དེ་རིང་གྲོས་ཚོགས་ཀྱི་ལས་ཉིན་བཅུ་པའི་ཕྱི་དྲོར་སྤྱི་འཐུས་ཁག་ཅིག་ནས་ནང་པ་ལའི་དོན་རྐྱེན་ཁྲོད་ཀྱི་བོད་མི་རྣམས་ཀྱི་ཚིག་ཐོར་ཞིབ་འཇུག་མང་པོ་གནང་མ་དགོས་པར་ཆབ་སྲིད་འབྲེལ་ཡོད་དང་འབྲེལ་ཆགས་ཁོངས་སུ་འཇོག་ཐུབ་ན་ལེགས་པའི་རེ་སྐུལ་ཞུས་པ་ལྟར་གང་ཐུབ་བསམ་ཤེས་གནང་རྒྱུ་ཡིན་སྐོར་གསུངས་སོང་།
སྤྱི་འཐུས་སྨོན་ལམ་མཐར་ཕྱིན་སོགས་སྤྱི་འཐུས་ཁག་ཅིག་ནས་ཕྱི་ལོ་ ༢༠༠༦ ལོར་ནང་པ་ལའི་དོན་རྐྱེན་སྐབས་སུ་ཡོང་བའི་བོད་མི་བཙན་བྱོལ་བ་རྣམས་ཀྱི་ཚིག་ཐོ་ལ་ཞིབ་འཇུག་མང་པོ་གནང་མ་དགོས་པར་ཆབ་སྲིད་འབྲེལ་ཡོད་དང་འབྲེལ་ཆགས་ཁོངས་སུ་འཇོག་ཐུབ་ན་ཡག་པོ་ཡོད་པའི་རེ་སྐུལ་གནང་བར་བདེ་སྲུང་བཀའ་བློན་འཕགས་པ་ཚེ་རིང་མཆོག་གིས། བདེ་སྲུང་ལས་ཁུངས་ནས་ནང་པ་ལའི་དོན་རྐྱེན་དང་འབྲེལ་བ་ཡོད་བ་རྣམས་ལ་གནད་དོན་དེ་དང་འབྲེལ་ནས་རྒྱབ་གཉེར་ཀྱི་ཡི་གེ་གང་འཚམ་སྤྲོད་ཀྱི་ཡོད་པ་དང་། ཆབ་སྲིད་བཙོན་པའི་ཁོངས་ཀྱི་ཆབ་སྲིད་འབྲེལ་ཡོད་འབྲེལ་ཆགས་ཀྱི་གཏན་འབེབ་ཀྱི་སྒྲིག་གཞི་ཞིག་ཡོད་པ་དང་། མ་འོངས་པར་སྒྲིག་གཞི་བསྐྱར་བཅོས་སྐབས་གང་ཐུབ་བསམ་ཤེས་བྱ་རྒྱུ་ཡིན་སྐོར་གསུངས་སོང་།
སྤྱི་འཐུས་ཁག་ཅིག་ནས་སྣེ་ལེན་ཁང་གི་ཁོར་ཡུག་གཙང་སྦྲ་དང་གཞུང་ལམ་ལེགས་བཅོས་དགོས་སྐོར་སོགས་གསུངས་སྐབས། ཨ་ཀྲུག་ཚེ་བརྟན་ལགས་ནས་དྷ་ས་ཁུལ་གྱི་གསར་འབྱོར་ཚོར་སྡོད་ཁང་གསར་རྒྱག་བྱེད་ཐུབ་ཀྱི་མེད་སྟབས། སྣེ་ལེན་ཁང་ལ་ས་ཁྱོན་ཆེན་པོ་ཡོད་པ་དང་ད་ལྟ་བོད་ནས་གསར་འབྱོར་དེ་ཙམ་ཡོང་གི་མེད་པ་སོགས་ལ་བརྟེན། སྣེ་ལེན་ཁང་གི་ཁང་པ་སྟོང་པ་དེ་ཚོ་གསར་འབྱོར་བ་ཚོར་སྤྲོད་ཐུབ་པར་བསམ་ཤེས་བྱེད་དགོས་སྐོར་གསུངས་བའི་ཐད་བདེ་སྲུང་བཀའ་བློན་མཆོག་གིས། ད་ལྟ་སྣེ་ལེན་ཁང་ཁག་གཞུང་འབྲེལ་གྱི་ངོས་ནས་གང་ཐུབ་ཅི་ཐུབ་ཀྱིས་བེད་སྤྱོད་གཏོང་བཞིན་ཡོད་པ་དང་། དཔེར་ན་དྷ་སའི་སྣེ་ཁང་ལ་དེ་སྔོན་གསར་འབྱོར་མང་པོ་མེད་སྐབས་ལས་བྱེད་སྦྱོང་བརྡར་བྱེད་ཆེད་བེད་སྤྱོད་བྱས་ཡོད་པ་དང་། ཏོག་ནད་ཀྱི་གནས་སྐབས་སུ་ཟུར་བཀག་ཆེད་བེད་སྤྱོད་བཏང་སྟེ་ཕན་ཐོགས་ཆེན་པོ་བྱུང་ཡོད་སྐོར་དང་། གསར་འབྱོར་གྱི་སྡོད་གནས་བཟོ་བར་བཀའ་བློན་མཆོག་གི་ལས་ཡུན་རིང་ཁག་པོ་ཆགས་ཡོད་སྐོར་གསུངས་སོང་། སྤྱི་འཐུས་མི་འགྱུར་རྡོ་རྗེ་ལགས་ནས་སྣེ་ལེན་ཁང་དུ་གསར་འབྱོར་བ་ཡོད་མེད་ལ་མ་བལྟོས་པར་འཛིན་སྐྱོང་གི་ངོས་ནས་སྐབས་དང་དུས་སོ་སོར་དགོངས་པ་བཞེས་དགོས་པ་ཞིག་ཡིན་ནའང་། སྣེ་ལེན་ཁང་གི་མིང་དེ་མུ་མཐུད་གནས་དགོས་པ་དང་། དེ་ལ་ལོ་རྒྱུས་རང་བཞིན་ལྡན་པའི་གནས་སྟངས་ཞིག་ཆགས་ཡོད་པ་དང་། དེའི་མིང་ལ་འགྱུར་བ་མ་གཏང་བར་བདག་པོ་རྒྱག་དགོས་སྐོར་གྱི་དགོངས་ཚུལ་གསུངས་སོང་།
དེ་རིང་ཉིན་རྒྱབ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་ནས་དེ་སྔོན་འོས་བསྡུ་ལས་ཁང་གི་ལས་དོན་དང་འབྲེལ་བའི་དོགས་འདྲིའི་རིགས་ལ་ལན་འདེབས་གསལ་བཤད་གནང་སྐབས། སྔོན་འགྲོའི་འོས་བསྡུ་དང་འབྲེལ་ནས་དབུས་འོས་བསྡུ་ལས་ཁང་ངོས་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་གཞི་རྩར་བཟུང་ནས་ལག་བསྟར་བྱ་རྒྱུའི་འབད་བརྩོན་ཞུས་པ་ལས། འོས་བསྡུའི་ལས་དོན་གྱི་རྣམ་པ་རྒྱ་ཆུང་རུ་བཏང་མེད་པ་དང་། དགེ་འདུན་པ་རྣམས་ནས་དེབ་སྐྱེལ་ཞུ་རྒྱུའི་ཆ་རྐྱེན་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༣ གྱི་ནང་གསེས་ ༢ པའི་ནང་། ཆོས་བརྒྱུད་སོ་སོའི་འོས་གཞིའི་ཁོངས་སུ་སེར་སྐྱ་ཁྱད་མེད་ཞུགས་འཐུས་དང༌། འོས་འཕེན་པ་རྣམས་དགོན་ཁག་དང༌། དེ་མིན་ཆོས་ཀྱི་ཚོགས་སྡེ་ཅི་རུང་ཞིག་ནང་ཡོད་པའི་གྲྭ་པ་དང་སྔགས་བཙུན་ངེས་པར་ཡིན་དགོས། ཞེས་གསལ་བ་བཞིན་ཆོས་སྡེ་ཁག་ནས་ཐོ་གཞུང་གཞིར་བཟུང་དང་། དེ་མིན་ཁ་འཐོར་གྲྭ་བཙུན་སྔགས་གསུམ་རྣམས་ཆོས་ཀྱི་ཚོགས་སྡེ་ཁག་ནས་ཡིན་པའི་ངོས་སྦྱོར་ཡོད་ཕྱིན་སྒྲིག་གསལ་དེབ་སྐྱེལ་ཞུ་དགོས་པའི་བཀོད་ཁྱབ་བཏང་ཡོད་སྐོར་དང་། དེ་བཞིན་ཆོས་བརྒྱུད་རིས་མེད་རྣམས་ལ་འོས་འཕེན་རྒྱུའི་ཐོབ་ཐང་ཡོད་མེད་ཐད། འོས་བསྡུའི་སྒྲིག་གཞི་དོན་ཚན་ ༣༧ ནང་གསེས་ ༡ པོའི་ཀ་པ་ནང་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ལྔ་མ་གཏོགས་རིས་མེད་ཟེར་བ་ཞིག་གསལ་མེད་སྟབས། མ་འོངས་པར་སྤྱི་འཐུས་ལྷན་ཚོགས་ངོས་ནས་རིས་མེད་སྐོར་ཐག་གཅོད་གང་གནང་བ་དེར་ལག་བསྟར་ཞུ་རྒྱུ་ཡིན་སྐོར་གསུངས་སོང་།
གསར་འགོད་པ། པ་སངས་ཚེ་རིང་། ཀླུ་མགོན་ཐར།
