རྒྱ་ནག་གཞུང་གིས་མུ་མཐུད་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་གཏོང་གི་ཡོད་པའི་སྙན་ཐོ་བཏོན།

དེ་རིང་དྷ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གི་ངོས་ནས་ཕྱི་ལོ་ ༢༠༢༠ ལོའི་བོད་ནང་གི་འགྲོ་བ་མིའི་ཐོབ་ཐང་གི་སྙན་ཐོ་འདོན་སྤེལ་གནང་བའི་ནང་། རྒྱ་ནག་གཞུང་གིས་མུ་མཐུད་ནས་བོད་ནང་མི་རིགས་མཐུན་སྒྲིལ་སོགས་ཀྱི་དམ་དྲག་སྲིད་ཇུས་ལག་བསྟར་བྱས་ཏེ། བོད་མིའི་བསམ་བརྗོད་རང་དབང་གིས་མཚོན་པའི་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་ཚབས་ཆེར་གཏོང་གི་ཡོད་སྐོར་བཀོད་འདུག

ད་ལན་གྱི་སྙན་ཐོའི་ནང་། ཕྱི་ལོ་ ༢༠༢༠ ལོར་རྒྱ་ནག་གཞུང་གིས་བོད་ནང་“བརྟན་ལྷིང་སྲུང་སྐྱོང་” དང་“མི་རིགས་མཐུན་སྒྲིལ་” “ནག་སེལ་གཤེད་བཅོམ་”“བོད་བརྒྱུད་ནང་བསྟན་ཀྲུང་གོ་ཅན་དུ་སྒྱུར་བ་” སོགས་ཀྱི་དྲག་གནོན་གྱི་སྲིད་ཇུས་རབ་དང་རིམ་པ་མང་པོ་ལག་བསྟར་བྱས་ཏེ། ལས་འགུལ་དེ་དག་གི་མིང་ཐོག་ནས་རྒྱ་ནག་དམར་ཤོག་གཞུང་གི་དབང་ཤུགས་དེ་སྤྱི་ཚོགས་ཁྱོན་ཡོངས་སུ་སླེབ་ཐབས་དང་། བོད་མིའི་ཆབ་སྲིད་དང་སྤྱི་དམངས། དཔལ་འབྱོར་དང་སྤྱི་ཚོགས། རིག་གཞུང་དང་བཅས་པའི་ཐོབ་ཐང་ཁག་ཚབས་ཆེའི་རྡོག་རོལ་བཏང་ཡོད་སྐོར་དང་། ལྷག་པར་དུ་འདས་ལོར་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་ཟེར་བ་དང་། ཕྱི་ལོ་ ༢༠༢༡ ནས་ ༢༠༢༥ བར་གྱི་ལོ་ལྔ་ཚན་བཅུ་བཞི་པའི་འཆར་འགོད་ཟེར་བ་གཏན་འབེབ་བྱས་ཏེ། རྒྱ་ནག་དམར་ཤོག་གཞུང་གི་སྲིད་དབང་གཅིག་སྡོམ་སྒེར་གཅོད་དབང་སྒྱུར་རྒྱུན་འཁྱོངས་བྱེད་ཐབས་དང་། “འཕེལ་རྒྱས་ཀྱི་སྤུས་ཀ་མཐོ་རུ་གཏོང་བ་” དང་ “སྤྱི་ཚོགས་རིང་ལུངས་དེང་རབས་ཅན་གྱི་བོད་འཛུགས་སྐྲུན་” ཟེར་བ་དེ་དག་ནི་བོད་མི་མཉམ་ཞུགས་མེད་པའི་དཔལ་འབྱོར་སྲིད་ཇུས་ཤིག་ཡིན་པ་མ་ཟད། དམར་ཤོག་རྒྱལ་ཁབ་ཀྱི་དཔལ་འབྱོར་ཁེ་ཕན་དང་ཆབ་སྲིད་ཀྱི་དམིགས་ཡུལ་གཞིར་བཟུང་ནས་རྒྱལ་ཡོངས་སུ་གཏན་འབེབ་བྱས་པ་ཞིག་ཡིན་སྐོར་བཀོད་ཡོད་འདུག

ཡང་སྙན་ཐོའི་ནང་། རྒྱ་ནག་གཞུང་གིས་བོད་ནང་“བོད་བརྒྱུད་ནང་བསྟན་ཀྲུང་གོ་ཅན་དུ་སྒྱུར་བ་” ཞེས་པའི་ལས་འགུལ་དེའི་ཁྲོད་ནས་བོད་མིའི་ཚོའི་ཆོས་ལུགས་དད་མོས་རང་དབང་གི་ཐོབ་ཐབ་སྤྱོད་དབང་མེད་པར་བཟོས་པ་མ་ཟད། སྲིད་ཇུས་དེའི་ཁྲོད་དུ་ནང་བསྟན་ཆོས་ལུགས་ཀྱི་དགེ་འདུན་པ་དང་དད་ལྡན་མང་ཚོགས་ཡོངས་རྫོགས་ལ་རྒྱལ་ཁབ་ཀྱིས་སྤེལ་བའི་ཆོས་ལུགས་བྱེད་སྒོ་སྤེལ་བའི་ལས་དོན་ནང་མཉམ་ཞུགས་དང་རྒྱབ་སྐྱོར་བྱ་དགོས་པའི་བཙན་སྐུལ་བཏང་ཡོད་སྐོར་དང་། ༧གོང་ས་རྒྱལ་བ་རིན་པོ་ཆེ་མཆོག་ལ་དད་པ་དམ་ཚིག་གནང་མཁན་བོད་མི་རྣམས་ལ་རྒྱལ་ཁབ་མགོ་རྟིང་སློག་པའམ། ཡང་ན་རྒྱལ་ཁབ་ཁ་བྲལ་ལ་ངན་སྐུལ་བྱས་པའི་ཉེས་མིང་འོག་འཛིན་བཟུང་བཀག་ཉར་བྱེད་མུས་ཡིན་སྐོར་བཀོད་འདུག

གཞན་ཡང་། སྙན་ཐོའི་ནང་། རྒྱ་ནག་ཧན་མི་རིགས་ཀྱིས་བཙན་བཟུང་བྱས་པའི་གྲོང་ཁྱེར་དང་གྲོང་རྡལ་མང་པོ་དམིགས་སུ་བཟུང་བའི་རྒྱ་གཞུང་གི་ཡར་རྒྱས་འཛུགས་སྐྲུན་གྱི་ལས་གཞི་ཟེར་བ་དེ་དག་གིས་མངོན་གསལ་དོད་པོར་གྲངས་ཉུང་བོད་མི་ཚོ་སྣང་མེད་རྒྱ་ཡན་དུ་དོར་ནས་རྒྱ་རིགས་མི་མང་གི་ཁེ་ཕན་བསྐྲུན་ཏེ། བོད་མི་ཚོར་ཁེ་ཕན་དང་ཡར་རྒྱས་ཅི་གང་ཕྱིན་མེད་པ་དང་། དེ་ནི་མི་རིགས་ཕན་ཚུན་འདྲ་མཉམ་མིན་པ་དང་། དབྱེ་འབྱེད་ཆེ་བ་དང་ཉམ་ཉེས་ཚབས་ཆེན་བྱུང་བའི་ཉེར་ལེན་ཆགས་ཡོད། རྒྱ་གཞུང་གི་རྨང་གཞིའི་སྒྲིག་བཀོད་དང་གྲོང་ཁྱེར་ཅན་འཛུགས་སྐྲུན། སྐད་ཡིག་སློབ་གསོ།  ལྷག་པར་དུ་ “སྐད་གཉིས་སློབ་གསོ་” ཟེར་བ་སོགས་ཡར་རྒྱས་འཛུགས་སྐྲུན་གྱི་སྲིད་ཇུས་ཁག་ཚང་མ་མི་རིགས་རྒྱ་སྒྱུར་ལས་དོན་ཆེན་པོ་ཞིག་གི་ཆ་ཤས་ཡིན་པ་དང་། དེ་ནི་བོད་མིའི་ངོ་བོ་ཉམ་ཉེས་བཟོ་ཐབས་དང་རིག་གཞུང་རྒྱ་སྒྱུར་བྱེད་ཐབས་ཤིག་ཡིན་སྐོར་བརྗོད་འདུག

སྙན་ཐོའི་མཇུག་བསྡོམས་ནང་། རྒྱ་ནག་དམར་ཤོག་རྒྱལ་ཁབ་ཀྱི་བསམ་སྦྱོར་དེ་དག་ནི། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཡོངས་ཁྱབ་གསལ་བསྒྲགས་དང་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་སོགས་ཚང་མ་དགྲ་ལྟར་འཛིན་ཐབས་ཤིག་ཡིན་པས་ན། རྒྱ་གཞུང་གིས་ངེས་པར་དུ་མཇུག་འབྲས་འདི་དག་གི་འགན་འཁུར་དགོས་པ་དང་། རྒྱ་ནག་དམར་ཤོག་རྒྱལ་ཁབ་འཛམ་གླིང་མཉམ་འབྲེལ་རྒྱལ་ཚོགས་དང་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་ཀྱི་ཚོགས་གྲས་སུ་ཞུགས་ནས། རྒྱལ་སྤྱིའིི་འགྲོ་བ་མིའི་ཐོབ་ཐང་གི་ཁྲིམས་ཡིག་ལག་བསྟར་གྱི་མིང་རྟགས་འཁོད་པ་དང་དུས་མཚུངས་སུ། རྒྱ་ནག་དམར་ཤོག་རྒྱལ་ཁབ་ཀྱི་ལག་བསྟར་ཁྲིམས་སྒྲིག་དང་སྲིད་ཇུས་ཁག་ཚང་མ་འགྲོ་བ་མིའི་ཐོབ་ཐང་ལས་དོན་དང་ཐད་ཀར་འབྲེལ་བ་དེས། ཁྲིམས་སྒྲིག་སྲིད་ཇུས་དེ་དག་རྒྱལ་སྤྱིའི་རྩ་ཁྲིམས་དང་འགྲོ་བ་མིའི་ཐོབ་ཐང་གི་ཁྲིམས་ཡིག་གི་ཆ་ཤས་སུ་གཏོགས་པ་གསལ་ཡོད་པས། ཁ་ལག་རྒྱབ་འགལ་གྱི་གནས་སྟངས་གསལ་བཤད་བྱས་ནས། རྒྱ་ནག་དམར་ཤོག་རྒྱལ་ཁབ་ཀྱིས་ངེས་པར་དུ་འགན་འཁུར་ལེན་དགོས་སྐོར་བརྗོད་འདུག

འཆར་ཅན་ལྟར་འདི་ལོའང་བོད་ཀྱི་འགྲོ་བ་མིིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་ངོས་ནས་སྙན་ཐོ་འདི་བོད་ཡིག་དང་། དབྱིན་ཡིག། རྒྱ་ཡིག་བཅས་སྐད་ཡིག་གསུམ་ནང་འདོན་སྤེལ་བྱས་འདུག་ལ། སྙན་ཐོའི་ནང་དོན་ཁྲོད་རྒྱ་ནག་གཞུང་གིས་བོད་ནང་སྤེལ་བའི་དམ་དྲག་གི་སྲིད་ཇུས་ཁག་དང་། སྤྱི་དམངས་དང་ཆབ་སྲིད་ཀྱི་ཐོབ་ཐང་སྐོར། དེ་བཞིན་བོད་ནང་གི་སློབ་གསོ་དང་སྐད་ཡིག་གི་ཐོབ་ཐང་། ཁོར་ཡུག་དང་ཡར་རྒྱས་ཀྱི་ཐོབ་ཐང་བཅས་ཀྱི་སྐོར་བཀོད་འདུག་ཅིང་། སྙན་ཐོ་དང་འབྲེལ་ནས་མཉམ་འབྲེལ་རྒྱལ་ཚོགས་དང་དེའི་ཚོགས་ཞུགས་རྒྱལ་ཁབ། གཞུང་འབྲེལ་མིན་པའི་ཚོགས་སྡེ་ཁག་བཅས་ཀྱིས་རྒྱ་ནག་དང་འབྲེལ་འདྲིས་བྱེད་སྐབས་སུ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་གླེང་སློང་དགོས་པ་དང་། རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་ཞུས་ཡོད་འདུག

གསར་འགོད་པ། པ་སངས་ཚེ་རིང་།