རྒྱ་གར་གྱི་བཟོ་གྲྭ་ཁག་གི་སྲོག་རླུང་རྣམས་སྨན་ཁང་དུ་ཁ་བསྒྱུར་གྱིས་མི་སྲོག་སྐྱོབ་དགོས་པའི་བཀའ་བཏང་།

ལྡི་ལིར་རྟེན་གཞི་བྱས་པའི་བོད་ཀྱི་འབྲས་ནད་ཚོགས་པའི་ཚོགས་གཙོ་ཚུལ་ཁྲིམས་རྡོ་རྗེ་ལགས་ཀྱིས་འདི་གའི་གསར་འགོད་པར་བོད་མི་ཕལ་མོ་ཆེས་ནད་ཡམས་འདི་རྩེད་མོ་ལྟ་བུར་བརྩིས་ནས་སྣང་མེད་གཏོང་གི་འདུག་ཀྱང་ད་ལྟ་དངོས་ནས་ཚང་མ་གཉིད་སད་རྒྱུའི་དུས་ལ་བབས་འདུག་ཅེས་བརྗོད་བྱུང་།

རྒྱ་གར་ནང་ཉིན་རེ་བཞིན་ཏོག་དབྱིབས་གཉན་རིམས་ཕོག་མཁན་གྱི་ནད་པ་ཧ་ཅང་ཇེ་མང་དུ་འགྲོ་བཞིན་པ་དང་བསྟུན་སྲོག་རླུང་འདང་ངེས་མེད་པའི་དཀའ་ངལ་བསྟུད་མར་འཕྲད་བཞིན་པའི་སྐབས་འདིར། ཁ་སང་ལྡི་ལིའི་འབྲིང་རིམ་ཁྲིམས་ཁང་གིས་སྲོག་རླུང་མཁོ་འདོན་བྱེད་རྒྱུ་དེ་གཞུང་གི་འགན་འཁྲི་ཡིན་པའི་ཆ་ནས། ད་ལྟའི་ཆེས་ཛ་དྲག་གི་དུས་སྐབས་འདིར་མིའི་ཚེ་སྲོག་སྐྱོབ་ཆེད་གཞུང་གིས་སྲོག་རླུང་བརྐུ་དགོས་བྱུང་ནའང་བརྐུ་དགོས་པའི་བཀའ་ཁྱབ་བཏང་ཡོད་འདུག

རྒྱ་གར་གྱི་སྒེར་གཉེར་སྨན་ཁང་ཆེ་གྲས་སྐོར་ཞིག་གིས་སྲོག་རླུང་འདང་ངེས་མེད་པའི་ཞུ་གཏུག་བྱས་པར་ལྡི་ལིའི་འབྲིང་རིམ་ཁྲིམས་ཁང་གིས་ཞུ་གཏུག་ལ་ཉན་ཞིབ་ཀྱིས་ཐག་གཅོད་བཀའ་ཁྱབ་གནང་བའི་ནང་། གཞུང་ངོས་ནས་ད་ལྟའི་ཛ་དྲག་གི་གནས་སྟངས་ཚོར་གྱི་མེད་པ་དེར་ང་ཚོ་བློ་ཕམ་བྱུང་། གཞུང་ཞིག་ཡིན་པའི་ཆ་ནས་སྲོག་རླུང་དེ་ཙམ་མ་གཏོགས་མཁོ་སྤྲོད་བྱེད་ཐུབ་ཀྱི་མི་འདུག་ཅེས་བརྗོད་ཐབས་མེད་པར། གཞན་གྱི་ས་ནས་སློང་བའམ། གཡར་བ། ཐ་ན་བརྐུ་དགོས་ནའང་བརྐུས་ཏེ། གང་ལྟར་སྲོག་རླུང་འདང་ངེས་ཡོད་པ་ཞིག་བཟོ་དགོས་པའི་འགན་འཁྲི་ཡོད། ཅེས་བརྗོད་འདུག

དེ་བཞིན་གཞུང་ངོས་ནས་བཟོ་གྲྭ་ཁག་གི་ཆེད་དུ་བེད་སྤྱོད་བྱེད་བཞིན་པའི་སྲོག་རླུང་རྣམས་སྨན་བཅོས་ཀྱི་ཐོག་ལ་ཁ་བསྒྱུར་དགོས་པའི་སྐོར་ནས། ད་ལྟ་ཉིན་རེར་མི་སྟོང་ཕྲག་ལྷག་འཆི་བཞིན་པའི་གནས་སྐབས་འདིར། གཞུང་གིས་བཟོ་གྲྭ་ཁག་ལ་སེམས་ཁྲལ་བྱེད་བཞིན་པ་ཧ་ཅང་བྱབ་ཆུང་རེད། གཞུང་ངོས་ནས་བཟོ་གྲྭ་ཁག་གིས་སྲོག་རླུང་བཀོལ་སྤྱོད་དེ་ཉུང་དུ་བཏང་ནས། དེའི་ཚབ་ཏུ་སྨན་ཁང་ཁག་ལ་སྲོག་རླུང་འདང་ངེས་མཁོ་སྤྲོད་བྱ་རྒྱུའི་ཐབས་ཤེས་འཚོལ་དགོས། གལ་ཏེ་བཟོ་གྲྭར་འཛུགས་སྐྲུན་སོགས་ཀྱི་ཆེད་སྤྱོད་བཞིན་པའི་སྲོག་རླུང་རྣམས་སྨན་ཁང་ཕྱོགས་སུ་ཁ་བསྒྱུར་ཚེ། ང་ཚོས་སྲོག་རླུང་གི་དཀའ་ངལ་འདི་སེལ་ཐུབ་ངེས་རེད། ཅེས་བརྗོད་ཡོད་འདུག

གྷར་ཌིན་གསར་ཁང་གི་གནས་ཚུལ་ལྟར་ན། འདས་པའི་བདུན་ཕྲག་གཅིག་ནང་རྒྱ་གར་ནང་ཏོག་དབྱིབས་ནད་པ་གསར་པ་ས་ཡ་ ༡།༦ ཐོན་པ་དེས། རྒྱ་གར་རྒྱལ་ཡོངས་ཀྱི་ཏོག་དབྱིབས་ནད་པའི་གྲངས་འབོར་དེ་ས་ཡ་ ༡༥ ལ་བསྐྱལ་ཡོད་པ་དང་། ནད་ཡམས་འགོས་ཁྱབ་གྱི་བརྒྱ་ཆ་དེ་བརྒྱ་ཆ་ ༡༧ ལ་འཕར་ཡོད་ཅིང་། ལྡི་ལི་ལྟ་བུར་མཚོན་ན་བརྒྱ་ཆ་ ༣༠ ཡིས་ཡར་ཕར་ཡོད་འདུག དེ་བཞིན་སྔར་དང་མི་འདྲ་བར་ཛ་དྲག་གནས་སྟངས་ནང་ལྷུང་མཁན་ན་གཞོན་ཇེ་མང་ཡིན་ཞིང་། ལྡི་ལིའི་ཏོག་དབྱིབས་ནད་པའི་ཁྲོད་ནས་བརྒྱ་ཆ་ ༦༥ རང་ལོ་ ༤༠ མན་ཆད་ཡིན་འདུག་ལ། ཁ་སང་གཅིག་པུར་ལྡི་ལིའི་ནང་ཏོག་དབྱིབས་ནད་པ་ ༢༠༠ ལྷག་འདས་གྲོངས་སུ་ཕྱིན་ཡོད་པ་མ་ཟད། གཞུང་སྒེར་གྱི་སྨན་ཁང་ཕལ་ཆེ་བའི་ནང་ནད་པར་ཉལ་ཁྲི་མེད་པའི་རྐྱེན་གྱིས། ནད་པ་མི་ཉུང་བ་ཞིག་སྨན་ཁང་གྱི་སྒོ་ཁར་སྲོག་རླུང་མ་འདང་བའི་རྐྱེན་གྱིས་འདས་གྲོངས་སུ་གྱུར་ཡོད་འདུག དེ་བཞིན་ལྡི་ལི་ཕུང་སྲེག་ཁང་རྣམས་ཁེངས་ནས་ཕུང་པོ་སྲེག་སའང་མེད་པའི་དཀའ་ངལ་འཕྲད་བཞིན་ཡོད་འདུག

གཞན་ཡང་། ཁ་སང་རྒྱ་གར་གྱི་ཆེས་ཛ་དྲག་ཡིན་པའི་ལྷོ་ཕྱོགས་མངའ་སྡེ་མཱ་ཧཱ་ར་ཤི་ཏྲ་ Maharashtra)  ཡི་སྨན་ཁང་ཞིག་གི་སྲོག་རླུང་གསོག་མཛོད་ཁང་དུ་སྲོག་རླུང་འགེངས་བཞིན་པའི་གནས་སྐབས་སུ། མཛོད་ཀྱི་ཕུ་ཤོར་བའི་རྐྱེན་གྱིས་སྨན་ཁང་གི་སྲོག་རླུང་ལ་རྟེན་བཞིན་པའི་ནད་པ་ ༢༢ འདས་གྲོངས་སུ་ཕྱིན་ཡོད་པ་རེད། སྤྱིར་མཱ་ཧཱ་ར་ཤི་ཏྲ་མངའ་སྡེ་དེ་རྒྱ་གར་གྱི་མངའ་སྡེ་ཕྱུག་ཤོས་དེ་ཡིན་ནའང་། འདས་པའི་བདུན་ཕྲག་འགའ་ཤས་ནང་ཏོག་དབྱིབས་གཉན་རིམས་ཤུགས་ཆེར་ཁྱབ་གདལ་ཕྱིན་ཏེ། མངའ་སྡེའི་སྨན་བཅོས་ཀྱི་སྒྲོག་གཞི་ལ་གཡོ་འགུལ་ཆེན་པོ་ཐེབས་ཏེ་རྒྱ་གར་ནང་གི་ཏོག་དབྱིབས་ནད་པ་མང་ཤོས་ཀྱི་མངའ་སྡེ་རུ་གྱུར་ཡོད་པ་རེད།

ཉེ་ཆར་ལྡི་ལིར་རྟེན་གཞི་བྱས་པའི་བོད་ཀྱི་འབྲས་ནད་ཚོགས་པའི་ཚོགས་གཙོ་ཚུལ་ཁྲིམས་རྡོ་རྗེ་ལགས་ཀྱིས་ངོ་དེབ་ཐད་གཏོང་བརྒྱུད། ལྡི་ལིའི་ནང་སྲོག་རླུང་འདང་ངེས་མེད་པའི་དཀའ་ངལ་འགྲེལ་བརྗོད་བྱས་པ་དེར་མི་མང་པོས་དོ་སྣང་དམིགས་བསལ་བྱས་འདུག་ལ། འདི་གའི་གསར་འགོད་པས་ཁ་པར་བརྒྱུད་ཁོང་ལ་ད་ལྟའི་གནས་སྟངས་ཇི་ཡིན་སྐོར་བཀའ་འདྲི་ཞུས་པར། ཁོང་གིས། ད་ལྟའི་ཆར་ལྡི་ལིའི་གཞུང་སྒེར་གྱི་སྨན་ཁང་ཚང་མའི་ནང་སྲོག་རླུང་མེད་པའི་དཀའ་ངལ་ཧ་ཅང་ཆེན་པོ་འཕྲད་བཞིན་ཡོད་པ་དངོས་ཡོད་རེད་ལ། སྨན་ཁང་ཚང་མའི་ནང་ཛ་དྲག་ནད་སྐྱོབ་ཚན་པ་གཙོས་པའི་སྡེ་ཚན་ཚང་མའི་ནང་ཉལ་ས་མེད་པའི་རྐྱེན་གྱིས་ནད་པ་ཛ་དྲག་རྣམས་ཀྱང་སྨན་ཁང་ནང་བསྙལ་ཐུབ་ཀྱི་མེད་པ་རེད། དེ་སྔོན་ང་ཚོས་བོད་མི་ནད་པ་ཛ་དྲག་ཅན་ཞིག་སྨན་ཁང་ལ་བསྙལ་ཆེད་དུ་ལྡི་ལིའི་ཨེམ་སི་ (AIIMS) དང་མེག་སི་ (MAX) ཡིས་མཚོན་པའི་སྨན་ཁང་ཆ་ཚང་ལ་ཕྱིན་པ་ཡིན་ཏེ། སྨན་པ་གཅིག་གིས་ཀྱང་ངོས་ལེན་བྱས་མེད་པ་མ་ཟད། དུས་རྒྱུན་ལས་འབྲེལ་གྱི་ཐོག་ནས་ངོ་ཤེས་ཡིན་པའི་རྒྱ་གར་གྱི་སྨན་པ་ཞིག་གིས། ཁྱེད་ཀྱི་ནད་པ་འདིའི་ཆེད་དུ་ད་ལྟ་ནད་པ་གཞན་ལ་བེད་སྤྱོད་བྱེད་བཞིན་པའི་དབུགས་སྐྱོར་འཕྲུལ་ཆས་ (Ventilator) དེ་བླང་དགོས་ཀྱི་རེད་དམ། ཞེས་བརྗོད་དེ་ད་ལྟ་ཧ་ཅང་འུ་ཐུག་པའི་གནས་སྟངས་ཤིག་རེད་འདུག ང་ཚོར་ཉལ་ས་མ་རག་པའི་རྐྱེན་གྱིས་ཕྱིར་ལོག་མ་བྱེད་ཐབས་མེད་བྱུང་སོང་། ཞེས་བརྗོད་བྱུང་།

ཡང་ཁོང་གིས་བོད་མི་ཕལ་མོ་ཆེས་ནད་ཡམས་འདི་རྩེད་མོ་ལྟ་བུར་བརྩིས་ནས་སྣང་མེད་གཏོང་གི་འདུག་ཀྱང་། ད་ལྟ་དངོས་ནས་ཚང་མ་གཉིད་སད་རྒྱུའི་དུས་ལ་བབས་འདུག བོད་པ་ཚོས་རང་གི་གཉེན་སྤུན་དང་དགའ་ཉེ་ལྟ་བུ་ཞིག་གྲོངས་ན་མ་གཏོགས་ནད་ཡམས་ལ་འཇིགས་སྣང་བྱེད་ཀྱི་མེད་པ་དེ་ཧ་ཅང་ནོར་འཁྲུལ་ཆེན་པོ་རེད། ད་ལྟའི་དུས་ཚོད་འདིར་ནད་ཡམས་ཕོག་ནས་ཛ་དྲག་ལྟ་བུ་ཆགས་ཏེ་སྲོག་རླུག་མ་ཐོབ་ཚེ། ཕལ་ཆེར་འཆི་རྒྱུ་མ་གཏོགས་མེད་པ་ལྟ་བུ་རེད་འདུག དེ་བཞིན་ད་ལྟ་ལོ་རྒན་གཞོན་མེད་པར་ཚང་མར་ནད་ཡམས་འདི་འགོ་ཡི་ཡོད་པ་མ་ཟད། ལོ་ཆུང་རྣམས་ལའང་དབུགས་ཀྱིས་མ་འདང་བ་སོགས་ཀྱི་ཛ་དྲག་དཀའ་ངལ་འཕྲད་ཀྱི་འདུག་པས། ཚང་མས་སྨན་པའི་ལམ་སྟོན་ལྟར་ཁ་རས་གྱོན་རྒྱུ་དང་། ལྷག་པར་དུ་ད་ལྟའི་དུས་སྐབས་འདིར་ཡག་ཤོས་བྱུང་ན་རང་ཁྱིམ་དུ་སྡོད་རྒྱུ་དེ་ཧ་ཅང་གལ་ཆེན་པོ་རེད་འདུག ཅེས་བརྗོད་བྱུང་།

འཕྲོད་བསྟེན་དབྱེ་ཞིབ་པ་དང་སྨན་པ་རྣམས་ཀྱིས་ད་ཐེངས་རྒྱ་གར་ནང་ཏོག་དབྱིབས་གཉན་རིམས་ཤུགས་ཆེར་འགོས་ཁྱབ་འགྲོ་བཞིན་པའི་རྐྱེན་རྩ་གཙོ་བོ་ནི། གཞུང་དམངས་གཉིས་ནས་གཉན་རིམས་སྔོན་འགོག་གི་ཐབས་ཇུས་ལག་ལེན་བསྟར་རྒྱུར་འཐུས་ཤོར་ཕྱིན་པ་དང་། འོས་བསྡུ་དང་ཆོས་ལུགས་ཀྱི་འདུ་འཛོམས། དེ་བཞིན་རྫས་རྒྱུན་གསར་པའི་ཏོག་དབྱིབས་གཉན་སྲིན་ཐོན་བཞིན་པ་བཅས་ཀྱི་རྐྱེན་པས་ཡིན་སྐོར་འགྲེལ་བརྗོད་བྱེད་ཀྱི་འདུག

གསར་འགོད་པ། པ་སངས་ཚེ་རིང་།