སྤྱི་འཐུས་བློ་བཟང་ཆོས་འབྱོར་ལགས་ཀྱིས་དགོངས་སེལ་དང་སྦྲགས་རྩ་དགོངས་ཞུས།

བོད་མི་མང་སྤྱི་འཐུས་བློ་བཟང་ཆོས་འབྱོར་ལགས་ནས་ནོར་འཁྲུལ་ཤོར་ན་ངོས་ལེན་ཞུས་ནས་དགོངས་པ་ཞུ་རྒྱུ་དེ་འོས་འདེམས་བྱུང་བའི་མགོ་འཁྲིད་ཅིག་གི་བཟང་སྤྱོད་ཆགས་ཡོད་པས་རྩ་དགོངས་ཞུས་པ་ཡིན་ཞེས་གསལ་བསྒྲགས་གནང་སོང་།

དེ་རིང་ཕྱི་ཚེས་ ༨ ཉིན་གྱི་སྔ་དྲོའི་ཆུ་ཚོད་ ༡༡ ཐོག་བོད་མི་མང་སྤྱི་འཐུས་ལྷན་ཁང་གི་མདུན་ཐང་དུ་བོད་མི་མང་སྤྱི་འཐུས་བློ་བཟང་ཆོས་འབྱོར་ལགས་ནས་ཉེ་ལམ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གསུམ་འཕོ་འགྱུར་བཏང་བ་དང་འབྲེལ་ནས་ཁྲིམས་དོན་ཁག་ཅིག་ལ་གོ་བ་ལེན་སྟངས་ནོར་འདུག་པས། སེམས་གཏིང་ནས་༧གོང་ས་རྒྱལ་བ་རིན་པོ་ཆེ་མཆོག་དང་སློབ་དཔོན་ཟམ་གདོང་རིན་པོ་ཆེ་མཆོག བོད་མི་མང་བཅས་ལ་དགོངས་སེལ་དང་། སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་ལས་གནས་ནས་དགོངས་པ་ཞུས་པ་ཡིན་པའི་གསར་འགོད་གསལ་བསྒྲགས་གནང་སོང་།

ཁོང་གི་ཡིག་ཐོག་གསལ་བསྒྲགས་ནང་། དེ་རིང་ ༢༠༢༡ ཟླ་ ༤ ཚེས་ ༨ ཉིན་ནོར་ཝེ་བོད་ཀྱི་རླུང་འཕྲིན་ཁང་གིས་བདག་གི་སློབ་དཔོན་ཟམ་གདོང་རིན་པོ་ཆེར་གནད་འདིའི་ཐོག་བཅར་འདྲི་ཞུ་སྐབས། བཅའ་ཁྲིམས་དོན་ཚན་ ༦༧ འོག་ཁྲིམས་ཞིབ་ཁང་ལ་དེ་ལྟར་ཁྲིམས་བཟོ་བའི་དབང་ཚད་ཡོད་པ། དེ་ནི་བཅའ་ཁྲིམས་ཀྱི་གོང་དུ་བསྡད་མེད་པ། དེ་བཞིན་འབྲེལ་ཡོད་བཅའ་ཁྲིམས་དོན་ཚན་ ༤༩ གཙོས་པའི་གོ་བ་ལེན་སྟངས་ཐད་ཀྱང་རང་ཉིད་ལ་ནོར་འཁྲུལ་བྱུང་འདུག་ན། སྙིང་ཁོང་རུས་པའི་གཏིང་ནས་༧གོང་ས་༧སྐྱབས་མགོན་ཆེན་པོ་མཆོག་དང་། སློབ་དཔོན་ཟམ་གདོང་རིན་པོ་ཆེ། བོད་མི་མང་བཅས་ལ་དགོངས་སེལ་ཞུ་རྒྱུ་མ་ཟད། སྤྱི་འཐུས་ཀྱི་ལས་འགན་ནས་ཀྱང་དགོངས་པ་ཞུས་པ་ཡིན། གནད་དོན་འདིའི་སྔ་ཕྱི་བར་གསུམ་ཡོངས་རྫོགས་ལ་རང་ཉིད་ཀྱི་རྣམ་དཔྱོད་གཞན་བྲན་དུ་མ་བཏང་བར། སྤྱི་འཐུས་ཀྱི་ལས་འགན་འབད་སྒྲུབ་བྱས་པ་ལས། ཤེས་བཞིན་ཁྱད་གསོད་བྱས་པ་ཏིལ་འབྲུ་ཙམ་མེད་པ་དམ་གཙང་ལྷ་མི་ཡོངས་ནས་དགོངས་འཇགས་ཞུ། ཞེས་བཀོད་ཡོད་འདུག

དེ་རྗེས་གསར་འགོད་པས་ད་ལྟ་སྤྱི་འཐུས་ལས་ཐོག་ནས་དགོངས་པ་ཞུ་ཡི་ཡོད་ནའང་། སྐབས་བཅུ་བདུན་པའི་བོད་མི་མང་སྤྱི་འཐུས་ཀྱི་འོས་གཞིའི་ནང་དུ་ཡོད་སྟབས། མུ་མཐུད་སྤྱི་འཐུས་ནང་དུ་བཞེངས་ཀྱི་ཡོད་མེད་བཀའ་འདྲི་ཞུས་པར་སྤྱི་འཐུས་བློ་བཟང་ཆོས་འབྱོར་ལགས་ཀྱིས། སྐབས་བཅུ་བདུན་པའི་སྤྱི་འཐུས་འོས་མིའི་ཁོངས་ནས་དེ་སྔོན་དབུས་འོས་བསྡུའི་ལས་ཁང་ནས་འོས་མི་རྣམས་སྤྱི་འཐུས་ལ་ལངས་མིན་གྱི་ཐག་གཅོད་བྱེད་པར་ཆུ་ཚོད་དུས་བཀག་བྱས་ཏེ་གཏན་འཁེལ་ཟིན་ཡོད་སྟབས། དོ་བདག་གིས་འོས་ཁོངས་ནས་ཕྱིར་འཐེན་བྱེད་འདོད་ཡོད་ཚེ་དེ་དུས་བྱེད་པ་ལས་ད་ལྟ་བྱ་ཐབས་མེད་པ་དང་། སྐབས་བཅུ་བདུན་པའི་སྐབས་སུ་འོས་ལྡུག་མིན་དེ་མདོ་སྨད་རྒྱ་ཆེ་མང་ཚོགས་ཀྱིས་ཐག་གིས་གཅོད་ཀྱི་ཡོད་པ་རེད། ད་ལྟའི་ཆར་བཟང་སྤྱོད་ཀྱི་ཐོག་ནས་ནོར་བ་དེ་ནོར་བ་ལ་ངོས་ཟིན་པའི་ཐོག་ནས་མི་མང་ལ་དགོངས་སེལ་ཞུས་ནས་ལས་གནས་ནས་དགོངས་པ་ཞུ་དགོས་པ་དང་། མ་འོངས་བར་གང་འདྲ་གནང་མིན་དེ་མདོ་སྨད་མི་མང་ནས་ཐག་གིས་གཅོད་ཀྱི་ཡོད་སྐོར་བརྗོད་སོང་།

ཡང་གསར་འགོད་པས་ཁྲིམས་ཞིབ་པ་གསུམ་འཕོ་འགྱུར་བཏང་ཟིན་པ་དང་། ད་ལྟ་སྤྱི་འཐུས་རྒྱུན་ལས་ཀྱིས་རིམ་པར་དགོངས་པ་ཞུས་ཚེ། ཁྲིམས་གཞི་བསྐྱར་བཅོས་མང་པོ་ཞིག་ལྷག་ཡོད་པ་དང་། ཕྱི་ཟླ་ ༥ གྲོས་ཚོགས་ཀྱི་གྲུབ་ཆ་ཚང་མིན་གྱི་གནད་དོན་ཡོང་སྲིད་པས་དེའི་ཐད་ལ་དགོངས་ཚུལ་ཅི་ཡོད་འདྲི་སྐབས་ཁོང་གིས། ང་རང་གི་བསམ་ཚུལ་ཡིན་ན་སྤྱི་འཐུས་དགོངས་པ་ཞུ་མཁན་མང་པོ་ཡོང་གི་ཡོད་པར་ངོས་འཛིན་བྱེད་ཀྱི་མེད་པ་དང་། དགོངས་པ་ཞུ་མཁན་མང་པོ་ཡོང་གི་ཡོད་མེད་ལ་མ་བལྟོས་པའི་ཐོག་ནས་ནམ་རྒྱུན་གྱི་འགྲོ་སྟངས་ཤིག་ཡོད་པ་རེད། ནོར་འཁྲུལ་ཞིག་ཤོར་བ་ཡིན་ན་ངོས་ལེན་ཞུས་ནས་དགོངས་པ་ཞུ་རྒྱུ་དེ་དམངས་གཙོའི་ལམ་ནས་འདེམས་འཐོན་བྱུང་བའི་མགོ་ཁྲིད་ཅིག་གི་བཟང་སྤྱོད་ཆགས་ཡོད་པ་དང་། མ་འོངས་པའི་གནས་སྟངས་དེ་སྐབས་དེ་དུས་ཀྱི་མི་ཡིས་ཐག་གཅོད་བྱས་འགྲོ་གི་རེད་བསམ་གྱི་འདུག ཅེས་བརྗོད་སོང་།

ཡང་གསར་འགོད་པས་བློ་བཟང་ཆོས་འབྱོར་ལགས་ནས་ཁྲིམས་ཀྱི་ངོས་བཞེས་ཐད་རྩོམ་ཡིག་བྲིས་པ་དང་༧གོང་ས་མཆོག་ལ་དགོངས་སྐོར་ཞུ་དགོས་པ་སོགས་ཀྱི་འགན་འཁུར་བ་ཞིག་གསུངས་ཡོད་ནའང་། གྲོས་ཚོགས་ཀྱི་འཐུས་མི་ཞིག་ཡིན་པའི་ངོས་ནས་འགན་འཁུར་ངོ་མ་དེ་གྲོས་ཚོགས་ར་བའི་ནང་གསུངས་དགོས་པ་ཞིག་ཆགས་ཡོད་སྟབས། ཁྲིམས་ཞིབ་པ་གསུམ་འཕོ་འགྱུར་གཏོང་སྐབས་ཁྱེད་རང་ངོས་ནས་གནད་དོན་དེ་དུས་ཡུན་ཐུང་ངུ་ཞིག་གི་ནང་ཐག་གཅོད་ཐུབ་པ་ཞིག་མིན་པ་དང་༧གོང་ས་མཆོག་ལ་དགོངས་སྐོར་ཞུ་དགོས་པ་སོགས་གསུངས་མེད་པའི་རྒྱུ་མཚན་ཅི་ཡིན་བཀའ་འདྲི་ཞུ་སྐབས། ཁོང་གིས། ཕྱི་ལོ་ ༢༠༢༠ ལོའི་ཟླ་ ༨ ནས་བཟུང་ཕྱོགས་བཞུགས་སྤྱི་འཐུས་རྣམས་ལ་ཁྲིམས་ཞིབ་ཁང་དང་སྤྱི་འཐུས་རྒྱུན་ལས་དབར་གྱི་ཡིག་ཆ་ག་རེ་བྱུང་བ་རྣམས་ཆ་ཚང་བཏང་ཡོད་པ་དང་། དེ་ཙམ་དུ་མ་ཟད་ཆེས་མཐོའི་ཁྲིམས་ཞིབ་པ་ཆེ་བ་དང་དཔལ་ལྡན་ཚོགས་གཙོ་སྦྲེལ་པོ་གཉིས་མཇལ་འཕྲད་གནང་བའི་ཚིག་ཐོའང་བཏང་ཡོད་པ་རེད། ཕྱོགས་བཞུགས་སྤྱི་འཐུས་རྣམ་པས་སྔ་དུས་ནས་ཐག་གཅོད་གནང་ཚར་བ་རེད། ང་རང་ལ་ཆ་མཚོན་ན་བློ་མཐུན་པ་དང་། ནམ་རྒྱུན་ལྟ་གྲུབ་དང་ཁྲིམས་སྒྲིག་གི་ཐོག་དོ་སྣང་ཡོད་མཁན་གྱི་སྤྱི་འཐུས་མང་པོ་དང་མཉམ་དུ་རབ་དང་རིམ་པར་གྲོས་བསྡུར་ཕྱིན་ཚར་བ་ཡིན། ད་ལྟ་གློ་བུར་དུ་གྲོས་ཚོགས་ཀྱི་ཚོགས་ཐེངས་གཅིག་གི་རིང་ལ་ཟེར་བའི་སྐད་ཆ་ཞིག་ཡོད་པ་རེད། དེ་ནི་ཟླ་གསུམ་དང་བཞི་ཡི་ལས་ཀ་ལྟ་བུ་ཞིག་ཆགས་ཡོད་པ་རེད། དེ་བས་དེའི་ཐོག་ལ་བསམ་བློ་ཆ་ཚང་བཏང་ནས་ཐག་གཅོད་བྱས་པ་ཞིག་རེད། རིན་པོ་ཆེའི་བཀའ་སློབ་ཕེབས་ཡོང་དུས་གནས་ཚུལ་ཁ་ཁ་རེད་མ་གཏོགས། དེའི་སྔོན་ལ་ང་རང་ཚོའི་ཐག་གཅོད་དེ་ལ་ང་རང་ཕྱི་གསལ་ནང་གསལ་དང་གནོངས་འགྱོད་མེད་པ་ལྟ་བུ་ཡིན་པ་དང་། དེའི་ཆ་ནས་གྲོས་ཚོགས་ནང་ནས་དམིགས་བསལ་གྱིས་ཞུ་དགོས་པ་ཞིག་ལ་མཐོང་གི་མེད་པ་རེད། ཅེས་འགྲེལ་བརྗོད་གནང་སོང་།

གསར་འགོད་པ། ཀླུ་མགོན་ཐར།