དེ་རིང་ཕྱི་ཟླ་ ༤ ཚེས་ ༢༥ ཉིན་ནི་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༢ ལ་ཕེབས་པའི་སྐུའི་འཁྲུངས་སྐར་གྱི་ཉིན་མོ་ཡིན་ལ། རྒྱ་ནག་གཞུང་གིས་ཁོང་དང་ནང་མི་བཅས་བཙན་འཛིན་བྱས་ཏེ་མི་ལོ་ཧྲིལ་པོ་ ༢༦ འདས་པའི་དེ་རིང་ད་དུང་ཡང་བོད་ཀྱི་གཞུང་འབྲེལ་མིན་པའི་ཚོགས་པ་ཁག་དང་། ཨ་རི་གཙོ་བོར་གྱུར་བའི་འཛམ་གླིང་གི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཚོགས་སྡེ་ཁག་ནས་མུ་མཐུད་རིན་པོ་ཆེ་མཆོག་གང་དུ་བཞུགས་ཡོད་མེད་གསལ་པོ་བཟོ་དགོས་པའི་འབོད་སྐུལ་གནང་བཞིན་ཡོད་པ་རེད།
ཟླ་འདིའི་ཕྱི་ཚེས་ ༢༢ ཉིན་གྱི་གསར་འགོད་ལྷན་ཚོགས་ཐོག ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་ནེ་ཌི་ཕི་ར་སི་ (Ned Price) ལགས་ཀྱིས། རྒྱ་ནག་གཞུང་གིས་༧པཎ་ཆེན་མཆོག་གི་འཁྲུངས་སྐར་དང་བསྟུན་ཁོང་གང་དུ་ཡོད་མེད་ཡོངས་ཁྱབ་གསལ་བསྒྲགས་བྱེད་དགོས་པ་མ་ཟད། སྐུ་དངོས་སུ་མཇལ་འཕྲད་གནང་དུ་འཇུག་དགོས་པའི་འབོད་སྐུལ་གནང་བ་དང་སྦྲགས། ༧གོང་ས་རྒྱལ་བ་རིན་པོ་ཆེ་མཆོག་དང་པཎ་ཆེན་རིན་པོ་ཆེ་མཆོག་གི་དབུས་པའི་བོད་མིའི་བླ་མ་རྣམས་ཀྱི་ཡང་སྲིད་ངོས་འཛིན་ལ་སྲིད་གཞུང་གང་གིས་ཀྱང་ཐེ་གཏོགས་མི་བྱེད་པར་བོད་མི་རང་གི་དད་མོས་གཞིར་བཟུང་གནང་བར་རྒྱུར་བརྩི་བཀུར་གནང་གི་ཡོད་ལ། ཨ་རིའི་གཞུང་ནས་མུ་མཐུད་བོད་ཀྱི་ཆོས་དང་རིག་གཞུང་སྐད་ཡིག བོད་མིའི་ངོ་བོ་བཅས་རྒྱུན་འཛིན་སྲུང་སྐྱོབ་བྱེད་པར་རྒྱབ་སྐྱོར་གནང་བཞིན་ཡོད་སྐོར་གསུངས་ཡོད་པ་རེད།
དབུས་བོད་ཀྱི་བུད་མེད་ལྷན་ཚོགས་ནས་༧པཎ་ཆེན་མཆོག་གི་འཁྲུངས་སྐར་དང་བསྟུན་འདི་གར་བསྒྲགས་གཏམ་དགོས་འདུན་དོན་ཚན་གཉིས་ཅན་ཞིག་མཁོ་གཏོང་གནང་བའི་ནང་། ༸པཎ་ཆེན་སྐུ་ཕྲེང་བཅུ་པར་དྲན་གསོ་བྱེད་པའི་དེ་རིང་གི་ཉིན་མོ་འདི་ནི་བཀྲིས་པའི་ཉིན་མོ་ཞིག་རེད་ལ་མྱ་ངན་བྱེད་དགོས་པའི་ཉིན་མོ་ཞིག་ཀྱང་ཆགས་ཡོད། ང་ཚོས་དེ་རིང་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་༣༢ ལ་ཕེབས་པའི་སྐུའི་འཁྲུངས་སྐར་སྲུང་བརྩི་ཞུ་བཞིན་ཡོད། རྒྱ་ནག་གཞུང་གིས་ཁོང་བཙན་འཁྲིད་བྱས་ཏེ་མི་ལོ་ཧྲིལ་པོ་ ༢༦ འདས་ཟིན་པ་དང་། ཕྱི་ལོ་ ༡༩༩༥ ལོར་༸གོང་ས་མཆོག་ནས་སྐབས་དེར་དགུང་གྲངས་དྲུག་ལ་ཕེབས་པའི་དགེ་འདུན་ཆོས་ཀྱི་ཉི་མ་མཆོག༧པཎ་ཆེན་རིན་པོ་ཆེའི་ཡང་སྲིད་ཡིན་པ་ངོས་འཛིན་གནང་རྗེས་། རྒྱ་ནག་གཞུང་གིས་ཁོང་དང་ཁོང་གི་ནང་མི་ཡོངས་རྫོས་བཙན་འཁྲིད་བྱས་པ་མ་ཟད། སྐབས་དེའི་བཀྲིས་ལྷུན་པོ་དགོན་པའི་དབུ་འཛིན་བྱ་བྲལ་རིན་པོ་ཆེ་མཆོག་ཀྱང་མཉམ་དུ་འཇུ་བཟུང་བྱས་ཡོད། དེ་རིང་ཕྱི་ལོ་ ༢༠༢༡ ལོའི ཟླ་ ༤ ཚེས་ ༢༥ ཉིན་༧པཎ་ཆེན་རིན་པོ་ཆེ་མཆོག་གུང་གྲངས་ ༣༢ ལ་ཕེབས་ཀྱི་ཡོད་པ་དང། ཁོང་བཙན་འཁྲིད་བྱས་ཏེ་འདས་ཟིན་པའི་མི་ལོ་ ༢༦ གི་རིང་ལ་ང་ཚོས་སྔར་བཞིན་ཁོང་གི་སྐུའི་གནས་སྟངས་ཀྱི་སྐོར་ལ་ཤེས་རྟོགས་གང་ཡང་མེད་ཅིང་། བོད་མི་དང་བོད་དོན་རྒྱབ་བསྐྱོར་བ། དེ་བཞིན་འཛམ་གླིང་རྒྱལ་ཁབ་ཁག་གི་སྲིད་གཞུང་ནས་རྒྱ་ནག་གཞུང་གིས་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་མི་དམངས་དང་འབྲེལ་གཏུག་བྱེད་དུ་མི་འཇུག་པ་དེ་ནི་ཡོངས་སུ་ནོར་འཁྲུལ་ཡིན་པའི་ངོས་འཛིན་བྱེད་ཀྱི་ཡོད། དེར་བརྟེན་སྐུ་ན་ཕྲ་བའི་པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་ནས་མྱུར་དུ་གློད་བཀྲོལ་གཏོང་དགོས་པའི་འབོད་སྐུལ་ཞུ་བཞིན་ཡོད། ཅེས་བཀོད་འདུག
རྒྱ་ནག་གཞུང་གིས་ག་དུས་ཡིན་ཀྱང་པཎ་ཆེན་དགེ་འདུན་ཆོས་ཀྱི་ཉི་མ་མཆོག་ནས་ཕྱི་རོལ་ཡུལ་གྱི་མི་སུ་གཅིག་དང་ཐུག་འཕྲད་བྱེད་འདོད་མེད་པར་གཅིག་པུར་བསྡད་འདོད་བྱེད་ཀྱི་ཡོད་ཅེས་ཁ་གཡར་གྱི་ཡོད། རྒྱ་ནག་གཞུང་གིས་བོད་མིའི་ཆོས་དད་རང་དབང་ལ་རྡོག་རོལ་གཏོང་བཞིན་ཡོད་པ་དང་། ༸པཎ་ཆེན་རིན་པོ་ཆེ་མཆོག་ནི་༸གོང་ས་མཆོག་ཕུད་པའི་བླ་མ་མཐོ་ཤོས་ཨང་གཉིས་པ་དེ་ཡིན་པ་དང་། དུས་རབས་མང་པོའི་རིང་༸གོང་ས་མཆོག་ནས་བོད་ཀྱི་བླ་སྤྲུལ་ཡང་སྲིད་ངོས་འཛིན་བྱེད་པའི་ཐད་ཐུགས་འགན་ཧ་ཅང་ཆེན་པོ་བཞེས་གནང་ཡོད་པ་དང། པཎ་ཆེན་རིན་པོ་ཆེའི་ཡང་སྲིད་ངོས་འཛིན་ཞུ་རྒྱུ་དེ་ཧ་ཅང་གལ་གནད་ཅན་ཞིག་ཡིན་སྟབས། མི་ལོ་ ༢༦ གི་རིང་བོད་ཀྱི་བུད་མེད་ལྷན་ཚོགས་ཀྱི་ངོས་ནས་གང་ཐུབ་ཀྱིས་འབད་བརྩོན་བྱས་ཏེ་རྒྱ་ནག་གི་འབྲེལ་ཡོད་སྡེ་ཚན་དང་འབྲེལ་བ་བྱས་ཀྱང་ཕན་ནུས་ལྡན་པ་ཞིག་བྱུང་མེད། བུད་མེད་ལྷན་ཚོགས་ཀྱི་ངོས་ནས་འཛམ་གླིང་རྒྱལ་ཁབ་ཁག་གི་དབུ་འཁྲིད་ཚོའི་ངོས་འཛིན་མཐོ་རུ་གཏོང་རྒྱུར་འབད་བརྩོན་དང་ནུས་པ་ཐོན་ཡོད་པ་དང་། ད་དུང་ཞི་བའི་ཁྲོམ་སྐོར་དང་། བགྲོ་གླེང་ཚོགས་འདུ་སོགས་འགོ་བསྒྲིགས་ཞུས་ཏེ་ལས་འགུལ་སྣ་ཚོགས་སྤེལ་ཡོད།
དེ་རིང་ནི་དགེ་འདུན་ཆོས་ཀྱི་ཉི་མ་མཆོག་གུང་གྲངས་ ༣༢ ལ་ཕེབས་པའི་སྐུའི་འཁྲུངས་སྐར་ཡིན་པ་དང་། བོད་ཀྱི་བེུད་ལྷན་ཚོགས་ཀྱི་ངོས་ནས་རྒྱ་ནག་གཞུང་གིས་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་གཏོང་དགོས་པའི་འབོད་སྐུལ་ཞུ་བཞིན་ཡོད། ང་ཚོས་འགྲོ་བ་མིའི་ཐོབ་ཐང་ལ་ཡིད་ཆེས་བྱེད་ཀྱི་ཡོད་པས་དགེ་འདུན་ཆོས་ཀྱི་ཉི་མ་མཆོག་ཀྱང་རང་དབང་གི་ཐོག་ནས་འཚོ་གནས་དགོས་པའི་ཐོབ་ཐང་ཡོད། འདི་ག་བོད་ཀྱི་བུད་མེད་ལྷན་ཚོགས་ཀྱི་ངོས་ནས་ཁོང་དགུང་གྲངས་ ༣༢ ལ་ཕེབས་པའི་སྐུའི་འཁྲུངས་སྐར་སྲུང་བརྩི་ཞུ་བ་དང་ཆབས་ཅིག་མགོན་པོ་གང་ཉིད་སྐུ་ཚེ་ཡུལ་གནས་ཡོང་བའི་སྨོན་ལམ་འདེབས་བཞིན་ཡོད། ཅེས་དགོས་འདུན་ཁག་གཉིས་བཏོན་པའི་ནང་། ༡༽ རྒྱ་གར་གཞུང་དང་བོད་དོན་རྒྱབ་སྐྱོར་བ་ཚོས་རྒྱ་ནག་གཞུང་ལ་གནོན་ཤུགས་སྤྲད་དེ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་སྐུའི་གནས་སྟངས་ཁ་གསལ་ཡོངས་གྲགས་དགོས་པའི་འབོད་སྐུལ་ཞུ་བཞིན་ཡོད། ༢༽ དགེ་འདུན་ཆོས་ཀྱི་ཉི་མ་མཆོག་མཆོག་གློད་བཀྲོལ་རང་དབང་ཐོབ་རྒྱུར་རྒྱ་གར་གཞུང་གིས་རྒྱ་ནག་ལ་གནོན་ཤུགས་སྤྲོད་དགོས་པའི་འདོད་སྐུལ་ཞུ་བཞིན་ཡོད་ཅེས་བཀོད་འདུག
