རྒྱ་གར་གྱི་ཇ་མུ་ཀ་ཤི་མུར་ནང་ཡོད་པའི་གནད་ཡོད་མི་སྣ་ཁག་ཅིག་གཙོ་བོར་གྱུར་བའི་ཇ་མུ་ཀ་ཤི་མུར་བོད་དོན་རྒྱབ་སྐྱོར་ཚོགས་པ་ཞིག་གསར་དུ་བཙུགས་ཏེ་ས་གནས་སུ་བོད་དོན་གོ་རྟོགས་སྤེལ་རྒྱུ་ཡིན་པ་གསལ་བསྒྲགས་གནང་འདུག
ཁ་སང་ཕྱི་ཚེས་ ༦ ཉིན་རྒྱ་གར་བྱང་ཕྱོགས་ཁུལ་གྱི་ཇ་མུ་གྲོང་སྡེའི་ནང་ལ་དྭགས་པ་ཕུན་ཚོགས་ལགས་ཀྱིས་ཇ་མུ་ཀ་ཤི་མུར་ས་གནས་བོད་དོན་རྒྱབ་སྐྱོར་ཚོགས་པ་ཐོག་མ་དེ་གསར་འཛུགས་གནང་བའི་གསར་འགོད་གསལ་བསྒྲགས་ཤིག་སྤེལ་འདུག་པ་དང་། སྐབས་དེར་ཁོང་གིས། ཇ་མུ་ཀ་ཤི་མུར་རྒྱ་གར་བོད་དོན་རྒྱབ་སྐྱོར་ཚོགས་པ་འཛུགས་དགོས་པའི་རྒྱུ་མཚན་ནི་ས་གནས་སུ་བོད་དོན་ལ་རྒྱབ་སྐྱོར་ཐོབ་ཐབས་དང་བོད་དོན་དང་འབྲེལ་ནས་གོ་རྟོགས་སྤེལ་ཆེད་ཡིན་སྐོར་བརྗོད་འདུག
སྐབས་དེར་ལ་དྭགས་པ་ཕུན་ཚོགས་ལགས་ཀྱིས། རྒྱ་གར་རྒྱལ་ཡོངས་སུ་རྒྱ་གར་བོད་དོན་རྒྱབ་སྐྱོར་ཚོགས་པ་ཁག་ ༡༤༠ ཙམ་ཡོད་ནའང་། ད་སྔ་བར་དུ་ཇ་མུ་ཀ་ཤི་མུར་གྱི་ནང་བོད་མི་ཚོར་རྒྱ་ནག་གཞུང་གིས་འགྲོ་བ་མིའི་ཐོབ་ཐང་དང་རང་དབང་སྤྲོད་ཀྱི་མེད་སྐོར་ལ་གོ་རྟོགས་སྤེལ་མཁན་གྱི་རྒྱ་གར་བོད་དོན་རྒྱབ་སྐྱོར་ཚོགས་པ་གཅིག་ཀྱང་མེད་སྟབས། བོད་དོན་རྒྱབ་སྐྱོར་ཚོགས་པ་དེ་ཡིས་ས་གནས་ཀྱི་སློབ་མ་དང་ཤེས་ཡོན་ཅན་ལ་བོད་དོན་གོ་རྟོགས་ཀྱི་གཏམ་བཤད་གོ་སྒྲིག་དང་། ཟབ་སྦྱོང་སོགས་སྤྲད་དེ་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་སྐོར་ལ་གྲོས་བསྡུར་བྱེད་པའི་ཁོར་ཡུག་བསྐྲུན་རྒྱུ་ཡིན་སྐོར་བརྗོད་འདུག
ཡང་ཁོང་གིས། རྒྱ་གར་བོད་དོན་རྒྱབ་སྐྱོར་ཚོགས་པ་ནི་ཧ་ཅང་གལ་གནད་ཆེན་པོ་ཡིན་པ་དང་། དབུས་རྒྱ་གར་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་འོག་ནས་ས་གནས་བོད་དོན་རྒྱབ་སྐྱོར་ཚོགས་པས་རང་དབང་གི་སྡེ་ཚན་ཞིག་གི་ངོ་བོའི་ཐོག་ནས་ལས་ཀ་བྱ་རྒྱུ་ཡིན་པ་དང་། དེ་ནི་མི་མང་གི་ཚོགས་པ་ཞིག་ཡིན་སྐོར་དང་། ཚོགས་མིའི་ཁོངས་སུ་རྒྱ་གར་གྱི་གནད་ཡོད་མི་སྣ་ཁག་ཅིག་མཉམ་ཞུགས་བྱས་ཡོད་པ་དང་། ཁོང་ཚོ་ནི་བོད་དོན་རྒྱབ་སྐྱོར་ལ་ཁ་ཞེ་གཉིས་མེད་ཡིན་པ་མ་ཟད། བོད་མིའི་རང་དབང་བསྐྱར་གསོ་དང་ངོ་བོ་སྲུང་སྐྱོབ་ཡོང་བར་རོགས་འདེགས་བྱ་རྒྱུར་འདུན་པ་ཡོད་པ། དེ་བཞིན་བོད་དོན་རྒྱབ་སྐྱོར་གྱི་ཁོར་ཡུག་ཆེ་རུ་གཏོང་བ་དང་། རྒྱ་ནག་གཞུང་ལ་གནོན་ཤུགས་སྤྲད་དེ་བོད་ནང་ཁོར་ཡུག་གཏོར་བཅོམ་མཚམས་འཇོག་བྱེད་པར་ཆོད་སེམས་ཡོད་མཁན་ཤ་སྟག་ཡིན་སྐོར་བརྗོད་འདུག
ཇ་མུ་ཀ་ཤི་མུར་ས་གནས་བོད་དོན་རྒྱབ་སྐྱོར་ཚོགས་པ་དེ་ནི་ཇ་མུ་ཀ་ཤི་མུར་ནང་གི་གནད་ཡོད་མི་སྣ་ཁག་ཅིག་གིས་སྣེ་འཁྲིད་བྱེད་ཀྱི་ཡོད་འདུག་ལ། དེའི་ཁྲོད་རྒྱ་གར་གཞུང་འབྲེལ་བརྒྱུད་ལམ་དྷུར་ཌར་ཤིན་ (Doordarshan) གསར་ཁང་གི་འགན་འཛིན་ཟུར་པ་ར་ཇིན་དྷར་སིངྒ་རའེ་ནཱ་ (Rajinder Singh Raina) ལགས་དང་། ཉེན་རྟོག་མགོ་འཁྲིད་ཟུར་པ་ཨམ་ཇེཌ་པར་ཝེ་ཛི་མིར་ཛ་ (Amjad Pervez Mirza) ལགས། དངུལ་ཁང་གི་འགན་འཛིན་ཟུར་པ་དང་སློབ་དཔོན་ཆེན་མོ་ཚེ་རིང་ (Tsering Tundom) ལགས་སོགས་ཡོད་འདུག་ལ། ཚོགས་པ་དེ་ནི་ཕྱི་ལོ་ ༢༠༡༩ ལོའི་ཟླ་ ༡༠ ནང་ཇ་མུ་ཀ་ཤི་མུར་དང་ལ་དྭགས་གཉིས་ཁ་ཁར་ཕྱེས་ཏེ། རྒྱ་གར་དབུས་གཞུང་གི་ཐད་སྐྱོང་ཁུལ་དུ་བཟོས་རྗེས་རྒྱ་གར་བོད་དོན་རྒྱབ་སྐྱོར་ཚོགས་པ་གསར་འཛུགས་བྱས་པ་ཐོག་མ་དེ་ཡིན་འདུག
གསར་འགོད་པ། ཀླུ་མགོན་ཐར།
