དེ་རིང་བཅའ་ཁྲིམས་དོན་ཚན་ ༦ བསྐྱར་བཅོས་གཏན་འབེབ་གནང་།

བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ནས་སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་ཞིབ་རྩད་གཅོད་མི་ཆོག་པའི་སྐོར་གྱི་བཅའ་ཁྲིམས་བསྐྱར་བཅོས་ཁྲིམས་འཆར་དེ་གཏན་འབེབ་གནང་ཐུབ་མ་སོང་།

དེ་རིང་གྲོས་ཚོགས་ཀྱི་ལས་ཉིན་ ༡༡ པའི་ཁྲིམས་བཟོའི་ལས་དོན་ཁྲོད། སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་གཞུང་འབྲེལ་བཅའ་ཁྲིམས་བསྐྱར་བཅོས་ཀྱི་གྲོས་ཆོད་གྲོས་འཆར་ཡིག་ཆ་ཨང་ ༤༢ པ་སྟེ། བཅའ་ཁྲིམས་བསྐྱར་བཅོས་དོན་ཚན་ ༩ བསྣམས་ཡོད་པའི་ནང་ནས་དོན་ཚན་ ༦ གཏན་འབེབ་དང་གཅིག་ཕྱིར་བསྡུ། གཉིས་གཏན་འབེབ་གནང་ཐུབ་མ་སོང་།

བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ཐོག་སྤྱི་འཐུས་ཁག་ཅིག་ནས་དགོངས་ཚུལ་གསུངས་སྐབས། དགག་པ་གནང་མཁན་ཚོས་བཅའ་ཁྲིམས་དོན་ཚན་ ༥༨ པ་དེ་ཆེས་མཐོའི་ཁྲིམས་ཞིབ་ཁང་གི་དབང་ཚད་དང་ལྷག་པར་དུ་བཅའ་ཁྲིམས་ཀྱི་ཚད་འཛིན་དང་ཆེས་མཐོའི་ཁྲིམས་ཞིབ་ཁང་གི་དབང་ཚད་དང་འབྲེལ་བ་ཡོད་པས་ལས་སླ་བོ་བྱས་ནས་ཐག་གཅོད་གནང་ན་གཏན་ནས་མི་འགྲིག་པ་དང་། དེ་བཞིན་ཁ་སང་ཁྲིམས་ཞིབ་པ་གསུམ་འཕོ་འགྱུར་བཏང་བ་དང་དེ་རིང་ཁྲིམས་འཆར་བསྐྱར་བཅོས་བྱས་པ་དེ་ཁ་སང་དང་འབྲེལ་བ་ཐད་ཀར་ཆགས་ཀྱི་ཡོད་པ་དང་། ཁ་སང་གི་ཁྲིམས་འཆར་དེ་ཕྱིར་འཐེན་བྱ་རྒྱུའི་ཁྲིམས་འཆར་གསར་པ་བཅུག་དགོས་སྐོར་དང་། དེ་བཞིན་སྤྱི་འཐུས་ལྷན་ཚོགས་ཀྱིས་ཁྲིམས་ཞིབ་པ་སོགས་ཚང་མ་འཕོ་འགྱུར་གཏོང་ཆོག་གི་ཡོད་པ་ལྟར། སྤྱི་འཐུས་ལྷན་ཚོགས་ཀྱང་འཕོ་འགྱུར་གཏོང་ཆོག་པའི་ལམ་ག་ཞིག་བཟོ་དགོས་སྐོར་སོགས་གསུངས་སོང་ལ། སྤྱི་འཐུས་ཚོགས་གཙོ་མཆོག་ནས་སྤྱི་འཐུས་བྱེ་བྲག་པ་འཕོ་འགྱུར་གཏང་ན་ལམ་ཁ་ཡོད་པ་མ་གཏོགས་སྤྱི་འཐུས་ལྷན་ཚོགས་འཕོ་འགྱུར་གཏོང་ཐུབ་མཁན་སུ་གང་མེད་སོགས་ཀྱི་གསལ་བཤད་གནང་སོང་།

བཅའ་ཁྲིམས་བསྐྱར་བཅོས་དོན་ཚན་ ༩ ཡི་ནང་ནས་བཅའ་ཁྲིམས་དོན་ཚན་ང་བརྒྱད་པ། སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་ཞིབ་རྩད་གཅོད་མི་ཆོག་པའི་ནང་གསེས་དང་པོ། སྤྱི་འཐུས་ལྷན་ཚོགས་དང་། སྤྱི་འཐུས་རྒྱུན་ལས། གཞན་ཡང་སྤྱི་འཐུས་ལྷན་ཚོགས་ཀྱི་ཚོགས་ཆུང་ཁག་གི་ལས་དོན་གང་ཞིག་ཚད་ལྡན་ཡིན་མིན་དང་། ཐག་གཅོད་བྱེད་ཕྱོགས་བཅའ་ཁྲིམས་དང་སྒྲིག་གཞི་ཁག་དང་མཐུན་མིན་ལ་བསྙད་དེ་ཁྲིམས་ཞིབ་ཁང་ནས་རྩད་གཅོད་མི་ཆོག་ཅེས་པའི་བསྐྱར་བཅོས་དེ་གཏན་འབེབ་གནང་ཐུབ་མ་སོང་།

བཅའ་ཁྲིམས་བསྐྱར་བཅོས་གཏན་འབེབ་གནང་ཐུབ་པ་ཁག་ནི།  བཅའ་ཁྲིམས་དོན་ཚན་བཞི་བཅུ་པ་སྤྱི་འཐུས་ལྷན་ཚོགས་ཀྱི་ཚོགས་འདུ་དང་འབྲེལ། འཆར་ཅན་སྤྱི་འཐུས་ལྷན་ཚོགས་ཀྱི་ཚོགས་འདུའི་ཚོགས་ཚེས་དང༌། དུས་ཡུན། ས་གནས་བཅས་སྤྱི་འཐུས་རྒྱུན་ལས་དང་གོ་བསྡུར་ཐོག་སྤྱི་འཐུས་ཚོགས་གཙོ་ལྷན་རྒྱས་ཀྱིས་གཏན་ལ་ཕབ་པ་ལྟར་ཚོགས་དྲུང་ལས་ཁུངས་ནས་སྤྱི་འཐུས་སོ་སོར་ཚོགས་བསྐོང་བརྡ་ཁྱབ་གཏོང་རྒྱུ་དང༌། ཚོགས་འདུ་སྔོན་མ་གྲོལ་བ་ནས་ཟླ་དྲུག་ནང་ཚུན་ཚོགས་འདུ་རྗེས་མ་དབུ་ཚུགས་ཟིན་པ་དགོས་རྒྱུ། ཞེས་པ་དེར། འོན་ཀྱང་། ནད་ཡམས་དང་དམག་འཁྲུག འབྱུང་བའི་འཇིག་པ་བཅས་གང་རུང་དབང་གིས་དཀའ་ངལ་ལྡོག་མེད་འཕྲད་སྐབས་ཚོགས་འདུ་ཕར་འགྱངས་བྱ་ཆོག་པ་དང་། དུས་ཚོད་ངེས་ཅན་ནང་སྔོན་རྩིས་འཆར་འབུལ་དང་བཀའ་འཁྲོལ་བྱ་དགོས་རྣམས་སྤྱི་འཐུས་རྒྱུན་ལས་ཚོགས་ཆུང་གིས་ཞིབ་འཇུག་དང་འབྲེལ་བཀའ་འཁྲོལ་གཏན་འབེབས་བྱ་ཆོག ཅེས་པ་ཁ་སྣོན་གནང་འདུག

བཅའ་ཁྲིམས་དོན་ཚན་རེ་གསུམ་པ་དོན་ཚན་དང་པོ་ཆེས་མཐོའི་ཁྲིམས་ཞིབ་པ་ཆེ་བ་བསྐོ་བཞག་དང་འབྲེལ། ཆེས་མཐོའི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་བཅས་སོ་སོའི་གོ་ཡུལ་སྟོང་པ་ནམ་ཐོན་ལ་ཆེས་མཐོའི་ཁྲིམས་ཞིབ་པ་ཆེ་བ་དང༌། སྤྱི་འཐུས་ཚོགས་གཙོ་ཚོགས་གཞོན། སྲིད་སྐྱོང་བཅས་ཚང་འཛོམས་བྱུང་ན་སྨོས་མེད་དང་། གལ་ཏེ་ཚང་འཛོམས་མ་ཐུབ་ཚེ་ངོ་ཡོད་ལྷན་ཚོགས་ཀྱིས་སྐབས་དེའི་འོས་མི་འདེམས་སྒྲུག་ཁོ་ནའི་ཆེད་བསྐོ་འཛུགས་བྱས་པའི་མི་འགྲོ་གསུམ་མམ་ལྔ་ཡོད་པའི་འདེམས་སྒྲུག་ཚོགས་ཆུང་གིས་ཉིས་ལྡབ་ལས་མ་ཉུང་བའི་འཆར་ཕུལ་ལྟར་སྤྱི་འཐུས་ལྷན་ཚོགས་སུ་འོས་བསྡུའི་ལམ་ནས་མང་མོས་ཐོབ་པ་དེར་ཁྲིམས་ཞིབ་པ་ཆེ་བའམ་ཁྲིམས་ཞིབ་པར་འོས་ཐོན་བྱུང་བར་ངོས་འཛིན་བྱ་རྒྱུ། ཞེས་བསྐྱར་བཅོས་གནང་འདུག་ལ། དེ་བཞིན་དབུས་འོས་བསྡུའི་སྤྱི་ཁྱབ་འགན་འཛིན་དང་། སྤྱི་ཁྱབ་རྩིས་ཞིབ་ལས་ཁང་གི་རྩིས་ཞིབ་སྤྱི་ཁྱབ་པ། ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་གཅིག་དང་། ཚོགས་མི་གཉིས་ནས་བཞི་བར་དགོས་པ་བསྐོ་བཞག་བྱེད་པ་ལའང་གོང་ལྟར་ཁ་སྣོན་གནང་འདུག

བཅའ་ཁྲིམས་དོན་ཚན་རེ་བདུན་པ།     ཆེས་མཐོའི་ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་དང༌། སྒྲིག་གཞི། བཅའ་ཁྲིམས་འདི་དང༌། སྤྱི་འཐུས་ལྷན་ཚོགས་ནས་གཏན་ལ་ཕབ་པའི་ཁྲིམས་ལུགས་གང་རུང་གི་དོན་ཚན་ཁག་གཞིར་བཟུང་ཐོག་ཆེས་མཐོའི་ཁྲིམས་ཞིབ་ཁང་ནས་ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་དང༌། འགྲོ་ལུགས་སྒྲིག་གཞི་བཅས་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་བཅས་སྤྱི་མོས་ཀྱིས་བཟོ་འགོད་འཆར་འབུལ་ལ་སྤྱི་འཐུས་ལྷན་ཚོགས་ནས་བཀའ་འཁྲོལ་གཏན་འབེབས་ལྟར་རྩ་འཛིན་ལག་བསྟར་བྱ་རྒྱུ་བཅས་གཏན་འབེབ་གནང་སོང་།

གཞན་ཡང་། དེ་རིང་གི་ལས་རིམ་ནང་སྲིད་སྐྱོང་བློ་བཟང་སེང་གེ་མཆོག་ནས་སྤྱི་འཐུས་རྣམས་པའི་དོགས་འདྲི་ཁག་དང་འབྲེལ་ཏེ། འདས་པའི་ལོ་བཅུའི་ནང་བོད་རྒྱ་འབྲེལ་མོལ་གྱི་གཙོས་བོད་ནང་གི་ཛ་དྲག་གནས་སྟངས་དང་། བོད་མིའི་སྒྲིག་འཛུགས་ཀྱི་ལས་དོན་ཁག་ཅིག་ཐོག་གསལ་བཤད་ལན་འདེབས་གནང་སྐབས། སྲིད་སྐྱོང་མཆོག་ནས་༧གོང་ས་མཆོག་ནས་མ་གཏོགས་བོད་མིའི་སྒྲིག་འཛུགས་ནས་བོད་རྒྱ་འབྲེལ་མོལ་སླར་གསོ་ཡོང་ཐབས་ཁག་པོ་ཆགས་ཡོད་སྐོར་གསུངས་སོང་།

གསར་འགོད་པ། བསྟན་འཛིན་ཕུར་བུ། སྐལ་བཟང་སྦྱིན་པ།