བོད་མི་ཚེ་རིང་ཡེ་ཤེས་ལགས་དང་འཆི་མེད་རྟ་མགྲིན་ལགས་རྣམ་གཉིས་ནས་བོད་མིའི་གཞིས་ཆགས་ཁག་ནང་སྦག་སྦག་སྐོར་བསྐྱོད་གནང་སྟེ་༧གོང་ས་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་བྷ་ར་ཊི་ནཱ་འབུལ་ལམ་ཞུ་དགོས་པའི་མཚན་རྟགས་བསྡུ་རུབ་གནང་གི་འདུག
དེ་རིང་ཉིན་གུང་ཆུ་ཚོད་ ༡༢ ཐོག་བཞུགས་སྒར་དྷ་སའི་མེག་གྷན་ཁྲོམ་གཞུང་དུ། བོད་མི་ཚེ་རིང་ཡེ་ཤེས་ལགས་དང་འཆི་མེད་རྟ་མགྲིན་ལགས་རྣམ་གཉིས་ཀྱིས། རྒྱ་གར་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་གྱི་སྤྱི་དམངས་ཀྱི་ཆེས་མཐོའི་གཟེངས་རྟགས་བྷ་ར་ཊི་ར་ཊི་ནཱ་ (Bharat Ratna) འབུལ་ལམ་ཞུ་ཆེད། རྒྱ་གར་རྒྱལ་ཡོངས་ཀྱི་བོད་མིའི་གཞིས་ཆགས་ཚང་མར་སྦག་སྦག་སྐོར་བསྐྱོད་བརྒྱུད་བོད་མིའི་ཚོགས་པ་ཁག་ནས་མཚན་རྟགས་བསྡུ་རུབ་གནང་གི་འདུག་ལ། ཐོག་མའི་ཆར་ཚེ་རིང་ཡེ་ཤེས་ལགས་ཀྱིས་ཁེར་རྐྱང་གི་ཐོག་ནས་སྦག་སྦག་སྐོར་བསྐྱོད་གནང་འཆར་ཡོད་ནའང་། འཆི་མེད་རྟ་མགྲིན་ལགས་ཁོང་གི་ལས་འགུལ་ནང་མཉམ་ཞུགས་གནང་ཡོད་འདུག
སྤྱིར་སྦག་སྦག་སྐོར་བསྐྱོད་ལས་འགུལ་འདི་ཁ་སང་ཕྱིི་ཚེས་ ༢༡ ནས་མགོ་བརྩམས་ཏེ་དྷ་ས་ཁུལ་གྱི་ཚོགས་པ་གཉིས་ནས་མཚན་རྟགས་བསྡུ་རུབ་ཞུས་ཟིན་འདུག་ལ། དེ་རིང་གསར་འགོད་གསལ་བསྒྲགས་སྟེང་ཚེ་རིང་ཡེ་ཤེས་ལགས་ཀྱིས། བོད་མིའི་སྒྲིག་འཛུགས་ཀྱི་ངོས་ནས་ཕྱི་ལོ་ ༢༠༢༠ ཟླ་ ༧ ཚེས་ ༡ ནས་འདི་ལོའི་ཕྱི་ཟླ་ ༦ ཚེས་ ༣༠ བར་༧རྒྱལ་བའི་བཀའ་དྲིན་རྗེས་དྲན་གྱི་ལོར་སྲུང་གཙི་ཞུ་ཡི་ཡོད་པ་ལྟར། རང་རེའི་བོད་མིའི་སྤྱི་ཚོགས་ནང་ལས་འགུལ་སྣ་ཚོགས་སྤེལ་དང་སྤེལ་མུས་ཡིན་ཡང་། རང་ཉིད་སྒེར་ངོས་ནས་༧རྒྱལ་བའི་བཀའ་དྲིན་རྗེས་དྲན་ཆེད་ཁོང་ལ་རྒྱ་གར་གཞུང་གིས་ཆེས་མཐོའི་གཟེངས་རྟགས་བྷ་ར་ཊི་ར་ཊི་ནཱ་འབུལ་དགོས་པའི་ཐད་ལས་འགུལ་སྤེལ་འདོད་བྱུང་བ་བཞིན། གཟེངས་རྟགས་དེ་ཉིད་ཀྱི་ཆ་རྐྱེན་གྱི་ཆ་ནས་༧གོང་ས་མཆོག་ཨང་ཀི་དང་པོར་སླེབས་ཀྱི་ཡོད་ནའང་། ད་བར་འབུལ་ཐུབ་མེད་པ་དེ་རྒྱལ་ཁབ་ཀྱི་སྲིད་ཀྱི་ལངས་ཕྱོགས་ཐད་ནས་བྱུང་ཡོད་སྲིད་ཡིན་ནའང་། འདས་ལོར་ནད་ཡམས་དེ་འགོས་ཁྱབ་སོང་བ་ནས་བཟུང་། རྒྱ་གར་གཞུང་གིས་རྒྱ་ནག་གི་མཉེན་ཆས་བཀག་སྡོམ་དང་། རྒྱ་གར་གྱི་མི་སེར་དཀྱུས་མའི་ཁྲོད་དུའང་རྒྱ་ནག་གི་ཚོང་ཟོག་བཀོལ་མཚམས་འཇོག་དགོས་པའི་ལས་འགུལ་སྤེལ་བ་སོགས་འགྱུར་བ་ཆེན་པོ་ཐེབས་པའི་སྐབས་འདིར། བོད་མི་ཚོ་ཁུ་སིམ་མེར་སྡོད་རྒྱུ་མེད་པ་མ་ཟད། ད་ལྟ་རྒྱ་གར་གཞུང་གིས་༧གོང་ས་མཆོག་ལ་གཟེངས་རྟགས་དེ་ཉིད་འབུལ་རྒྱུའི་དུས་ལ་བབ་ཡོད་པའི་ཚོར་བ་ཤུགས་ཆེར་སླེབས་པའི་རྒྱུ་མཚན་གྱིས་སྦག་སྦག་སྐོར་བསྐྱོད་ཀྱི་ལས་འགུལ་འདི་སྤེལ་ཡོད་སྐོར་འགྲེལ་བརྗོད་གནང་བྱུང་།
རྒྱ་གར་གྱི་མངའ་སྡེ་ཨུ་ཏར་ཁན་གྱི་རྒྱལ་ས་ལྡེ་ར་ལྡུན་གྱི་བདེ་སྐྱིད་གླིང་བོད་མིའི་གཞིས་ཆགས་སུ་གནས་སྡོད་བོད་མི་དྭང་ཞབས་ཟུར་པ་ཚེ་རིང་ཡེ་ཤེས་ལགས་དང་། སིམ་ལར་གནས་སྡོད་བོད་མི་འཆི་མེད་རྟ་མགྲིན་ལགས་རྣམ་གཉིས་ཀྱིས། རྒྱ་གར་གྱི་སྲིད་བློན་མུ་དྷི་མཆོག་གི་མཚན་ཐོག་ལ་བོད་མིའི་ཚོགས་པ་ཁག་གི་ལས་ཐམ་དང་མཚན་རྟགས་འཁོད་པའི་ཞུ་ཡིག་ཅིག་འབུལ་འཆར་ཡོད་འདུག
དེ་བཞིན་ཚེ་རིང་ཡེ་ཤེས་ལགས་ཀྱིས། འདས་པའི་ལོ་གཅིག་ནང་བོད་མི་སྒེར་པ་སྐོར་ཞིག་གིས་གོམ་བགྲོད་ལ་སོགས་པའི་ལས་འགུལ་སྤེལ་བ་ཙམ་ལས། དུས་རྒྱུན་དུ་གཞུང་འབྲེལ་མ་ཡིན་པའི་ཚོགས་པ་ཁག་གིས་མ་གཏོགས་ལས་འགུལ་སྤེལ་གྱི་མེད་པའི་རྣམ་པ་ཞིག་ཡོད་པ་མ་ཟད། བོད་མི་སྒེར་ངོས་ནས་ལས་འགུལ་སྤེལ་རྒྱུ་ཉུང་དྲགས་ཡོད་སྟབས། ལས་འགུལ་འདི་བརྒྱུད་ནས་བོད་མི་སྒེར་རེ་རེར་སྐུལ་འདེད་ཡོང་རྒྱུའི་རེ་བ་བྱེད་ཀྱི་ཡོད་སྐོར་བརྗོད་སོང་།
གསར་འགོད་པ། པ་སངས་ཚེ་རིང་།
