བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་གཞན་གཉིས་བཅས་འཕོ་འགྱུར་གཏོང་བའི་མང་མོས་ཐག་གཅོད་གནང་།

དེ་རིང་གྲོས་ཚོགས་དུས་བཅུ་པའི་ལས་ཉིན་བཅུ་པའི་སྔ་དྲོར། སྤྱི་འཐུས་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་ནས་གཞུང་འབྲེལ་གྲོས་ཆོད་གྲོས་འཆར་ཡིག་ཆ་ཨང་ ༣༩ པ་སྟེ། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་། ཁྲིམས་དཔོན་གཞན་གཉིས་བཙན་བྱོལ་བོད་མིའི་ཁྲིམས་སྒྲིག་དང་འགལ་ཡོད་པས་འཕོ་འགྱུར་གཏོང་དགོས་པའི་གྲོས་འཆར་བཏོན་ཏེ།  སྤྱི་འཐུས་ཁག་ཅིག་ནས་གྲོས་འཆར་དེར་རྒྱབ་སྐྱོར་ཡོད་མེད་དང་། ལས་ཐོག་གསུམ་འཕོ་འགྱུར་བཏང་བ་ཙམ་གྱིས་མི་ཕན་པར་མ་འོངས་པར་དཀའ་རྙོག་འདི་འདྲ་མ་ཡོང་བའི་ཆེད་དུ་ཁྲིམས་སྒྲིག་ཅིག་གསར་དུ་བཟོ་གལ་ཆེ་བ་སོགས་ཀྱི་དགོངས་ཚུལ་བྱུང་རྗེས། ཚོགས་གཙོ་མཆོག་གི་བཀའ་ལྟར་གསང་བའི་འོས་ཤོག་བླུགས་པ་བརྒྱུད། སྤྱི་འཐུས་ཀྱི་རྩ་འབོར་གསུམ་ཆ་གཉིས་བརྒལ་བ་སྤྱི་འཐུས་ ༣༡ ནས་འཕོ་འགྱུར་གཏོང་དགོས་གསུངས་བར་བརྟེན། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་དང་། ཁྲིམས་དཔོན་གཞན་ཀརྨ་དགྲ་འདུལ་ལགས་དང་བསྟན་འཛིན་ལུང་རྟོགས་ལགས་རྣམ་གཉིས་བཅས་འཕོ་འགྱུར་གཏོང་རྒྱུ་མང་མོས་ཐག་གཅོད་གནང་སོང་།

གཞུང་འབྲེལ་གྲོས་འཆར་སྙན་སྒྲོན་ཞུས་རྗེས། གྲོས་ཆོད་དེ་དང་འབྲེལ་ནས་ཚོགས་གཙོ་པདྨ་འབྱུང་གནས་མཆོག་ནས་གསལ་བཤད་གནང་སྐབས། དེ་རིང་ང་ཚོས་གྲོས་ཆོད་གྲོས་འཆར་འཁྱེར་ཡོང་བ་དེ་ནི་དགའ་ནས་མིན་པར་འུ་ཐུག་ནས་འཁྱེར་ཡོང་བ་ཡིན། ཆེས་མཐོའི་ཁྲིམས་ཞིབ་ཁང་ནས་དེ་འདྲ་ཞིག་མ་གནང་ན་བསམ་ནས་འབོད་སྐུལ་ག་ཚོད་ཞུས་པ་ཡིན་ནའང་དེ་འདྲ་གནང་སོང་། ང་ཚོས་ཡར་ཞུས་སྐབས་སུ་མང་པོ་ལབ་ཡོད། ད་ལྟ་འོས་བསྡུའི་ལས་རིམ་རེད། ཆེས་མཐོའི་ཁྲིམས་ཞིབ་ཁང་ནས་ཆབ་སྲིད་ཅིག་མ་འཁྲབ་ན་ཡག་པོ་འདུག་ཞུས་པ་ཡིན། ཆབ་སྲིད་མེད་གསུང་གི་འདུག ཅེས་དང་། ད་ལྟའི་ཏོག་དབྱིབས་གཉན་རིམས་ཀྱི་གནས་སྐབས་སུ་སྤྱི་འཐུས་གྲོས་ཚོགས་སྒོ་བརྒྱབ་ཚེ་བར་བརྒལ་གྱི་བཀའ་ཁྲོལ་མང་པོ་ཞིག་འགག་འགྲོ་ཡི་ཡོད་པ་དང་། འོས་བསྡུའི་ལས་རིམ་ནང་སྤྱི་འཐུས་རྒྱུན་ལས་རྣམས་ཟུར་དཔང་འགྲོ་ཐུབ་ཀྱི་མེད་པ་སོགས་ལ་བརྟེན། རྙོག་དྲ་ཅི་འབྱུང་ལ་ཚོད་དཔག་དཀའ་བ་དང་། དེ་ལ་བརྟེན་ནས་དགྲ་དགའ་གཉེན་སྡུག་དང་རྒྱལ་བའི་དགོངས་པ་འཁྲུག་གཞིར་འགྱུར་བའི་ཉེན་ཁ་ཡོང་གི་ཡོད་པས་དེ་དག་གི་འགན་ཆ་ཚང་ཆེས་མཐོའི་ཁྲིམས་ཞིབ་ཁང་གི་འཁུར་དགོས་སྐོར་ཞུས་ཡོད་ནའང་། ཁོང་ཚོས་འགྱུར་བ་གཏོང་གི་མིན་གསུངས་བྱུང་བ་དང་། དེ་འདྲ་ཡིན་ཚེ། སྤྱི་འཐུས་རྣམ་པས་ཀྱང་བཅའ་ཁྲིམས་ཀྱི་དགོངས་དོན་བཞིན་མི་བྱེད་ཀ་མེད་ཆགས་ཀྱི་ཡོད་སྐོར་ཞུ་སྐབས་རྣམ་པ་ཚོས་ག་རེ་གནང་ནའང་དེ་རྣམ་པ་ཚོས་གནང་ཡ་རེད་གསུངས་སྟབས། ཐེངས་འདིའི་གྲོས་ཆོད་གྲོས་འཆར་དེ་འཁྱེར་ཡོད་སྐོར་དང་། བཅའ་ཁྲིམས་ཆེས་མཐོ་ཁྲིམས་ཞིབ་ཁང་གི་སྲུང་མ་ཐུབ་ནའང་བོད་མི་མང་སྤྱི་འཐུས་ཀྱི་སྲུང་དགོས་པ་ཞིག་ཆགས་ཡོད་པ་དང་། གྲོས་ཆོད་དེ་བཅའ་ཁྲིམས་སྲུང་སྐྱོབ་རང་གི་ཆེད་དུ་ཡིན་སྐོར་གསུངས་བྱུང་།

ཡང་ཚོགས་གཙོ་མཆོག་གིས། སྤྱི་མང་གཏུག་བཤེར་སྒྲིག་གཞི་དོན་ཚན་ ༦༩ པའི་ནང་གསེས་ཏ་པ་དེ་བཅའ་ཁྲིམས་ཀྱི་སྒང་དུ་བསྡད་ནས་ཐག་གཅོད་བྱེད་ཀྱི་ཡིན་ཟེར་བ་དེ་རེད། དེ་རིང་ང་ཚོ་སྤྱི་འཐུས་རྒྱུན་ལས་ལ་ཐག་གཅོད་བྱས་པ་རེད། མ་འོངས་པར་སུ་ལ་ཡིན་ནའང་ཡོང་གི་རེད། ཞུ་གཏུག་གང་ཡང་བྱེད་མི་དགོས་པའི་ཐོག་ནས་ཁྲིམས་ཀྱི་ངོས་བཞེས་ཞེས་ཐག་གཅོད་བྱས་པ་རེད། ཞུ་ས་སྡོད་ས་གང་ཡང་མེད་པ་རེད། དེ་ནི་དམངས་གཙོའི་ལམ་ལུགས་ནང་དུ་ཏག་ཏག་སྡོད་ཀྱི་ཡོད་མེད་ཤེས་དཀའ་བ་དང་། དོན་ངོ་མར་རྒྱལ་ཁབ་གཞན་ལ་དཔེ་བླངས་བ་རེད། དཔེ་བལྟ་ཡ་མ་རེད། ད་ལྟ་ང་ཚོ་བཙན་བྱོལ་ནང་དུ་ཡོད་པ་རེད་ལ། བཙན་བྱོལ་བོད་མིའི་བཅའ་ཁྲིམས་ནི་གོང་ན་མེད་པ་དེ་རེད། དེའི་འོག་ཏུ་བསྡད་ནས་ང་ཚོས་ཕྱག་ལས་གནང་དགོས་པ་མ་གཏོགས། དེའི་སྒང་ལ་བསྡད་ནས་ཕྱག་ལས་གནང་ཚེ་བཅའ་ཁྲིམས་ལ་ནུས་པ་མེད་པ་བཟོ་ཡི་ཡོད་པ་རེད། ཅེས་གསུངས་སོང་།

གཞུང་འབྲེལ་གྲོས་ཆོད་གྲོས་འཆར་ཐོག་སྤྱི་འཐུས་ཁག་ཅིག་ནས་དགོངས་ཚུལ་གསུང་སྐབས། སྤྱི་འཐུས་ཟླ་བ་ཕུན་སྐྱིད་ལགས་ཀྱིས། བཅའ་ཁྲིམས་ནང་ཁྲིམས་ཞིབ་པ་འདེམས་དུས་དམ་འབུལ་ཞུ་ས་དེ་ཁྲིམས་ཞིབ་པ་ཆེ་བ་དེ་ཆགས་ཀྱི་ཡོད། ད་ཐེངས་ཁྲིམས་དཔོན་གསུམ་ཀ་གནས་དབྱུང་བཏང་བ་ཡིན་ན། གཞུག་ཏུ་ཁྲིམས་དཔོན་གསར་བ་གསུམ་དེར་དམ་འབུལ་ཇི་ལྟར་བྱ་རྒྱུ་ཡིན་མིན་གྱི་དོགས་འདྲི་གནང་བར། ཚོགས་གཙོ་པདྨ་འབྱུང་གནས་མཆོག་གིས། གལ་ཏེ་ཁྲིམས་ཞིབ་པ་རྣམས་འཕོ་འགྱུར་སོང་ན། དེ་ལ་དཔག་པའི་རྩ་ཁྲིམས་བསྐྱར་བཅོས་གནང་དགོས་སྐོར་འགྲེལ་བརྗོད་གནང་སོང་།

སྤྱི་འཐུས་མི་འགྱུར་རྡོ་རྗེ་ལགས་ཀྱིས་ད་ཐེངས་ཀྱི་གནད་དོན་དང་འབྲེལ་ནས་བཅའ་ཁྲིམས་ནང་འགྱུར་བ་དང་ཁ་གསལ་རུ་གཏོང་དགོས་པའི་ཐུགས་ཚོར་བྱུང་སྟབས། ད་ལྟའི་གྲོས་ཚོགས་ངོས་ནས་འབྱུང་འགྱུར་ལེགས་བཅོས་གཏོང་དགོས་པ་གང་ཡོད་མེད་ཀྱི་གྲོས་འཆར་ཞིག་འཁུར་ཡོང་ན་ལེགས་པོ་ཡོད་སྐོར་གྱི་དགོངས་ཚུལ་བཏོན་གནང་སོང་བ་དང་། གཞན་ཡང་སྤྱི་འཐུས་སྒྲོལ་མ་ཚེ་རིང་ལགས་ཀྱིས་ད་ཐེངས་བཅའ་ཁྲིམས་དང་ཁྲིམས་སྒྲིག་འགྲེལ་བརྗོད་བྱེད་སྟངས་ཀྱི་ཐོག་ནས་དཀའ་རྙོག་བྱུང་ཡོད་པ་དེ། ཁྲིམས་ཞིབ་པ་ལས་ཐོག་རྣམས་མར་ཕུད་ནས་སེལ་གྱི་མེད་སྐོར་དང་། ཁྲིམས་ཞིབ་ཁང་གིས་ཁྲིམས་ཡིག་དོན་ཚན་ ༦༩ པའི་ཀ་པ་དེ་ལྐོག་ལྐོག་སུད་སུད་ལ་བཞག་པ་ཞིག་རྩ་བ་ནས་ཡིན་གྱི་མ་རེད་བསམ་གྱི་ཡོད་ལ། ཁྲིམས་ཁང་ལ་དགོས་ངེས་ཀྱི་ཁྲིམས་དང་སྒྲིག་གཞི་དེ་ཚོ་ཁོང་ཚོས་བཟོ་ཡི་ཡོད་པ་དང་། ཁྲིམས་སྒྲིག་གསར་པ་བཟོས་པ་དང་འགྱུར་བ་ཕྱིན་པ་དེ་དག་སྤྱི་འཐུས་རྒྱུན་ལས་ལ་སླེབས་ཀྱི་ཡོད་བསམ་གྱི་ཡོད་སྐོར་དང་། ཁྲིམས་ཞིབ་པ་འཕོ་འགྱུར་བཏང་བ་དེས་དཀའ་རྙོག་སེལ་གྱི་མེད་སྟབས། གྲོས་འཆར་དེར་རྒྱབ་སྐྱོར་ཞུ་ཡི་མེད་སྐོར་དང་། དེའི་ཚབ་ཏུ་མཁས་པའི་ཚོགས་ཆུང་ཞིག་བཙུགས་ནས་དཀའ་རྙོག་སེལ་དགོས་པའི་དགོངས་ཚུལ་གསུངས་སོང་།

ཚོགས་གཞོན་ཨཅརྱ་ཡེ་ཤེས་ཕུན་ཚོགས་མཆོག་ནས་གྲོས་འཆར་བཏོན་ཞིང་མཁན་པོ་བསོད་ནམས་བསྟན་འཕེལ་ལགས་ནས་རྒྱབ་སྐྱོར་གནང་པའི་གྲོས་ཆོད་གྲོས་འཆར་ཡིག་ཆ་ཨང་ ༣༩ པའི་ནང་གྲོས་ཚོགས་ཚོགས་དུས་ ༡༠ པ་འཕར་འགྱང་གནང་དགོས་བྱུང་བའི་བརྒྱུད་རིམ་གསལ་བཤད་དང་སྦྲགས། སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པ་ཕར་འགྱངས་བྱས་པ་དང་འབྲེལ། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམས་ནས་ཁྲིམས་ཀྱིས་ངོས་བཞེས་ཞེས་པ་བརྒྱུད་སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་ཞིབ་བརྩད་གཅོད་དང་། ཁྲིམས་ཀྱིས་ངོས་བཞེས་ཞེས་པའི་དབང་ཚད་ཡོད་ཚུལ་རྒྱལ་ཁབ་གཞན་གྱི་ཁྲིམས་སྒྲིག་དང་སྦྱར་ནས་ཞྭ་དཔེ་ལྷམ་འགེབས་བྱས་ནས་དེ་འབྲེལ་ཐག་གཅོད་ཀྱི་བཀའ་ཁྱབ་བཏང་བ་བཅས་ནི་བཙན་བྱོལ་བོད་མིའི་བཅའ་ཁྲིམས་དང་འགལ་བར་བརྟེན། ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་དང་། ཁྲིམས་ཞིབ་པ་གཞན་ཀརྨ་དགྲ་འདུལ། ཁྲིམས་ཞིབ་པ་གཞན་བསྟན་འཛིན་ལུང་རྟོགས་བཅས་གྲོས་ཆོད་འདི་བཞག་ཉིན་ནས་འཕོ་འགྱུར་དགོས། ཞེས་བཀོད་འདུག

གྲོས་ཆོད་དེ་དང་འབྲེལ་ནས་ཚོགས་གཙོ་པདྨ་འབྱུང་གནས་མཆོག་ནས་གསལ་བཤད་གནང་སྐབས། དེ་རིང་ང་ཚོས་གྲོས་ཆོད་གྲོས་འཆར་འཁྱེར་ཡོང་བ་དེ་ནི་དགའ་ནས་མིན་པར་འུ་ཐུག་ནས་འཁྱེར་ཡོང་བ་ཡིན། ཆེས་མཐོའི་ཁྲིམས་ཞིབ་ཁང་ནས་དེ་འདྲ་ཞིག་མ་གནང་ན་བསམ་ནས་འབོད་སྐུལ་ག་ཚོད་ཞུས་པ་ཡིན་ནའང་དེ་འདྲ་གནང་སོང་། ང་ཚོས་ཡར་ཞུས་སྐབས་སུ་མང་པོ་ལབ་ཡོད། ད་ལྟ་འོས་བསྡུའི་ལས་རིམ་རེད། ཆེས་མཐོའི་ཁྲིམས་ཞིབ་ཁང་ནས་ཆབ་སྲིད་ཅིག་མ་འཁྲབ་ན་ཡག་པོ་འདུག་ཞུས་པ་ཡིན། ཆབ་སྲིད་མེད་གསུང་གི་འདུག ཅེས་དང་། ད་ལྟའི་ཏོག་དབྱིབས་གཉན་རིམས་ཀྱི་གནས་སྐབས་སུ་སྤྱི་འཐུས་གྲོས་ཚོགས་སྒོ་བརྒྱབ་ཚེ་བར་བརྒལ་གྱི་བཀའ་ཁྲོལ་མང་པོ་ཞིག་འགག་འགྲོ་ཡི་ཡོད་པ་དང་། འོས་བསྡུའི་ལས་རིམ་ནང་སྤྱི་འཐུས་རྒྱུན་ལས་རྣམས་ཟུར་དཔང་འགྲོ་ཐུབ་ཀྱི་མེད་པ་སོགས་ལ་བརྟེན། རྙོག་དྲ་ཅི་འབྱུང་ལ་ཚོད་དཔག་དཀའ་བ་དང་། དེ་ལ་བརྟེན་ནས་དགྲ་དགའ་གཉེན་སྡུག་དང་རྒྱལ་བའི་དགོངས་པ་འཁྲུག་གཞིར་འགྱུར་བའི་ཉེན་ཁ་ཡོང་གི་ཡོད་པས་དེ་དག་གི་འགན་ཆ་ཚང་ཆེས་མཐོའི་ཁྲིམས་ཞིབ་ཁང་གི་འཁུར་དགོས་སྐོར་ཞུས་ཡོད་ནའང་། ཁོང་ཚོས་འགྱུར་བ་གཏོང་གི་མིན་གསུངས་བྱུང་བ་དང་། དེ་འདྲ་ཡིན་ཚེ། སྤྱི་འཐུས་རྣམ་པས་ཀྱང་བཅའ་ཁྲིམས་ཀྱི་དགོངས་དོན་བཞིན་མི་བྱེད་ཀ་མེད་ཆགས་ཀྱི་ཡོད་སྐོར་ཞུ་སྐབས་རྣམ་པ་ཚོས་ག་རེ་གནང་ནའང་དེ་རྣམ་པ་ཚོས་གནང་ཡ་རེད་གསུངས་སྟབས། ཐེངས་འདིའི་གྲོས་ཆོད་གྲོས་འཆར་དེ་འཁྱེར་ཡོད་སྐོར་དང་། བཅའ་ཁྲིམས་ཆེས་མཐོ་ཁྲིམས་ཞིབ་ཁང་གི་སྲུང་མ་ཐུབ་ནའང་བོད་མི་མང་སྤྱི་འཐུས་ཀྱི་སྲུང་དགོས་པ་ཞིག་ཆགས་ཡོད་པ་དང་། གྲོས་ཆོད་དེ་བཅའ་ཁྲིམས་སྲུང་སྐྱོབ་རང་གི་ཆེད་དུ་ཡིན་སྐོར་དང་།  ཆེས་མཐོའི་ཁྲིམས་ཞིབ་ཁང་གི་གནང་སྟངས་དེ་བཅའ་ཁྲིམས་དོན་ཚན་ ༦༦ པ་ཆེས་མཐོའི་ཁྲིམས་ཞིབ་ཁང་གི་དབང་ཚད་དང་། དོན་ཚན་ ༥༨ པ་སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་ཞིབ་རྩད་གཅོད་མི་ཆོག་པ་དེར་འགལ་ཡོད་སྐོར་གསུངས་སོང་།

གསར་འགོད་པ། ཀླུ་མགོན་ཐར།