བཅའ་ཁྲིམས་བཤིག་ཅིང་།  སྒྲིག་འཛུགས་ཀྱི་རྨང་ལ་འབར་རྫས་བསྒྲོགས།

འབུམ་ཐང་པ་སངས་ཚེ་རིང་།

༄༅།  །འདིར་ཞུ་བར་བྱ་བ་ནི།  ཉེ་ལམ་བོད་མི་མང་སྤྱི་འཐུས་ལྷན་ཚོགས་ཀྱི་མཚན་ཐོག་ཏུ་ཕུལ་བའི་སྒེར་གྱི་སྙན་ཞུ་དེར་སྣོན་འཕྲི་ཅུང་ཟད་བགྱིས་ཏེ་ཕྱི་ལོ་ ༢༠༢༡  ལོའི་ཟླ་  ༣  ཚེས་  ༢༥  ཉིན་སྐབས་བཅུ་དྲུག་པའི་གྲོས་ཚོགས་ཚོགས་དུས་བཅུ་པའི་ཐོག་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་།   ཁྲིམས་ཞིབ་པ་གཉིས་དུས་གཅིག་ལ་འཕོ་འགྱུར་བཏང་བ་དེས་རྐྱེན་པས་བཙན་བྱོལ་བོད་མིའི་སྤྱི་ཚོགས་ཁྲོད་འཁྲུགས་རྐྱེན་ཧ་ཅང་ཆེན་པོ་བྱུང་བའི་གནས་སྟངས་ལ་ཐོག་མའི་བྱུང་རྐྱེན་དང་།  བར་གྱི་བརྒྱུད་རིམ།   མཐའ་མའི་མཇུག་འབྲས་བཅས་ལ་གང་མཐོང་ཅི་ཤེས་དག་བརྗོད་པར་བྱ་རྒྱུར།

ཐེངས་འདིའི་གྲོས་ཚོགས་ཀྱི་ཐག་གཅོད་གནང་སྟངས་དེ་ནི་ཁྲིམས་ཀྱི་གཞི་རྩའི་གནས་སྟངས་དང་འགལ་ཡོད་པ་དང་།  བཙན་བྱོལ་བོད་མིའི་བཅའ་ཁྲིམས་དང་འགལ་ཡོད་པ།   ཁྲིམས་སྒྲིག་ཁག་གི་ནང་གསལ་བའི་ཁྲིམས་དོན་བྱ་རིམ་དང་ཡང་འགལ་ཡོད་པ་སོགས་ཕྱོགས་ཡོངས་ནས་དྲང་བདེན་དང་ཁྲིམས་མཐུན་ཞིག་བྱུང་མེད་པར་བརྟེན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་བགྲེས་གཞོན་གཉིས་ཀྱིས་གཙོས་སྤྱི་འཐུས་རྒྱུན་ལས་རྣམ་པའི་མཚན་ཐོག་ཏུ་ཐེངས་འདིའི་གྲོས་འཆར་ཐག་གཅོད་དེ་བཞིན་ཕྱིར་འཐེན་དང་།  ཆེས་མཐོའི་ཁྲིམས་ཞིབ་ཁང་གི་ཁྲིབ་ཞིབ་པ་གསུམ་པོའི་ལས་གནས་བསྐྱར་གསོ་དགོས་པའི་ཐབས་ལམ་བསྟེན་དགོས་པའི་འབོད་སྐུལ་སླད་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཟུར་པ་བཅུ་ཡི་མཚན་རྟགས་འཁོད་པའི་སྙན་ཞུ་དང་།   བཀའ་ཟུར་ཁག་ཅིག་གི་སྙན་ཞུ།  བཙན་བྱོལ་བོད་མིའི་སྲི་ཞུ་ལས་བྱེད་པ་ཟུར་པ་བརྒྱ་དང་དྲུག་ཅུ་རེ་ལྔའི་སྙན་ཞུ།  སྤྱི་འཐུས་ལས་ཐོག་པའི་སྙན་ཞུ།  བཅའ་ཁྲིམས་ཁྱད་མཁས་པའི་ལམ་སྟོན།   ཁྲིམས་ལུགས་ཆེད་མཁས་པའི་བསམ་འཆར།   གཞུང་འབྲེལ་མ་ཡིན་པའི་ཆོལ་ཁ་གསུམ་གྱི་ཚོགས་པས་གཙོས་ཚོགས་པ་དང་སྐྱིད་སྡུག་ཁག་མང་པོ་ཞིག་གི་སྙན་ཞུ།   བསམ་ཡོད་མི་མང་སྒེར་གྱི་སྙན་ཞུ།  དྲྭ་བའི་བརྒྱུད་ལམ་ཁག་ནས་མི་མང་དུ་མ་ཞིག་གི་ངག་ཐོག་འབུལ་སྐུལ་བཅས་གཅིག་མཇུག་གཉིས་མཐུད་ཀྱིས་ཕུལ་དང་འབུལ་བཞིན་ཡོད་ལ།  ཤེས་ལྡན་མི་སྣའི་ཆེད་རྩོམ་མང་དག་ཅིག་ཀྱང་སྤེལ་ཡོད།

ཕྱི་ལོ་  ༢༠༢༠  ལོའི་ཟླ་ ༥ ཚེས་ ༡༣  ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་ཕྱི་ལོ་ ༢༠༢༠  ལོའི་ཟླ་ ༩  ཚེས་ ༡༦ རེས་གཟའ་ལྷག་པ་ནས་ཟླ་ ༩ ཚེས་ ༢༤  རེས་གཟའ་ཕུར་བུ་བར་ལས་དུས་ཉིན་གྲངས་བརྒྱད་རིང་ཚུགས་གཏན་འཁེལ་བའི་གསལ་བསྒྲགས་ཤིག་བསྐྱངས་ཟིན་པ་དེ་ལྟར་ཡང་།  ཕྱི་ལོ་  ༢༠༢༠  ལོའི་ཟླ་ ༨  ཚེས་ ༡༧ ཉིན་གྱི་སྔ་དྲོ་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་དབུ་བཞུགས་ཀྱིས་གསར་འགོད་གསལ་བསྒྲགས་ཤིག་བསྐྱར་སྤེལ་གནང་སྟེ།   སྤྱི་འཐུས་རྒྱུན་ལས་ལྷན་ཚོགས་ཐེངས་ ༣༢༧ པའི་བཀའ་བསྡུར་ཐག་གཅོད་བྱུང་དོན་བཞིན་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠  དེ་བཞིན་གོང་གསལ་གསལ་བསྒྲགས་ནང་གསལ་གྱི་གཏན་འབེབས་དུས་ཚོད་ཐོག་ཚོགས་མི་དགོས་པར་བཙན་བྱོལ་བོད་མིའི་བཅའ་ཁྲིམས་དོན་ཚན་དྲུག་པ་དང་།   དོན་ཚན་བཞི་བཅུ་ཞེ་དགུ་པའི་ནང་གསེས་ ༢ པའི་ཆ་རྐྱེན་འོག་ནས་ཕྱི་ལོ་  ༢༠༢༡ ལོའི་ཟླ་  ༣ པའི་བར་འཕར་འགྱངས་བྱས་པའི་གསལ་བསྒྲགས་སྤེལ་ཡོད་པ་དང་།    ཆབས་ཅིག  འགྲེལ་བརྗོད་ནང་”ཏོག་དབྱིབས་གཉན་རིམས་བཅུ་དགུ་པའི་རྐྱེན་པས་འཛམ་གླིང་ཁྱོན་ཡོངས་ཀྱི་གནས་སྟངས་ཉིན་རེ་བཞིན་ཛ་དྲག་ཏུ་འགྱུར་བཞིན་པ་དང་།  ལྷག་པར་དྷ་ས་ས་གནས་ནི་༸རྒྱལ་བའི་བཞུགས་སྒར་ཡིན་སྟབས་ང་ཚོས་གང་ཅིའི་ཐད་འགན་ཁུར་བྱ་དགོས་པ།  གྲོས་ཚོགས་ཚོགས་པའི་དབང་དུ་བཏང་ཡང་རྒྱལ་སྤྱིའི་འགྲུལ་བཞུད་སྒོ་རྒྱ་བསྡམས་པའི་རྐྱེན་གྱིས་དཀའ་ངལ་ཡོད་པའི་ཆ་ནས་ཕྱི་རྒྱལ་དུ་ཡོད་པའི་སྤྱི་འཐུས་མང་ཆེ་བ་ཕེབས་མི་ཐུབ་པ་དང་།   རྒྱ་གར་ནང་ནས་ཀྱང་སྤྱི་འཐུས་ཇི་ཙམ་ཕེབས་ཐུབ་ཀྱི་ཡོད་མེད་རྟོགས་དཀའ་བའི་གནས་སྟངས་ཀྱི་ཆ་ནས་ད་ལན་ཐག་གཅོད་དེ་བྱས་པ་ཡིན་གསུངས་འདུག” དེས་ན།

དང་པོ།  རྒྱུན་ལས་ཀྱིས་ལུང་དུ་དྲངས་པའི་བཅའ་ཁྲིམས་དོན་ཚན་དྲུག་པའི་འབྲུ་དོན་དེ་གྲོས་ཚོགས་འཕར་འགྱངས་སམ་ཕྱིར་བསྡུ་བྱས་པ་ལ་འབྲེལ་བ་ཇི་ལྟར་འདོགས་ཐུབ་བམ།  བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་དྲུག་པ།  རྒྱལ་སྤྱིའི་ཁྲིམས་ལུགས་དང་།  ཡུལ་ཁྲིམས་ལ་བརྩི་སྲུང་།  ཞེས་པའི་འོག  “བོད་མིའི་སྒྲིག་འཛུགས་ཀྱི་ཁྲིམས་ལུགས་དང་།  ཆབ་སྲིད་དབང་འཛིན་གྱི་བཀའ།  སྒྲིག་གཞི་བཅས་རྒྱལ་སྤྱིའི་ཁྲིམས་ལུགས་དང་།  ལྷག་དོན་བོད་མིའི་གནས་ཡུལ་རྒྱལ་ཁབ་ཁག་གི་ཡུལ་ཁྲིམས་དང་མི་འགལ་བ་བྱ་རྒྱུ།“ ཞེས་གསལ་བས།   བཅའ་ཁྲིམས་ཀྱི་འབྲུ་དོན་འདི་དང་གྲོས་ཚོགས་ཚོགས་རྒྱུའི་བར་ལ་འབྲེལ་བ་གང་ཡང་མི་འདུག   འདིར་བོད་མིའི་སྒྲིག་འཛུགས་ཀྱི་ཁྲིམས་ཡིག་གང་བཟོས་པ་དང་།  དེ་བཞིན་ཆབ་སྲིད་དབུ་ཁྲིད་ཀྱི་བཀའམ་གསུང་འཕྲིན།  དེ་བཞིན་སྒྲིག་འཛུགས་མ་ལག་ཁག་གི་སྒྲིག་གཞི་གང་བཟོས་པ་དག   རྒྱལ་སྤྱིའི་ཁྲིམས་ལུགས་དང་ལྷག་པར་བོད་མི་གནས་ཡུལ་རྒྱལ་ཁབ་ཁག་གི་ཡུལ་ཁྲིམས་དང་མི་འགལ་བ་བྱ་རྒྱུ་ཞེས་གསལ་བས།  བོད་མི་མང་སྤྱི་འཐུས་ལྷན་ཚོགས་དབུ་བརྙེས་པ་ནས་འདི་ལོའི་བར་གྲོས་ཚོགས་ནམ་ཚོགས་ལ་འབྲུ་དོན་འདི་འགལ་མེད་ཐོག་ཚོགས་ཡོད་པས།   ༢༠༢༠ ལོའི་ཟླ་ ༩ པའི་ནང་ཚོགས་འཆར་ཡོད་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དེ་བཞིན་རྒྱལ་སྤྱིའི་ཁྲིམས་ལུགས་དང་འགལ་བ།  ལྷག་དོན་གནས་ཡུལ་རྒྱལ་ཁབ་ཀྱི་ཡུལ་ཁྲིམས་དང་འགལ་བས་ཚོགས་མི་ཆོག་པ་དང་།   ༢༠༢༡  ལོའི་ཟླ་ ༣ པའི་ནང་ཚོགས་ཚེ་དེ་ལྟར་མི་འགལ་བའི་ལམ་སྟོན་བཀའ་རྒྱ་འདྲ་ཕེབས་ཡོད་ན་ནི་གནས་སྟངས་གཞན་ཞིག་ཡིན་མོད།    དེ་འདྲ་ཞིག་བྱུང་ཡོད་པ་ནི་དེ་རིང་བར་མཇལ་རྒྱུ་མི་འདུག་ལ།  དེ་བཞིན་དུ་བཅའ་ཁྲིམས་དོན་ཚན་བཞི་བཅུ་ཞེ་དགུ་པའི་ནང་གསེས་ ༢ པ་ལུང་དུ་དྲངས་པ་ལྟར་ན།  བཅའ་ཁྲིམས་དོན་ཚན་བཞི་བཅུ་ཞེ་དགུ་པ།  སྤྱི་འཐུས་ལྷན་ཚོགས་ཀྱི་ཉུང་ཚད།  ཅེས་པའི་ནང་གསེས་ ༢ པར།  “སྤྱི་འཐུས་ཉུང་མཐའི་གྲངས་ཚད་མ་ལོངས་པར་ཚོགས་འདུ་ཉིན་གྲངས་བདུན་ལྷག་འཕར་འགྱངས་བྱེད་དགོས་བྱུང་ན་ཚོགས་གཙོ་སྦྲེལ་པོས་ཚོགས་འདུ་འཕར་འགྱངས་ཀྱི་ཐག་གཅོད་བྱ་རྒྱུ།“ཞེས་གསལ་ཡོད།  དོན་ཚན་འདིའི་འབྲུ་དོན་ནི།  སྤྱི་འཐུས་རྣམས་གྲོས་ཚོགས་ཚོགས་དུས་དེར་འདུ་སྐོང་གིས་གྲོས་ཚོགས་ཚོགས་པའི་གནས་སྐབས་སུ་ངོ་ཡོད་སྤྱི་འཐུས་ཇི་ཡོད་ཀྱི་ཉུང་མཐའི་གྲངས་ཚད་མ་ལོན་པའི་གནས་སྐབས་སུ་ལག་བསྟར་བྱ་ཆོག་པའི་གོ་དོན་ཞིག་ལས།  སྤྱི་འཐུས་གྲོས་ཚོགས་མ་ཚོགས་པའི་སྔོན་ནས་ཚོགས་དུས་ཧྲིལ་པོ་ཞིག་འཕར་འགྱངས་སམ་ཕྱི་བསྡུ་བྱས་ཆོག་པའི་གོ་དོན་གཏན་ནས་གསལ་མེད།  དེ་ནི་སྣ་འཐེན་ནས་ཁ་ནང་དུ་སླེབས་ཐབས་བྱས་པ་ལས་མ་འདས།  ལར་ནས།   གོང་དུ་ཚོགས་གཙོའི་འཕར་འགྱངས་བྱས་པའི་གསལ་བསྒྲགས་ནང་།   “རྒྱལ་སྤྱིའི་འགྲུལ་བཞུད་སྒོ་རྒྱ་བསྡམས་པའི་རྐྱེན་གྱིས་དཀའ་ངལ་ཡོད་པའི་ཆ་ནས་ཕྱི་རྒྱལ་དུ་ཡོད་པའི་སྤྱི་འཐུས་མང་ཆེ་བ་ཕེབས་མི་ཐུབ་པ་དང་།   རྒྱ་གར་ནང་ནས་ཀྱང་སྤྱི་འཐུས་ཇི་ཙམ་ཕེབས་ཐུབ་ཀྱི་ཡོད་མེད་རྟོགས་དཀའ་བའི་གནས་སྟངས་ཀྱི་ཆ་ནས་”ཞེས་གསལ་བས།  སྐབས་དེར་ཕྱི་རྒྱལ་དུ་ཡོད་པའི་སྤྱི་འཐུས་ཇི་ཙམ་ཞིག་ཚོགས་ཕེབས་མི་ཐུབ་པ་དང་།  ཕྱི་ལོའི་ཟླ་བ་གསུམ་པའི་ནང་ཚོགས་ཕེབས་ཐུབ་པའི་ཁག་ཐེག་ཀྱི་བདེན་ཁུངས་གང་ཡང་མི་འདུག་ཅིང་།   དེ་བས་རྒྱ་གར་ནང་ཡོད་སྤྱི་འཐུས་རྣམ་པ་ཅི་ཙམ་ཕེབས་ཞུགས་མི་ཐུབ་པ་རྟོགས་དཀའ་བའི་གནས་སྟངས་གཞིར་བཞག་སྟེ་འོས་ཚོད་ཀྱིས་ཐག་བཅད་པ་ཙམ་དུ་ཟད།   ༢༠༢༠ ལོའི་ཟླ་ ༩ ནང་ལ་གནས་ཡུལ་རྒྱལ་ཁབ་ཀྱི་གྲོས་ཚོགས་དང་།  ས་གནས་ཀྱི་གྲོས་ཚོགས།  རྒྱལ་སྤྱིའི་ནང་དུ་ཡང་དུས་ཚོད་དེའི་ཡས་མས་སུ་གྲོས་ཚོགས་ཇི་སྙེད་ཅིག་ཚོགས་ཡོད་པའི་གནས་སྟངས་བྱུང་ཡོད་སྟབས།   བཙན་བྱོལ་བོད་མིའི་སྤྱི་འཐུས་མི་གྲངས་ལྔ་བཅུ་ཙམ་ཞིག་གྲོས་ཚོགས་ཚོགས་མི་ཆོག་པའི་གནས་སྟངས་ཤིག་ཡོང་གཞི་མེད་པར་གྱུར་ཡོད།   དེས་ལས་ལྡོག་ནས་ཚོགས་གཙོའམ་རྒྱུན་ལས་ཀྱི་སྐབས་དེའི་ཐག་གཅོད་དེ་ནི་རང་མཐོང་ཆེ་དྲག་སྟེ།   བཙན་བྱོལ་བོད་མིའི་བཅའ་ཁྲིམས་དོན་ཚན་བཞི་བཅུ་པ།   སྤྱི་འཐུས་ལྷན་ཚོགས་ཀྱི་ཚོགས་འདུ།  ཞེས་པའི་འོག “འཆར་ཅན་སྤྱི་འཐུས་ལྷན་ཚོགས་ཀྱི་ཚོགས་འདུའི་ཚོགས་ཚེས་དང་།   དུས་ཡུན།  ས་གནས་བཅས་སྤྱི་འཐུས་རྒྱུན་ལས་གོ་བསྡུར་ཐོག་སྤྱི་འཐུས་ཚོགས་གཙོ་ལྷན་རྒྱས་ཀྱིས་གཏན་ལ་ཕབ་པ་ལྟར་ཚོགས་དྲུང་ལས་ཁུངས་ནས་སྤྱི་འཐུས་སོ་སོོར་ཚོགས་བསྐོང་བརྡ་ཁྱབ་གཏོང་རྒྱུ་དང་།   ཚོགས་འདུ་སྔོན་མ་གྲོལ་བ་ནས་ཟླ་དྲུག་ནང་ཚུན་ཚོགས་འདུ་རྗེས་མ་དབུ་ཚུགས་ཟིན་པ་དགོས་རྒྱུ།“ཞེས་པའི་འགན་དབང་བཀུར་བའི་བཀའ་ལས་ཡོངས་སུ་འགལ་འཛོལ་ཆགས་ཡོད།  དོན་ཚན་འདིའི་འབྲུ་དོན་ལ་བཅའ་ཁྲིམས་འདིའི་མགོ་མཇུག་བར་གསུམ་གང་དུ་ཡང་དམིགས་བསལ་གཏོང་ཆོག་པའི་དོན་ཚན་གཅིག་ཀྱང་གསལ་མེད་ལ།  བཅའ་ཁྲིམས་དོན་ཚན་ཞེས་གཉིས་པ།  སྤྱི་འཐུས་རྒྱུན་ལས།  ཞེས་པའི་ནང་གསེས་ ༢ པར།  “རྒྱུན་ལས་ཀྱི་ལས་དོན་བྱེད་ཕྱོགས་དང་།  དབང་ཚད་སྤྱི་འཐུས་ལྷན་ཚོགས་ནས་གཏན་འབེབས་བྱས་པའི་ཁྲིམས་ལུགས་སམ།  སྒྲིག་གཞི་ལྟར་ལག་ལེན་བསྟར་རྒྱུ།“ ཞེས་པའི་འབྲུ་དོན་དང་ཡང་འགལ་བས་ཐེངས་འདིའི་བཅའ་ཁྲིམས་སྦོ་ལུག་སའི་གནད་དོན་ཡང་མཚམས་འདི་ནས་ཆགས་ཡོད།

གཉིས་པ།  འགྲེལ་བརྗོད་ནང་ཏོག་དབྱིབས་གཉན་རིམས་བཅུ་དགུ་པའི་རྐྱེན་པས་འཛམ་གླིང་ཁྱོན་ཡོངས་ཀྱི་གནས་སྟངས་ཉིན་རེ་བཞིན་ཛ་དྲག་ཏུ་འགྱུར་བཞིན་པ་ཡིན་ན།  ཐེངས་འདིར་ཕྱིར་འགྱངས་བྱས་ཀྱང་ ༢༠༢༡  ལོའི་ཟླ་ ༣ པའི་ནང་ཛ་དྲག་དེ་མུ་མཐུད་མི་གནས་པའི་ངེས་པ་མེད་ཅིང་།  སྔ་ལོ་ཕྱི་ཟླ་དགུ་པའི་ནང་རྡ་སར་གྲོགས་ཚོགས་ཚོགས་ན་༸རྒྱལ་བའི་བཞུགས་སྒར་ལ་འགན་ཁུར་དགོས་པ་དང་།  ཕྱི་ལོའི་ཕྱི་ཟླ་གསུམ་པའི་ནང་རྡ་སར་གྲོགས་ཚོགས་ཚོགས་ན་༸རྒྱལ་བའི་བཞུགས་སྒར་ལ་འགན་ཁུར་མི་དགོས་པ་རེད་དམ།  བོད་མི་གནས་ཡུལ་སྤྱི་དང་།  ལྷག་པར་རྒྱ་གར་ལྟ་བུར་མཚོན་ན།  ལོ་སྔོན་མའི་ཕྱི་ཟླ་དགུ་པའི་ནང་ལས་ཀྱང་འདི་ལོའི་ཕྱི་ཟླ་གསུམ་པའི་ནང་ནད་ཡམས་ཀྱི་ཁྱབ་ཚད་ཤུགས་ཆེ་རུ་དང་ཛ་དྲག་ཏུ་ཕྱིན་ཡོད་པ་མིག་གིས་མཐོང་ཆོས་སུ་གྱུར་བ་དེ་རེད་ལ།   དེ་བཞིན་འཛམ་གླིང་ཁྱོན་ཡོངས་ཀྱི་བཀའ་རྒྱ་ཡང་དེ་མུར་གནས་ཡོད།

དེས་ན་བཅའ་ཁྲིམས་སྦོ་ལུག་ཡོང་བའི་གནད་དོན་འདིས་རྐྱེན་པས་”ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་  ༢༠༢༠  ལོའི་ཟླ་ ༨ ཚེས་ ༢༡ ཉིན།   སྤྱི་འཐུས་ཚོགས་གཙོ་སྦྲེལ་པོ་བརྒྱུད་སྤྱི་འཐུས་རྒྱུན་ལས་ལྷན་ཚོགས་ལ།  སྤྱི་འཐུས་རྒྱུན་ལས་ལྷན་ཚོགས་ཀྱི་ཐག་གཅོད་དེ་བཞིན་ཁྲིམས་མཐུན་བཟོ་དགོས་པའི་བཀའ་ཁྱབ་ལམ་སྟོན་གཅིག་མཇུག་སྔ་རྗེས་གནང་བའི་ནང་།   སྤྱི་འཐུས་རྒྱུན་ལས་ནས་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་འཕར་འགྱངས་བྱས་པའི་གསལ་བསྒྲགས་བྱས་འདུག་པ་དེ།  སྤྱི་པའི་ཁེ་ཕན་ལ་གནོད་འགལ་འགྲོ་གཞིའི་གནད་ཆེའི་ཁྲིམས་དོན་གྱི་གནད་དོན་ཆགས་ཡོད་སྟབས།  ཁྲིམས་ཞིབ་ཁང་ནས་སྤྱི་མང་ཁྲིམས་ཡིག་དོན་ཚན།  ༦༩  [ཏ] གཞིར་བཟུང་ཁྲིམས་ཀྱིས་ངོས་བཞེས་བརྒྱུད་ཞིབ་འཇུག་བགྱིས་པ་ཡིན་ཞེས་འཁོད་འདུག”ཆེས་མཐོའི་ཁྲིམས་ཞིབ་ཁང་ནས་སྤྱི་འཐུས་རྒྱུན་ལས་ལ་དེ་ལྟར་བཀའ་ཁྱབ་ལམ་སྟོན་གཏོང་ཆོག་པའི་དབང་ཚད་ནི།  བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་ལྔ་པ།  བཅའ་ཁྲིམས་ཀྱི་ཚད་འཛིན།  ཅེས་པའི་ནང་གསེས་  ༡  པོར།    ཁྲིམས་ལུགས་དང་།  ཆབ་སྲིད་དབང་འཛིན་གྱི་བཀའ།  སྒྲིག་གཞི་བཅས་གང་ཡང་བཅའ་ཁྲིམས་འདིའི་དོན་ཚན་གང་རུང་དང་འགལ་ཚེ་འགལ་བའི་ཆ་དེ་རྩ་འཛིན་མེད་པ་བྱ་རྒྱུ།   ཞེས་དང་།   ནང་གསེས་  ༢  པར།  གོང་གསལ་རྣམས་ཀྱི་དོན་གནད་བཅའ་ཁྲིམས་འདིའི་དོན་ཚན་ཁག་དང་འགལ་མིན་རྩོད་གླེང་བྱུང་ཚེ་ཆེས་མཐོའི་ཁྲིམས་ཞིབ་ཁང་ནས་ཐག་གཅོད་བྱ་རྒྱུ།  ཞེས་དང་།  བཅའ་ཁྲིམས་དོན་ཚན་བཅུ་བཞི་པ།  གཞི་རྩའི་ཐོབ་ཐང་དང་།  ལས་འགན་ལག་ལེན་དོན་འཁེལ།  ཞེས་པའི་ནང་།  གོང་འཁོད་དོན་ཚན་ཁག་ནང་གསལ་གྱི་ཐོབ་ཐང་དང་།  ལས་འགན་ཁག་ལ་གནོད་འགལ་བྱུང་ཚེ་དོན་ཚན་ ༡༢ པ་ནང་གསལ་ཁྲིམས་ལུགས་ཀྱིས་བཀག་པ་ཕུད།  དེ་མིན་ཆེས་མཐོའི་ཁྲིམས་ཞིབ་ཁང་དང་།  ཁྲིམས་ཞིབ་ཁང་འོག་མ་ཁག་ལ་སྐབས་བསྟུན་ཞུ་གཏུགས་ཆོག་པའི་ཐོབ་ཐང་ཡོད་ཅིང་།  ཁྲིམས་ཞིབ་ཁང་དེ་དག་ལ་གོང་འཁོད་ཐོབ་ཐང་ཁག་སྲུང་སྐྱོབ་ཆེད་དགོས་ངེས་བཀོད་འདོམས་བྱ་རྒྱུའི་དབང་ཆ་ཡོད།  ཅེས་དང་།  བཅའ་ཁྲིམས་ཀྱི་དོན་ཚན་དྲུག་ཅུ་རེ་དྲུག་པ།   ཆེས་མཐོའི་ཁྲིམས་ཞིབ་ཁང་གི་དབང་ཚད།   ཅེས་པའི་ནང་གསེས་  ༡  པོར།  ཆེས་མཐོའི་ཁྲིམས་ཞིབ་ཁང་ནི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་ཐུག་གི་གཞུ་གཏུགས་བྱ་ཡུལ་ཁྲིམས་ཞིབ་ཁང་དང་།   བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན།  ཞེས་དང་།   ནང་གསེས་  ༢   པའི།  [ཆ] པར།  གོང་གསལ་དོན་ཚན་ཁག་ནང་མ་གསལ་བའི་རྩོད་གཞི་ཁག་བཅས་ལ་གཟུ་བོའི་ཚུལ་གྱིས་ཁྲིམས་ཞིབ་ཐག་གཅོད་བྱ་རྒྱུ།  ཞེས་ཁྲིམས་ལུགས་སྲུང་སྐྱོབ་ཀྱི་འགན་དབང་ཆ་ཚང་བཀུར་ཡོད་པ་ལྟར་གོང་གསལ་བཀའ་ཁྱབ་ལམ་སྟོན་དེ་བཏང་བ་ཆགས་ཡོད།

འོན་ཀྱང་སྤྱི་འཐུས་རྒྱུན་ལས་ནས་ཆེས་མཐོའི་ཁྲིམས་ཞིབ་ཁང་གི་བཀའ་ཁྱབ་ལམ་སྟོན་དེ་ལྟར་བཏང་བ་ནི་བཅའ་ཁྲིམས་ཀྱི་འགན་དབང་ལས་འགལ་ཡོད་པར་ངོས་འཛིན་གྱིས་བཀའ་ཁྱབ་ལམ་སྟོན་དང་ལེན་མ་གནང་བ་དེ་རེད།  འོ་ན།  སྤྱི་འཐུས་རྒྱུན་ལས་ཀྱིས་ཆེས་མཐོའི་ཁྲིམས་ཞིབ་ཁང་ནས་བཅའ་ཁྲིམས་ཀྱིས་བཀུར་བའི་འགན་དབང་ལས་འགལ་བའི་བཀའ་ཁྱབ་ཡིན་པའི་སྒྲུབ་བྱེད་གང་དག་དྲངས་འདུག་ཅེ་ན།   བཅའ་ཁྲིམས་ཀྱི་དོན་ཚན་བཞི་བཅུ་ཞེ་དྲུག་པ།  སྤྱི་འཐུས་ཀྱི་དམིགས་བསལ་ཐོབ་ཐང་།   ཞེས་པའི་ནང་གསེས་  ༡  པོར།  “སྤྱི་འཐུས་སུ་རུང་ནས་སྤྱི་འཐུས་ལྷན་ཚོགས་སམ།   དེའི་ཚོགས་ཆུང་གང་རུང་ནང་གྲོས་མོལ་གླེང་ཕྱོགས་དང་།  འོས་བསྡུ་བྱེད་སྟངས་འགྲིག་མིན་གྱི་སྐོར་ལ་སུས་ཀྱང་ཁྲིམས་ཞིབ་ཁང་དུ་གཞུ་གཏུགས་མི་ཆོག“ ཅེས་དང་།   བཅའ་ཁྲིམས་དོན་ཚན་ལྔ་བཅུ་ང་བརྒྱད་པ།  སྤྱི་འཐུས་ལྷན་ཚོགས་ཀྱི་ལས་དོན་བྱེད་ཕྱོགས་ལ་ཁྲིམས་ཞིབ་རྩད་གཅོད་མི་ཆོག་པ།  ཞེས་པའི་ནང་གསེས་  ༡  པོར།  “སྤྱི་འཐུས་ལྷན་ཚོགས་ཀྱི་ལས་དོན་གང་ཞིག་ཚད་ལྡན་ཡིན་མིན་དང་ཐག་གཅོད་བྱེད་ཕྱོགས་ལྷན་ཚོགས་ཀྱི་སྒྲིག་གཞི་དང་མཐུན་མིན་ལ་བསྙད་དེ་ཁྲིམས་ཞིབ་ཁང་ནས་རྩད་གཅོད་མི་ཆོག“ ཅེས་དང་།   ནང་གསེས་  ༢  པར།  “ལྷན་ཚོགས་ཀྱི་འགྲོ་ལུགས་དང་།   སྒྲིག་གཞི་བཟོ་འགོད་བཅས་ཀྱི་ཆེད་བཅའ་ཁྲིམས་འདི་ཐོག་ནས་སྤྲད་པའི་དབང་ཚད་ལག་བསྟར་བྱེད་ཕྱོགས་ལ་སྤྱི་འཐུས་ལྷན་ཚོགས་ཀྱི་ཚོགས་མི་སུ་ཡང་ཁྲིམས་ཞིབ་ཁང་གང་གིའང་ཁྱབ་ཁོངས་སུ་མེད།“ ཅེས་པའི་འབྲུ་དོན་རྣམས་ཁུངས་སུ་དྲངས་བཞིན་ཡོད་མོད།   འོན་ཏེ་སྤྱི་འཐུས་རྒྱུན་ལས་ནས་དྲངས་པའི་གོང་གསལ་བཅའ་ཁྲིམས་ཀྱི་འབྲུ་དོན་དེ་དག་ནི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་པའི་རྒྱུད་རིམ་ནང་དང་།  སྤྱི་འཐུས་གྲོས་ཚོགས་ཀྱི་སྔོན་རྩིས་ཚོད་དཔག་ཚོགས་ཆུང་ལ་སོགས་པའི་ཚོགས་ཆུང་དེ་དག་གིས་གྲོས་ཚོགས་ཚོགས་པའི་གནས་སྐབས་སུ་ལས་དོན་བྱེད་ཕྱོགས་ལ་ཁྲིམས་ཞིབ་རྩད་གཅོད་མི་ཆོག་པར་གོ་བ་ལས།   སྤྱི་འཐུས་རྒྱུན་ལས་ཀྱིས་བཅའ་ཁྲིམས་འདིའི་”ཚད་འཛིན་”གྱི་འབྲུ་དོན་ལས་འགལ་ཆོག་པའི་དབང་ཚད་གང་ཡང་བསྟན་མེད་ཅིང་།  དེ་ཡང་བཅའ་ཁྲིམས་དོན་ཚན་བཞི་བཅུ་ཞེ་དྲུག་པར།  “སུས་ཀྱང་ཁྲིམས་ཞིབ་ཁང་དུ་གཞུ་གཏུགས་མི་ཆོག་“ཅེས་པའི་གཞུ་གཏུགས་མི་ཆོག་པ་དེ་དོན་ཚན་དེ་རང་དུ་“གྲོས་མོལ་གླེང་ཕྱོགས་“དང་།  “འོས་བསྡུ་བྱེད་སྟངས་འགྲིག་མིན་གྱི་སྐོར་“དེ་གཞུ་གཏུགས་མི་ཆོག་ཅེས་གསལ་ལ།  དེ་བཞིན་དུ་སྤྱིར་དོན་ཚན་ལྔ་བཅུ་ང་བརྒྱད་པ་འདི་ནི།  བོད་མི་མང་སྤྱི་འཐུས་ལྷན་ཚོགས་ཀྱིས་ལས་དོན་སྒྲུབ་བཞིན་པའི་གནས་སྐབས་སུ་གོ་གི་ཡོད་པ་ནི།  དོན་ཚན་འདི་གའི་འགོ་བརྗོད་དུ།  “སྤྱི་འཐུས་ལྷན་ཚོགས་ཀྱི་ལས་དོན་བྱེད་ཕྱོགས་ལ་ཁྲིམས་ཞིབ་རྩད་གཅོད་མི་ཆོག་པ།“ ཅེས་གསལ་བར་བསྟན་ཡོད་པ་ཙམ་མ་ཟད།  “བཅའ་ཁྲིམས་འདི་ཐོག་ནས་སྤྲད་པའི་དབང་ཚད་ལག་བསྟར་བྱེད་ཕྱོགས་“ཞེས་ཆེད་དུ་གསལ་ལ།   ལྷག་པར་དོན་ཚན་འདིར་གང་ཞིག་ཁྲིམས་ཞིབ་ཁང་ནས་རྩད་གཅོད་མི་ཆོག་ས་དེ་དོན་ཚན་འདི་རང་དུ།  “ལྷན་ཚོགས་ཀྱི་འགྲོ་ལུགས་དང་།   སྒྲིག་གཞི་བཟོ་འགོད་“བཅས་ཀྱི་ཆེད་”བཅའ་ཁྲིམས་འདི་ཐོག་ནས་སྤྲད་པའི་དབང་ཚད་ལག་བསྟར་“བྱེད་ཕྱོགས་ལ་”སྤྱི་འཐུས་ལྷན་ཚོགས་ཀྱི་ཚོགས་མི་སུ་ཡང་“ཁྲིམས་ཞིབ་ཁང་གང་གིའང་ཁྱབ་ཁོངས་སུ་མེད།” ཅེས་གསལ་བར་བསྟན་ཡོད་ཀྱང་།   སྤྱི་འཐུས་རྒྱུན་ལས་ཀྱི་ངོས་ནས་བོད་མི་མང་སྤྱི་འཐུས་ལྷན་ཚོགས་ཀྱི་ལས་དོན་བྱེད་ཕྱོགས་དང་།   སྤྱི་འཐུས་རྒྱུན་ལས་ཀྱི་ལས་དོན་བྱེད་ཕྱོགས་གཉིས་ཉ་ཉུང་མཉམ་གཅིག་ཏུ་བསྲེས་ནས་འགྲེལ་གྱི་ཡོད་པ་དེ་གོང་གསལ་བཅའ་ཁྲིམས་ཀྱི་དོན་ཚན་ལུང་དྲངས་སྟངས་ལས་གསལ་པོར་ཤེས་ཐུབ།   ང་ཚོས་ངེས་པར་དུ་མཁྱེན་དགོས་པ་ཞིག་ནི་བཅའ་ཁྲིམས་དོན་ཚན་བཞི་བཅུ་ཞེ་གཉིས་པར་སྤྱི་འཐུས་རྒྱུན་ལས་ཀྱི་གྲུབ་ཆ་ཇི་ཡིན་དང་། བཅའ་ཁྲིམས་དོན་ཚན་སོ་བདུན་པར་སྤྱི་འཐུས་ལྷན་ཚོགས་ཀྱི་གྲུབ་ཆ།   དེ་གཉིས་སོ་སོའི་ལས་དོན་བྱེད་ཕྱོགས་ཀྱི་ཁྲིམས་སྒྲིག་ཀྱང་སོ་སོར་ཡོད་ཅིང་།  སྤྱི་འཐུས་རྒྱུན་ལས་དང་སྤྱི་འཐུས་ལྷན་ཚོགས་གཉིས་དོན་གཅིག་མིང་གི་རྣམ་གྲངས་ཤིག་མིན་སྟབས་སྤྱི་འཐུས་རྒྱུན་ལས་དེ་སྤྱི་འཐུས་ལྷན་ཚོགས་ཀྱི་ངོ་བོ་ཞིག་ཆགས་ཐུབ་ཀྱི་མེད།

གནད་དོན་འདི་དག་དང་འབྲེལ་ནས་ཕྱི་ལོ་ ༢༠༢༡  ལོའི་ཟླ་  ༣  ཚེས་  ༢༥  ཉིན་སྐབས་བཅུ་དྲུག་པའི་གྲོས་ཚོགས་ཚོགས་དུས་བཅུ་པའི་ཐོག་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་།   ཁྲིམས་ཞིབ་པ་གཉིས་དུས་གཅིག་ལ་འཕོ་འགྱུར་བཏང་ཡོད།   དེ་ལྟའི་འཕོ་འགྱུར་དེ་ནི་ཐོག་མའི་ཆ་ནས་ཁྲིམས་ཀྱི་གཞི་རྩའི་རང་བཞིན་དང་འགལ་ཡོད་པ་དང་།   ཁྲིམས་ལུགས་ལག་བསྟར་གྱི་ཆ་ནས་བཅའ་ཁྲིམས་དང་འགལ་ཡོད་པ།   ཐག་གཅོད་བྱ་རིམ་གྱི་ཆ་ནས་ཁྲིམས་སྒྲིག་དང་འགལ་ཡོད་ཅིང་།

༡༽  བཅའ་ཁྲིམས་དོན་ཚན་དྲུག་ཅུ་རེ་གསུམ་པའི་ནང་གསེས་ ༤ པར།  “སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གྱི་གསུམ་ཆ་གཉིས་ཡན་གྱིས་ཁྲིམས་ཞིབ་པ་ཆེ་བ་དང་།   ཁྲིམས་ཞིབ་པ་གཞན་གཉིས་བཅས་སུ་རུང་འཕོ་འགྱུར་དགོས་པའི་གྲོས་ཆོས་བཞག་སྟེ་འཕོ་འགྱུར་བྱེད་དགོས་བྱུང་ན་ལས་དེ་མིན་ཁྲིམས་ཞིབ་པ་ཆེ་བའི་ལས་རྒྱུུན་ལོ་ལྔ་འམ།  རང་ལོ་དྲུག་ཅུ་རེ་ལྔ་ཧྲིལ་པོ་ལོན་པ་གང་སྔའི་བར་ཡིན།  ཁྲིམས་ཞིབ་པ་གཞན་གཉིས་རང་ལོ་དྲུག་ཅུ་རེ་ལྔ་ཧྲིལ་པོ་མ་ལོན་བར་ལས་འཁུར་རྒྱུན་འཛིན་བྱ་རྒྱུ།“ཞེས་བོད་མི་མང་སྤྱི་འཐུས་ལྷན་ཚོགས་ལ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་།  ཁྲིམས་ཞིབ་པ་གཞན་གཉིས་འཕོ་འགྱུར་གཏོང་རྒྱུའི་དབང་ཚད་ཅིག་བཀུར་ཡོད་མོད་ཀྱང་།   དབང་ཚད་སྤྱོད་ཕྱོགས་དེ་སྤྱི་འཐུས་སྒེར་གྱི་ཁེ་ཕན་དང་དབང་གྲགས་ཆེད་དུ་མ་ཡིན་པར།   དགོས་ངེས་ཁྲིམས་ཀྱི་བྱ་རིམ་བརྒྱུད་དགོས་པ་དེ།  བཅའ་ཁྲིམས་དོན་ཚན་ལྔ་བཅུ་ང་བཞི་པ།  གྲོས་བསྡུར་བཀག་སྡོམ།  ཞེས་པའི་འོག   “ཆེས་མཐོའི་ཁྲིམས་ཞིབ་པ་ཆེ་བ་དང་།   ཁྲིམས་ཞིབ་པ་གཞན་གཉིས་གང་རུང་འཕོ་འགྱུར་བྱ་རྒྱུའི་སྐོར་དང་།   སྤྱི་འཐུས་ལྷན་ཚོགས་ནས་ཚོགས་ཆུང་ཟུར་འཛུགས་ཀྱིས་རྟོག་ཞིབ་ཐོག་སྤྱི་འཐུས་སུ་སྙན་ཐོ་འབྱོར་བའི་སྐབས་སུ་མ་གཏོགས་དེ་མིན་ཁྲིམས་ཞིབ་པའི་ལས་དོན་བྱེད་ཕྱོགས་སྐོར་སྤྱི་འཐུས་ལྷན་ཚོགས་སུ་གླེང་སློང་དང་།   གྲོས་བསྡུར་བྱེད་མི་ཆོག“ཅེས་གསལ་བསྟན་པས།   གོང་གསལ་བཅའ་ཁྲིམས་དོན་ཚན་དྲུག་ཅུ་རེ་གསུམ་པའི་ནང་གསེས་ ༤ པའི་འབྲུ་དོན་ལག་ལེན་དུ་བསྟར་དགོས་པའི་གནས་སྟངས་བྱུང་ཚེ།  བཅའ་ཁྲིམས་དོན་ཚན་ལྔ་པའི་འབྲུ་དོན་ཇི་བཞིན་ཁྲིམས་ཀྱི་བྱ་རིམ་ལག་ལེན་བསྟར་དགོས་པ་གསལ་ཡོད་ན་ཡང་།  སྐབས་འདིའི་གྲོས་ཚོགས་ཀྱི་ཐག་གཅོད་དེ་ནི་རལ་གྲི་གནམ་གཡུགས་ཀྱིས་ཕྱོགས་གཅིག་རྐྱང་པའི་འགྲེལ་བརྗོད་ཁོ་ནར་གཞིར་བཞག་སྟེ་ཐག་བཅད་པ་དེས།  བཅའ་ཁྲིམས་ཀྱི་དོན་ཚན་དྲུག་པ་དང་།  དོན་ཚན་དགུ་པ།   དོན་ཚན་བཅུ་གཉིས་པ་ནང་གསལ་གྱི་རྒྱལ་སྤྱིའི་ཁྲིམས་ལུགས་དང་འགྲོ་བ་མིའི་གཞི་རྩའི་ཐོབ་ཐང་བརྩིས་མེད་བཏང་ཞིང་།  ཉེས་མེད་དག་འབུད་བྱེད་པའི་གོ་སྐབས་ཙམ་ཡང་གནང་མེད་སྟབས།  དེ་ནི་དབང་ཆ་གཅིག་བསྡུས་ཀྱི་བྱ་སྤྱོད་ཅིག་ལས་མང་གཙོའི་ལམ་ལུགས་ཀྱི་འགྲོ་སྟངས་ཤིག་བྱུང་མེད་པས་འགྲོ་བ་མིའི་གཞི་རྩའི་ཐོབ་ཐང་དང་འགལ་ཡོད།

༢༽  བཙན་བྱོལ་བོད་མིའི་བཅའ་ཁྲིམས་ལག་བསྟར་བྱེད་ཕྱོགས་དང་འགལ་ཡོད་པ་ནི།  བཅའ་ཁྲིམས་དོན་ཚན་ལྔ་པར།  བཅའ་ཁྲིམས་ཀྱི་ཚད་འཛིན།  ཅེས་པའི་ནང་གསེས་  ༡  པོར། “ཁྲིམས་ལུགས་དང་།  ཆབ་སྲིད་དབང་འཛིན་གྱི་བཀའ།  སྒྲིག་གཞི་བཅས་གང་ཡང་བཅའ་ཁྲིམས་འདིའི་དོན་ཚན་གང་རུང་དང་འགལ་ཚེ་འགལ་བའི་ཆ་དེ་རྩ་འཛིན་མེད་པ་བྱ་རྒྱུ།“ཞེས་པ་དང་།   ནང་གསེས་  ༢  པར།  “གོང་གསལ་རྣམས་ཀྱི་དོན་གནད་བཅའ་ཁྲིམས་འདིའི་དོན་ཚན་ཁག་དང་འགལ་མིན་རྩོད་གླེང་བྱུང་ཚེ་ཆེས་མཐོའི་ཁྲིམས་ཞིབ་ཁང་ནས་ཐག་གཅོད་བྱ་རྒྱུ།“ཞེས་པ་དང་འགལ་ཞིང་།  དོན་ཚན་འདིར་བཙན་བྱོལ་བོད་མིིའི་སྒྲིག་འཛུགས་དང་།  དེའི་ཁྱབ་ཁོངས་དང་བཅས་པའི་ཁྲིམས་སྒྲིག་གི་རྩ་བ་ནི་བཙན་བྱོལ་བོད་མིའི་བཅའ་ཁྲིམས་ཡིན་ཞིང་།  ཆབ་སྲིད་དབུ་ཁྲིད་ཀྱི་བཀའམ་གསུང་འཕྲིན་དང་།  སྒྲིག་གཞི་བཅས་གང་ཡིན་ཡང་།  བཅའ་ཁྲིམས་ནང་གསལ་གྱི་འབྲུ་དོན་དང་འགལ་ཚེ།  འགལ་བའི་ཆ་དེ་མཐའ་མའི་ཐག་གཅོད་བྱེད་དབང་ཆེས་མཐོའི་ཁྲིམས་ཞིབ་ཁང་ལ་འགན་དབང་ཡོད་པའི་བཀའ་ཁྱབ་ལ་མཁྱེན་བཞིན་དུ་ཁྱད་གསོད་བྱས་ཡོད་ལ།  བཅའ་ཁྲིམས་དོན་ཚན་བཅུ་བཞི་པ།  གཞི་རྩའི་ཐོབ་ཐང་དང་།  ལས་འགན་ལག་ལེན་དོན་འཁེལ།  ཞེས་པའི་ནང་། “གོང་འཁོད་དོན་ཚན་ཁག་ནང་གསལ་གྱི་ཐོབ་ཐང་དང་།  ལས་འགན་ཁག་ལ་གནོད་འགལ་བྱུང་ཚེ་དོན་ཚན་ ༡༢ པ་ནང་གསལ་ཁྲིམས་ལུགས་ཀྱིས་བཀག་པ་ཕུད།  དེ་མིན་ཆེས་མཐོའི་ཁྲིམས་ཞིབ་ཁང་དང་།   ཁྲིམས་ཞིབ་ཁང་འོག་མ་ཁག་ལ་སྐབས་བསྟུན་ཞུ་གཏུགས་ཆོག་པའི་ཐོབ་ཐང་ཡོད་ཅིང་།  ཁྲིམས་ཞིབ་ཁང་དེ་དག་ལ་གོང་འཁོད་ཐོབ་ཐང་ཁག་སྲུང་སྐྱོབ་ཆེད་དགོས་ངེས་བཀོད་འདོམས་བྱ་རྒྱུའི་དབང་ཆ་ཡོད།“ཅེས་གསལ་བ་ལྟར་གཏན་འབེབས་ཁྲིམས་སྒྲིག་ཁག་དང་འགལ་འཛོལ་བྱུང་བའི་གནད་དོན་ཅི་རིགས་ལ་ཆེས་མཐོའི་ཁྲིམས་ཞིབ་ཁང་ལ་དེ་དག་སྲུང་སྐྱོབ་དང་བཀོད་འདོམས་བྱ་རྒྱའི་དབང་ཚད་བཀུར་ཡོད་ཅིང་།  དེ་བཞིན་དུ་བཅའ་ཁྲིམས་དོན་ཚན་དྲུག་ཅུ་རེ་དྲུག་པ།   ཆེས་མཐོའི་ཁྲིམས་ཞིབ་ཁང་གི་དབང་ཚད།  ཅེས་པའི་ནང་གསེས་ ༡ པོར།  “ཆེས་མཐོའི་ཁྲིམས་ཞིབ་ཁང་ནི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་ཐུག་གི་ཞུ་གཏུགས་བྱ་ཡུལ་ཁྲིམས་ཞིབ་ཁང་དང་།   བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན།“ཞེས་གསལ་བས། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ནི།  བཙན་བྱོལ་བོད་མིའི་སྒྲིག་འཛུགས་དང་།  དེའི་ཁྱབ་ཁོངས་སུ་ཡོད་པའི་བོད་མི་ཡོངས་ཀྱི་མཐར་ཐུག་གི་ཞུ་གཏུགས་བྱ་ཡུལ་ཡིན་པ་དང་།  ལྷག་པར་བཙན་བྱོལ་བོད་མིའི་སྒྲིག་འཛུགས་ཀྱི་བཅའ་ཁྲིམས་ཀྱིས་མཚོན་ཁྲིམས་སྒྲིག་ཡོངས་རྫོགས་སྲུང་སྐྱོབ་ཞུ་མཁན་གོང་ན་མེད་པའི་འགན་དབང་བཀུར་ཡོད་ཅིང་།  སྤྱི་འཐུས་རྒྱུན་ལས་ཀྱིས་ཆེས་མཐོའི་ཁྲིམས་ཞིབ་ཁང་ལ་རྩོད་གླེང་དང་།   གྲོས་ཚོགས་སུ་གྲོས་འཆར་འདོན་པའི་གནས་སྐབས་སུ་སྤྱི་མང་གཏུགས་བཤེར་ཁྲིམས་ཡིག་གི་དོན་ཚན་དྲུག་ཅུ་རེ་དགུ་པའི་ནང་གསེས་[ཏ]པ། “ཁྲིམས་ཀྱི་ངོས་བཞེས་“ཞེས་པ་ལག་བསྟར་གནང་བའི་ཁྲིམས་དོན་དེ་བཅའ་ཁྲིམས་ཀྱི་དབང་ཚད་ལས་འགལ་བར་ཀླན་ཀ་བཙལ་བ་དང་།  ཕྱོགས་གཞན་ཞིག་ནས་ཁྲིམས་དོན་དེ་འདྲ་ཞིག་བཟོ་བཀོད་གཏན་འབེབས་གནང་བ་ཤེས་ཚོར་མ་བྱུང་བའི་འགྲེལ་བརྗོད་གནང་བ་ནི་ཟེར་རྒྱུས་འཕོངས་པའི་གཏམ་དུ་ཟད་དེ།   ཕྱི་ལོ་ ༢༠༡༡ ལོར་ཆེད་དུ་གྲོས་ཚོགས་འཕར་མ་འདུ་སྐོང་གིས་བཅའ་ཁྲིམས་བསྐྱར་བཅོས་གཏན་ལ་ཕབ་པ་ནས་བཟུང་སྔར་སྲོལ་སྤྱི་འཐུས་ལྷན་ཚོགས་དང་ཆེས་མཐོའི་ཁྲིམས་ཞིབ་ཁང་ནས་གཏན་འབེབས་གང་གནང་གི་ཁྲིམས་སྒྲིག་ཁག་ལ་༸གོང་ས་༸སྐྱབས་མགོན་ཆེན་པོས་ཆོག་མཆན་མཚན་བཀོད་གནང་ལམ་དེ་བཞིན་བསྐྱར་བཅོས་གནང་རྗེས།  ཆེས་མཐོའི་ཁྲིམས་ཞིབ་ཁང་ལ་བཅའ་ཁྲིམས་དོན་ཚན་དྲུག་ཅུ་རེ་བདུན་པའི་འོག་དགོས་མཁོའི་ཁྲིམས་སྒྲིག་གཏན་འབེབས་གནང་ཆོག་པའི་འགན་དབང་རང་ཆས་སུ་བཀུར་བ་དང་།   གོང་གསལ་བརྒྱུད་ལམ་དེ་བསྐྱར་བཅོས་གནང་ཉིན་ནས་བརྒྱུད་ལམ་གསར་པ་གཞན་ཞིག་བརྟེན་མི་དགོས་པ་གནང་བ་དེ་ཡང་།   མང་གཙོའི་ཀ་བ་གསུམ་པོར་ལྗིད་མཉམ་སྟངས་འཛིན་ཡོང་སླད་དུ་དམིགས་པ་ཞིག་ཡིན་པ་མཁྱེན་བཞིན་དུ་སྤྱི་འཐུས་རྒྱུན་ལས་ནས་ཆེས་མཐོའི་ཁྲིམས་ཞིབ་ཁང་གི་བཀའ་ཁྱབ་ལམ་སྟོན་ལ་བརྩི་བཀུར་མ་ཞུས་པ་དང་།  སྤྱིར་ཆེས་མཐོའི་ཁྲིམས་ཞིབ་ཁང་གི་ཁྲིམས་ཡིག་ཁག་ལ་བསྐྱར་བཅོས་ཐེངས་འགའ་གནང་བ་གསལ་ལ།  སྤྱི་མང་ཁྲིམས་ཡིག་གི་དོན་ཚན་དྲུག་ཅུ་རེ་དགུ་པའི་ནང་གསེས་[ཏ]པ་ཚུད་པའི་ཁྲིམས་ཡིག་གི་དོན་ཚན་ཁག་ཅིག་བསྐྱར་བཅོས་དང་གསར་བཅུག་གང་གནང་ངོ་བཤུས་ཁག་ ༢༠༡༩ ལོའི་ཟླ་ ༡༠  ཚེས་ ༡༦ ཉིན་བཀའ་སྤྱི་ལྷན་རྒྱས་སུ་ཕུལ་ཡོད་པ་ཙམ་མ་ཟད།  འགྲོ་ལུགས་ལྟར་བོད་མི་མང་སྤྱི་འཐུས་ལྷན་ཁང་གི་ཚོགས་དྲུང་ལས་ཁུངས་ནས་སྤྱི་འཐུས་རྣམས་ལ་མཁྱེན་རྟོག་སླད་ངོ་བཤུས་འབུལ་གཏོང་སོང་བ་ཡིན་དགོས་མོད་ཀྱང་།  ཁྲིམས་ཡིག་བསྐྱར་བཅོས་དེ་འདྲ་ཞིག་མཁྱེན་རྟོག་མ་བྱུང་ཚུལ་གྱི་འགྲེལ་བརྗོད་གནང་ཡོང་བ་ནི།  ཆེས་མཐོའི་ཁྲིམས་ཞིབ་ཁང་ལ་སྣང་ཆུང་ཁྱད་གསོད་ཙམ་མ་ཟད་ཡིད་ཆེས་དང་ཐུགས་རེ་གནང་སྟེ་བོད་མི་མང་གི་སྤྱི་འཐུས་ཀྱི་ཞབས་སྟེགས་འབུལ་མཁན་བོད་མིའི་ཚོའི་ཐུགས་རེ་ཡང་རྒྱབ་སྐྱུར་བྱས་པ་ཞིག་ཆགས་ཡོད།

༣༽  ཐག་གཅོད་ཀྱི་བྱ་རིམ་ཆ་ནས་ཀྱང་འགལ་ཡོད་པ་ནི།   ཐེངས་འདིའི་གྲོས་ཚོགས་ཀྱི་གྲོས་འཆར་དེ་བཞིན་ ༢༠༢༡ ལོའི་ཟླ་ ༣ ཚེས་ ༢༥ ཉིན་གློ་བུར་དུ་གྲོས་ཚོགས་སུ་བསྣམས་ཡོང་སྐབས་སྤྱི་འཐུས་རྒྱུན་ལས་རྣམ་པས་གྲོས་འཆར་དེ་འདྲ་ཞིག་འདོན་གྱི་ཡོད་པ་མཁྱེན་གྱི་ཡོད་ན་ལས།  ཕྱོགས་བཞུགས་སྤྱི་འཐུས་རྣམ་པས་ཚོགས་གཙོ་སྦྲེལ་པོས་གྲོས་ཚོགས་སུ་དེ་ཉིན་གྲོས་འཆར་དེ་འདྲ་ཞིག་འདོན་རྒྱུའི་གསལ་བཤད་མ་བྱས་བར་མཁྱེན་རྟོག་བྱུང་མེད་པ་དང་།  བཅའ་ཁྲིམས་དོན་ཚན་ལྔ་པ་དང་།  བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་།  ལས་དོན་བྱེད་ཕྱོགས་ཀྱི་སྒྲིག་གཞིའི་དོན་ཚན་ཞེ་ལྔ་པ།  དོན་ཚན་ལྔ་གསུམ་པ།  དོན་ཚན་ལྔ་བཞི་པ་བཅས་ཀྱི་ནང་དུ་གསལ་བའི་ཁྲིམས་ཀྱི་བྱ་རིམ་གང་ལ་ཡང་མ་བརྟེན་པར།   སྤྱི་འཐུས་རྒྱུན་ལས་ཀྱི་གྲོས་ཆོད་གྲོས་འཆར་དེ་བཞིན་ལྐོག་ལྐོག་སུད་སུད་དང་བྲེལ་བྲེལ་ཚུབ་ཚུབ་ཀྱིས་གསང་བའི་འོས་འཕེན་གྱི་མིང་ཐོག་ནས་ཆེས་གལ་འགངས་ཆེ་བའི་མང་གཙོའི་ཀ་བ་གསུམ་གྱི་ཡ་གྱལ་ཁྲིམས་ལུགས་དབང་འཛིན་གྱི་ཀ་བ་དེ་སྒེར་ནས་སྤྱི་ལ་སྤུངས་ཏེ་ཆུ་ཚོད་གཅིག་དང་ཕྱེད་ཀའི་ནང་རྨང་ནས་གཏོར་བ་དེ་ནི་རང་མཐོང་ཆེ་དྲག་པའི་ཕོ་ཚོད་ཀྱི་དབང་དུ་སོང་བའམ་དགོས་པ་གཞན་ཞིག་གི་ཆེད་དུ་ཡིན་ན་ལས་ཁྲིམས་མཐུན་ལུགས་མཐུན་ཞིག་གཏན་ནས་ཆགས་ཐུབ་མེད།

གྲོས་ཚོགས་ཀྱིས་ ༢༠༢༡  ལོའི་ཟླ་ ༣ ཚེས་ ༢༥ ཉིན་ཁྲིམས་ཞིབ་པ་གསུམ་དུས་གཅིག་ལ་འཕོ་འགྱུར་བཏང་བའི་གྲོས་ཆོས་བཞག་པ་དང་འབྲེལ་ནས།  ཚེས་ ༢༦ ཉིན་བཅའ་ཁྲིམས་བསྐྱར་བཅོས་ཀྱི་དོན་ཚན་ཁག་ཅིག་བཏོན་གནང་བ་ལས།  རེ་ཟུང་བརྩིས་མེད་ཕྱིན་པ་ཕུད་དོན་ཚན་བདུན་ལ་བསྐྱར་བཅོས་བྱས་ཡོད།  གང་བསྐྱར་བཅོས་གནང་བའི་དོན་ཚན་ཁག་ནི།  བཅའ་ཁྲིམས་དོན་ཚན་ལྔ་པ་དང་།  དོན་ཚན་བཞི་བཅུ་པ།  དོན་ཚན་ལྔ་བཅུ་ང་བརྒྱད་པ།  དོན་ཚན་དྲུག་ཅུ་རེ་གསུམ་པ།  དོན་ཚན་དྲུག་ཅུ་རེ་དྲུག་པ།  དོན་ཚན་དྲུག་ཅུ་རེ་བདུན་པ།  དོན་ཚན་དགུ་བཅུ་གོ་བདུན་པ་བཅས་ཡིན་ཞིང་།  དེ་དག་ལས་དོན་ཚན་གཅིག་མ་གཏོགས་དྲུག་ཆ་ཚང་ཐེངས་འདིའི་ཁྲིམས་ཞིབ་པ་འཕོ་འགྱུར་བཏང་བའི་གནད་དོན་འབྲེལ་བ་ཆགས་ཡོད།  སྔ་ཉིན་གྱི་གྲོས་འཆར་དེ་བཞིན་ཁྲིམས་མཐུན་ལུགས་མཐུན་ཞིག་བྱུང་ཡོད་ཚེ།  ཚེས་ ༢༦  ཉིན་བྲེལ་བྲེལ་ཚུབ་ཚུབ་ཀྱིས་དོན་ཚན་དེ་དག་བསྐྱར་བཅོས་གནང་དགོས་དོན་ཆགས་ཀྱི་མེད།  གང་ཡིན་ཞེ་ན།  གྲོས་ཆོས་གྲོས་འཆར་དེ་ཁྲིམས་མཐུན་མ་བྱུང་བར་བཅའ་ཁྲིམས་ཀྱི་འབྲུ་དོན་དང་འགལ་ཡོད་སྟབས།  གྲོས་འཆར་དེ་ཉིད་ཁྲིམས་མཐུན་བཟོ་ཆེད་བསྐྱར་བཅོས་གནང་དགོས་བྱུང་ཡོད།  དེ་ལྟར་གྱུར་ན།  ཁྲིམས་ཀྱི་དབང་སྒྱུར་ཡིན་རབ་གླེང་གིན་པའི་བཙན་བྱོལ་བོད་མིའི་སྒྲིག་འཛུགས་དེ་གང་ཟག་གི་དབང་སྒྱུར་དུ་སོང་བས།  གཅིག་བསྡུས་རིང་ལུགས་ཀྱི་རྒྱ་ནག་གུང་ཁྲན་ཏང་གིས་ཁྲིམས་ལུགས་ལག་བསྟར་བྱེད་སྟངས་ཀྱི་འགྲན་ཡར་མི་འགྱུར་གྲང་།   ལར་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གསུམ་ལ་ཡང་དེ་ལྟར་དབང་ཚད་ལོག་འགྱུར་གནང་གི་ཡོད་ན་གཞི་རིམ་མི་མང་ཉམས་ཆུང་དག་གི་མགོ་ལ་ཤོད་ཅི་དགོས།

དེ་ལྟར་གོང་གསལ་བཅའ་ཁྲིམས་བསྐྱར་བཅོས་གནང་བའི་ཁྲོད་ནས་བཅའ་ཁྲིམས་དོན་ཚན་ལྔ་པའི་བསྐྱར་བཅོས་དེས།  བཅའ་ཁྲིམས་ཀྱི་ཚད་འཛིན་ལ་དོ་ཕོག་དང་།  བཅའ་ཁྲིམས་དོན་ཚན་དྲུག་པའི་དབང་ཚད་ལས་འགལ་ཏེ་ཆེས་མཐོའི་ཁྲིམས་ཞིབ་ཁང་གི་འགན་དབང་ལ་ཚོད་འཛིན།  མང་གཙོའི་ཀ་བ་གསུམ་གྱི་ལྗིད་མཉམ་སྟངས་འཛིན་དོན་གྱིས་སྟོང་པར་བཟོས་ཡོད་པ་ནི།  སྤྱི་མང་ཁྲིམས་ཡིག་གི་དོན་ཚན་དོན་ཚན་དྲུག་ཅུ་རེ་དགུ་པའི་ནང་གསེས་[ཏ]པའི་དགོས་དོན་བེད་མེད་དུ་བཏང་བ་དེ་ཡིན།  བཅའ་ཁྲིམས་དོན་ཚན་བཞི་བཅུ་པར་བསྐྱར་བཅོས་གནང་བ་དེས།   བཅའ་ཁྲིམས་དོན་ཚན་ང་གཉིས་པ་དང་།  སྤྱི་འཐུས་རྒྱུན་ལས་ཚོགས་ཆུང་གི་སྒྲིག་གཞིའི་དོན་ཚན་བཞི་པ་དང་ལྔ་པའི་འབྲུ་དོན་ཁག་ཀྱང་བརྩིས་མེད་བཏང་ཡོད།   བཅའ་ཁྲིམས་དོན་ཚན་དྲུག་ཅུ་རེ་གསུམ་པར་བསྐྱར་བཅོས་བྱེད་དོན་ནི།  ད་ཐེངས་གྲོས་ཚོགས་ཀྱིས་བཅའ་ཁྲིམས་དོན་ཚན་ལྔ་བཅུ་ང་བཞི་པར།   ཆེས་མཐོའི་ཁྲིམས་ཞིབ་པ་ཆེ་བ་དང་།   ཁྲིམས་ཞིབ་པ་གཞན་གཉིས་“གང་རུང་“འཕོ་འགྱུར་བྱ་རྒྱུའི་སྐོར་ཞེས་དང་།  བཅའ་ཁྲིམས་དོན་ཚན་དྲུག་ཅུ་རེ་གསུམ་པར།   སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གྱི་གསུམ་ཆ་གཉིས་ཡན་གྱིས་ཁྲིམས་པ་ཞིབ་པ་ཆེ་བ་དང་།   ཁྲིམས་ཞིབ་པ་གཞན་གཉིས་བཅས་“སུ་རུང་“འཕོ་འགྱུར་དགོས་པའི་གྲོས་ཆོས་བཞག་སྟེ་འཕོ་འགྱུར་བྱེད་དགོས་བྱུང་ན་ཞེས་པའི་འབྲུ་དོན་ལས་འགལ་བའི་ཐག་གཅོད་དེས་རྐྱེན་པས་བསྐྱར་བཅོས་མ་བྱེད་ཐབས་མེད་དུ་གྱུར་ཞིང་།   སླེབས་ལ་ཉེ་བའི་སྐབས་བཅུ་དྲུག་པའི་བཀའ་ཤག་ལྷན་རྒྱས་དང་།  སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་བགྲེས་གཞོན་གཉིས་ཀྱི་ལས་འཁུར་དམ་འབུལ་ཞུ་ཡུལ་ཡོངས་སུ་གཏོར་བརླགས་བཏང་ཟིན་སྟབས།  དོན་ཚན་འདིའི་བསྐྱར་བཅོས་ནི་ཉེས་ཅན་པའི་ལས་འཛོལ་འགེབས་ཐབས་ལ་དམིགས་པའི་བསྐྱར་བཅོས་ཤིག་ཆགས་ཤིང་།  འདི་ཡི་ཞོར་དུ་བཅའ་ཁྲིམས་དོན་ཚན་དགུ་བཅུ་གོ་བདུན་པ་ཡང་འབྲུ་སྣོན་བསྐྱར་བཅོས་བྱས་མོད།  འོན་ཀྱང་བྱེད་ཐབས་དེ་ནི་ཧོལ་རྒྱུུགས་རང་བཞིན་གྱི་བྱེད་སྟངས་ཤིག་ལས།  སྤྱི་ལ་སྨན་པ་དང་དོན་ལ་གནས་པའི་བྱེད་སྟངས་ཤིག་བྱུང་མེད་ཅིང་།  དོན་ཚན་འདིའི་ཚིག་བརྗོད་དང་དོན་མཐུན་གྱི་དོན་ཚན་བརྒྱ་དང་གཅིག་གི་ནང་གསེས་ ༡ པོ་དང་།  དོན་ཚན་བརྒྱ་དང་བདུན་གྱི་ནང་གསེས་ ༡ པོའི་ཀ་པའི་འབྲུ་དོན་གཉིས་ལ་འབྲུ་སྣོན་བསྐྱར་བཅོས་གཏོང་རྒྱུ་གཏིང་བརྗེད་སོང་ཡོད།  བཅའ་ཁྲིམས་དོན་ཚན་དྲུག་ཅུ་རེ་དྲུག་པའི་ནང་གསེས་ ༢ པའི་ཆ་པ། “གོང་གསལ་དོན་ཚན་ནང་མ་གསལ་བའི་རྩོད་གཞི་ཁག་བཅས་ལ་གཟུ་བོའི་ཚུལ་གྱིས་ཁྲིམས་ཞིབ་ཐག་གཅོད་བྱ་རྒྱུ་“ཞེས་པ་འཕྲི་བཅོས་བྱས་པ་དེས།  གོང་བརྗོད་དོན་ཚན་ལྔ་པར་བསྐྱར་བཅོས་བྱས་པ་དང་གཅིག་མཚུངས་དང་།   དེ་བས་ཆེས་མཐོའི་ཁྲིམས་ཞིབ་ཁང་གི་དབང་ཚད་ལ་དོ་ཕོག་བཏང་ཞིང་།  མང་གཙོའི་ཀ་བ་གསུམ་གྱི་ཡ་གྱལ་དང་།    མང་གཙོའི་ལམ་ལུགས་ཀྱི་ཆེས་བླ་ན་མེད་པའི་ཁྲིམས་ལུགས་དབང་འཛིན་རྨང་ནས་ནུས་མེད་བཟོས་ཡོད་པས།  དེ་ལྟར་བཟོ་བའི་རྒྱབ་ལྗོངས་དམིགས་ཡུལ་ལ་ཅི་ཞིག་སྦས་ཡོད་པ་ཚོད་དཔག་དཀའ་ཡང་།  བཅའ་ཁྲིམས་དོན་ཚན་རེ་བདུན་པར་སྣོན་བཅོས་བྱས་པ་དེ་ཡང་གོང་བརྗོད་དོན་ཚན་ལྔ་པ་དང་།  དོན་ཚན་དྲུག་ཅུ་རེ་དྲུག་པར་བསྐྱར་བཅོས་བྱས་པའི་གནད་དོན་དང་གཅིག་མཚུངས་སུ་སྣང་།

དེས་ན་ད་ཐེངས་སྐབས་བཅུ་དྲུག་པའི་སྐབས་བབས་སྤྱི་འཐུས་རྒྱུན་ལས་འདི་ནས་བཙན་བྱོལ་བོད་མིའི་བཅའ་ཁྲིམས་སྦོ་ལུགས་པའི་འགོ་བརྩམས་པ་དང་།   སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་འདི་ནས་མང་གཙོའི་ཀ་བ་གསུམ་ཆ་མི་ཚང་བར་བཏང་བ་ཙམ་མ་ཟད།  བཅའ་ཁྲིམས་བསྐྱར་བཅོས་ཀྱི་གནད་དོན་ལ་དཔགས་ན་རིང་པོར་མི་ཐོག་པར་བཙན་བྱོལ་བོད་མིའི་སྒྲིག་འཛུགས་ཀྱང་རྨང་ནས་སྦོ་ལུག་རྒྱུའི་སྟ་གོན་ཞིག་རིམ་བཞིན་བསྒྲིགས་ཟིན་འདུག་གོ །

གཞན་ཡང་བཅའ་ཁྲིམས་ཀྱི་འབྲུ་དོན་དང་འགལ་མེད་ཅིག་གནང་ཡོད་མེད་གང་ལྟར་ཡང་ ༢༠༢༡ ལོའི་ཟླ་ ༤ ཚེས་ ༢༧ ཉིན་ཚོགས་དྲུང་ལས་ཁུངས་ནས་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུ་འཕར་མ་ཕྱི་ལོ་ ༢༠༢༡  ལོའི་ཟླ་ ༥ ཚེས་ ༢༠ རེས་གཟའ་ཕུར་བུ་སྟེ་གཞུང་འབྲེལ་གྲོས་ཆོད་ཁོ་ན་མ་གཏོགས་འདོན་མི་ཆོག་པའི་ཉིན་ཚོགས་རྒྱུའི་གསལ་བསྒྲགས་ཤིག་སྤེལ་འདུག་པས་དེ་བས་བརྗོད་མི་ཤེས་པའི་ཡ་མཚན་ཞིག་མ་སྐྱེས་དཀའ་མེད་དུ་གྱུར།  ཁྲིམས་ཞིབ་པ་གསུམ་འཕོ་འགྱུར་གཏོང་རྒྱུའི་མིང་ཐོག་ཏུ་བཏོན་པའི་གྲོས་ཆོད་གྲོས་འཆར་ཤོག་ལྷེ་བདུན་ཅན་དེའི་ནང་ཁ་སྔོན་སྐབས་བཅུ་དྲུག་པའི་བོད་མི་མང་སྤྱི་འཐུས་རྒྱུན་ལས་ཀྱིས་ ༢༠༢༠ ལོའི་ཟླ་ ༩ པའི་ནང་ནད་ཡམས་ཀྱི་རྐྱེན་པས་གྲོས་ཚོགས་ཚོགས་ཐབས་མེད་ཚུལ་ཨུ་ཚུགས་མཐའ་སྐྱེལ་གནང་ཡང་།  ད་ལྟའི་གནས་སྐབས་སུ་གནས་ཡུལ་རྒྱལ་ཁབ་ནང་ནད་ཡམས་ཀྱི་གནས་སྟངས་བརྗོད་ཐབས་བྲལ་བའི་ཛ་དྲག་ཏུ་གྱུར་ཡོད་པ་དང་།  རྒྱལ་སྤྱིའི་འགྲུལ་བཞུད་ཕལ་མོ་ཆེ་བཀག་སྡོམ་ཡོད་པ་ཤེས་བཞིན་དུ་གྲོས་ཚོགས་ཚོགས་འདུ་འཕར་མ་ཚོགས་ཐུབ་པའི་གནས་སྟངས་ཤིག་ཡོང་བཞིན་པ་ནི་དེ་བས་ཡ་མཚན་སྐྱེ་གཞི་ཞིག་མ་ཡིན་ནམ།    དེ་བཞིན་དུ་ ༢༠༢༡ ལོའི་ཟླ་ ༤ ཚེས་ ༣༠ ཉིན་བོད་ཀྱི་བརྙན་འཕྲིན་བརྒྱུད་སྲིད་སྐྱོང་མཆོག་གིས་བཙན་བྱོལ་བོད་མི་ཡོངས་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གསུམ་པོའི་འཕོ་འགྱུར་གྱི་གནད་དོན་སྐོར་གླེང་སློང་མི་གནང་བའི་འབོད་སྐུལ་ཟེར་བ་ཞིག་གནང་འདུག་པས།   བརྗོད་དོན་ལ་ཉན་གྱིན་ཉན་གྱིན་ཉེ་སྔོན་གྲོས་ཚོགས་ནས་ཁྲིམས་དང་སྒྲིག་གཞི་གང་ལ་ཡང་ལྟོས་མེད་ཀྱིས་ཁྲིམས་ཞིབ་པ་གསུམ་དུས་གཅིག་ལ་འཕོ་འགྱུར་བཏང་བར་བསམ་ཡོད་མི་མང་ཡོངས་རྫོགས་བློ་ཕམ་དང་བྱེད་ཕྱོགས་དེའི་རྒྱབ་ལྗོངས་ལ་དོགས་པ་ཆེན་པོས་གླེང་སློང་བྱེད་ཀྱིན་པ་རེད་མོད།  སྲིད་སྐྱོང་གི་བཀའ་མོལ་དེ་ནས་ཁྲིམས་ཞིབ་པ་གསུམ་འཕོ་འགྱུར་བཏང་བ་དེའི་རྒྱབ་ཏུ་མངོན་པར་མི་གསལ་བའི་ལྐོག་གཡོ་ཆེན་པོ་ཞིག་གི་རྒྱབ་གཟུགས་དེ་བས་ཤུགས་ཀྱིས་མངོན་བཞིན་འདུག་ལ།   ཡང་སྙིང་ད་ལྟའི་བཀའ་སྤྱི་ལས་ཐོག་པ་ཚོས་ལྐོག་ཇུས་ཅི་ཞིག་བཤམས་ཀྱི་ཡོད་དམ་སྙམ་པའི་དོགས་པ་ཇེ་ཆེ་རེད་འདུག   མི་མང་གི་རེ་འབོད་ལ་ཁ་བཙུམས་ཟེར་ནས་ཉེན་བརྡ་བཏང་ཡོང་ན་དེ་ནི་ཏག་ཏག་ཅིག་ག་ལ་ཡིན་ཏེ།  མི་མང་འ་ཆད་འུ་ཐུག་པའི་རེ་འབོད་དེ་བཀའ་སྤྱི་གཉིས་ཀྱིས་ཐོས་རྒྱུ་ཙམ་ཞིག་གི་ཆེད་དུ་མིན་པ་དེ་བས་ལོས་ཤེས།   ད་ཆ་རི་ལུགས་པ་ཐག་པས་མ་འདུམ་སའི་གནས་སྟངས་ལ་གྱར་ཡོང་སྐབས་དེའི་ནག་ཉེས་ཡོངས་རྫོགས་མི་མང་གི་མགོ་ལ་གཡོག་བརྩིས་དང་།   གྲོས་ཚོགས་འཕར་མ་ཚོགས་འཆར་དང་དེའི་སྐབས་སུ་ཁྲིམས་ཞིབ་པ་གསུམ་གྱི་མི་འགྲོ་འདེམས་སྒྲུག་ཚོགས་ཆུང་གིས་འདེམས་སྒྲུག་གང་གནང་གི་མི་འགྲོ་དག་ཁྲིམས་ཞིབ་པར་བསྐོར་འཆར་ཡིན་ལུགས་བརྗོད་བཞིན་འདུག    དེ་ལྟའི་འདེམས་སྒྲུག་ཚོགས་ཆུང་གི་ཚོགས་མིའི་མི་འགྲོ་སུ་དག་ཡོད་དམ།  ཚོགས་ཆུང་གི་ལས་དོན་བྱེད་ཕྱོགས་ལ་ཐོག་མ་ཉིད་ནས་རྒྱས་བཅས་གང་ཞིག་གནང་ཡོད་དམ།  དེ་དག་བསྐོ་གཞག་བྱེད་མཁན་གྱི་ངོར་ཏན་ཏན་དགོས་པ་གཞན་ཞིག་ཡོད་སོང་ན་ཡང་།  བཙན་བྱོལ་མི་མང་བསམ་ཡོད་ཀུན་གྱིས་དེར་གཏན་ནས་ངོས་ལེན་ཞུ་ཐབས་བྲལ་ཞིང་།  གོང་གསལ་མི་འགྲོའི་ཁོངས་སུ་གནས་ཡུལ་རྒྱལ་ཁབ་ཀྱི་ཁྲིམས་ཙམ་མ་ཟད་རྒྱལ་སྤྱིའི་ཁྲིམས་ལུགས་ཀྱི་ངོས་ནས་ཀྱང་ནག་ཉེས་བསག་ཟིན་པའི་གང་ཟག་ཅིག་བཙན་བྱོལ་བོད་མིའི་སྒྲིག་འཛུགས་ཀྱི་གལ་གནད་ཆེ་བའི་ཁྲིམས་ཞིབ་པའི་མི་འགྲོ་འདེམས་སྒྲུག་ཚོགས་ཆུང་དུ་བསྐོས་སྒྲིག་བྱས་པ་ནི།   བསམ་བཞིན་དུ་འཛམ་གླིང་མི་མང་གི་མདུན་དུ་བཙན་བྱོལ་བོད་མིའི་སྒྲིག་འཛུགས་དང་།  ༸གོང་ས་༸སྐྱབས་མགོན་ཆེན་པོས་དབུས་པའི་གཞིས་བྱེས་བོད་མི་ཡོངས་རྫོགས་ལ་ཡིད་ཆེས་མེད་པ་དང་།  ནག་ཉེས་བཟོ་ཐབས་ཅིག་མ་ཡིན་ནམ།   དེས་ན་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་མི་རབས་རྒན་པ་ཚོས་དཀའ་བ་དང་དུ་བླངས།  ངལ་བ་ཁྱད་དུ་བསད་ནས་བསྐྲུན་པའི་མི་རིགས་ཤིག་གི་བདེན་དོན་འཐབ་རྩོད་ཀྱི་ནུས་པ་སྤུངས་སའི་སྒྲིག་འཛུགས་དེ་ད་ཆ་གང་ཟག་རེ་ཟུང་གིས་ཤེས་བཞིན་དུ་མིག་གི་མདུན་ནས་གཏོར་བརླགས་འགྲོ་གཞིའི་སྦྱོར་བ་རྩོམ་བཞིན་པ་སེམས་ཀྱིས་མ་བཟོད་པར་སྐུལ་སློང་རྣམ་དག་ཅིག་གིས་ཀུན་ནས་བསླངས་ཏེ་ཁ་ནང་གི་རྨ་དེ་ཁ་ནང་ནས་གསོ་ཆེད་སྦྲུལ་མདུད་སྦྲུལ་གྱིས་བཤིག་སྟེ་སྤྱི་ཚོགས་ལ་འགན་འཁུར་བའི་སྒོ་ནས་རྟ་ལ་བྱམས་པ་དང་སྒ་ལ་བཟོ་བའི་སླད་དུ་འགན་ཁྲི་ཡོད་པ་དག་གིས་ ༢༠༢༡ ལོའི་ཟླ་ ༣ ཚེས་ ༢༥ ཉིན་ཁྲིམས་ཞིབ་པ་གསུམ་འཕོ་འགྱུར་བཏང་བའི་གྲོས་ཆོད་དེ་ཉིད་ཕྱིར་འཐེན་གྱིས་ཁྲིམས་ཞིབ་པ་རྣམ་པ་གསུམ་གྱི་ལས་གནས་བསྐྱར་གསོ་དང་།   དེ་འབྲེལ་བཅའ་ཁྲིམས་བསྐྱར་བཅོས་ཇི་བྱས་དག་སྔར་སོར་ཆུད་པའི་ཐབས་ལམ་བསྟེན་རྒྱུ་ནི་གནད་ཀྱི་དམ་པ་ཡིན།

མཆན། གོང་བཀོད་བསམ་ཚུལ་རྩོམ་ཡིག་དེ་ནི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།