རྒྱ་གཞུང་ཉེན་རྟོག་པས་བོད་མིའི་ཁྱིམ་ཚང་རེ་རེར་ཕྱིན་ནས་གུང་ཁྲན་ཏང་ལ་མིག་དཔེ་བལྟས་ནས་དེའི་རྗེས་སུ་འབྲང་དགོས་ལུགས་དང་༧གོང་ས་མཆོག་གི་སྐུ་པར་སྒྲིག་གཤོམ་བྱས་ན་སྲིད་གཞུང་གི་རོགས་སྐྱོར་ཡོངས་རྫོགས་མེད་པ་བཟོ་རྒྱུ་ཡིན་པའི་དོན་ཚན་ ༥ ཅན་གྱི་བཀའ་རྒྱ་བསྒྲགས་ཡོད་འདུག
ཁ་སང་ཕྱི་ཚེས་ ༧ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༣ པའི་ཚེས་ ༥ ཉིན་རྒྱ་ནག་གཞུང་གིས་ཆེད་དམིགས་འཇིགས་སྐུལ་དྲག་སྤྱོད་ལ་འགོག་རྒོལ་ཆེད་བཙུགས་པའི་དྲག་ཆས་ཉེན་རྟོག་རུ་ཁག་ (The Snow Wolf Commando)ཟེར་བ་ཞིག་གིས། དཀར་མཛེས་ཁུལ་སེར་ཤུལ་རྫོང་རྫ་དབོན་པོ་ཡུལ་ཚོའི་བོད་མིའི་ཁྱིམ་ཚང་རེ་རེར་སྔོག་བཤེར་བྱས་ཏེ། ༧གོང་ས་མཆོག་གི་སྐུ་པར་རྣམས་བཙན་གྱིས་མར་ལེན་དུ་བཅུག་སྟེ། དེའི་ཚབ་ཏུ་རྒྱ་ནག་གཞུང་གི་མགོ་འཁྲིད་ཚོའི་པར་བཀལ་བ་མ་ཟད། ཚོགས་འདུ་ཞིག་གི་ཐོག་བོད་མི་རྣམས་ཀྱིས་༧གོང་ས་མཆོག་གི་སྐུ་པར་མི་བཤམ་རྒྱུའི་དོན་ཚན་ ༥ ཅན་གྱི་ཁས་ལེན་ཡི་གེ་ཞིག་ལ་མིང་རྟགས་བཀོད་བཅུག་ཡོད་པ་སོགས་དམ་དྲག་དོགས་གཟོན་སྔར་ལས་ཤུགས་ཆེ་རུ་བཏང་ཡོད་འདུག
འབྲེལ་ཡོད་ཅིག་གིས་འདི་གའི་གསར་འགོད་པར་ཉེ་སྔོན་ཕྱི་ཟླ་ ༣ ཚེས་ ༡༧ ཉིན་སྤེལ་བའི་ཁས་ལེན་ཡི་གེ་དེ་མཁོ་སྤྲོད་བྱས་པའི་ནང་། ཏང་གི་བཀའ་དྲིན་ཚོར་བ་དང་མེས་རྒྱལ་ལ་དགའ་ཞེན། ཁྲིམས་ལུགས་སྲུང་བའི་འདུ་ཤེས་ཟབ་ཏུ་གཏོང་ཆེད། རང་ཁྱིམ་དུ་བཀག་སྡོམ་ལས་འགལ་བའི་ཏཱ་ལའི་སྐུ་བྲིས་བཞག་མི་ཆོག་པ་དང་། རང་ཉིད་ཀྱི་གཉེན་ཉེ་ཁྱིམ་ཚང་ལ་བཀག་སྡོམ་ལས་འགལ་བའི་ཏཱ་ལའི་སྐུ་པར་བཞག་མི་ཆོག་པའི་སྐུལ་སློང་བྱེད་དགོས་པ། བཀག་སྡོམ་ལས་འགལ་བའི་ཏཱ་ལའི་སྐུ་པར་སྒེར་ཉར་དང་། བརྒྱུད་སྤྲོད། པར་འགྲེམ་བཅས་བྱེད་མི་ཆོག དེ་བཞིན་དྲ་ཐོག་ནས་ཏཱ་ལའི་སྐུ་པར་དང་རི་མོ། དེ་བཞིན་ཁྲིམས་འགལ་གྱི་གཏམ་བརྗོད། རྩོམ་སྒྲིག་དང་བརྒྱུད་སྤེལ་བྱ་རྒྱུ་གཏན་འགོག་བྱེད་དགོས་པ། རང་ཉིད་ཆབ་སྲིད་ཀྱི་ལམ་ལ་ཕྱོགས་ནས། ཏང་ལ་མིག་དཔེ་བལྟས་ཏེ་ཏང་གི་རྗེས་སུ་འབྲང། ཁྲིམས་འགལ་གྱི་རིགས་དབྱེ་བར་འཐབ་རྩོད་བྱས་ནས་དྲང་བདེན་གྱི་ལམ་ལ་བསྒྱུར་དགོས། ཞེས་དོན་ཚན་ ༥ བཀོད་ཡོད་པའི་ཐོག གལ་ཏེ་བོད་མི་སུ་རུང་དོན་ཚན་དེ་དག་དང་འགལ་ཚེ། རྒྱལ་ཁབ་ཀྱི་འཚོ་བའི་རོགས་དངུལ་ཡོངས་རྫོགས་དང་རོགས་སྐྱོར་གཅིག་ཀྱང་མེད་པར་བྱ་རྒྱུ་ཡིན་སྐོར་བཀོད་འདུག
ས་གནས་ཀྱི་འབྲེལ་ཡོད་བོད་མི་ཞིག་གིས་འགྲོ་བ་མིའི་ཐོབ་ཐང་ལྟ་ཞིབ་ཁང་ལ་གནས་ཚུལ་མཁོ་སྤྲོད་བྱས་པ་ལྟར་ན། སྤྱི་ཚོགས་དྲ་ལམ་སྟེང་ཉེ་ལམ་རྒྱ་ནག་གི་བཙོན་འོག་ཏུ་གདུག་རྩུབ་མནར་གཅོད་མྱངས་རྗེས་འདས་གྲོངས་སུ་ཕྱིན་པའི་རྫ་དབོན་པོའི་གྲྭ་བསྟན་འཛིན་ཉི་མ་ལགས་ཀྱི་གནས་ཚུལ་སྤྱི་ཚོགས་དྲ་ལམ་དུ་འགོད་སྤེལ་བྱས་པའི་རྐྱེན་གྱིས། ས་གནས་བོད་མི་འགའ་འཛིན་བཟུང་བྱས་ཏེ་གང་དུ་ཡོད་མེད་ཁ་གསལ་མེད་སྐོར་དང་། ཡང་ས་གནས་མི་མང་རྣམས་ལ་ཁ་པར་ནང་མཉེན་ཆས་ཤིག་ཕབ་ལེན་བྱེད་དུ་བཅུག་སྟེ། སྒེར་གྱི་གནས་ཚུལ་རྣམས་ཐད་ཀར་གཞུང་གིས་ལྟ་ཆོག་པར་བཟོས་ཡོད་སྐོར་བཀོད་འདུག
གཞན་ཡང་། རྒྱ་ནག་གི་དྲག་ཆས་ཉེན་རྟོག་པས་རྫ་དབོན་པོ་ཁུལ་གྱི་བོད་མིའི་དུད་ཚང་རྣམས་སྔོག་བཤེར་མ་བྱས་གོང་གི་སྔར་ཉིན་ཏག་ཏག་དེར། རྒྱ་ནག་གི་དམར་ཤོག་ཚོགས་པའི་དྲུང་ཆེ་དབྱང་མིང་ཀོང་ (Yang Mingguang) ཟེར་བ་ཞིག་རྫ་དབོན་པོའི་ས་གནས་ས་ཐོག་གི་གནས་ཚུལ་ལ་རྟོག་ཞིབ་ཆེད་བསླེབས་ཏེ། རྫ་དབོན་པོ་དགོན་པའི་གྲྭ་པ་རྣམས་ལ་སློབ་གསོ་སྤྲད་པས་མི་ཚད། ཉེན་རྟོག་པ་རྣམས་ལ་སྤྱི་ཚོགས་བསྲ་བརྟན་གྱི་ཕྱོགས་སུ་ཤུགས་བརྒྱབ་དགོས་སྐོར་སོགས་བརྗོད་ཡོད་འདུག
གསར་འགོད་པ། པ་སངས་ཚེ་རིང་།
