བདེ་ལེགས་སྨན་ཁང་གིས་རང་ལོ་ ༦༠ ཡན་རྣམས་ལ་དངོས་སུ་ཏོག་དབྱིབས་སྔོན་འགོག་སྨན་ཁབ་རྒྱག་པའི་མགོ་བཙུགས་ཡོད་པ་དང་དང་པོ་རྒྱ་གར་གཞུང་གི་ཏོག་དབྱིབས་སྐོར་གྱི་མཉེན་ཆས་ཨ་རོ་གྱ་སེ་ཏུ་ནང་ཐོ་འགོད་བྱེད་དགོས་ཀྱི་འདུག
དེ་རིང་བཞུགས་སྒར་དྷ་སའི་གངས་སྐྱིད་དུ་རྟེན་གཞི་བྱས་པའི་བདེ་ལེགས་སྨན་ཁང་གིས། དྷ་སར་གནས་སྡོད་བོད་མི་དགུང་ལོ་ ༦༠ ཡན་རྣམས་ལ་དངོས་སུ་ཏོག་དབྱིབས་སྔོན་འགོག་སྨན་ཁབ་རྒྱག་པའི་མགོ་བརྩམས་པ་དང་བསྟུན། སྨན་པ་བསྟན་འཛིན་བརྩོན་འགྲུས་ལགས་ཀྱིས་བོད་མི་རྣམས་ཀྱིས་རྒྱ་གར་གཞུང་གི་ཨ་རོ་གྱ་སེ་ཏུ་ (aarogya setu) དྲ་རྒྱ་བརྒྱུད་སྔོན་འགོག་སྨན་ཁབ་ཆེད་ཐོ་འགོད་ཞུ་དགོས་སྐོར་དང་། བོད་མིའི་སྤྱི་ཚོགས་ནང་ཁྲག་ཤེད་དང་གཅིན་སྙིའི་ནད་གཞི་ཡོད་མཁན་ཚོར་སྔོག་འགོག་སྨན་ཁབ་བརྒྱབ་མི་ཆོག་པའི་གནས་ཚུལ་རྫུན་མ་ཞིག་ཁྱབ་གདལ་འགྲོ་བཞིན་འདུག་ཀྱང་། དོན་དངོས་ཐོག་ནད་གཞི་དེ་དག་ཡོད་མཁན་ཚོས་ངེས་པར་དུ་འགོག་ཁབ་བརྒྱབ་དགོས་ཀྱི་ཡོད་སྐོར་བརྗོད་བྱུང
འདི་གའི་གསར་འགོད་པ་ཡུལ་དངོས་སུ་བཅར་ཏེ་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་སུ་བཀའ་འདྲི་ཞུས་པར་ཁོང་གིས། ཁ་སང་ནས་ང་ཚོ་བདེ་ལེགས་སྨན་ཁང་ལ་སྔོན་འགོག་སྨན་ཁབ་རག་ནས་མང་ཚོགས་ཁྲོད་ནས་དགུང་ལོ་ ༦༠ ཡན་རྣམས་ལ་བརྒྱབས་པ་ཐེངས་དང་པོ་ཆགས་ཀྱི་ཡོད། སྤྱིར་བདེ་ལེགས་སྨན་ཁང་འདི་ཁེ་མེད་ཀྱི་ཚོགས་སྡེ་ཞིག་ཡིན་ནའང་། ད་ལྟའི་ཆར་རྒྱ་གར་གཞུང་ངོས་ནས་བདེ་ལེགས་སྨན་ཁང་འདི་སྒེར་པའི་སྨན་ཁང་ཞིག་ལ་ངོས་འཛིན་བྱས་ཡོད་སྟབས། ང་ཚོས་གཞུང་ལ་སྙན་ཞུ་བརྒྱབ་ནས་སྨན་ཁབ་ཉོ་དགོས་ཀྱི་ཡོད་ཅིང་། མི་རེ་རེའི་ཆེད་ཧིན་སྒོར་ ༡༥༠ གཞུང་ལ་འབུལ་དགོས་ཀྱི་ཡོད་ཀྱང་། ད་ལྟའི་ཆར་ང་ཚོས་དགུང་ལོ་ ༦༠ ཡན་རྣམས་ཀྱི་ས་ནས་དངུལ་ལེན་མི་དགོས་པར་རྒྱ་གར་གཞུང་ལ་བདེ་ལེགས་སྨན་ཁང་རང་ནས་འབུལ་རྒྱུ་ཡིན། ཅེས་བརྗོད་བྱུང་།
འགོག་ཁབ་ཐོ་འགོད་བྱེད་སྟངས་སྐོར་ལ་ཁོང་གིས། ད་ལྟའི་ཆར་གལ་ཆེ་ཤོས་དེ་མང་ཚོགས་ངོས་ནས་རྒྱ་གར་གཞུང་གི་མཉེན་ཆས་ཨ་རོ་གྱ་སེ་ཏུ་ (https://www.aarogyasetu.gov.in/applink/) ནང་སོ་སོའི་ཁ་པར་ཨང་གྲངས་ཐོག་ནས་ཐོ་འགོད་བྱེད་དགོས་པ་དང་། ཐོ་འགོད་བྱེད་སྐབས་དེ་སྔ་ཡིན་ན་རིན་མེད་(Free)ཀྱི་གདམ་ཀ་དེར་མནན་ཏེ། རྒྱ་གར་གཞུང་གི་སྨན་ཁང་ལ་འགྲོ་དགོས་ཀྱང། ད་ལན་རིན་པ་སྤྲོད་དགོས་པའི་(Paid)གདམ་ཀ་དེར་བདམས་དགོས་ལ། དེའི་རྗེས་སྨན་ཁབ་རྒྱག་སའི་ས་ཚིགས་དེ་བདེ་ལེགས་སྨན་ཁབ་གདམ་དགོས་སྐོར་འགྲེལ་བརྗོད་གནང་བྱུང་ལ། མང་ཚོགས་ངོས་ནས་རྒྱ་གར་གཞུང་གི་འགོག་ཁབ་ཀྱི་ལས་གཞིའི་ལམ་སྟོན་གཞིར་བཟུང་ཐོ་འགོད་བྱེད་དགོས་སྐོར་བརྗོད་བྱུང་།
ཡང་མང་ཚོགས་ཁྲོད་ནད་གཞིའི་རྐྱེན་པས་སྨན་ཁབ་བརྒྱབ་ཆོག་མིན་གྱི་ཐད་ལ་གནས་ཚུལ་བདེན་པ་མིན་པ་མང་པོ་ཞིག་ཁྱབ་བཞིན་པར་བརྟེན། སྨན་པ་བསྟན་འཛིན་བརྩོན་འགྲུས་ལགས་སུ་ནད་གཞི་ག་རེ་ཡོད་ན་སྔོན་འགོག་སྨན་ཁབ་བརྒྱབ་ཆོག་གི་མེད་པ་རེད་ཅེས་དྲིས་པར་ཁོང་གིས། ཟླ་བ་གཅིག་ནང་ཚུད་ལ་སྔོན་འགོག་སྨན་ཁབ་གང་རུང་བརྒྱབ་མྱོང་བ་དང་། སྦྲུམ་མ་རྣམས། ལོ་ན་ ༡༨ མན་ཆད། དེ་བཞིན་ཁྲག་འབྱམས་པའམ་ཁྲག་ཤོར་བ་ (Bleeding disorder)། གཞན་ཡང་ཁབ་ཀྱི་རྒྱུ་ཆ་ལ་མི་འཕྲོད་མཁན་བཅས་ཀྱིས་གནས་སྐབས་རིང་སྔོག་འགོག་སྨན་ཁབ་བརྒྱབ་མི་ཆོག་སྐོར་བརྗོད་བྱུང་ལ། ཡང་སྤྱི་ཚོགས་ཁྲོད་ཁྲག་ཤེད་དང་གཅིན་སྙིའི་ནད་གཞི་ཅན་རྣམས་ཀྱིས་འགོག་ཁབ་བརྒྱབ་མི་ཉན་པའི་སྐད་ཆ་ཞིག་འགྲོ་བཞིན་པའི་ཐད་ཁོང་གིས། རྒྱ་གར་གཞུང་ངོས་ནས་ནད་གཞི་དེ་དག་ཡོད་མཁན་ཚོས་སྔོན་འགོག་སྨན་ཁབ་བརྒྱབ་དགོས་པ་མ་ཟད། ད་དུང་རང་ལོ་ ༤༥ ཡན་རྣམས་ཀྱི་ཁྲོད་འདས་པའི་ལོ་ ༡༠ ནང་ཁྲག་ཤེད་དང་གཅིན་སྙིའི་ནད་གཞི་ཕོག་ཡོད་ཚེ་སྔོན་འགོག་སྨན་ཁབ་བརྒྱབ་དགོས་པའི་ལམ་སྟོན་གནང་ཡོད་སྐོར་འགྲེལ་བརྗོད་གནང་བྱུང་།
ད་ཐེངས་བདེ་ལེགས་སྨན་ཁབ་ཀྱིས་རྒྱག་བཞིན་པའི་སྔོན་འགོག་སྨན་ཁབ་དེ་ཨེས་ཏྲ་ཛེ་ནེ་ཁ་ (AstraZeneca) དང་ཨོག་སི་ཧྥོར་ཌི་གཉིས་ཀྱིས་བཟོས་པའི་ཀོ་ཝི་ཤིལ་ཌི་ (Covishield) དེ་ཡིན་ཞིང་། ཟླ་འདིའི་ཕྱི་ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་རྫོང་གི་ཛོ་ནལ་སྨན་ཁང་དུ་སྔོག་འགོག་སྨན་ཁབ་དེ་སྒྲོན་སྐབས། མགོན་པོ་ཁོང་ཉིད་ཀྱིས། ནད་པ་ཚོས་ཀྱང་ཕྱོགས་ཡོངས་ཀྱི་ཁེ་ཕན་གྱི་ཆེད་དུ་འགོག་ཁབ་འདི་བརྒྱབ་རྒྱུ་ཧ་ཅང་གལ་ཆེན་པོ་ཡིན་སྟབས། ངོས་ཀྱིས་འགོག་ཁབ་འདི་བརྒྱབས་པ་ཡིན། མི་མང་པོ་ཞིག་ལ་འགོག་ཁབ་འདི་རྒྱག་པའི་བློ་སྤོབས་ཡོང་བར་ངོས་ཀྱིས་སྐུལ་མ་བྱེད་འདོད་བྱུང་། ཞེས་བཀའ་སློབ་གནང་ཡོད་པ་རེད།
ཐོ་འགོད་བྱེད་སྟངས། https://www.youtube.com/watch?v=XmA0-_e2gpQ
གསར་འགོད་པ། པ་སངས་ཚེ་རིང་།
