ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་འོག་རྒྱལ་སྤྱིའི་ཀོ་ནི་ཧྥ་བུད་མེད་རྐང་སྤོལ་རྩེད་འགྲན་ཐོག་མ་ཕྱིར་འཐེན་བྱས་སྟབས། བོད་ཀྱི་བུད་མེད་རྐང་སྤོལ་རུ་ཁག་རྒྱལ་སྤྱིའི་ཀོ་ནི་ཧྥ་རྐང་སྤོལ་རྩེད་འགྲན་ཐོག་མཉམ་ཞུགས་བྱེད་པའི་གོ་སྐབས་མེད་པ་ཆགས་ཡོད་འདུག
འདི་ལོའི་ཕྱི་ཟླ་ ༦ ཚེས་ ༢༣ ནས་ ༣༠ བར་ཡུ་རོབ་ཀྱི་རྒྱལ་ཁབ་རོ་མ་ནི་ཡའི་ (Romania) སི་ཁ་ལེར་ལན་ཌི་ (Szeklerland) ཁུལ་དུ་ཚོགས་གཏན་འཁེལ་བའི་རྒྱལ་སྤྱིའི་ཀོ་ནི་ཧྥ་ (CONIFA) རྐང་སྤོལ་མཐུན་ཚོགས་ཀྱི་ཆེས་ཐོག་མའི་རྒྱལ་སྤྱིའི་བུད་མེད་རྐང་སྤོལ་རྩེད་འགྲན་ནང་བོད་ཀྱི་བུད་མེད་རུ་ཁག་མཉམ་ཞུགས་བྱ་གཏན་འཁེལ་ཡོད་ཀྱང་། ཁ་སང་རྐང་སྤོལ་རྩེད་འགྲན་གོ་སྒྲིག་ཚོགས་པའི་ངོས་ནས་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་འོག རྐང་སྤོལ་རྩེད་འགྲན་དེ་ཚོགས་ཐུབ་ཐབས་མེད་པའི་ཡོངས་བསྒྲགས་བྱས་ཡོད་པ་དང་། འདི་གར་གསར་འགོད་པར་བོད་ཀྱི་བུད་མེད་རྐང་སྤོལ་རུ་ཁག་གི་སློབ་སྟོན་པ་མགོན་པོ་རྡོ་རྗེ་ལགས་ཀྱིས་བོད་པའི་བུད་མེད་རུ་ཁག་ཀྱང་མཉམ་ཞུགས་བྱ་ཐུབ་པའི་གནས་སྟངས་མེད་སྐོར་བརྗོད་བྱུང་།
མགོན་པོ་རྡོ་རྗེ་ལགས་ཀྱིས། མདང་དགོངས་ཀོ་ནི་ཧྥ་རྐང་སྤོལ་རྩེད་འགྲན་གོ་སྒྲིག་ཚོགས་པས་འཕྲིན་ཡིག་ཅིག་བཏང་སྟེ། ཡུ་རོབ་རྒྱལ་ཁབ་རོ་མ་ནི་ཡའི་ནང་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་འོག འཚོག་གཏན་འཁེལ་བའི་ཆེས་ཐོག་མའི་རྒྱལ་སྤྱིའི་བུད་མེད་ཀྱི་རྐང་སྤོལ་རྩེད་འགྲན་འཚོགས་ཐུབ་ཀྱི་མི་འདུག་ཟེར་གྱི་འདུག ཅེས་བརྗོད་བྱུང་བ་དང་། རྒྱལ་སྤྱིའི་བུད་མེད་ཀྱི་རྐང་སྤོལ་རྩེད་འགྲན་ག་དུས་ཤིག་ལ་འཚོག་ཐུབ་མིན་ངེས་གཏན་མེད་སྟབས། ད་ལྟ་བོད་ཀྱི་བུད་མེད་རྐང་སྤོལ་རུ་ཁག་ཀྱང་བསྡུ་མཚམས་འཇོག་དགོས་བྱུང་ཡོད་འདུག
ཀི་ནི་ཧྥ་རྐང་སྤོལ་རྩེད་འགྲན་གོ་སྒྲིག་ཚོགས་པས་རྩེད་འགྲན་ཕྱིར་འཐེན་བྱེད་དོན་གཙོ་བོ་གང་ཡིན་སྐོར་ལ་མགོན་པོ་ལགས་ཀྱིས། རྐང་སྤོལ་རྩེད་འགྲན་མཚམས་འཇོག་དགོས་དོན་ནི་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་རེད་འདུག རྒྱུ་མཚན་གཞན་གང་ཡང་མི་འདུག ཅེས་བརྗོད་བྱུང་བ་དང་། ཉེ་སྔོན་བོད་རྒྱལ་ཡོངས་རྩེད་རིགས་ཚོགས་ཆུང་ངོས་ནས། བོད་རིགས་བུད་མེད་རྐང་སྤོལ་རྩེད་འགྲན་པ་གསར་པ་བསྡུ་རུབ་ཀྱི་གསལ་བསྒྲགས་གནང་ཞིང་། སྔོན་མ་ནས་རུ་ཁག་ནང་ཡོད་པ་རྣམས་ལ་འཕྲིན་ཡིག་ཕུལ་བ་བརྒྱུད་སྦྱོང་བརྡར་བྱེད་པར་ཡོང་དགོས་པའི་བརྡ་ཐོ་བརྒྱབ་ཡོད་ནའང་། ད་ལྟ་རྩེད་འགྲན་ཕྱིར་འཐེན་བྱས་སྟབས། དེ་རིང་ནས་བོད་རྒྱལ་ཡོངས་རྩེད་རིགས་ཚོགས་ཆུང་གིས་རྩེད་འགྲན་པ་མི་སྒེར་འཕྲིན་ཡིག་བརྒྱུད་རྩེད་འགྲན་མཚམས་འཇོག་དང་འབྲེལ་རྐང་སྤོལ་སྦྱོང་བརྡར་སོགས་ཀྱི་ལས་རིམ་ཡོངས་མཚམས་འཇོག་བྱས་པའི་བརྡ་ལན་སྤྲོད་ཀྱི་ཡོད་འདུག
ཀོ་ནི་ཧྥ་རྐང་སྤོལ་མཐུན་ཚོགས་ (Confederation of Independent Football Associations) འདི་ཐོག་མར་ཕྱི་ལོ་ ༢༠༡༣ ཟླ་ ༦ ཚེས་ ༧ ཉིན། ཧྥི་ཧྥ་རྒྱལ་སྤྱིའི་རྐང་སྤོལ་མཐུན་ཚོགས་ཀྱི་ངོས་འཛིན་མེད་པའི་རྒྱལ་ཁབ་དང་ས་ཁུལ་གྱི་རྐང་སྤོལ་རུ་ཁག་རྣམས་ལ་དམིགས་ཏེ་མགོ་བརྩམས་པ་ཞིག་ཡིན་པ་དང་། ཆེས་ཐོག་མའི་རྒྱལ་སྤྱིའི་རྐང་སྤོལ་འགྲན་བསྡུར་དེ་ཕྱི་ལོ་ ༢༠༡༤ ལོར་སི་ཝེ་ཌན་དུ་ཚོགས་ཡོད་པ་དང་། ཕྱི་ལོ་ ༢༠༡༨ ལོར་བོད་རྒྱལ་ཡོངས་སྐྱེས་པའི་རྐང་སྤོལ་རུ་ཁག་མཐུན་ཚོགས་དེས་གོ་སྒྲིག་བྱས་པའི་རྐང་སྤོལ་རྩེད་འགྲན་ནང་ཞུགས་མྱོང་ཡོད། ད་ཐེངས་ཀྱི་རྒྱལ་སྤྱིའི་བུད་མེད་རྐང་སྤོལ་རྩེད་འགྲན་ནང་ཁྱོན་རྒྱལ་ཁབ་དང་ས་ཁུལ་མི་འདྲ་བ་ ༦ གི་རུ་ཁག་མཉམ་ཞུགས་བྱ་འཆར་ཡོད་པ་དང་། བོད་ཀྱི་བུད་མེད་རུ་ཁག་དེ་སི་ཁ་ལེར་ལན་ཌི་(Szeklerland)དང་ཁ་མེ་རི་ཡ་ (Chameria) ཡི་རུ་ཁག་དང་འགྲན་རྒྱུ་ཡིན་འདུག
གསར་འགོད་པ། སྐལ་བཟང་སྦྱིན་པ།
