རྒྱ་དཀར་ནག་གི་གནད་དོན་དབྱེ་ཞིབ་པ་དང་ཆེད་མཁས་པ་སྐུ་ཞབས་ཇ་ཡ་དྷེ་ཝ་ར་ན་དྷེ་ (Jayadeva Ranade) ལགས་ཀྱིས་རྒྱ་ནག་གཞུང་གིས་བོད་བརྒྱུད་ནང་བསྟན་ལ་སྔར་ལས་དམ་དྲག་ཤུགས་ཆེ་རུ་གཏོང་གི་ཡོད་པ་དེས་འདས་པའི་ལོ་ངོ་བཅུ་ཕྲག་ནང་བོད་ནང་ལག་བསྟར་བྱས་པའི་སྲིད་ཇུས་ཁག་ལེགས་གྲུབ་བྱུང་མེད་པ་གསལ་སྟོན་བྱེད་ཀྱི་ཡོད་སྐོར་བརྗོད་སོང་།
༸པཎ་ཆེན་སྐུ་ཕྲེང་ ༡༡ པ་དགེ་འདུན་ཆོས་ཀྱི་ཉི་མ་མཆོག་གི་སྐུའི་འཁྲུངས་སྐར་ཉིན་མོ་དང་སྟབས་བསྟུན། དབུས་བོད་ཀྱི་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ། རྒྱ་གར་གྱི་ཧི་མ་ལ་ཡའི་ཨེ་ཤ་ཡའི་རིག་གནས་ཞིབ་འཇུག་ཁང་དང་ (Centre for Himalayan Asia studies and Engagement)། དང་། (Research and Development Foundation for Integral Humanism) བཅས་མཉམ་འབྲེལ་ཐོག བོད་རིག་པ་བ་དང་བོད་དོན་རྒྱབ་སྐྱོར་བ་སྐུ་ཞབས་ཝི་ཇེ་ཀ་རན་ཊི་ (Vijay Kranti) ལགས་ཀྱིས་གཙོ་སྐྱོང་གནང་བའི་བའི་ཐོག་ནས་དྲ་ལམ་བརྒྱུད་རྒྱ་ནག་གཞུང་གིས་༸པཎ་ཆེན་རིན་པོ་ཆེ་བཙན་འཁྲིད་བྱས་པ་དང་དེའི་གལ་གནད་ཅེས་པའི་བརྗོད་གཞིའི་ཐོག་དྲ་ལམ་གྱི་གཏམ་བཤད་བགྲོ་གླེང་གནང་སོང་།
བགྲོ་གླེང་སྐབས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་ཟུར་སྤེན་པ་ཚེ་རིང་མཆོག་གིས་གསུང་བཤད་གནང་སྐབས། རྒྱ་ནག་གཞུང་གིས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་བཙན་འཁྲིད་བྱས་དགོས་དོན་ནི། ༸པཎ་ཆེན་སྐུ་ཕྲེང་བཅུ་གཅིག་པ་ཁོང་ཉིད་༸གོང་ས་རྒྱལ་བ་རིན་པོ་མཆོག་གིས་ངོས་འཛིན་གནང་བ་ཞིག་ཡིན་པ་དང་། རྒྱ་ནག་གཞུང་ལ་༸པཎ་ཆེན་རིན་པོ་ཆེ་མཆོག་རྒྱ་གར་ལ་བཙན་བྱོལ་དུ་ཕེབས་སྲིད་པའི་ཞེད་སྣང་བྱུང་བ། རྒྱ་ནག་གིས་ངོས་འཛིན་བྱས་པའི་༸པཎ་ཆེན་བླ་མ་དེ་འབྱུང་འགྱུར་༸གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ངོས་འཛིན་ཐད་ཆབ་སྲིད་ཀྱི་ལག་ཆར་བཀོལ་སྤྱོད་བྱ་ཆེད་བཅས་ཡིན་སྐོར་དང་། རྒྱ་ནག་ངོས་ནས་༸པཎ་ཆེན་རིན་པོ་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་ཇི་ཡིན་དན་རྟགས་དང་བཅས་པ་གསལ་པོ་བཟོ་དགོས་སྐོར་དང་། བོད་མི་དང་རྒྱལ་སྤྱིའི་སྤྱི་ཚོགས་ངོས་ནས་རྒྱ་ནག་གཞུང་གིས་སྤྲུལ་སྐུ་ངོས་འཛིན་གྱི་གཙོས་པའི་བོད་བརྒྱུད་ནང་བསྟན་ལ་ཐེ་ཇུས་བྱ་རྒྱུར་མོས་མཐུན་རྩ་བ་ནས་མེད་སྐོར་སོགས་གསུངས་སོང་།
གཞན་ཡང་། བགྲོ་གླེང་ཐོག་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་ནག་གི་གནད་དོན་དབྱེ་ཞིབ་དང་ཐབས་ཇུས་ལྟེ་གནང་ཁང་ (Centre for China Analysis and Strategy) གི་ཚོགས་གཙོ་དང་། རྒྱ་དཀར་ནག་གི་གནད་དོན་དབྱེ་ཞིབ་པ་དང་ཆེད་མཁས་པ་སྐུ་ཞབས་ཇ་ཡ་དྷེ་ཝ་ར་ན་དྷེ་ (Jayadeva Ranade) ལགས་ཀྱིས། རྒྱ་ནག་གཞུང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་བཙན་ཁྲིད་བྱས་པ་དེ་ནི། རྒྱ་ནག་གིས་བོད་ཀྱི་ནང་བསྟན་ཆོས་ལུགས་ལ་སྟངས་འཛིན་བྱ་རྒྱུའི་གོམ་པ་དང་པོ་དེར་ངོས་འཛིན་བྱེད་ཀྱི་ཡོད་ཀྱང་། བོད་མི་རྣམས་ནི་རང་གི་ཆོས་ལུགས་ལ་དད་མོས་ཆེན་པོ་ཡོད་པའི་མི་རིགས་ཤིག་ཡིན་སྟབས། རྒྱ་ནག་གི་ཐབས་ཇུས་འོག་ཚུད་ཐུབ་ཐབས་མེད་སྐོར་དང་། རྒྱ་ནག་གཞུང་གིས་བསྐོ་གཞག་བྱས་པའི་༸པཎ་ཆེན་བླ་མ་དེར་བོད་གཞིས་བྱེས་གཉིས་ཀས་༸པཎ་ཆེན་རིན་པོ་ཆེའི་ཡང་སྲིད་དུ་ངོས་འཛིན་བྱེད་ཀྱི་མེད་པ། འདས་པའི་ལོ་གཅིག་ནང་རྒྱ་ནག་གིས་བསྐོ་གཞག་བྱས་པའི་༸པཎ་ཆེན་རིན་པོ་ཆེ་བོད་ཀྱི་ས་ཁུལ་ཁག་ཏུ་གཟིགས་སྐོར་དུ་ཕེབས་རྒྱུ་མང་དུ་ཕྱིན་ཡོད་པ་མ་ཟད། འདོད་མོས་ཡོད་མེད་ལ་མ་ལྟོས་པར་ཁོང་ལ་མཇལ་བཅར་ཞུ་མཁན་བོད་མིའང་མང་དུ་ཕྱིན་ཡོད་པ་མངོན་གསལ་ཡིན་པ་དང་། རྒྱ་ནག་གཞུང་ངོས་ནས་༸པཎ་ཆེན་རྒྱལ་མཚན་ནོར་བུ་རྒྱལ་སྤྱིའི་ཆོས་ལུགས་ཀྱི་ཚོགས་འདུ་ཁག་ལ་ཞུགས་སུ་བཅུག་སྟེ། རྒྱལ་སྤྱིའི་སྟེང་ནས་ངོས་འཛིན་ཐོབ་ཐབས་བྱེད་ཀྱི་ཡོད་ཀྱང་། ད་ལྟའི་ཆར་དེར་ལེགས་གྲུབ་བྱུང་མེད་སྐོར་སོགས་འགྲེལ་བརྗོད་གནང་སོང་ལ། ཉེ་བའི་ཆར་རྒྱ་ནག་གཞུང་གིས་བོད་བརྒྱུད་ནང་བསྟན་འདི་ཉིད་རྒྱ་ནག་གི་སྤྱི་ཚོགས་རིང་ལུགས་ཅན་དུ་སྒྱུར་ཐབས་དང་། བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ཐོག་སྟངས་འཛིན་ཡོང་ཐབས་བཅས་ལ་སྔར་བས་དམ་དྲག་ཤུགས་ཆེར་བྱེད་བཞིན་ཡོད་པ་དང་། དེས་དོན་དངོས་ཐོག་རྒྱ་ནག་གཞུང་གིས་འདས་པའི་ལོ་ངོ་བཅུ་ཕྲག་ནང་བོད་ནང་ལག་བསྟར་བྱས་པའི་སྲིད་ཇུས་ཁག་ལེགས་གྲུབ་བྱུང་མེད་པ་གསལ་སྟོན་བྱེད་ཀྱི་ཡོད་སྐོར་འགྲེལ་བརྗོད་གནང་སོང་།
དེ་བཞིན་རྒྱ་གར་དུ་རྟེན་གཞི་བྱས་པའི་ RDFIH ཞིབ་འཇུག་ཁང་གི་འགན་འཛིན་ཧེ་ཤི་ཅན་དྷ་ར་ཤཱར་མ་ལགས་ཀྱིས། བོད་ཀྱི་གནད་དོན་འདི་འགྲོ་བ་མིའི་ཐོབ་ཐང་དང་ཡུལ་བབ་སྲིད་ཇུས་ཀྱི་གནད་དོན་ཙམ་ཞིག་མིན་པར། རིག་གཞུང་དང་རྒྱལ་ཁབ་གཅིག་གི་གནད་དོན་ཞིག་ཡིན་སྐོར་དང་། བོད་འདི་སྔར་བཞིན་རང་དབང་རང་བཙན་གྱི་རྒྱལ་ཁབ་གཅིག་ཏུ་འགྱུར་རྒྱུའི་ཐོབ་ཐང་ཡོད་པ་དང་། རྒྱ་ནག་གིས་༸གོང་ས་མཆོག་དང་༸པཎ་ཆེན་རིན་པོ་ཆེ་ལྟ་བུར་སྟངས་འཛིན་དམ་དྲག་བྱེད་བཞིན་པ་དེས། རྒྱ་ནག་གི་ཞན་ཆ་དང་བོད་ཀྱི་སྟོབས་ཤུགས་སྟོན་གྱི་ཡོད་སྐོར་སོགས་འགྲེལ་བརྗོད་གནང་བྱུང་།
ཐེངས་འདིའི་བགྲོ་གླེང་ལས་རིམ་ནང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བུ་ཆུང་ཚེ་རིང་ལགས་དང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས། བོད་རང་བཙན་སློབ་ཕྲུག་ཚོགས་པའི་རྒྱ་གར་ཚན་པའི་ཚོགས་གཙོ་རིག་འཛིན་ཆོས་སྒྲོན་ལགས། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པའི་འགན་འཛིན་འབྲུག་ལྡན་སྐྱིད་ལགས་བཅས་ཀྱིས་པཎ་ཆེན་རིན་པོ་ཆེའི་སྐོར་ལང་གཏམ་བཤད་གནང་སོང་།
གསར་འགོད་པ། པ་སངས་ཚེ་རིང་།
