བོད་རིགས་ཨ་རི་བ་ཞིག་སིན་སིན་ན་ཊི་གྲོང་ཁྱེར་གྱི་སྤྱི་ཁྱབ་པའི་འོས་མིར་ལངས་འདུག

བོད་རིགས་ཨ་རི་བ་ཨ་ཧྥ་ཊབ་ཀརྨ་སིང་པུ་རི་ཝལ་ (Aftab Karma Singh Pureval) ལགས་ཨ་རིའི་ཨོ་ཧ་ཡོ་ (Ohio) མངའ་སྡེའི་ནང་གི་སིན་སིན་ན་ཊི་ (Cincinnati) གྲོང་ཁྱེར་སྤྱི་ཁྱབ་པའི་འོས་མིར་ལངས་ཡོད་འདུག་ལ། ཟླ་འདིའི་ཕྱི་ཚེས་ ༤ ཉིན་གྱི་སྔོན་འགྲོའི་འོས་བསྡུའི་ཁྲོད་ཁོང་འོས་མི་ ༦ གི་ནང་ནས་འོས་གྲངས་མཐོ་ཤོས་གཉིས་ཀྱི་ནང་ཚུད་ཚེ། འདི་ལོའི་ཕྱི་ཟླ་ ༡༡ ཚེས་ ༢ ཉིན་གྱི་དངོས་གཞིའི་འོས་བསྡུའི་ནང་ཞུགས་ཐུབ་ཀྱི་ཡོད་འདུག

ཨ་ཧྥ་ཊབ་ཀརྨ་སིང་པུ་རི་ཝལ་ལགས་ཀྱི་དྲིལ་བསྒྲགས་དྲ་ཚིགས་སྟེང་དུ། གལ་སྲིད་ཁོང་ལ་འོས་འཐོབ་ཚེ། གྲོང་ཁྱེར་དེའི་ཁུལ་གྱི་དཔལ་འབྱོར་བསྐྱར་གསོ་བྱས་ཏེ་མི་མང་གི་འཚོ་བ་ཇེ་ལེགས་སུ་གཏང་རྒྱུ་དང་། ས་གནས་ཉེན་རྟོག་ལས་ཁུངས་ལ་བསྐྱར་བཅོས་དང་སྤྱི་བདེའི་ལས་དོན་ཚགས་ཚུད་དུ་གཏང་སྟེ། ཁྱིམ་ཚང་རེ་རེའི་ཉེ་འཁོར་ལ་བདེ་འཇགས་བསྐྲུན་རྒྱུ་དང་། དེ་བཞིན་རིན་གོང་སྟབས་བདེ་ཡིན་པའི་སྡོད་ཁང་གང་མང་གསར་འཛུགས་དང་སྤྱི་པའི་འགྲིམ་འགྲུལ་ཡར་རྒྱས་གཏང་རྒྱུ་ཡིན་པའི་བསྒྲགས་གཏམ་དོན་ཚན་གསུམ་བཀོད་འདུག

འདི་ལོའི་ཕྱི་ཟླ་ ༡ ཚེས་ ༡༤ ཉིན་ཀརྨ་ལགས་ཀྱིས་སྒེར་གྱི་སྤྱི་ཚོགས་དྲ་བ་ཊུའུ་ཝེ་ཊུར་སྟེང་། ཐོག་མར་སིན་སིན་ན་ཊི་ (Cincinnati) གྲོང་ཁྱེར་སྤྱི་ཁྱབ་པའི་འོས་མིར་ལངས་བ་ཡོངས་བསྒྲགས་བྱས་ཡོད་པ་དང་། སྐབས་དེར་ཁོང་གིས་ཧ་ཅང་དཀའ་ཁག་ཆེ་བའི་ལོ་གཅིག་གི་རྗེས། ད་དུང་མུ་མཐུད་དཀའ་ཁག་དེ་ལ་གདོང་ལེན་བྱེད་དགོས་ཀྱི་ཡོད་པ་དང་། ང་ཚོའི་རྒྱལ་ཁབ་གཉན་འཕྲང་གི་དུས་ཚོད་ཞིག་གི་ནང་ལྷུང་ཡོད་པ་མ་ཟད། ང་ཚོའི་གྲོང་ཁྱེར་ཡང་གཅིག་མཚུངས་ཀྱི་གནས་སྟངས་འོག་ལྷུང་ཡོད་པ་རེད། དེར་བརྟེན་ངས་རང་ཉིད་གྲོང་ཁྱེར་སྤྱི་ཁྱབ་པའི་འོས་མིར་ལངས་བ་གསལ་བསྒྲགས་བྱེད་ཀྱི་ཡོད། ཅེས་བཀོད་འདུག

ཨ་རིའི་ནང་གི་རྒྱ་གར་བའི་ཚོགས་སྡེ་ཆེ་ཤོས་ཨིམ་པེག་ཊི་ (IMPACT) ཡི་འགན་འཛིན་དང་རྒྱབ་སྐྱོར་བ་མ་ཁི་ཇཱ་ (Makhija) ཡིས་སྒེར་གྱི་སྤྱི་ཚོགས་དྲ་ལམ་ཊུའུ་ཝེ་ཊུར་སྟེང་། ཀརྨ་ལགས་གྲོང་ཁྱེར་སྤྱི་ཁྱབ་པ་ཆགས་ཚེ། གྲོང་ཁྱེར་འདིའི་ཡུལ་མི་ཀུན་ལ་སྤྱི་ཡོངས་ནས་ཁེ་ཕན་ཞིག་བསྐྲུན་ཐུབ་པའི་གདེང་ཚོད་ཡོད་པ་དང་། ཏོག་དབྱིབས་གཉན་རིམས་ལ་བརྟེན་ནས་ཉམས་ཆག་བྱུང་བའི་དཔལ་འབྱོར་བསྐྱར་གསོ་སོགས་བྱེད་ཐུབ་ངེས་ཡིན་པར་བརྟེན། འོས་བསྡུ་མཇུག་མ་བསྒྲིལ་བར་དུ་ཨ་རིའི་རྒྱ་གར་བ་ཚོས་མུ་མཐུད་ཀརྨ་ལགས་ལ་རྒྱབ་སྐྱོར་བྱ་འདོད་ཡོད་སྐོར་སོགས་བྲིས་འདུག

ད་ལྟ་ཀརྨ་ལགས་ནི་ཨ་རིའི་ཨོ་ཧའོ་མངའ་སྡེའི་ཧ་མིལ་ཊོན་ (Hamilton County) རྫོང་ཁྲིམས་ཁང་གི་ཁྲིམས་དྲུང་ཆེན་མོ་ཡིན་འདུག་ལ། ཕྱི་ལོ་ ༢༠༢༥ ལོར་ཁོང་གི་ལས་ཡུན་དེ་རྫོགས་ཀྱི་ཡོད་འདུག དེ་ནི་ས་གནས་སུ་ལོ་ངོ་ ༡༠༠ ལྷག་གི་རིང་ཨ་རིའི་དམངས་གཙོ་ཚོགས་པའི་ཚོགས་མི་ཞིག་ཁྲིམས་དྲུང་ཆེན་མོར་བསླེབས་པ་ཐོག་མ་དེ་ཆགས་ཡོད་འདུག དེ་བཞིན་ཕྱི་ལོ་ ༢༠༡༨ ལོར་ཁོང་ཨ་རིའི་གྲོས་ཚོགས་འོག་མའི་འཐུས་མིར་ལངས་ཏེ་བོད་མི་ཨ་རི་བ་ཞིག་ཨ་རིའི་གྲོས་ཚོགས་འཐུས་མིར་ལངས་བ་ཐེངས་དང་པོ་ཆགས་ཡོད་པ་དང་། འོས་བསྡུའི་དྲིལ་བསྒྲགས་སྐབས་ཁོང་གིས་རང་ཉིད་ཀྱི་ཕ་མའི་མི་རིགས་ལ་བརྟེན། ཁོང་བོད་མི་ཨ་རི་བ་དང་རྒྱ་གར་ཨ་རི་བ་ཞིག་ཡིན་པར་སྤོབས་པ་སྐྱེས་ཀྱི་ཡོད་སྐོར་དང་། ཁོང་ནི་ཁོང་གི་རིག་གཞུང་དང་མི་རིགས་བཅས་ལ་ཧ་ཅང་སྤོབས་པ་ཡོད་སྐོར་བརྗོད་ཡོད་པ་རེད།

རང་ལོ་ ༣༨ ཡིན་པའི་ཀརྨ་ལགས་ཀྱི་ཨ་མ་ལགས་ཀྱིས་རྒྱ་གར་ལྷོ་ཕྱོགས་མེ་སོར་དུ་སློབ་སྦྱོང་བྱས་ཏེ། ཕྱིས་སུ་ལྡི་ལི་མཐོ་སློབ་ནང་སློབ་སྦྱོང་བྱེད་སྐབས། རྒྱ་གར་པན་ཇབ་མི་རིགས་ཡིན་པ་བྷི་རིག་ཨ་རྗེ་ཐི་སིང་ (Brig Ajit Singh) ཞེས་པ་དང་ཐུག་ནས་གཉེན་སྒྲིག་བྱས། ཕྱིས་སུ་ཨ་རིར་གནས་སྤོར་བྱས་ཏེ་ཕྱི་ལོ་ ༡༩༨༢ ལོར་ཀརྨ་ལགས་ཨོ་ཧའོ་ཞེ་ནི་ཡ་ (Xenia) གྲོང་ཁྱེར་དུ་སྐྱེས་ཡོད་པ་དང་། ཁོང་གིས་ཁྲིམས་ལུགས་རིག་པར་སློབ་སྦྱོང་བྱས་ཡོད་འདུག ཕྱི་ལོ་ ༡༩༩༤ ལོར་ཁོང་དགུང་གྲངས་ ༡༣ སྟེང་བོད་ཀྱི་རྒྱལ་ས་ལྷ་སར་ཕྱིན་ཡོད་འདུག ཕྱི་ལོ་ ༢༠༡༨ ལོར་ཁོང་གིས་(Dr. Whitney June Whitis)དང་གཉེན་སྒྲིག་བྱས་ཏེ། ལོ་གཅིག་ཡིན་པའི་བུ་ཆུང་བྷོ་དྷི་ (Bodhi) ཞེས་པ་ཞིག་ཡོད་འདུག

གསར་འགོད་པ། ཀླུ་མགོན་ཐར།