རྒྱ་ནག་གཞུང་གིས་ནོར་བུ་གླིང་ག་ཉམས་གསོ་བྱེད་ཀྱིན་ཡོད་འདུག

ང་དགུའི་རྗེས་ནས་རྒྱ་ནག་གིས་བོད་ཀྱི་ལོ་རྒྱུས་རང་བཞིན་ལྡན་པའི་ཕོ་བྲང་དང་དགོན་པ། དེ་བཞིན་འདུ་ཁང་སོགས་ཞིག་བཟོ་བྱེད་ཀྱི་ཡོད་ཁུལ་གྱིས་ནང་གི་ཤུལ་བཞག་རིག་དངོས་ཁག་རྒྱ་ནག་ཏུ་ནང་འདྲེན་བྱས་ཡོད་པ་ལྟར། དེ་རིང་ཁ་སང་རྒྱ་ནག་གིས་ནོར་གླིང་ལ་ཉམས་གསོ་གཏོང་གི་ཡོད་ཟེར།
རྒྱ་ནག་གཞུང་འབྲེལ་གྱི་དྲ་ལམ་དུ་ཐོན་པའི་གནས་ཚུལ་ལྟར་ན། ད་ལྟའི་ཆར་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ནོར་བུ་གླིང་ཁར་ཉམས་གསོ་མགོ་འཛུགས་ཀྱིས། ལོ་རྒྱུས་རང་བཞིན་ལྡན་པའི་ནོར་བུ་གླིང་ཁའི་འཛུགས་སྐྲུན་གྱི་རིག་དངོས་ ༩ ཡི་གསེར་ཟངས་རྒྱ་ཕིབས་དང་ཨར་ལས། དེ་བཞིན། རིག་དངོས་མྱུར་སྐྱོབ་དང་ཉམས་གསོ་བཅས་བྱེད་ཀྱིན་ཡོད་འདུག

ནོར་གླིང་གི་རྒྱ་ཕིབས་ཉམས་གསོའི་ལས་གཞིའི་ཁྲོད། རྒྱ་ནག་གཞུང་གིས་རྒྱ་སྒོར་ཁྲི་ ༣༨༦༨ བཏང་སྟེ། སྐལ་བཟང་བདེ་འཁྱིལ་ཕོ་བྲང་དང་ཁམས་གསུམ་ཟིལ་གནོན། དེ་བཞིན་སྤྱན་གསལ་ཕོ་བྲང་དང་ཕོ་བྲང་གསར་པ་སོགས་གནའ་བོའི་འཛུགས་སྐྲུན་གྱི་རིག་དངོས་ ༩ ཡི་སྨི་ངོས་གྲུ་བཞི་མ་ ༨༥༥ ལྷག་གི་གསེར་ཟངས་རྒྱ་ཕིབས་ལ་གསེར་ཆུ་བྱུགས་རྒྱུ་དང་སྨི་ངོས་གྲུ་བཞི་མ་ཁྲི་གཅིག་ལྷག་ཟིན་པའི་ནོར་བུ་གླིང་ཁའི་ཐོག་ཁང་གི་ཨར་ལས་དང་འབྲེལ་ཡོད་ཀྱི་རིག་དངོས་སོགས་ལ་ཉམས་གསོ་དང་མྱུར་སྐྱོབ་རང་བཞིན་གྱི་སྲུང་སྐྱོབ་བྱ་རྒྱུ་ཡིན་པ་རེད།

ཕྱི་ལོ་ ༡༩༩༤ ལོར་ཕོ་བྲང་པོ་ཏ་ལ་འཛམ་གླིང་གི་རིག་དངོས་ཤུལ་བཞག་ཁོངས་སུ་བཅུག་ཡོད་པ་ལྟར། ཕྱི་ལོ་ ༢༠༠༠ དང་ ༢༠༠༡ བཅས་བསྟུད་མར་གཙུག་ལག་ཁང་དང་ནོར་བུ་གླིང་ག་གཉིས་འཛམ་གླིང་གི་རིག་དངོས་ཤུལ་བཞག་ཁོངས་སུ་བཅུག་ཡོད་པ་རེད་ལ། ལྷ་སའི་ནུབ་ཕྱོགས་ཀྱི་མཚམས་སུ་ཡོད་པའི་ནོར་བུ་གླིང་ག་ནི་༧གོང་ས་སྐུ་ཕྲེང་རིམ་བྱོན་གྱི་དབྱར་ཀའི་བཞུགས་གནས་ཡིན་པ་ལྟར་ཕྱི་ལོ་ ༡༧༥༡ ལོར་བཞེངས་མགོ་ཚུགས་པ་དང་། ཕྱི་ལོ་ ༡༧༥༥ བོད་རབ་བྱུང་བཅུ་གསུམ་པའི་ཤིང་ཕག་ལོར་༧གོང་ས་སྐུ་ཕྲེང་བདུན་པ་བསྐལ་བཟང་རྒྱ་མཚོ་མཆོག་གིས་བསྐལ་བཟང་ཕོ་བྲང་ཕྱག་བཏབ་པ་ནས། ཕྱི་ལོ་ ༡༩༥༩ བར་༧གོང་ས་སྐུ་ཕྲེང་རིམ་བྱོན་གྱིས་ཉམས་གསོ་གནང་ཡོད་ཅིང་། ད་ལྟ་ནོར་གླིང་ལ་ཁྱོན་ཡོངས་ཀྱི་རྒྱ་ཁྱོན་སྤྱི་ལེ་གྲུ་བཞི་མ་སུམ་འབུམ་དྲུག་ཁྲི་དང་བསྐལ་བཟང་ཕོ་བྲང་དང་སྤྱན་གསལ་ཕོ་བྲང། དེ་བཞིན་རྟག་བརྟན་མི་འགྱུར་ཕོ་བྲང་བཅས་ནི་ནོར་གླིང་གི་ཆོས་སྲིད་ཀྱི་མཛད་སྒོ་གནང་ཡུལ་གཙོ་བོ་ཁག་ཡིན་པ་རེད།

གསར་འགོད་པ། སྐལ་བཟང་སྦྱིན་པ།