བསོད་ནམས་དབང་མོ་ལགས་དང་ཚེ་རིང་སྒྲོལ་མ་ལགས་གཉིས་ནས་སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་ལས་འཁུར་དམ་བཅའ་ཕུལ་ཡོད་པ་རེད།
སྐབས་བཅུ་དྲུག་པའི་མདོ་སྟོད་སྤྱི་འཐུས་བློ་བཟང་གྲགས་པ་ལགས་དང་མདོ་སྨད་སྤྱི་འཐུས་རྒྱ་རིགས་ཐར་ལགས་གཉིས་ནས་སྤྱི་འཐུས་ཀྱི་ལས་གནས་ནས་རྩ་དགོངས་ཞུས་ཡོད་པ་ལྟར། དེ་རིང་སྔ་དྲོའི་ཆུ་ཚོད་ ༡༠ ཙམ་གྱི་སྟེང་བོད་མི་མང་སྤྱི་ཚོགས་ལྷན་ཚོགས་ཀྱི་ཚོགས་ཁང་དུ། མདོ་སྟོད་དང་མདོ་སྨད་སྤྱི་འཐུས་ཀྱི་སྒུག་ཐོའི་ཨང་རིམ་དང་པོ་ཚེ་རིང་སྒྲོལ་མ་ལགས་དང་བསོད་ནམས་དབང་མོ་ལགས་གཉིས་ནས་བཙན་བྱོལ་བོད་མིའི་བཅའ་ཁྲིམས་དོན་ཚན་ ༤༧ དགོངས་དོན་ལྟར། བོད་མི་མང་སྤྱི་འཐུས་ཚོགས་གཞོན་ཨཅརྱ་ཡེ་ཤེས་ཕུན་ཚོགས་མཆོག་གི་མདུན་དུ་སྐབས་ ༡༦ པའི་བོད་མི་མང་སྤྱི་འཐུས་ཀྱི་ལས་འཁུར་དམ་འབུལ་ཞུས་ཡོད་པ་རེད།
དེ་རིང་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་འོག མདོ་སྟོད་དང་མདོ་སྨད་སྤྱི་འཐུས་གསར་པ་གཉིས་ཀྱི་ལས་འཁུར་དམ་བཅའ་ཕུལ་བཞིན་པའི་ཡུལ་དངོས་དྲ་ལམ་བརྒྱུད་ཐད་གཏོང་ཞུ་ཐུབ་མེད་པ་དང་། དམ་འབུལ་མཛད་སྒོའི་ཐོག་སྤྱི་འཐུས་ཚོགས་གཞོན་མཆོག་གི་དབུས་པའི་སྤྱི་འཐུས་རྒྱུན་ལས་གཅིག་མ་གཏོགས་ཚང་མ་འཛོམས་ཡོད་འདུག་ཟེར། འོན་ཀྱང་། ད་ལྟའི་རྒྱ་གར་ནང་གི་ཏོག་དབྱིབས་ཀྱི་ཛ་དྲག་གནས་སྟངས་ལ་གཞིགས་ན་ཕྱི་ལོ་ ༥ ཚེས་ ༢༠ ཉིན་འཚོགས་གཏན་འཁེལ་བའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་འཕར་མ་འཚོགས་ཐུབ་མིན་དོགས་གཞིའི་འོག་གནས་ཡོད་པ་རེད།
བདམས་ཐོན་སྤྱི་འཐུས་ཚེ་རིང་སྒྲོལ་མ་ལགས་ནི་ཕྱི་ལོ་ ༡༩༧༨ ཟླ་ ༥ ཚེས་ ༢༦ ཉིན་རྒྱ་གར་བྱང་ཤར་མེག་གྷ་ལ་ཡའི་མངའ་སྡེའི་ཤེས་ལོངས་ས་གནས་སུ་སྐྱེས་ཤིང་། ༧གོང་ས་མཆོག་གི་ཐུགས་རྗེའི་བཀའ་དྲིན་ལ་བརྟེན་ནས་ཆུང་དུས་ནས་རྡོར་གླིང་བོད་མིའི་གཏན་སློབ་ནས་འཛིན་རིམ་བཅུ་གཉིས་ཐོན། དེ་རྗེས་ཤེས་ལོངས་ནང་རྟེན་གཞི་བྱས་པའི་ནེ་ཧུ་ (North Eastern Hill University-NEHU) གཙུག་ལག་སློབ་གཉེར་ཁང་ནས་ཉེ་བའི་གཙུག་ལག་རབ་འབྱམས་པའི་སློབ་མཐར་ཕྱིན། ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་མི་དང་རྒྱུན་ལས། དྲུང་ཆེ། དེ་བཞིན་ས་གནས་བོད་ཀྱི་བུད་མེད་ལྷན་ཚོགས་ཀྱི་ཚོགས་མི་དང་དྲུང་ཆེ་བཅས་གནང་ཞིང་། ད་ལྟའི་ཆར་ཤེས་ལོངས་མི་མང་ནས་རེ་བ་ཆེན་པོས་ས་གནས་འཐུས་ཚོགས་སུ་བདམས་ཐོན་བྱུང་ཡོད་པ་ལྟར་བ། ཤེས་ལོངས་ས་འཐུས་ཀྱི་ཚོགས་གཙོའི་ལས་འགན་འཁུར་བཞིན་ཡོད་པ་རེད།
བདམས་ཐོན་སྤྱི་འཐུས་བསོད་ནམས་དབང་མོ་ལགས་ནི་ཕྱི་ལོ་ ༡༩༧༢ ཟླ་ ༨ ཚེས་ ༡༨ ཉིན་རྒྱ་གར་བྱང་ཕྱོགས་སྡེ་ར་ལྡུན་དོན་གྲུབ་གླིང་གཞིས་ཆགས་སུ་ཕ་སྟག་ལུང་དགེ་འདུན་བླ་མ་དང་། མ་ཚེ་རིང་མཚོ་གཉིས་ཀྱི་བུ་མོར་སྐྱེས་ཤིང་། ཆུང་དུས་རྒྱ་གར་ར་ཇཱ་ རམ་ མོ་ཧན་ རོཡེ་(Raja Ram Mohan Roy Academy School,Dehradun) སློབ་གྲྭར་འགྲིམས་པ་དང་། རྗེས་ནས་ཌི་ཨེ་ཝི་ (DAV (PG) College,Dehradun) མཐོ་སློབ་དང་། ཨི་དྷི་ར་གྷན་རྡུའི་མི་མང་ (IGNOU) གཙུག་ལག་སློབ་གཉེར་ཁང་ནས་ཕྱི་ལོ་ ༢༠༡༩ ལོར་དབྱིན་ཡིག་ཐོག་སློབ་དཔོན་ཆེན་མོའི་ལག་འཁྱེར་བླངས་ཡོད་ཅིང་། ད་ལྟའི་ཆར་ (Unison World School, Administration Department) ཞེེེས་པའི་སློབ་གྲྭའི་ནང་རྒྱལ་སྤྱིའི་སློབ་གྲྭའི་མཐུན་སྦྱོར་གྱི་ཕྱག་ལས་གནང་བཞིན་ཡོད། རྒྱ་གར་མཐོ་སློབ་ཁག་ནས་སློབ་མཐར་ཕྱིན་རྗེས་བོད་མི་རིགས་ལ་ཞབས་ཞུ་སྒྲུབ་འདོད་ཡོད་པ་ལྟར། ཕྱི་ལོ་ ༡༩༩༧ ནས་ ༢༠༠༢ བར་ལྡི་ར་རྡུན་མདོ་སྨད་ས་གནས་རྒྱུན་ལས་དང་དོན་འགྲུབ་གླིང་ས་གནས་གྲོས་ཚོགས་ཀྱི་ཚོགས་མིའི་ལས་འགན་གཅིག་ལྕོགས་གནང་མྱོང་བ་མ་ཟད། ས་གནས་འོས་བསྡུའི་འཐུས་མི་ལོ་ལྔ་དང་འོས་བསྡུའི་ཚོགས་གཙོ་བཅས་ཀྱི་འགན་ཡང་འཁུར་མྱོང་བ་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
