བུད་མེད་ལྷན་ཚོགས་ཀྱི་ཚོགས་ཆེན་ ༡༣ པ་མགོ་འཛུགས་གནང་།

དབུས་ཚོགས་གཞོན་་སྐལ་བཟང་གཡུ་སྒྲོན་ལགས་ནས་ཐེངས་འདིའི་ཚོགས་ཆེན་ཐོག་ནེའུ་ཡོག་དང་ནེའུ་འཇར་སིའི་སྐབས་བཅོ་ལྔ་པའི་རྒྱུན་ལས་བསླེབས་འདུག་པ་ལྟར་ནང་ཁུལ་གྲོས་བསྡུར་བྱས་ནས་དཀའ་རྙོག་སེལ་བ་ལྟ་བུ་དང་མཐའ་མའི་ཐག་གཅོད་བྱུང་ཡོད་སྐོར་བརྗོད་བྱུང་།

དེ་རིང་ཕྱི་ཚེས་ ༡༤ ཉིན་གྱི་སྔ་དྲོའི་ཆུ་ཚོད་ ༡༠ ཙམ་གྱི་ཐོག བཞུགས་སྒར་དྷ་སའི་བོད་ཀྱི་ཟློས་གར་ཚོགས་ཁང་དུ། བོད་ཀྱི་བུད་མེད་ལྷན་ཚོགས་ཀྱི་ཉིན་གསུམ་རིང་གི་ཚོགས་ཆེན་ཐེངས་བཅུ་གསུམ་པ་མགོ་འཛུགས་གནང་སོང་བ་དང་།   ཚོགས་ཐོག་ཏུ་དམིགས་བསལ་སྐུ་མགྲོན་བོད་ཀྱི་བཙུན་མའི་ལས་འཆར་གྱི་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་དང་། སྐུ་མགྲོན་གཙོ་བོ་བཀའ་ཟུར་རྒྱ་རི་སྒྲོལ་མ་མཆོག་རྣམ་གཉིས་ཀྱི་དབུས་བུད་མེད་ཀྱི་རྒྱུན་ལས་ཟུར་པ་ཁག་ཅིག་དང་། ཚོགས་སྐྱིད་ཁག་གི་འཐུས་ཚབ། དེ་བཞིན་ས་གནས་བུད་མེད་ ༡༨ ཀྱི་འཐུས་ཚབ་བཅས་མཉམ་ཞུགས་གནང་ཡོད་འདུག

ཚོགས་ཆེན་གྱི་ཐོག་མར་དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་སྒྲོལ་མ་དབྱངས་ཅན་ལགས་ཀྱིས་ལས་བསྡོམས་དང་འབྲེལ་ནས་གསུང་བཤད་གནང་སྐབས། བུད་མེད་ལྷན་ཚོགས་ཀྱི་དམིགས་ཡུལ་དེ་བཞིན་དྲན་གསོ་ཡང་ཡང་གཏོང་དགོས་པ་གལ་ཆེན་པོ་ཡིན་པ་དང་། ཚོགས་པའི་དམིགས་ཡུལ་ཞུས་པ་ཡིན་ན། དེ་ནི་མ་ཎི་བགྲངས་བ་དང་གཅིག་མཚུངས་ཡིན་ལ། མ་ཎི་ག་ཚོད་བགྲངས་བ་ཡིན་ནའང་ཕན་ཐོགས་མ་གཏོགས་གནོད་སྐྱོན་མེད་པ་མ་ཟད། བུད་མེད་ལངས་གླུའི་ཚིག་དེ་དག་ལ་བལྟས་ནས་བོད་མི་རེ་རེ་ཡིས་ཉིན་རེའི་བྱེད་སྒོ་དང་བོད་སྤྱི་དོན་ཐད་ནུས་པ་སྤུངས་ཐབས། དེ་བཞིན་མཐུན་སྒྲིལ་བྱེད་ཕྱོགས་སོགས་གསལ་བོ་བསྟན་ཡོད་སྐོར་དང་། དེང་སྐབས་བོད་མིའི་སྤྱི་ཚོགས་ནང་ཟ་ངེ་ཟིང་ངེ་ཡོད་པ་དེ་མི་ཡོང་ཆེད་བུད་མེད་ལྷན་ཚོགས་ཀྱི་ལངས་གླུ་ལ་བལྟ་དགོས་སྐོར། དེ་བཞིན་རྒྱ་ནག་གི་མགོ་ཁྲིད་ཞི་ཅིན་ཕིན་སླེབས་རྗེས་ནས་བོད་ཀྱི་གནས་སྟངས་ཇེ་སྡུག་ཏུ་ཕྱིན་ཡོད་སྟབས། མི་སྒེར་དང་ཚོགས་སྡེ་ཁག་གིས་རང་ནུས་ལ་དཔག་པའི་ལས་འགུལ་སྤེལ་གྱི་ཡོད་པ་དང་། བུད་མེད་ལྷན་ཚོགས་ཀྱི་ངོས་ནས་ཀྱང་གང་ཐུབ་བྱེད་ཀྱི་ཡོད་སྐོར། བོད་ནང་གི་བུད་མེད་གནས་སྟངས་ལོ་རེར་ཕྱི་རྒྱལ་ཀྱི་ཉམས་ཞིབ་པ་དང་། དགེ་རྒན་ཆེན་མོ་སོགས་མི་གྲངས་ ༡༠༠ ཙམ་ངོ་སྤྲོད་བྱེད་ཀྱི་ཡོད་སྐོར། མཚམས་རེར་སྤྱི་ཚོགས་ནང་གི་དཀའ་ངལ་ཁག་ས་གནས་ཀྱིས་སེལ་ཐབས་བྱེད་ཀྱི་ཡོད་ནའང་། ས་གནས་ཀྱི་སེལ་མ་ཐུབ་པ་རྣམས་དབུས་ལ་ཞུས་ནས་སེལ་ཐབས་གང་ཐུབ་བྱེད་ཀྱི་ཡོད་སྐོར་སོགས་བརྗོད་འདུག

ཚོགས་ཆེན་ཐོག་ཏུ་བཀའ་ཟུར་རྒྱ་རི་སྒྲོལ་མ་མཆོག་གིས། ཉེ་ཆར་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་འཕོ་འགྱུར་བཏང་བའི་གནད་དོན་དང་འབྲེལ་ནས་བོད་མིའི་སྒྲིག་འཛུགས་ནི་དམངས་གཙོའི་སྒྲོམ་གཞི་ཞིག་གི་ནང་ཡོད་ནའང་བཙན་བྱོལ་ནང་ཡོད་པའི་སྒྲིག་འཛུགས་ཤིག་ཡིན་པར་བརྟེན། གནད་དོན་དེའི་རིགས་ལ་བཀའ་བསྡུར་དང་ལྷག་པར་དུ་དམངས་གཙོའི་ཀ་བ་གསུམ་པོ་ནས་གུ་ཡངས་གནང་ཇི་ཐུབ་བྱ་དགོས་པ་གལ་ཆེན་ཡིན་ལ། ད་ལན་གྱི་དཀའ་ངལ་དེ་བོད་མི་མང་སྤྱི་འཐུས་ལྷན་ཚོགས་ནས་སེལ་ཐབས་དགོས་སྐོར་གསུངས་སོང་། དེ་བཞིན་དམིགས་བསལ་སྐུ་མགྲོན་བཀའ་ཟུར་རིན་ཆེན་མཁའ་འགྲོ་མཆོག་གིས། བོད་མི་རྣམས་བཙན་བྱོལ་དུ་ཡོང་དགོས་པའི་རྒྱུ་མཚན་སོགས་ལ་དགོངས་པ་བཞེས་ཐུབ་ན་དཀའ་རྙོག་ཆུང་རིགས་སྔོན་འགོག་ཐུབ་ལ། ཚང་མས་རྒྱ་ཆེ་ས་དང་སྤྱི་པར་བསམ་བློ་གཏང་ནས་ལས་དོན་སྒྲུབ་ཐུབ་ན་ཕན་ཐོགས་ཆེན་པོ་ཡོད་སྐོར་སོགས་གསུངས་སོང་།

འདི་གའི་གསར་འགོད་པས་ཞལ་པར་བརྒྱུད་ཉེ་ལམ་གྱི་ནེའུ་ཡོག་དང་ནེའུ་འཇར་སིའི་ས་གནས་བོད་ཀྱི་བུད་མེད་ལྷན་ཚོགས་སྐབས་ ༡༥ དང་༡༦ དབར་གྱི་རྩིས་སྤྲོད་ཀྱི་དཀའ་རྙོག་དེ་ཚོགས་ཆེན་འདིའི་ཐོག་ཐག་གཅོད་བྱུང་མེད་དྲིས་པར་དབུས་བུད་མེད་ལྷན་ཚོགས་ཀྱི་ཚོགས་གཞོན་སྐལ་བཟང་གཡུ་སྒྲོན་ལགས་ཀྱིས། རྩ་བའི་ནེའུ་ཡོག་དང་ནེའུ་འཇར་སིའི་ས་གནས་བོད་ཀྱི་བུད་མེད་ལྷན་ཚོགས་ཡིན་པ་དེ་སྐབས་བཅུ་དྲུག་པ་དེ་ཆགས་ཡོད་པ་རེད། འོན་ཀྱང་ཐེངས་འདིར་སྐབས་བཅོ་ལྔ་པ་ཕེབས་འདུག་པ་དང་། ང་ཚོའི་ལས་ཁུངས་སུ་བཅར་ནས་བཀའ་མོལ་བྱུང་སོང་། སྤྱིར་ཕྱི་ལོ་ ༢༠༢༠ ཟླ་ ༨ ཚེས་ ༡༦ ཉིན་ཐག་གཅོད་ཟིན་པ་རེད། སྐབས་བཅོ་ལྔ་པ་ཕེབས་ཡོད་སྟབས། ང་ཚོས་ཡར་མར་བཀའ་མོལ་ཞུས་ཏེ་སྐབས་བཅོ་ལྔ་པས་སྐབས་བཅུ་དྲུག་པར་ལས་ཐམ་དང་ལས་ཤོག ངོ་དེབ་བཅས་རྩིས་སྤྲོད་བྱས་མེད་སྟབས། ད་ལན་དེ་དག་རྩིས་སྤྲོད་བྱེད་པའི་ཐོག ཚོགས་ཆེན་འདི་གོ་སྐབས་སུ་བཟུང་སྟེ་སྐབས་བཅོ་ལྔ་པར་ཕྱག་འཁྱེར་ཕུལ་བ་དང་། ཕྱི་ལོ་ ༢༠༢༡ ལོའི་ཟླ་ ༥ ཚེས་ ༩ ཉིན་ས་གནས་སུ་རྩིས་སྤྲོད་བྱ་རྒྱུའི་ཐག་གཅོད་བྱུང་སོང་། ད་ལྟའི་ནེའུ་ཡོག་དང་ནེའུ་འཇར་སིའི་དཀའ་རྙོག་དེ་སེལ་བ་ལྟ་བུ་ཞིག་དང་མཐའ་མའི་ཐག་གཅོད་བྱུང་བ་དང་། གཉིས་ཀས་མོས་མཐུན་ཡོད་པ་དང་མཚན་རྟགས་བརྒྱབས་པའི་གནས་སྟངས་ཤིག་ཆགས་ཡོད་པ་རེད། ཅེས་འགྲེལ་བརྗོད་གནང་བྱུང་།

གསར་འགོད་པས་དེ་སྔོན་ས་གནས་སུ་དངུལ་བྱང་རྩིས་སྤྲོད་བྱུང་ཡོད་མེད་ཀྱི་གནད་དོན་ཞིག་བྱུང་ཡོད་པས་དེའི་ཐད་གང་འདྲ་བྱུང་ཡོད་དྲིས་པར་ཚོགས་གཞོན་ལགས་ཀྱིས། དངུལ་བྱང་དེ་སྐབས་བཅོ་ལྔ་པའི་ཕྱག་ལས་གནང་སྐབས་དངུལ་གཉེར་གྱི་མཚན་ཐོག་ལ་ཡོད་འདུག་པ་དང་། སྐབས་བཅོ་ལྔ་པའི་དངུལ་གཉེར་གྱིས་སྐབས་བཅུ་དྲུག་པའི་དངུལ་གཉེར་ལ་རྩིས་སྤྲོད་གནང་ཚར་འདུག སྐབས་བཅུ་དྲུག་པ་ཡར་བཞེངས་སྐབས་སུ་དངུལ་རྩིས་སྤྲོད་བྱུང་འདུག ཅེས་འགྲེལ་བརྗོད་གནང་བྱུང་།

གསར་འགོད་པ། ཀླུ་མགོན་ཐར།