཀའ་ངལ་འོག་སྨན་བཅོས་ལ་འགོར་འགྱང་བྱུང་ཞིང་། ཁོའི་སྨན་བཅོས་སླད་ཕྱི་ཕྱོགས་སུ་ཡོད་པའི་ཁོང་གི་སྤུན་མཆེད་རྣམས་ཀྱི་རྒྱ་སྒོར་ཁྲི་ ༤ ཙམ་བསྡུ་རུབ་བྱེད་ཐུབ་ཡོད་པ་དང་། བདུན་ཕྲག་ཁ་ཤས་རིང་སྨན་ཁང་དུ་བསྡད་རྗེས་གྲྭ་བསྟན་འཛིན་ཉི་མ་ལགས་ཀྱི་འཕྲོད་བསྟེན་གནས་སྟངས་ཛ་དྲག་ཡིན་པ་དང་སྨན་བཅོས་བྱ་ཐབས་བྲལ་བའི་གནས་སྟངས་འོག་སྨན་ཁང་ནས་འགྲོ་དགོས་བྱུང་ཡོད་པ་དང་། དེ་ནས་ཕྱི་ཟླ་ ༡༢ ཚེས་ ༡ ཉིན་བསྟན་འཛིན་ཉི་མ་ལགས་དར་རྩེ་མདོའི་སྨན་ཁང་ཞིག་ཏུ་འཁྲིད་ཐུབ་ཡོད་ཀྱང་། སྐབས་དེར་ཁོང་དྲན་མེད་བརྒྱལ་ཡོད་སྟབས། སྨན་པས་ཁོང་གི་གནས་སྟངས་ཛ་དྲག་ཡིན་པ་དང་བཅོས་ཐབས་མེད་སྐོར་བརྗོད་དེ། ཁོང་གིས་ནང་མི་ཚོས་གྲྭ་བསྟན་འཛིན་ཉི་མ་ལགས་ཕྱིར་རང་ཁྱིམ་དུ་འཁྲིད་ཡོང་རྗེས་འདས་གྲོངས་སུ་ཕྱིན་ཡོད་འདུག
རྒྱལ་སྤྱིའི་འགྲོ་མིའི་ཐོབ་ཐང་གིས། རྒྱ་ནག་གཞུང་གིས་བཙོན་འཇུག་བྱས་པའི་མི་རྣམས་ལ་རྡུང་རྡེག་མནར་གཅོད་ཚད་མེད་གཏོང་གི་ཡོད་པ་དང་དམིགས་བསལ་གྲངས་ཉུང་མི་རིགས་ས་ཁུལ་གྱི་མི་རྣམས་ལ་རྡུང་རྡེག་དང་ཐུབ་ཚོད་གཏོང་གི་ཡོད་པ་དང་། རྒྱ་ནག་གཞུང་གིས་བསྟན་འཛིན་ཉི་མ་ལགས་སུ་ཚད་ལས་བརྒལ་བའི་མནར་གཅོད་བཏང་བའི་གནད་དོན་ལ་བདེན་པས་ཞིབ་འཇུག་བྱས་ཏེ། ཁོང་ལ་མནར་གཅོད་གཏོང་མཁན་རྣམས་ལ་ཉེས་ཆད་གཅོད་དགོས་པ་མ་ཟད། རྒྱ་ནག་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འཐུས་མི་ཡིན་པ་དང་རྒྱལ་ཚོགས་ཀྱི་གྲོས་མཐུན་གཞིར་བཟུང་། ས་གནས་སྲིད་གཞུང་གིས་གྲྭ་བསྟན་འཛིན་ཉི་མ་ལགས་ཀྱི་ནང་མི་རྣམས་ལ་དྲང་བདེན་དང་གུན་གསབ་འཐུས་ཚང་ཞིག་སྤྲོད་དགོས་ཀྱི་ཡོད་སྐོར་བརྗོད་ཡོད་པ་རེད།
འདི་གའི་གསར་ཁང་ལ་འབྱོར་བའི་གནས་ཚུལ་ལྟར་ན། སེལ་ཤུལ་རྫོང་རྫ་དབོན་པོ་ཡུལ་ཚོའི་རྒྱའི་གཞུང་ལས་ར་སྐོར་ནང་དུ་བོད་རང་བཙན་དགོས་སྐོར་གྱི་ཡིག་ཆ་གཏོར་བའི་གནས་ཚུལ་དང་འབྲེལ། སེར་ཤུལ་རྫོང་མི་དམངས་འབྲིང་རིམ་ཁྲིམས་ཁང་གིས། རང་ལོ་ ༢༠ ཡིན་པའི་གྲྭ་ཀུན་གསལ་ལ་ལོ་ ༤ དང་། རང་ལོ་ ༡༨ ཡས་མས་ཡིན་པའི་གྲྭ་བསྟན་འཛིན་ཉི་མ་འམ་རྟ་མེ། རང་ལོ་ ༡༨ ཡས་མས་ཀྱི་གྲྭ་བསོད་བཀྲ་ལ་ལོ་ ༣། རང་ལོ་ ༡༨ ཡས་མས་ཀྱི་གྲྭ་ཚུལ་ཁྲིམས་ལ་ལོ་ ༣ ། དེ་བཞིན། རྫ་དབོན་སྡེ་བའི་ཡུལ་མི་ཡོན་ཏན་དང་ཆོས་རྒྱལ་གཉིས་ལ་ ༤ བཅས་ཀྱི་ཁྲིམས་ཐག་བཅད་ཡོད་པ་དང་། སྐབས་དེར་རྒྱ་གཞུང་ཉེན་རྟོག་པས་ཁྱོན་བོད་མི་ ༧ འཛིན་བཟུང་བཙན་ཁྲིད་བྱས་པའི་ཁྲོད་གྲྭ་ཤེར་རྒྱམ་ཀློད་གྲོལ་བཏང་ཡོད་པ་དང་། གྲྭ་ཉི་མ་ལགས་ཀྱི་བཙོན་འཇུག་ཁྲིམས་ཐག་ཕྱིར་བསྒྲགས་མ་བྱས་པར་གསང་བའི་བཞག་ཡོད་འདུག
འགྲོ་བ་མིའི་ཐོབ་ཐང་དང་འབྲེལ་བའི་རྒྱལ་ཚོགས་ཀྱི་གྲོས་མཐུན་ཡིག་ཆ་ཁག་ལྟར་ན། མི་ཞིག་བཙོན་འཇུག་གི་གནས་སྟངས་དང་འབྲེལ་ནས་རྐྱེན་འདས་སུ་ཕྱིན་པའི་གནས་ཚུལ་ཐོན་སྐབས་འཕྲལ་མར་ནུས་པ་ལྡན་ཞིང་དྲང་བདེན་གྱིས་ཞིབ་འཇུག་བྱེད་དགོས་ཀྱི་ཡོད་པ་དང་། འདས་ལོའི་ཕྱི་ཟླ་ ༦ ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེས་མཁས་པས། རྒྱ་ནག་གཞུང་ལ་སྐྱོན་བརྗོད་ཀྱིས་རྒྱ་ནག་ནང་འགྲོ་བ་མིའི་ཐོབ་ཐང་ལ་རྡོག་རོལ་ཐེབས་བཞིན་པའི་གནས་སྟངས་ལ་རང་དབང་ལྡན་པའི་ཞིབ་འཇུག་བྱེད་དགོས་པའི་སྐུལ་མ་བཏང་ཡོད་འདུག
གསར་འགོད་པ། སྐལ་བཟང་སྦྱིན་པ།
