བོད་ཀྱི་དཔའ་བོ་དཔའ་མོ་རྣམས་ལ་རྗེས་དྲན་ལས་འགུལ་དབུ་འཛུགས་གནང་།

བོད་ཀྱི་དཔའ་བོ་དཔའ་མོའི་ཉིན་མོ་དང་བསྟུན་རང་ལུས་མེར་སྲེག་གནང་མཁན་བོད་ཀྱི་རྒྱལ་གཅེས་དཔའ་བོ་དཔའ་མོ་ཉུང་མཐར་ ༡༥༧ བྱུང་བ་རེ་རེའི་འདས་གྲོངས་སུ་ཕྱིན་པའི་ཟླ་ཚེས་གཞིར་བཞག་གིས་རྒྱ་གར་གཙོས་ཕྱི་རྒྱལ་ཡུལ་གྲུའི་ས་གནས་ཁག་མི་འདྲ་བ་ ༡༥༧ ནང་ཁོང་རྣམ་པའི་ལོ་རྒྱུས་དང་བོད་ཀྱི་གནས་སྟངས་ཛ་དྲག་སྐོར་འགྲེལ་བརྗོད་གནང་སྟེ་ཁོང་རྣམ་པར་བཀའ་དྲིན་རྗེས་དྲན་དང་དྲན་གསོ་ཞུ་རྒྱུ་ཡིན་འདུག

ཁ་སང་ཕྱི་ལོ་ ༢༠༢༡ ཟླ་ ༤ ཚེས་ ༢༩ ཉིན་གྱི་ཕྱི་དྲོའི་ཆུ་ཚོད་ ༣ སྟེང་དྲ་ཐོག་ནས་བོད་ཀྱི་གཞོན་ནུ་ལྷན་ཚོགས་དང་འཕགས་བོད་འབྲེལ་མཐུད་ཚོགས་པ། དེ་བཞིན་ངག་མེད་ཀྱི་མགྲིན་ཚབ་ལས་འགུལ་བ་བཅས་མཉམ་འབྲེལ་ཐོག བོད་བསྟན་སྲིད་གཉིས་ཀྱི་དོན་དུ་རང་ལུས་མེར་སྲེག་གནང་མཁན་བོད་ཀྱི་དཔའ་བོ་དཔའ་མོ་རྣམས་ལ་བཀའ་དྲིན་རྗེས་དྲན་གྱི་ལས་འགུལ་ཞིག་དྲ་ཐོག་བརྒྱུད་དབུ་འཛུགས་གནང་སོང་། སྐབས་དེར་སྐུ་མགྲོན་གཙོ་བོར་འཕགས་བོད་འབྲེལ་མཐུད་ཚོགས་པ་གསར་འཛུགས་གནང་མཁན་སྐུ་ཞབས་ཨིན་དེ་རེཤ་ཀུ་མར་(Indresh Kumar)ལགས་དང་། དམིགས་བསལ་སྐུ་མགྲོན་དུ་བཀའ་ཟུར་རྒྱ་རི་སྒྲོལ་མ་ལགས། འཕགས་བོད་འབྲེལ་མཐུད་ཚོགས་པའི་སྤྱི་ཁྱབ་དྲུང་ཆེ་སྐུ་ཞབས་པཱང་ཀཤ་གོ་ཡལ་(Pankaj Goyal)ལགས་བཅས་ཕེབས་འདུག

སྤྱིར་བོད་ཀྱི་དཔའ་བོ་དཔའ་མོ་རྣམས་ལ་བཀའ་དྲིན་རྗེས་དྲན་གྱི་ལས་འགུལ་འདི་ཉིད་ཐོག་མའི་འཆར་གཞི་ལྟར་ན། རྒྱ་གར་གྱི་རྒྱལ་ས་ལྡི་ལིར་ཟླ་འདིའི་ཕྱི་ཚེས་ ༢༩ ཉིན་གསར་འགོད་གསལ་བསྒྲགས་གནང་རྒྱུ་དང་སྦྲགས། རྒྱ་གར་རྒྱལ་ཡོངས་ནས་འཕགས་བོད་འབྲེལ་མཐུད་ཚོགས་པའི་རྒྱུན་ལས་དང་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་སོགས་བསྡུ་སྐོང་གིས་ཚོགས་འདུ་ཆེན་པོ་ཞིག་ཚོགས་ཏེ་ལས་འགུལ་དབུ་འཛུགས་ཞུ་འཆར་ཡོད་ཀྱང་། ཉེ་ལམ་ནས་རྒྱ་གར་ནང་ཏོག་དབྱིབས་ནད་ཡམས་འགོས་ཁྱབ་ཀྱི་ཚ་རླབས་གཉིས་པ་བསླེབས་ནས་མངའ་སྡེ་མང་པོ་ཞིག་ནས་རིམ་གྱིས་ཁྱིམ་སྡོད་བཀའ་རྒྱ་བཏང་བའི་ཁོངས་རྒྱལ་ས་ལྡི་ལི་ཡང་ཚུད་ཡོད་སྟབས། ལས་འགུལ་འདི་ཉིད་ཐོག་མའི་འཆར་གཞི་བཞིན་ཚོགས་ཐུབ་ཡོད་པ་མ་རེད།

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་འགྲུབ་ལགས་ཀྱིས། བོད་ཀྱི་གཞོན་ནུ་ལྷན་ཚོགས་དང་འཕགས་བོད་འབྲེལ་མཐུད་ཚོགས་པ། ལྡི་ལིར་རྟེན་གཞི་བྱེད་བཞིན་པའི་ངག་མེད་ཀྱི་མགྲིན་ཚབ་ལས་འགུལ་བ་བཅས་མཉམ་འབྲེལ་ཐོག རྒྱ་ནག་གཞུང་གི་དྲག་གནོན་སྲིད་ཇུས་ངན་པར་ཞི་བའི་ངོ་རྒོལ་སྐད་འབོད་གནང་སྟེ། རང་ལུས་མེར་སྲེག་གནང་མཁན་བོད་ཀྱི་དཔའ་བོ་དཔའ་མོ་ ༡༥༧ རྣམས་ལ་གུས་བརྩི་དང་། ཁོང་རྣམ་པར་བཀའ་དྲིན་རྗེས་དྲན་མཚོན་ཕྱིར་“བོད་ཀྱི་དཔའ་བོ་དཔའ་མོ་རྣམས་ལ་རྗེས་དྲན་ལས་འགུལ་”ཞེས་པ་ཞིག་དབུ་འཛུགས་ཞུ་གི་ཡོད། ཕྱི་ཟླ་ ༤ ཚེས་ ༢༩ ཉིན་ནི་བོད་ཀྱི་གཞོན་ནུ་ལྷན་ཚོགས་ངོས་ནས་བོད་ཀྱི་དཔའ་བོ་དཔའ་མོའི་ཉིན་མོར་ལོ་ལྟར་སྲུང་བརྩི་ཞུ་བཞིན་ཡོད་པ་དང་། ཉིན་འདི་ནི་ཕྱི་ལོ་ ༡༩༩༨ ལོར་དཔའ་བོ་ཐུབ་བསྟན་དངོས་འགྲུབ་ལགས་ཀྱིས་རང་ལུས་མེར་སྲེག་གནང་བའི་ཉིན་མོ་ཡང་འཁེལ་གྱི་ཡོད། ཚང་མས་མཁྱེན་གསལ་ལྟར་དཔའ་བོ་ཐུབ་བསྟན་དངོས་འགྲུབ་ལགས་ནི་བོད་ཀྱི་རང་དབང་འཐབ་རྩོད་ཆེད་རང་ལུས་མེར་སྲེག་གནང་མཁན་ཆེས་ཐོག་མ་དེ་ཡིན། ཞེས་བརྗོད་སོང་། 

ཡང་ལས་འགུལ་གྱི་དམིགས་ཡུལ་སྐོར་ལ་ཁོང་གིས། རང་ལུས་མེར་སྲེག་གནང་མཁན་བོད་ཀྱི་དཔའ་བོ་དཔའ་མོ་ཡོད་དོ་ཅོག་ལ་གུས་བརྩི་དང་སྙིང་ཁོང་རུས་པའི་གཏིང་ནས་བཀའ་དྲིན་རྗེས་དྲན་ཞུས་ཏེ། ཁོང་རྣམས་ལ་དྲན་གསོ་དང་ཁོང་རྣམ་པའི་མི་ཚེའི་ལོ་རྒྱུས་ལ་རྒྱུས་ལོན་ཁྱབ་བསྒྲགས་བྱེད་རྒྱུ་མ་ཟད། རྒྱ་གར་དང་རྒྱལ་སྤྱིའི་ནང་བོད་ཀྱི་དཔའ་བོ་དཔའ་མོ་ཁོང་རྣམ་པའི་ཐུན་མོང་གི་འདོད་འདུན་གསལ་སྟོན་བྱ་རྒྱུ། བོད་མི་རྣམས་ཀྱིས་ཡོད་ཚད་བློས་གཏོང་གིས་རྒྱ་གཞུང་ལ་ཞི་བའི་ངོ་རྒོལ་སྐད་འབོད་ཐོག་རང་ལུས་མེར་སྲེག་གནང་དགོས་བྱུང་བའི་ད་ཡོད་བོད་ཀྱི་ཛ་དྲག་གི་གནས་སྟངས་གསལ་སྟོན་བྱས་ཏེ་ཕྱིར་བསྒྲགས་བྱ་རྒྱུ་དང་། ལས་འགུལ་འདི་གོ་སྒྲིག་ཞུ་པའི་ཐོག་ནས་གལ་འགངས་ཆེ་བའི་བགྲོ་གླེང་དང་དོན་དང་ལྡན་པའི་ལས་དོན་འགོ་འཛུགས་ཞུ་རྒྱུ་ཡིན། ཞེས་འགྲེལ་བརྗོད་སོང་།

ཁོང་གིས། རྒྱ་གར་ནང་གི་བོད་ཀྱི་གཞིས་ཆགས་ཁག་དང་། རྫོང་ཁག གནད་འགག་ཅན་གྱི་ལྟེ་གནས་སོགས་སུ་ས་གནས་སོ་སོའི་མགོ་ཁྲིད་དང་དྭང་བླངས་གནང་འདོད་ཡོད་རིགས་ཚུད་པའི་ལས་དོན་དེ་མཇུག་སྐྱོང་གནང་མཁན་འབྲེལ་མཐུད་པའི་ཚོགས་ཆུང་གྲངས་ ༡༠༨ བསྐོ་བཞག་བྱས་ཏེ། རང་ལུས་མེར་སྲེག་གནང་མཁན་ནང་ནས་དཔའ་བོ་དཔའ་མོ་ཁྱོན་བསྡོམས་ ༡༠༨ ཐད་ཀར་སུ་བྱུང་འདེམ་སྒྲུག་གིས་འབྲེལ་མཐུད་ཚོགས་ཆུང་རེ་རེར་ལས་འགན་སྤྲད་དེ། རྒྱ་གར་ཕུད་ཕྱི་རྒྱལ་ཡུལ་གྲུ་ཁག་གི་ལས་དོན་ཚོགས་ཆུང་ཁག་ལ་རིམ་གྱིས་དཔའ་བོ་དཔའ་མོ་ ༡༠༨ ཀྱི་ལྷག་འཕྲོ་རྣམས་ཀྱི་མཚན་ཐོ་རེ་རེ་འབུལ་རྒྱུ་དང་། ས་གནས་སོ་སོར་ལས་དོན་བྱེད་མཁན་འབྲེལ་མཐུད་ཚོགས་ཆུང་ ༡༥༧ བསྐོ་བཞག་གིས་རང་ལུས་མེར་སྲེག་གནང་མཁན་གྱི་མཚན་གཞུང་རེ་རེ་ཕུལ་རྗེས། དཔའ་བོ་དཔའ་མོ་སོ་སོའི་རང་ལུས་མེར་སྲེག་གནང་བའི་ཟླ་ཚེས་བཞིན་ལོ་རེར་ཐེངས་རེར་བཀའ་དྲིན་རྗེས་དྲན་སྲུང་བརྩི་ཞུ་རྒྱུ་དང་། བཀའ་དྲིན་རྗེས་དྲན་སྲུང་བརྩི་ཞུ་བའི་སྐབས། ཚོགས་ཆུང་སོ་སོ་ནས་ལས་དོན་གསར་གཏོད་ཀྱི་རྣམ་པའི་ཐོག་ནས་རང་ལུས་མེར་སྲེག་གནང་མཁན་རྣམས་སྐབས་དེར་ཅི་བྱ་གདོལ་མེད་དུ་གྱུར་བའི་གནས་སྟངས་དང་། ཁོང་རྣམ་པ་ཚང་མའི་འདོད་འདུན་དང་ཚོར་ཤུགས་གཅིག་གི་འོག་ནས་བོད་དོན་ཆེད་རང་ལུས་མེར་བསྲེགས་ཀྱིས་རང་སྲོག་བློས་བཏང་གནང་བ་གསལ་སྟོན་ཐུབ་དགོས། ཞེས་གསུངས་སོང་།

སྐུ་མགྲོན་གཙོ་བོ་ཨིན་དེ་རེཤ་ལགས་ཀྱིས། བོད་ཀྱི་རང་དབང་རང་བཙན་དེ་ནི་རྒྱ་གར་གྱི་བདེ་འཇགས་དང་འབྲེལ་བ་ཡོད་པ་དང་། བོད་ལ་རང་བཙན་འཐོབ་པ་བྱེད་རྒྱུ་དེ་འགྲོ་བ་མི་ཞིག་ཡིན་པའི་ཆ་ནས་བལྟས་ནའང་ཤིན་ཏུ་ནས་གལ་འགངས་ཆེ་བའི་གནད་དོན་ཞིག་ཡིན་སྐོར་བརྗོད་སོང་བ་དང་། དམིགས་བསལ་སྐུ་མགྲོན་བཀའ་ཟུར་རྒྱ་རི་སྒྲོལ་མ་ལགས་ཀྱིས། རང་ལུས་མེར་སྲེག་གནང་བ་དེ་ནི་བོད་པའི་རིག་གཞུང་གོམས་སྲོལ་ཞིག་མ་ཡིན་ཡང་། རྒྱ་ནག་གཞུང་གི་གདུག་རྩུབ་སྲིད་ཇུས་འོག་བོད་མི་རྣམས་འུ་ཐུག་ཐབས་ཟད་ནས་སྤེལ་བའི་ལས་འགུལ་ཞིག་ཆགས་ཡོད། ཅེས་གསུངས་སོང་། སྐུ་ཞབས་པཱང་ཀཤ་ལགས་ཀྱིས། བོད་ཀྱི་རང་དབང་སླར་གསོའི་ཆེད་དུ་བོད་མི་ཙམ་མ་ཡིན་པར་རྒྱ་གར་མང་ཚོགས་ནས་ཀྱང་ནུས་པ་མཉམ་སྤུངས་གནང་རྒྱུ་གལ་ཆེན་པོ་ཡིན་པ་དང་། བོད་ནང་ལ་བོད་མི་ཚོས་རང་གི་སྐད་ཡིག་ལ་སློབ་སྦྱོང་དང་ཆོས་དང་རིག་གཞུང་ཚུལ་བཞིན་ཉམས་ལེན་བྱེད་རྒྱུ་ཡོད་པ་མ་རེད་སོགས་རྒྱ་ནག་གི་སྲིད་ཇུས་ངན་པ་ཐེར་འདོན་གནང་སོང་།