བོད་དོན་གོམ་བགྲོད་པ་བསྟན་འཛིན་དོན་གྲུབ་ལགས་ཀྱིས་ཉིན་གྲངས་ ༩༤ རིང་རྒྱ་གར་གྱི་རྒྱལ་ས་ལྡི་ལི་དང་བྷེང་ལོར། མཱམ་བྷའེ་བཅས་ཀྱི་ནང་བོད་ཀྱི་ཁོར་ཡུག་སྲུང་སྐྱོབ་དང་བཙན་བཟུང་འོག་གི་རྒྱལ་ཁབ་ཅིག་ལ་ངོས་འཛིན་དགོས་པ་སོགས་ཀྱི་རེ་འདུན་འོག་བོད་དོན་གོ་རྟོགས་སྤེལ་རྒྱུ་རེད་འདུག
དེ་རིང་བོད་ཀྱི་བུད་མེད་སྒེར་ལངས་ཉིན་མོ་དང་སྟབས་བསྟུན། ཉེ་ཆར་བོད་དོན་ཆེད་བཞུགས་སྒར་དྷ་ས་ནས་བོད་ཧིན་ས་མཚམས་སྣ་ཐོད་ལ་བར་གོམ་བགྲོད་གནང་མཁན་བསྟན་འཛིན་དོན་གྲུབ་ལགས་ཀྱིས། སང་ཉིན་ནས་བཟུང་ཉིན་གྲངས་ ༩༤ རིང་རྒྱ་གར་གྱི་གྲོང་ཁྱེར་ཆེ་ཁག་གསུམ་ནང་བོད་དོན་དང་འབྲེལ་བའི་ཡིག་ཆ་བགོ་འགྲེམ་གྱིས་རྒྱ་གར་མང་ཚོགས་ཁྲོད་བོད་དོན་གོ་རྟོགས་སྤེལ་བའི་ལས་འགུལ་སྤེལ་རྒྱུ་ཡིན་འདུག
འདི་གའི་གསར་འགོད་པས་ཞལ་པར་བརྒྱུད་བསྟན་འཛིན་དོན་གྲུབ་ལགས་སུ་ལས་འགུལ་གྱི་དམིགས་ཡུལ་སོགས་ཀྱི་སྐོར་དྲིས་པར་ཁོང་གིས། ང་རང་སྣ་ཐོད་ལ་བར་གོམ་བགྲོད་འགྲོ་སྐབས་གསར་འགོད་གསལ་བསྒྲགས་དང་གོམ་བགྲོད་འགྲོ་རྒྱུ་དེ་འདོད་བློ་ཁེངས་པ་བྱུང་སོང་། འོན་ཀྱང་གོམ་བགྲོད་ཀྱི་རིང་མི་ཉུང་ཉུང་མ་གཏོགས་ཐུག་མེད་པ་མ་ཟད། ཐུག་པ་རྣམས་ཀྱང་འཚོ་བ་ཞན་པོ་ཤ་སྟག་ཡིན་སྟབས། བོད་དོན་དང་འབྲེལ་བའི་ཡིག་ཆ་བགོ་འགྲེམ་བྱ་རྒྱུའི་ཐད་དེ་ཙམ་བྱུང་མ་སོང་། དེར་བརྟེན་ད་ཐེངས་བྷེང་ལོར་དང་། མཱམ་བྷའེ། ལྡི་ལི་བཅས་ནང་ཟླ་བ་གཅིག་རེར་བོད་དོན་ཐོག་གསར་འགོད་གསལ་བསྒྲགས་དང་ཡིག་ཆ་འགྲེམ་སྤེལ་བྱ་རྒྱུ་ཡིན་པ་མ་ཟད། རྒྱ་གར་གྱི་གྲོས་ཚོགས་འཐུས་མི་དང་མགོ་འཁྲིད་རྣམས་ལ་ཐུག་འཕྲད་བྱས་ཏེ་བོད་དོན་ཐོག་རྒྱབ་སྐྱོར་ཡོང་བའི་འབོད་སྐུལ་ཞུ་རྒྱུ་ཡིན། ཞེས་བརྗོད་བྱུང་།
བསྟན་འཛིན་དོན་གྲུབ་ལགས་ཀྱིས་ཐེངས་འདིའི་ལས་འགུལ་བརྒྱུད་ནས་རྒྱ་གར་གཞུང་མང་གཉིས་ནས་བོད་ཀྱི་ཁོར་ཡུག་སྲུང་སྐྱོབ་དང་། བོད་དེ་བཙན་འཛུལ་བྱས་པའི་རྒྱལ་ཁབ་ཅིག་ལ་ངོས་འཛིན་དགོས་པ། དེ་བཞིན་མང་ཚོགས་ནས་རྒྱ་ནག་གི་ཚོང་ཟོག་རྣམས་ཉོ་ཚོང་དང་བཀོལ་སྤྱོད་བྱ་རྒྱུ་མཚམས་འཇོག་དགོས་པ་བཅས་ཀྱི་རེ་འདུན་གསུམ་འདོན་རྒྱུ་ཡིན་འདུག
བསྟན་འཛིན་དོན་གྲུབ་ལགས་འདས་ལོའི་ཕྱི་ཟླ་ ༡༡ ཚེས་ ༢ ཉིན་བཞུགས་སྒར་དྷ་སའི་མེག་གྷན་ཁྲོམ་གཞུང་ནས་མགོ་འཛུགས་ཀྱིས་རྒྱ་གར་གྱི་མངའ་སྡེ་འབྲས་ལྗོངས་ཀྱི་བོད་ཧིན་ས་མཚམས་སྣ་ཐོད་ལ་བར་ཁྱོན་སྤྱི་ལེ་ ༢༣༠༠ ལྷག་གི་གོམ་བགྲོད་ལས་འགུལ་སྤེལ་ཏེ། འདི་ལོའི་ཕྱི་ཟླ་ ༢ ཚེས་ ༣ ཉིན་བསྟན་འཛིན་དོན་གྲུབ་ལགས་དང་། ལམ་ཕྱེད་ནས་ཁོང་དང་ལྷན་དུ་གོམ་བགྲོད་གནང་མཁན་བོད་མི་བསྟན་འཛིན་ཉི་མ་ལགས་གཉིས་སྣ་ཐོད་ལར་འབྱོར་ཡོད་ཅིང་། བསྟན་འཛིན་དོན་གྲུབ་ལགས་ཀྱིས། གོམ་བགྲོད་ལས་འགུལ་དེའི་རིང་བོད་ཀྱི་གཞུང་འབྲེལ་མ་ཡིན་པའི་ཚོགས་པ་དང་བོད་མི་སྒེར་ངོས་ནས་ཁོང་ལ་དཔལ་འབྱོར་དང་ལམ་སྟོན་སོགས་ཀྱི་ཐད་ནས་རོགས་འདེགས་ཤུགས་ཆེན་པོ་བྱས་ཡོད་པ་དང་། གལ་ཏེ་དེ་ལྟར་བྱུང་མེད་ཚེ་ལས་འགུལ་དེ་ཉིད་ལེགས་གྲུབ་ཡོང་རྒྱུ་དཀའ་མོ་ཡིན་པ་དང་། ད་ཐེངས་ཀྱི་ལས་འགུལ་འདིར་ཡང་འཛམ་གླིང་ཡུལ་གྲུ་གང་སར་གནས་པའི་བོད་མི་ཡོངས་ནས་རྒྱབ་སྐྱོར་གནང་རྒྱུའི་རེ་བ་ཡོད་སྐོར་བརྗོད་བྱུང་།
གསར་འགོད་པ། པ་སངས་ཚེ་རིང་།
བུ་འདིའི་ལས་འགུལ་དག་ལ་ཡི་རང་དང་བཀའ་དྲིན་ཆེ་་ཞུ་རྒྱུ་ཡིན། ཁོང་འདིས་འདི་ལྟར་འགན་ཁུར་བ་དང་ལས་འགུལ་སྤེལ་བ་ཙམ་གྱིས་ཧ་ལས་པ་རེད། ཁོང་གིས་བཀའ་མོལ་གནང་ཕྱོགས་འགའི་ཐད་ནས་དོགས་པ་དང་བསམ་ཚུལ་འགའ་བྱུང་སོང་། རྗེས་ཕྱོགས་ཕན་ཐོགས་སྲིད་སྙམ་ནས་འདིར་བཤད་འདོད་བྱུང་། ཁོང་ད་དུང་སློབ་ཕྲུག་ཅིག་གི་ཚོར་སྣང་རང་འཇག་ཁུར་ནས་སྐད་ཆ་བཤད་པ་ལས་ལས་འགུལ་བ་ཞིག་གི་གདེང་སྤོབས་དང་། ཚོར་སྣང་དེ་ཙམ་མི་འདུག དཔེར་ན་ཚིག་བེད་སྤྱོད་བྱེད་སྐབས། གསར་འགོད་པ་སོགས་བུ་རྒན་པ་ཚང་མ་རྒན་ལགས་རང་བེད་སྤྱོད་བྱེད་ཀི་འདུག སྐད་ཆ་བཤད་སྐབས་འཚབ་འཚུབ་ཆེན་པོ་དང་གོ་རིམ་མི་འདུག དེ་བཞིན་ཁོང་ལ་ཆབ་སྲིད་གོ་རྟོགས་དེ་ཙམ་མེད་པ་ལྟར་མཐོང་སོང་། ལས་འགུལ་འདི་ལྟར་སྤེལ་བ་དང་། བློས་གཏོང་འདི་ལྟར་བྱེད་ཐུབ་དུས། སྐད་ཆ་བཤད་སྟངས་དང་། ཆབ་སྲིད་གོ་རྟོགས་གང་ཐད་ནས་གོ་རྟོགས་ཡོད་པ་བྱ་རྒྱུ་དེའང་གལ་ཆེན་རེད་འདུག དེ་མིན་ཁ་ནས་གང་དྲན་དྲན་བཏོན་བསྡད་པ་ཡིན་ན། གསར་འགོད་པས་གཙོས་མང་པོ་ཞིག་གིས་བལྟ་སྲུང་དང་། ལྟ་ཉན་བྱས་སྡོད་ཡོད་དུས། ཉེན་འཚབ་ཀྱང་ཆེན་པོ་རེད།