༸གོང་ས་མཆོག་ནས་རྒྱ་གར་གཞུང་ལ་ཞལ་འདེབས་གནང་།

༸གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་སྲིད་བློན་བདེ་རྩ་ཚོགས་པར་ཏོག་དབྱིབས་ནད་ཡམས་ཀྱི་གནས་སྟངས་ཛ་དྲག་གྱུར་དང་འགྱུར་བཞིན་པར་གདུང་སེམས་མཉམ་སྐྱེད་མཚོན་ཕྱིར་ཞལ་འདེབས་ཕུལ་གནང་ཡོད་འདུག

དེ་རིང་ཕྱི་ལོ་ ༢༠༢༡ ཟླ་ ༤ ཚེས་ ༢༧ ཉིན་༸གོང་ས་རྒྱལ་བ་རིན་པོ་ཆེ་མཆོག་གི་དྲ་རྒྱའི་སྟེང་གནས་ཚུལ་སྤེལ་བ་ལྟར་ན། ཉེ་ལམ་ནས་རྒྱ་གར་ནང་ཏོག་དབྱིབས་ནད་ཡམས་ཀྱི་རླབས་གཉིས་པ་དེ་སླེབས་ཏེ། ཉིན་རེར་ནད་པ་ཁྲི་ཚོགས་བརྒལ་བ་བྱུང་ནས་སྨན་ཁང་ནང་ནད་པར་ཉལ་ཁྲི་དང་སྲོག་རླུང་འདང་ངེས་མེད་པར་དཀའ་ངལ་ཆེན་པོ་ཕྲད་དང་འཕྲད་བཞིན་ཡོད། ༸གོང་ས་མཆོག་གིས་རྒྱ་གར་གྱི་སྲིད་བློན་བདེ་རྩ་ཚོགས་པ་(PM-CARES Fund)བརྒྱུད་རྒྱ་གར་གཞུང་དམངས་གཉིས་ལ་གདུང་སེམས་མཉམ་སྐྱེད་མཚོན་བྱེད་དུ་ཞལ་འདེབས་དང་། ཕྱག་བྲིས་ཤིག་ཕུལ་གནང་མཛད་འདུག

ཕྱག་བྲིས་ནང་༸གོང་ས་རྒྱལ་བ་རིན་པོ་ཆེ་མཆོག་གིས། ངོས་ནས་རྒྱ་ཁྱབ་འགྲོ་བཞིན་པའི་ཏོག་དབྱིབས་གཉེན་རིམས་ ༡༩ པ་ལ་རྒྱ་གར་གཙོས་རྒྱལ་སྤྱིའི་ནང་གདོང་ལེན་མུ་མཐུད་བྱས་དང་བྱེད་བཞིན་པའི་གནས་སྟངས་ལ་དོ་སྣང་བྱེད་ཀྱི་ཡོད།

དེ་འདྲའི་གནས་སྟངས་ཛ་དྲག་དང་ཏོག་དབྱིབས་གཉེན་རིམས་ ༡༩ པའི་རླབས་འཕྱུར་ནས་ཉེན་ཁ་ཆེ་བའི་དུས་སྐབས་དེར། ངོས་ཀྱིས་༸ཏཱ་ལའི་བླ་མ་དགེ་རྩ་ཚོགས་པ་ནས་རྒྱ་གར་སྲིད་བློན་གྱི་བདེ་རྩ་ཚོགས་པར་རྒྱ་གར་སྤུན་ཟླ་རྣམས་ལ་ང་ཚོའི་གདུང་སེམས་མཉམ་སྐྱེད་མཚོན་ཕྱིར་ཞལ་འདེབས་འབུལ་རོགས་གནང་ཞེས་ཞུས་ཡོད།

ངོས་ནས་གོ་སྐབས་འདི་བརྒྱུད་དེ་གཏོར་སྐྱོན་ཆེ་བའི་རྒྱ་ཁྱབ་ཀྱི་ན་ཚ་དེ་གདོང་ལེན་དང་ཞི་ཐབས་གནང་མཁན་དང་། དམིགས་བསལ་སེམས་ཤུགས་ཆེན་པོའི་ཐོག་མདུན་དུ་དངོས་སུ་ཐོན་ནས་ཕྱག་ལས་གནང་མཁན་ཡོངས་ལ་སྙིང་ཁོང་རུས་པའི་སྟེང་ནས་བསྟོད་བསྔགས་དང་རྗེས་སུ་ཡི་རངས་ཞུ་བཞིན་ཡོད་ལ། ཉེན་ཁ་ཆེ་བའི་རྒྱ་ཁྱབ་ཀྱི་ན་ཚ་དེ་ནས་གང་མྱུར་གྲོལ་བའི་སྨོན་འདུན་ཞུ་གི་ཡོད། ཅེས་གསུངས་ཡོད་འདུག

རྒྱ་གར་ནང་ཏོག་དབྱིབས་ནད་ཡམས་ཀྱི་རླབས་གཉིས་པ་དེ་སླེབས་ཏེ་ཉིན་རེར་ནད་པའི་མི་གྲངས་འབུམ་ཕྲག་བརྒལ་བ་ཐོན་གྱི་ཡོད་པ་དང་། རྒྱ་གར་གྱི་རྒྱལ་ས་ལྡི་ལི་དང་གྲོང་ཁྱེར་མོམ་བྷེ་གཉིས་ལ་ནད་པ་མང་ཤོས་དང་སྨན་ཁང་གི་ཉལ་ཁྲི་དང་སྲོག་རླངས་འདང་ངེས་མེད་པས་དཀའ་ངལ་ཆེ་ཤོས་ཕྲད་དང་འཕྲད་བཞིན་ཡོད་འདུག