ཁ་མཆུ་ཨང་ ༢༡ པ་རུལ་སོང་བའི་ཐག་གཅོད་བཀའ་ཁྱབ་བཏང་།

ཕྱི་ལོ་ ༢༠༡༩ ཟླ་  ༡ ཚེས་ ༡༧ ཉིན་ནས་གཞུང་ཞབས་བགྲེས་ཡོལ་སྐལ་བཟང་ཕུན་ཚོགས་ཀྱིས། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ལ་བགྲེས་ཡོལ་ཐོབ་ཐང་དང་འབྲེལ་བའི་ཁ་མཆུ་ཞུས་ཡོད་ཀྱང་། ཟླ་འདིའི་ཕྱི་ཚེས་ ༡༥ ཉིན་ཆེས་མཐོའི་ཁྲིམས་ཞིབ་ཁང་གིས། གྱོད་ཡ་ཕྱོགས་གཉིས་ནས་ཁྲིམས་ཡིག་གཞིར་བཟུང་གི་འགན་ཁུར་ཚུལ་བཞིན་བླངས་མེད་པ་དང་། ཁྲིམས་ཞིབ་ཀྱི་བྱ་རིམ་མུ་མཐུད་འགྲོ་རྒྱུའི་གཞི་རྟེན་མེད་པ་ཆགས་པར་བརྟེན། ཁ་མཆུ་ཨང་ ༢༡ པ་ཁ་མཆུ་རུལ་བའི་ཐག་གཅོད་བཀའ་ཁྱབ་ཅིག་གནང་འདུག་པ་མ་ཟད།  སྤྱི་མང་གཏུག་བཤེར་འགྲོ་ལུགས་ཁྲིམས་ཡིག་དོན་ཚན་ ༨༡ ནང་གསལ་ལྟར། གྱོད་ཡ་ཕན་ཚུན་ནས་ཁ་མཆུ་དེ་རང་བཙན་བྱོལ་བོད་མིའི་ཁྲིམས་ཞིབ་ཁང་གང་འདྲ་ཞིག་ཏུའང་སླར་ཡང་གསར་དུ་ཞུ་གཏུག་བྱ་རྒྱུའི་ཐོབ་ཐང་མེད་པའི་ཐག་གཅོད་བཀའ་ཁྱབ་བཏང་འདུག

དེ་ཡང་ཆེས་མཐོའི་ཁྲིམས་ཞིབ་ཁང་གི་མཐའ་མའི་ཐག་གཅོད་བཀའ་ཁྱབ་ཏུ་རྒྱུ་མཚན་དོན་ཚན་བཞི་བཏོན་པའི་ནང་། གྱོད་ཡ་ཕྱོགས་གཉིས་ནས་ཁྲིམས་ཡིག་གི་བྱ་རིམ་གཞིར་བཟུང་ཁ་མཆུའི་གནད་དོན་ཐོག་འགན་ཁུར་ཚུལ་བཞིན་བླངས་མེད་པ་མ་ཟད། ཁྲིམས་ཞིབ་ཁང་གི་བརྡ་ཐོ་རིམ་ཅན་དུ་བཏང་བའི་ལམ་སྟོན་དང་ཐག་གཅོད་ཁག་ལའང་བརྩི་བཀུར་ཉམས་ལེན་བྱས་མེད་པ། གཉིས་པ་ཞུ་སྦྱོར་བའི་ངོས་ནས་རྩོད་གཞིའི་གནད་དོན་ཐོག་ཁ་མཆུ་གསར་འཛུགས་དང་། གྱོད་ཡ་དོ་བདག་གི་ཐོབ་ཐང་དང་འབྲེལ་མེད་ཀྱི་དགོས་འདུན་རིམ་འཛར་དུ་བཏོན་པ་དང་། ཁ་མཆུའི་གནད་དོན་ཁུངས་སྐྱེལ་སྒྲུབ་བྱེད་དུ་རང་ཉིད་ཀྱི་བསམ་ཚུལ་ཙམ་གཞི་ལ་བཞག་སྟེ་ཚོད་དཔག་གི་རྩོད་ཤགས་དང་། གུས་དང་བསྐྱར་བཅོས་སྔོན་བགྲེས་ཤག་གནང་ཡུལ་བགྲེས་ཡོལ་བ་གཉིས་ཀྱི་གནས་སྟངས་གཅིག་མཚུངས་ཡིན་པ་གང་ཞིག་ལ་གུས་པར་བགྲེས་ཤག་མ་གནང་བ་དང་། ཁོང་རྣམས་ལ་གནང་ཡོད་པ་ནས་གནས་སྟངས་མཚུངས་པར་གནང་སྟངས་མི་འདྲ་བ་བྱུང་ཡོད་པ་ར་སྤྲོད་བྱེད་ཀྱི་ཡོད་ཟེར་བ་ཙམ་ལས། ཁུངས་སྐྱེལ་དཔང་རྟགས་གཅིག་ཀྱང་འདོན་འབུལ་ཞུས་མེད་ལ། ཞུ་སྦྱོར་བའི་བསྒྲུབ་བྱ་གཙོ་བོ་བོད་མིའི་སྒྲིག་འཛུགས་ཀྱི་ལས་ཤག་དང་བགྲེས་ཤག་བགོ་འགྲེམས་ཀྱི་སྒྲིག་གཞི་དོན་ཚན་ ༡༢ (༣) བསྐྱར་བཅོས་གཏན་འབེབས་བྱས་པ་དེ་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་གང་དང་འགལ་ཡོད་མེད་ཀྱི་ཁྲིམས་དོན་གྱི་གནད་དོན་ལྟེ་བའི་ཐོག་སྒྲུབ་བྱེད་ཡང་དག་འདོན་འབུལ་བྱས་མེད་པ་མ་ཟད། སྣོན་འཕྲི་ཐེངས་མང་ཕྱིན་པའི་ཞུ་སྦྱོར་བའི་ཞུ་རྩའི་ནང་ཁུངས་སྐྱེལ་སྒྲུབ་བྱེད་བཀོད་ཡོད་ལུགས་བརྗོད་དེ། ཞིབ་གཅོད་ཀྱི་བྱ་རིམ་སྐབས་སུ་སྒྲིག་གཞི་དེ་ནུས་ལྡན་མིན་པ་ཇི་ལྟར་ཆགས་པའི་ཁུངས་སྐྱེལ་གྱི་འགན་ཁུར་བླངས་མེད།


གསུམ་པ་རྩོད་ལན་པའི་ངོས་ནས་གཏན་འབེབས་ཟིན་པའི་ཁ་མཆུའི་གནད་དོན་ཁུངས་སྐྱེལ་གྱི་སྐབས་སུ། ཁྲིམས་ཞིབ་ཁང་ནས་ ༢༠༢༠།༩།༡༡དང་། ༢༠༢༠།༡༡།༡༣ དང་། ༢༠༢༠།༡༡།༢༧ ཉིན་སོ་སོར་བསྟུད་མར་བརྡ་ཐོ་སྔ་རྗེས་ཁག་གསུམ་བཏང་སྟེ། ཁྲིམས་ཡིག་ལུང་འདྲེན་གྱིས་སྒྲིག་གཞི་སྲུང་སྐྱོབ་ཀྱི་ཁུར་འཁྲིའི་ལས་འགན་ལེན་དགོས་པའི་བཀོད་མངགས་ལམ་སྟོན་བྱས་པར། ཁྲིམས་ཡིག་གིས་བསྐུར་བའི་ལས་འགན་གཡོལ་རྐྱང་བྱས་ཡོད། བཞི་བ་གྱོད་ཡ་ཕྱོགས་གཉིས་ནས་ཁྲིམས་ཡིག་གཞིར་བཟུང་གི་འགན་ཁུར་ཚུལ་བཞིན་མ་བླངས་པར། ཁྲིམས་ཞིབ་བྱ་རིམ་མུ་མཐུད་འགྲོ་རྒྱུའི་གཞི་རྟེན་མེད་པ་ཆགས་པར་བརྟེན། ཁ་མཆུ་ཨང་ ༢༡ འདི་ཆེས་མཐོའི་ཁྲིམས་ཞིབ་ཁང་གི་ཁ་མཆུ་ཨང་་༢༡ པའི་ཐག་གཅོད་གནང་ལམ་ལ་གོ་བསྟུན་གྱིས། ཁ་མཆུ་རུལ་བར་ཐག་གཅོད་བྱས་པ་ཡིན་ན། ཞུ་སྦྱོར་བས་ཁྲིམས་དོད་ཇི་ཕུལ་ཁྲིམས་དྲུང་བརྒྱུད་ཕྱིར་ཞུ་ཆོག་རྒྱུ་དང་། སྤྱི་མང་གཏུག་བཤེར་འགྲོ་ལུགས་ཁྲིམས་ཡིག་དོན་ཚན་ ༨༡ ནང་གསལ། གྱོད་ཡ་ཕན་ཚུན་དེ་རང་གིས་ཁ་མཆུ་དེའམ། གནད་དོན་དེ་རང་བཙན་བྱོལ་བོད་མིའི་ཁྲིམས་ཞིབ་ཁང་གང་འདྲ་ཞིག་ཏུའང་སླར་ཡང་གསར་དུ་ཞུ་གཏུག་བྱ་རྒྱུའི་ཐོབ་ཐང་མེད་པའི་ཐག་གཅོད་བཀའ་ཁྱབ་ཏུ། ཞེས་འཁོད་འདུག

ཕྱི་ལོ་ ༢༠༡༩ ཟླ་ ༡༠ ཚེས་ ༣༡ ཉིན་ཆེས་མཐོའི་ཁྲིམས་ཞིབ་ཁང་ནས་ཁ་མཆུ་ཨང་ ༢༡ པར་ལོ་དེའི་ཕྱི་ཟླ་ ༡༡ ཚེས་ ༢༠ ཉིན་ཐོག་མའི་ཉན་ཞིབ་གནང་རྒྱུ་ཡིན་པའི་གསལ་བརྡ་བཏང་ཡོད་ཀྱང་། སྐབས་དེར་རྩོད་ལན་པ་དང་ཞུ་སྦྱོར་བ་གཉིས་ཀས་ཆེས་མཐོའི་ཁྲིམས་ཞིབ་ཁང་ལ་ཡིག་ཆ་རྣམས་དུས་ཐོག་ཕུལ་ཐུབ་མེད་པར་བརྟེན། ཁ་མཆུ་དེའི་ཉན་ཞིབ་ཐོག་མ་དེ་ཕྱིར་འགྱངས་གནང་དགོས་བྱུང་སྟེ། ཆེས་མཐོའི་ཁྲིམས་ཞིབ་ཁང་ནས་ཉན་ཞིབ་ཀྱི་བརྡ་ཐོ་ཐེངས་གཉིས་པ་བཏང་བ་ལྟར། ཕྱི་ཚེས་ ༢༡ ཉིན་ཉན་ཞིབ་ཐེངས་གཉིས་པ་ཚོགས་ཡོད་པ་རེད།

 གསར་འགོད་པ། སྐལ་བཟང་སྦྱིན་པ།