བོད་མིའི་སྤྱི་ཚོགས་འདི་ཕོ་མོ་འདྲ་མཉམ་གྱི་སྤྱི་ཚོགས་ཤིག་རེད་དམ།

“ད་ལྟ་ང་ཚོས་གདོང་ལེན་བྱ་དགོས་ས་དེ་གང་རེད་ཟེར་ན། དབང་ལྡན་མི་སྣ་མང་པོས་ཕོ་མོ་འདྲ་མཉམ་སྐོར་ཤེས་ཀྱི་མེད་པ་མ་ཟད། དེ་ཉིད་རྟོགས་ཐབས་ཀྱང་བྱེད་ཀྱི་མེད་པ་དེ་རེད། དེའི་ཐོག་ཁོང་ཚོས་གནད་དོན་དེ་དག་ལ་ཞེ་ཐག་པ་ནས་དགག་པ་རྒྱག་གི་ཡོད། སྤྱིར་ང་ཚོའི་སྲིད་བྱུས་རྣམས་ཕོ་མོ་འདྲ་མཉམ་གྱི་སྤྱི་ཚོགས་ཤིག་སྐྲུན་ཐབས་ཀྱི་ཕྱོགས་སུ་གཞོལ་ཐུབ་པ་དགོས་ཀྱང་། དབང་ལྡན་མི་སྣ་དེ་ཚོར་ཕོ་མོ་འདྲ་མཉམ་སྐོར་ཤེས་རྟོགས་མེད་པ་དེས་ང་ཚོའི་སྲིད་བྱུས་དག་ལ་ལྡོག་ཕྱོགས་ཀྱི་ནུས་པ་ཐོན་གྱི་ཡོད་པ་རེད།“

དྲི་བ། ཕོ་མོ་འདྲ་མཉམ་ཟེར་དུས་གང་འདྲ་ཞིག་ལ་གོ་དགོས་ཀྱི་རེད་དམ།

གཞི་རྩའི་ཆ་ནས་བཤདད་ན། ཕོ་མོ་འདྲ་མཉམ་ཟེར་དུས་ཕོ་མོ་དབྱེ་བ་མེད་པར་ཚང་མར་ཐོབ་ཐང་དང་། མཐུན་རྐྱེན། གོ་སྐབས། བདེ་འཇགས་བཅས་འདྲ་མཉམ་ཐོབ་པ་ལ་ཟེར་གྱི་ཡོད།

དྲི་བ། ཁྱེད་ཀྱིས་ང་ཚོ་བཙན་བྱོལ་བོད་མིའི་སྤྱི་ཚོགས་འདི་ཡར་ཐོན་ཅན་ (Progressive) ཞིག་ལ་ངོས་འཛིན་བྱེད་ཀྱི་ཡོད་མེད་དང་། སྤྱི་ཡོངས་ནས་ཕོ་མོ་འདྲ་མཉམ་གྱི་གནས་བབ་གང་འདྲ་ཞིག་ལ་སླེབས་ཡོད་པར་ངོས་འཛིན་བྱེད་ཀྱི་ཡོད། དུས་རྒྱུན་བོད་མིའི་མགོ་འཁྲིད་དང་མང་ཚོགས་ཁྲོད་དུ་ང་ཚོའི་སྤྱི་ཚོགས་འདི་ཕོ་མོ་འདྲ་མཉམ་གྱིས་མཚོན་པའི་སྤྱི་ཚོགས་ཀྱི་གནད་དོན་ཐོག་གཞན་དང་བསྡུར་ན་བཟང་བ་ཡོད་སྐོར་རྗོད་ཀྱི་འདུག ཁྱེད་ཀྱིས་བལྟས་ན་དེ་འདྲ་ཞིག་ཨེ་རེད། 

རྒྱལ་ཁབ་དང་སྤྱི་ཚོགས་ཕལ་ཆེ་བས་རང་གི་མི་སེར་གྱི་ཡར་རྒྱས་ཀྱི་ཚད་གཞི་དེ་ཤེས་ཡོན་དང་། དཔལ་འབྱོར་གྱི་ཡོང་འབབ། འཕྲོད་བསྟེན། ཚེ་ཚད་བཅས་ལ་གཞིར་འཛིན་གྱི་ཡོད། གལ་ཏེ་མི་སེར་རྣམས་ལ་ཚད་དང་ལྡན་པའི་ཤེས་ཡོན་སྦྱང་རྒྱུའི་གོ་སྐབས་མེད་ཚེ། དེ་ནི་ཡར་རྒྱས་མིན་པའི་རྟགས་མཚན་གསལ་པོ་ཞིག་ཡིན། རང་རེའི་བོད་མིའི་སྤྱི་ཚོགས་ནང་མཚོན་ན་གནས་ཚུལ་དེ་དག་ཐད་ཚད་ལྡན་གྱི་ཞིབ་འཇུག་གྲངས་ཐོ་ཞིག་མེད་པར་བརྟེན། ངས་རང་རེའི་སྤྱི་ཚོགས་འདི་ཡར་ཐོན་ཅན་ཞིག་ཡིན་མིན་ཞུ་ཐབས་མི་འདུག

འོན་ཀྱང་། གལ་ཏེ་ཁྱེད་ཀྱིས་ང་ཚོའི་སྤྱི་ཚོགས་ཀྱི་བུད་མེད་རྣམས་ཀྱི་གནས་སྟངས་སྐོར་འདྲི་གི་ཡོད་ཚེ། ངས་དེར་ལན་ཞིག་མ་འདེབས་ཐབས་མེད་རེད། རང་རེའི་སྤྱི་ཚོགས་ནང་བུད་མེད་ཚོས་མུ་མཐུད་འཚེ་སྤྱོད་མྱོང་གི་ཡོད་ཅིང་། ཕལ་ཆེ་བ་སྐྱེས་པ་ཕོའི་ལག་ནས་མྱོང་གི་ཡོད། དེའི་ནང་ནས་ཀྱང་མང་ཆེ་བ་ཁྱོ་ག་དང་དགའ་རོགས་ཀྱིས་མཚོན་པའི་ཁྱིམ་ནང་གི་འཚེ་སྤྱོད་མྱོང་མཁན་རེད། ཁྱིམ་ནང་བུད་མེད་རྣམས་ཀྱིས་རྩུབ་སྤྱོད་དང་། སྡིགས་ར། སེམས་ཁམས། དཔལ་འབྱོར་བཅས་ཀྱི་འཚེ་སྤྱོད་རྣམ་པ་སྣ་ཚོགས་མྱོང་གི་ཡོད། རང་རེའི་སྤྱི་ཚོགས་ནང་དྲག་རྩུབ་དང་བཙན་ཐབས་ཀྱི་འཁྲིག་སྤྱོད་མི་མྱོང་མཁན་བུད་མེད་ཧ་ཅང་དཀོན་པོ་རེད། ང་ཚོའི་བུད་མེད་རྣམས་ལ་ཁྱིམ་ཙམ་དུ་མ་ཟད་དྲ་ལམ་སོགས་བརྒྱུད་ནས་ཀྱང་འཚེ་སྤྱོད་ཕོག་གི་ཡོད་པ་མངོན་གསལ་རེད།

ང་ཚོའི་སྤྱི་ཚོགས་ཀྱི་དཀའ་ངལ་ཆེ་ཤོས་དེ་གང་རེད་ཟེར་ན། སྤྱི་ཚོགས་ནང་གཞི་རྩའི་ཆ་ནས་འདྲ་མཉམ་མེད་པའི་རྐྱེན་གྱིས་བུད་མེད་རྣམས་ཀྱིས་དཔུང་པ་མཉམ་གཤིབ་ཀྱི་ཐོག་ནས་སྐྱེས་པ་ཕོར་འགྲན་ཐུབ་ཀྱི་མེད་པ་དེ་རེད། སྐྱེས་པ་ཕོ་དང་བསྡུར་ན་ཕ་མའི་འགན་འཁྲི་དེ་བུད་མེད་རྣམས་ཀྱི་ཐོག་ལ་འགེལ་རྐྱང་བྱེད་ཀྱི་ཡོད་སྟབས། ལས་ཞུགས་བུད་མེད་རྣམས་ཀྱིས་བྱིས་པ་བཙས་པའི་སྔ་ཕྱིར་ལས་ཀ་ནས་དགོངས་པ་མ་ཞུ་ཐབས་མེད་ཆགས་ཀྱི་ཡོད་ལ། གནས་སྐབས་མང་པོར་བྱིས་པར་ལྟ་རྟོག་གིས་མཚོན་པའི་ཁྱིམ་ཚང་གི་འགན་འཁྲི་དེ་གཙོ་བོ་བུད་མེད་ཀྱི་ཡིན་པར་ངོས་འཛིན་བྱེད་ཀྱི་ཡོད།

དེ་ཙམ་དུ་མ་ཟད། བུད་མེད་རྣམས་ཀྱི་ལས་ཀ་བྱ་སའི་ལས་ཁུངས་ཀྱི་མགོ་འཁྲིད་ཕལ་ཆེ་བ་སྐྱེས་པ་ཕོ་ཡིན་ཞིང་། ཁོང་ཚོའི་ཁྲོད་ནས་ཕལ་ཆེ་བས་བུད་མེད་དང་འབྲེལ་བའི་གནད་དོན་གལ་ཆེན་རིགས་སྣང་མེད་དུ་འཇོག་རྐྱང་རེད། ཚོགས་པ་སྒྲིག་འཛུགས་ཕལ་ཆེ་བའི་ནང་བུད་མེད་རྣམས་ལ་བྱིས་པ་བཙའ་དུས་མང་ན་ཟླ་བ་ ༣ གི་ཐོབ་སེང་ཡོད། སྐྱེད་མའི་ཐོབ་སེང་དེ་དོན་དངོས་ཐོག་མ་བུ་གཉིས་ཀྱི་འཕྲོད་བསྟེན་དང་ལུས་གསོའི་ཆེད་མེད་དུ་མི་རུང་བ་ཞིག་ཡིན་ནའང་། ཚོགས་པ་སྒྲིག་འཛུགས་ཁག་གིས་དེ་རྒྱུན་ལྡན་མ་ཡིན་པ་ཞིག་དང་ཚོགས་པའི་ལས་དོན་ལ་འཐུས་ཤོར་འགྲོ་རྐྱེན་ཞིག་ལ་རྩི་ཡི་ཡོད། ང་ཚོས་སྦྲུམ་མའི་གནས་སྐབས་སུ་ཕྲུ་གུའི་ཨ་ཕ་ལ་འགན་འཁྲི་ཅི་ཙམ་ཡོད་མེད་སྣང་འཇོག་བྱེད་ཀྱི་མེད་ལ། སྐབས་ལ་ལར་འགན་འཁྲི་མེད་པ་ལྟ་བུའི་བསམ་ཚུལ་སླེབས་བཞིན་པ་དེ་ནི་དབྱེ་འབྱེད་ཀྱི་སྣང་ཚུལ་ཞིག་རེད།

དབུ་འཁྲིད་ཀྱི་གོ་སར་ཐོན་བཞིན་པའི་བུད་མེད་རྣམས་ལ་མཚོན་ན། རྒྱུན་ལྡན་གྱི་ཟུར་ཟ་སྐྱོན་བརྗོད་རིགས་ཕུད། རང་ཉིད་བུད་མེད་ཅིག་ཡིན་པའི་ཆ་ནས་གཞན་གྱི་ཕྱོགས་ལྷུང་གྱི་ལྟ་ཚུལ་དང་སྐྱོན་བརྗོད་གཟེད་དགོས་ཀྱི་ཡོད་ཅིང་། དེ་དག་གིས་བུད་མེད་མགོ་འཁྲིད་ཚོར་ལུས་སེམས་གཉིས་ཀའི་ཐོག་ནས་དོ་ཕོག་ཤུགས་ཆེར་ཐེབས་ཀྱི་ཡོད་པས། རང་ཤུགས་ཀྱིས་བུད་མེད་རྣམས་མགོ་འཁྲིད་ཀྱི་འགྲན་རྩོད་དེའི་ནང་ཞུགས་ཐུབ་ཀྱི་མེད། དེ་ལྟར་ཡིན་ནའང་ང་ཚོའི་སྤྱི་ཚོགས་ཀྱིས་མུ་མཐུད་བུད་མེད་རྣམས་ཀྱིས་ཅིའི་ཕྱིར་སྐྱེས་པ་ལྟར་མགོ་འཁྲིད་དང་ཆབ་སྲིད་ནང་འཇོན་གྱི་མེད་པ་རེད་ཅེས་དོགས་སློང་བྱེད་ཀྱི་ཡོད། ངའི་རེ་བ་ལ་གོང་གི་གནས་ཚུལ་དེས་འདི་ཐོག་གསལ་པོ་བཟོས་ཡོད་ངེས་རེད།

ཕྱོགས་གཅིག་ནས་ང་ཚོའི་སྤྱི་ཚོགས་ནང་མིག་ལྟོས་བྱ་སའི་བུད་མེད་མགོ་འཁྲིད་ཧ་ཅང་ཉུང་ཉུང་རེད་ལ། ང་ཚོའི་ལོ་རྒྱུས་དང་ཆོས་ལུགས་ཁྲོད་སྐྱེས་པའི་འཇོན་ཐང་དང་སྙིང་སྟོབས་ཀྱིས་ཁེངས་ཡོད་ཀྱང། ང་ཚོའི་སྤྱི་ཚོགས་ནང་སེམས་འགུལ་ཐེབས་ས་དང་ཡི་རང་བྱ་སའི་བུད་མེད་ཧ་ཅང་ཉུང་ཉུང་རེད། ང་ཚོའི་ད་ལྟའི་བུད་མེད་མགོ་འཁྲིད་ཕལ་ཆེ་བའང་ཕོ་མཆོག་མོ་དམན་གྱི་ལྟ་ཚུལ་འཛིན་མཁན་གྱི་ཕྱུག་བདག་གམ་དབང་ཤུགས་ཅན་གྱི་ཁྱིམ་ཚང་ནས་ཡིན་སྟབས། ཁོང་ཚོ་མང་ཚོགས་ཀྱི་ཡི་རང་དང་སེམས་འགུལ་ཐེབས་སའི་མགོ་འཁྲིད་ཅིག་མིན། དེ་ཙམ་དུ་མ་ཟད། ཁོང་ཚོ་ཕལ་ཆེ་བས་ང་ཚོའི་སྤྱི་ཚོགས་ཀྱི་བུད་མེད་དཀྱུས་མ་རྣམས་ཀྱི་དཀའ་སྡུག་ཤེས་ཀྱི་མེད་པ་རེད།

རྒྱུ་མཚན་དེ་དག་ལ་བརྟེན་ནས། ངས་ང་ཚོའི་སྤྱི་ཚོགས་འདི་ཕོ་མོ་འདྲ་མཉམ་གྱི་སྤྱི་ཚོགས་ཞིག་ཏུ་འགྱུར་བར་ད་དུང་ལམ་ཐག་རིང་པོ་ཡོད་པར་ངོས་འཛིན་ཞུ་ཡི་ཡོད། དེ་བཞིན་ང་ཚོས་རང་གི་སྤྱི་ཚོགས་འདི་གནས་སྟངས་སྡུག་པོ་ཡིན་པའི་སྤྱི་ཚོགས་གཞན་དང་སྡུར་ཐབས་བྱེད་པ་འདི། ཕྱོགས་གང་ནས་བལྟས་ཀྱང་ཡར་རྒྱས་ཀྱི་ཚད་ཐིག་ཅིག་མིན་པ་ཤེས་དགོས།

དྲི་བ། སྤྱིར་བཏང་ཕོ་མོ་འདྲ་མཉམ་མེད་པ་དེ་རྐྱེན་རྩ་གང་ལ་ཐུག་ཡོད་མེད་དང་། ལྷག་པར་དུ་རང་རེའི་བོད་མིའི་སྤྱི་ཚོགས་ནང་རྐྱེན་རྩ་དེ་དག་གང་ནས་འཚོལ་དགོས་ཀྱི་རེད། 

རང་རེའི་སྤྱི་ཚོགས་འདི་ཕོ་མོ་འདྲ་མཉམ་གྱི་སྤྱི་ཚོགས་ཞིག་ཏུ་བསྐྲུན་ཆེད། ཐོག་མར་ང་ཚོས་སྐྱེ་བོ་སུ་འདྲ་ཞིག་ཡིན་རུང་རང་ཉིད་གང་ཡིན་པ་དེ་ལྟར་བྱ་འདོད་ཀྱི་ནུས་པ་དང་འདུན་པར་(person’s capacity to be themselves)བར་གཅོད་མཁན་གྱི་གོམས་སྲོལ་དང་། ལྟ་ཚུལ། བྱེད་སྒོ་ཁག་མེད་པར་བཟོ་དགོས་པ་མ་ཟད། བུད་མེད་དང་རང་བཞིན་འགྱུར་བའི་སྐྱེ་བོ་(trans-person) ཡིས་མཚོན་པའི་དམིགས་བསལ་ཅན་རྣམས་ལ་ཐོབ་ཐང་དང་གོ་སྐབས། མཐུན་རྐྱེན་སོགས་གཅིག་མཚུངས་སུ་སྦྱིན་དགོས།

དོན་དམ་པའི་ཕུགས་རྒྱང་རིང་པོའི་འགྱུར་བ་ཞིག་ཡོང་བར་ང་ཚོར་ཐབས་ལམ་གཉིས་ཡོད། གཅིག་དེ་ལྟ་ཚུལ་དང་གོམས་སྲོལ་རྣམས་འགྱུར་བ་གཏོང་ཐབས་དང་། གཅིག་ཤོས་དེ་གནའ་སྔ་མོ་ནས་བུད་མེད་རྣམས་ལ་འདྲ་མཉམ་མེད་པའི་འབྱུང་རྩ་སྟེ། སྤྱི་ཚོགས་དང་ཆོས་ལུགས། རིག་གཞུང་བཅས་ཀྱི་ནང་ཕོ་མོ་འདྲ་མཉམ་མེད་པའི་གཞི་རྩའི་དབང་ཆའི་གྲལ་རིམ་ལ་ཁྱོན་ཡོངས་ནས་འགྱུར་བ་གཏོང་དགོས་ཀྱི་རེད།

ལྟ་ཚུལ་བསྒྱུར་བཅོས་གཏོང་ཐབས་ནི། ཕོ་མོ་ཟེར་ན་འདི་ལྟ་བུ་ཞིག་ཡིན་དགོས་པ་དང་། དེ་ལྟ་བུ་ཞིག་མིན་པའི་ཡོངས་ཁྱབ་ཀྱི་ལྟ་ཚུལ་མེད་པའི་མི་རབས་གསར་བ་ཞིག་སྐྱེད་སྲིང་བྱ་དགོས། ལྟ་ཚུལ་ལ་འགྱུར་བ་བཏང་བ་དེས་ཕྲུ་གུ་རྣམས་ལ་རང་ཉིད་འཚོལ་སྙེག་བྱ་རྒྱུའི་ལམ་བུ་དང་གཞན་ལ་ཕོ་མོའི་ལུས་རྟེན་གྱི་ཆ་ནས་དབྱེ་འབྱེད་མི་བྱ་རྒྱུའི་ཁོར་ཡུག་ཅིག་བསྐྲུན་ཐུབ། དེའི་ཐད་ང་ཚོའི་ཤེས་ཡོན་གྱིས་ནུས་པ་གལ་ཆེན་ཐོན་ཐུབ་ཀྱི་རེད། གཞི་རྩའི་སྒྲོམ་གཞི་ལ་འགྱུར་བ་གཏོང་དགོས་ན། ང་ཚོས་བུད་མེད་དང་ཟུར་ཕུད་ཀྱི་ཕོ་མོའི་རྟེན་གཙོས་པའི་རྟེན་ཚང་མའི་མངོན་འདོད་མཚོན་པའི་སྲིད་བྱུས་དང་སྒྲིག་ཁྲིམས་བཟོ་དགོས།

དྲི་བ། ཁྱེད་ཀྱིས་བསམ་ན་ད་བར་བཙན་བྱོལ་བོད་མིའི་ཆེས་མཐོའི་མགོ་འཁྲིད་(བཀའ་ཁྲི། སྲིད་སྐྱོང། ཚོགས་གཙོ།)ནང་བུད་མེད་ཅིག་སླེབས་ཐུབ་མེད་པ་དེ། བུད་མེད་འཇོན་པོ་དེ་འདྲ་མ་ཐོན་པའི་རྐྱེན་གྱིས་ཡིན་ནམ། ཡང་ན་སྤྱི་ཚོགས་ཀྱིས་བུད་མེད་རྣམས་ལ་ཕྱོགས་ལྷུང་གི་ལྟ་ཚུལ་ཞིག་བཟུང་བའི་རྐྱེན་གྱིས་རེད།

སྤྱི་ཚོགས་ཁྲོད་བུད་མེད་རྣམས་ལ་སྐྱེས་པ་དང་བསྡུར་ན་མགོ་འཁྲིད་ཀྱི་ནུས་པ་མེད་སྐོར་དང་། བུད་མེད་རྣམས་མགོ་འཁྲིད་བྱེད་པར་སྐྱེས་པ་ཕོ་ལྟར་བློ་ཐག་ཆོད་པོ་དང་དྲག་པོ་མེད་སྐོར་སོགས་རྗོད་ཀྱི་ཡོད་ལ། དེ་བཞིན་ཕ་མས་ཆུང་དུས་ནས་བུ་མོ་རྣམས་བུ་ལས་ཁ་ལ་ཉན་པ་དགོས་སྐོར་གྱི་སློབ་གསོ་སྤྲོད་ཀྱི་ཡོད། དེ་ཙམ་དུ་མ་ཟད་བུད་མེད་རྣམས་ལ་རང་གི་བསམ་ཚུལ་བཤད་རྒྱུར་འཛེམ་ཟོན་དགོས་པའི་སློབ་གསོ་སྤྲོད་ཕྱོགས་དེས། རང་ཤུགས་ཀྱིས་བུད་མེད་ཚོ་སྤྱི་ཚོགས་ནང་ཐོན་དུས་གྱོང་ཆེན་པོ་རག་གི་ཡོད།

ང་ཚོའི་བསམ་བློའི་ནང་མགོ་འཁྲིད་ཟེར་དུས་རང་ཤུགས་ཀྱིས་ཕོ་གཤིས་ཅན་ (Masculinity) ཞིག་དགོས་པའི་སྣང་བ་ད་དུང་ཡལ་མེད། མོ་གཤིས་ཅན་དེ་མགོ་འཁྲིད་ཀྱི་ཁྱད་ནུས་ཤིག་ལ་མ་བརྩིས་པ་དེས་བུད་མེད་ཚོར་རང་ཤུགས་ཀྱིས་གྱོང་རག་གི་ཡོད། སྤྱིར་སྐྱེས་པའི་མགོ་འཁྲིད་ཅིག་ལ་འགྲན་རྩོད་དང་ཆེ་འདོད་ཀྱི་བསམ་པ་ཡོད་ན། སྤྱི་ཚོགས་ཀྱིས་དེར་བསྔགས་བརྗོད་བྱེད་མོས། འོན་ཀྱང་གལ་ཏེ་བུད་མེད་མགོ་འཁྲིད་གཅིག་ལ་འགྲན་རྩོད་དང་ཆེ་འདོད་ཀྱི་བསམ་པ་སྐྱེས་ཚེ། བསྔགས་བརྗོད་ཀྱི་ཚབ་ཏུ་གཤེ་གཤེ་དང་འཕྱ་དམོག་ཕོག་སའི་གཞི་ཞིག་ཏུ་འགྱུར་གྱི་ཡོད། མགོ་འཁྲིད་ནང་ཡོད་པའི་བུད་མེད་ཚོས་ཀྱང་མ་འདོད་བཞིན་དུ་རང་གི་ལྷན་སྐྱེས་ཀྱི་མོ་གཤིས་དོར་ནས་ཕོ་གཤིས་ཅན་ཞིག་སྟོན་དགོས་ཀྱི་ཡོད། དེ་ལྟར་བྱེད་དགོས་དོན་ནི། གལ་ཏེ་མོ་གཤིས་ཉིད་དུ་གནས་ཚེ་སྤྱི་ཚོགས་ཀྱིས་བུད་མེད་དེ་ཉིད་ནུས་སྟོབས་ཞན་པོར་ངོས་འཛིན་བྱེད་སྲིད་པས་ཡིན། ང་ཚོས་བསམ་བློའི་འཁྱེར་སོ་འདིར་འགྱུར་བ་གཏོང་བ་ལ། གཞི་རྩའི་ཆ་ནས་མགོ་འཁྲིད་ཟེར་བ་གང་འདྲ་ཞིག་དགོས་མིན་ཐད་ཀྱི་བསམ་ཚུལ་དེར་བསྒྱུར་བཅོས་གཏོང་དགོས་ལ། ལྷག་པར་དུ་མགོ་འཁྲིད་ཟེར་བ་དེ་ངེས་པར་དུ་ཕོ་གཤིས་ཅན་ཞིག་ཡིན་དགོས་པའི་མཚམས་ཐིག་ལས་བརྒལ་དགོས།

བུད་མེད་རྣམས་ལ་མིག་ལྟོས་བྱ་སའི་བུད་མེད་མགོ་འཁྲིད་དེ་ཙམ་མེད་པ་འདིས། རང་བཞིན་གྱིས་བུད་མེད་རྣམས་མཐོ་རིམ་མགོ་འཁྲིད་ཁྲོད་རང་གི་ཚབ་མཚོན་ཞིག་མི་འདུག་སྙམ་པའི་དཀའ་ངལ་ཞིག་འབྱུང་གི་ཡོད། ང་ཚོའི་མིག་ལྟོས་བྱ་སའི་སྐྱེ་བོ་ཕལ་ཆེ་བ་སྐྱེས་པ་རེད། དངོས་ཡོད་གནས་སྟངས་འདིས་བུད་མེད་རྣམས་མགོ་འཁྲིད་བྱ་རྒྱུར་རང་ཤུགས་ཀྱིས་ཚད་བཀག་བཟོ་ཡི་ཡོད། དེ་བཞིན་སྔར་ནས་སྐྱེས་པ་ཕོས་འཛིན་བཞིན་པའི་གོ་གནས་སམ་བྱ་བར་ཞུགས་འདོད་པའི་བུད་མེད་རྣམས་ལ་ལམ་སྟོན་བྱེད་མཁན་གྱི་བུད་མེད་མགོ་འཁྲིད་ཀྱང་ཧ་ལམ་མེད་པའི་བཟོ་ལྟ་བུ་རེད།

ངས་གོང་དུ་བཤད་པ་བཞིན། སྤྱི་ཚོགས་ཁྱོན་ཡོངས་ཀྱིས་བུད་མེད་ཟེར་དུས་ཁྱིམ་ཚང་གི་གཅེས་སྐྱོང་བ་དེ་ཡིན་དགོས་པའི་སྣང་ཚུལ་ཞིག་བསྐྲུན་ཡོད། ཁྱིམ་ལས་ཀྱི་འགན་འཁྲི་དེ་ཡང་བུད་མེད་རྣམས་ཀྱི་མགོ་ཐོག་ལ་ལྷུང་གི་ཡོད། འོན་ཀྱང་དེང་སང་ཕོ་མོ་གཉིས་ཀར་འགན་འདྲ་མཉམ་ཡོད་པ་ཚོར་མཁན་སྐྱེས་པ་ཉུང་ཤས་ཐོན་བཞིན་པ་དེ་ང་ཚོས་བརྗེད་མི་ཉན། གང་ལྟར་ཕྱོགས་ཡོངས་ནས་བལྟས་ན། ད་ལྟའང་སྐྱེས་པ་དང་བསྡུར་ན། བུད་མེད་རྣམས་ཀྱིས་ཕྲུ་གུ་དང་རྒན་འཁོག་ལ་ལྟ་རྟོག་བྱ་ཆེད་རང་གི་ལས་ཀ་དང་ཕུགས་བསམ་དོར་དགོས་ཀྱི་ཡོད་པ་མ་ཟད། དེས་རང་ཤུགས་ཀྱིས་བུད་མེད་རྣམས་དཔལ་འབྱོར་གྱི་ཐོག་ནས་རང་ཁ་རང་གསོ་ཡོང་ཐུབ་ཀྱི་མེད་ལ། མགོ་འཁྲིད་ཀྱི་ཕྱོགས་སུ་བསྐྱོད་ཐུབ་ཀྱི་མེད་པ་ནི་བཤད་མི་དགོས་པ་རེད།

བུད་མེད་རྣམས་ལ་ལས་ཀའི་སྐབས་སུའང་འཁྲིག་སྤྱོད་ཀྱི་བརྙས་བཅོས་དང་རྩུབ་སྤྱོད་ཕོག་གི་ཡོད་ནའང་། ཚོགས་པ་སྒྲིག་འཛུགས་ཕལ་ཆེ་བར་བུད་མེད་རྣམས་ཉེན་ཁ་དེ་དག་ལས་སྲུང་སྐྱོབ་བྱེད་པའི་སྲིད་བྱུས་སམ་སྒྲིག་གཞི་མེད་སྟབས། བུད་མེད་རྣམས་ཀྱིས་རང་གི་ལུས་སེམས་ལ་གནོད་འཚེ་ཆེ་བའི་ཁོར་ཡུག་དེ་ལྟ་བུའི་ནང་མུ་མཐུད་ལས་ཀ་གཉེར་ཐུབ་ཀྱི་མེད་པ་རེད། དེར་བརྟེན། གོང་དུ་བཤད་པའི་རྒྱུ་རྐྱེན་དེ་དག་གིས་བུད་མེད་རྣམས་མགོ་འཁྲིད་ཀྱི་གནས་བབ་ལ་སླེབས་རྒྱུར་འགོག་རྐྱེན་བཟོ་ཡི་ཡོད་པ་རེད།

དྲི་བ། ཁྱེད་ཀྱིས་བལྟས་ན་ང་ཚོའི་གཞི་རིམ་གྱི་ཤེས་ཡོན་སློབ་གསོའི་ནང་ཕོ་མོ་འདྲ་མཉམ་སོགས་ཀྱི་གནད་དོན་རིགས་ཚུད་ཐུབ་པ་བྱ་རྒྱུ་ཇི་ཙམ་གལ་ཆེན་པོ་མཐོང་གི་འདུག

ཕོ་མོ་འདྲ་མཉམ་ཐད་ང་ཚོའི་ཤེས་ཡོན་སློབ་གསོས་ནུས་པ་ཚད་མཐོན་པོ་འདོན་ཐུབ་ཀྱི་རེད། ཕྲུ་གུ་ཚོས་རང་ཉིད་དང་རང་གི་མཐའ་འཁོར་གྱི་འཇིག་རྟེན་འཚོལ་སྙེག་བྱ་ས་ཐོག་མ་དེ་སློབ་གྲྭ་ཡིན་ནའང་། ཕོ་མོ་དང་འབྲེལ་བའི་ཕྱོགས་ལྷུང་གི་ལྟ་ཚུལ་ཕལ་ཆེ་བ་ནང་མི་དང་། སློབ་གྲྭ། ཆེ་ས་ནས་སྤྱི་ཚོགས་བཅས་ཀྱིས་དངོས་ཤུགས་བརྒྱུད་གསུམ་ནས་ཕྲུ་གུའི་བསམ་བློའི་ནང་ཐིམ་དུ་འཇུག་གི་ཡོད། དེ་ལྟར་མི་ཡོང་བའི་ཆེད་དུ། ང་ཚོའི་ཤེས་ཡོན་སློབ་གསོ་འདི་ལག་ཆ་ཞིག་ཏུ་བཀོལ་སྤྱོད་བྱས་ཏེ་ཕོ་མོ་འདྲ་མཉམ་མིན་པའི་གོམས་སྲོལ་དང་ལྟ་ཚུལ་དེ་དག་ལ་ནུས་པ་ཡོད་ཚད་ཀྱིས་རྒོལ་དགོས།

ང་ཚོས་སློབ་གྲྭའི་བསླབ་གཞིར་བསྐྱར་བཅོས་དང་ཕོ་མོ་གཉིས་ཀར་འཚམ་མཐུན་གྱི་འཛིན་ཁང་བཀོད་སྒྲིག ད་དུང་སློབ་འཁྲིད་ཀྱི་ཐབས་ལམ་དང་། ཕོ་མོ་འདྲ་མཉམ་སོགས་ཀྱི་གནད་དོན་ཐོག་རྒྱུས་མངའ་དང་སེམས་ཚོར་ཡོད་མཁན་གྱི་དགེ་རྒན་བཀོད་སྒྲིག་བྱེད་ཐབས་ཙམ་དུ་མ་ཟད། དེ་ལྟ་བུའི་དགེ་རྒན་དེར་རང་གི་འཛིན་ཁང་ནང་ཕོ་མོ་འདྲ་མཉམ་མིན་པའི་གནད་དོན་རིགས་ཐེར་འདོན་དང་སློབ་མར་ལམ་སྟོན་བྱ་རྒྱུའི་ནུས་པ་ཡོད་མཁན་ཞིག་དགོས། བུ་དང་བུ་མོ་གཉིས་ཀར་འཛིན་ཆས་སོགས་ཤེས་ཡོན་གྱི་མཐུན་རྐྱེན་འདྲ་མཉམ་ཐོག་མཁོ་སྤྲོད་བྱེད་པ་དང་། ཕྲུ་གུ་རྣམས་ལ་འབྱུང་འགྱུར་ཕོ་མོ་འདྲ་མཉམ་མིན་པའི་དོན་རྐྱེན་རིགས་ལ་གདོང་ལེན་བྱེད་ཐབས་ཀྱིས་མཚོན་པའི་སློབ་གསོ་རིགས་འཐུས་ཚང་སློབ་དགོས།

དྲི་བ། ང་ཚོ་མི་སྒེར་ཞིག་ཡིན་པའི་ཆ་ནས། སྤྱི་ཚོགས་ནང་ཕོ་མོ་འདྲ་མཉམ་ཡོང་ཐབས་ཐད་ག་རེ་བྱེད་ཐུབ་པ་དང་ག་རེ་བྱེད་དགོས་ཀྱི་རེད་བསམ་གྱི་འདུག

མི་སྒེར་གྱི་རིམ་པའི་ཐོག་ནས་བཤད་ན། ཐོག་མར་སོ་སོར་ཕོ་མོ་འདྲ་མཉམ་ལ་སོགས་པའི་གནད་དོན་ཐད་ཤེས་རྟོགས་ཡོད་པར་བྱ་རྒྱུ་དེ་གལ་ཆེན་པོ་རེད། ང་ཚོས་ཕོ་མོ་འདྲ་མཉམ་ཐོག་ལས་ཀ་བྱེད་མཁན་སྐྱེ་བོ་དང་། ཡང་ན་བུད་མེད་ཀྱིས་མཚོན་པའི་ཟུར་ཕུད་ཀྱི་ཕོ་མོའི་རྟེན་རྣམས་ཀྱི་བསམ་ཚུལ་དང་མྱོང་བ་ཁག་ལ་ཉན་པ་དང་དོ་སྣང་བྱེད་པ། ལྷག་པར་དུ་ཁོང་ཚོའི་བསམ་བློའི་ནང་ཕོ་མོ་འདྲ་མཉམ་ཟེར་དུས་གང་འདྲ་ཞིག་ཡིན་པ་རྟོགས་རྒྱུ་གལ་འགངས་ཆེ། དེ་ལྟར་བྱས་ཏེ་ང་ཚོར་ཕྱོགས་སུ་མ་ལྷུང་བའི་ལྟ་ཚུལ་ཞིག་གི་ཐོག་ནས་གནད་དོན་ལ་དབྱེ་ཞིབ་བྱ་རྒྱུའི་གནས་སྟངས་ལ་སླེབས་ཐུབ་ངེས་རེད།

ང་ཚོས་ཉིན་ལྟར་ཕོ་མོའི་རྟེན་གཞན་ལ་དབྱེ་འབྱེད་དང་གནོད་པའི་གཞིར་གྱུར་བའི་རང་ཉིད་ཀྱི་བསམ་བློའི་འཁྱེར་སོ་དང་རིན་ཐང་ལྟ་ཚུལ་ལ་རྒོལ་བརྡུང་བཏང་ནས་དྲང་པོའི་ཕྱོགས་ལ་ཞུགས་རྒྱུར་འབད་དགོས། ལྷག་པར་དུ་ང་ཚོས་གཞན་ལ་མེད་ཅིང་རང་ལ་ཡོད་པའི་ཁེ་དབང་དང་ཐོབ་ཐང་དག་ལ་བསྐྱར་ཞིབ་བྱ་དགོས་ལ། རང་གི་ཁེ་དབང་དེ་དག་ལོག་པར་སྤྱོད་རྒྱུའི་ཚབ་ཏུ་ཁེ་དབང་མེད་མཁན་ཚོར་ལྷག་བསམ་རྣམ་དག་གིས་རམ་འདེགས་བྱ་དགོས། ང་ཚོའི་ལྟ་ཚུལ་དང་སྤྱོད་པ་རྣམས་འཕྲལ་དུ་འགྱུར་བ་འགྲོ་རྒྱུ་དཀའ་མོ་ཡིན་ཡང་། གལ་ཏེ་ང་ཚོས་ག་ལེར་བཟང་ཕྱོགས་སུ་གོམ་པ་སྤོས་ཚེ་ཕོ་མོ་འདྲ་མཉམ་གྱི་གནད་དོན་དེ་རིམ་གྱིས་ཇེ་གསལ་དང་ཇེ་ལེགས་སུ་འགྲོ་ངེས་རེད།

དྲི་བ། ད་བར་ཁྱེད་རང་ཕོ་མོ་འདྲ་མཉམ་དང་། བུད་མེད་ནུས་སྟོབས་གོང་སྤེལ་སོགས་གཞི་རིམ་གྱི་ལས་འགུལ་ནང་མཉམ་ཞུགས་དང་སྣེ་ཁྲིད་བྱེད་སྐབས་གདོང་ལེན་བྱེད་དགོས་པའི་གནས་སྟངས་ག་རེ་ཕྲད་སོང་།

རང་རེའི་སྤྱི་ཚོགས་ནང་ཚོགས་པ་མི་ཉུང་བས་ཕོ་མོ་འདྲ་མཉམ་གྱི་ཐོག་ལ་ཕྱག་ལས་གནང་བཞིན་པའི་རྐྱེན་གྱིས། ད་ལྟ་དེའི་ཕྱོགས་ལ་ལས་ཀ་བྱ་རྒྱུ་གང་འཚམ་གྱིས་སྟབས་བདེ་དང་སླ་རུ་ཕྱིན་འདུག དེང་སང་ཤེས་ཡོན་སློབ་གསོ་ཐོབ་པའི་རྒྱུ་མཚན་དང་། ཕོ་མོ་འདྲ་མཉམ་གྱིས་མཚོན་པའི་གནད་དོན་དེ་དག་དངོས་ཡོད་འཚོ་བའི་ཁྲོད་ཅི་ཙམ་གལ་ཆེན་ཡིན་པ་དང་། ལྷག་ཏུ་རང་ཉིད་སྒེར་གྱི་མི་ཚེ་ལའང་རིན་ཐང་ཅི་ཙམ་ཡོད་མེད་ཤེས་རྟོགས་ཐུབ་ཀྱི་ཡོད་པའི་རྒྱུ་མཚན་གྱིས། གཞོན་སྐྱེས་ཁྲོད་མོ་དབང་རིང་ལུགས་དང་ཕོ་མོ་འདྲ་མཉམ་སོགས་ཀྱི་གནད་དོན་ལ་དོ་སྣང་བྱེད་ཤུགས་ཆེ་རུ་ཕྱིན་འདུག

གང་ལྟར་ཡང་། ད་ལྟ་ང་ཚོས་གདོང་ལེན་བྱ་དགོས་ས་དེ་གང་རེད་ཟེར་ན། དབང་ལྡན་མི་སྣ་མང་པོས་ཕོ་མོ་འདྲ་མཉམ་སྐོར་ཤེས་ཀྱི་མེད་པ་མ་ཟད། དེ་ཉིད་རྟོགས་ཐབས་ཀྱང་བྱེད་ཀྱི་མེད་པ་དེ་རེད། དེའི་ཐོག་ཁོང་ཚོས་གནད་དོན་དེ་དག་ལ་ཞེ་ཐག་པ་ནས་དགག་པ་རྒྱག་གི་ཡོད། སྤྱིར་ང་ཚོའི་སྲིད་བྱུས་རྣམས་ཕོ་མོ་འདྲ་མཉམ་གྱི་སྤྱི་ཚོགས་ཤིག་སྐྲུན་ཐབས་ཀྱི་ཕྱོགས་སུ་གཞོལ་ཐུབ་པ་དགོས་ཀྱང་། དབང་ལྡན་མི་སྣ་དེ་ཚོར་ཕོ་མོ་འདྲ་མཉམ་སྐོར་ཤེས་རྟོགས་མེད་པ་དེས་ང་ཚོའི་སྲིད་བྱུས་དག་ལ་ལྡོག་ཕྱོགས་ཀྱི་ནུས་པ་ཐོན་གྱི་ཡོད་པ་རེད།

མཆན། བསྟན་འཛིན་དཔལ་ཡོན་ལགས་ཊ་ཊ་སྤྱི་ཚོགས་ཚན་རིག་སློབ་གླིང་ནས་སྤྱི་ཚོགས་ཞབས་ཞུའི་ཐོག་མཐོ་རིམ་སློབ་གཉེར་ཐོན་ཏེ། རྒྱ་གར་དབུས་གཞུང་གིས་གཉེར་བའི་རྒྱལ་ཡོངས་གྲོང་གསེབ་ཀྱི་དབུལ་སྐྱོར་ལས་གཞིའི་ཚོགས་མི་དང་། བོད་ཀྱི་ཐེབས་རྩའི་ལས་གཞིའི་འགན་འཛིན་གྱི་ཕྱག་ལས་གནང་ཡོད། ཕྱི་ལོ་ ༢༠༡༨ ལོར་ཁོང་མོ་དང་བསྟན་འཛིན་སྐལ་བཟང་གཉིས་ནས་བོད་མིའི་སྤྱི་ཚོགས་ཀྱི་ཕོ་མོ་འདྲ་ལམ་ཐོག་ཕྱག་ལས་གནང་མཁན་གྱི་གྲོགས་མོ་ཚོགས་པ་གསར་འཛུགས་གནང་ཡིན་ཞིང་། ད་ལྟ་ཚོགས་པ་དེའི་ནང་ཕྱག་ལས་གནང་མུས་ཡིན་པ་རེད།

གསར་འགོད་པ། པ་སངས་ཚེ་རིང་།