རྒྱ་ནག་དམར་ཤོག་ཚོགས་པ་དབུ་བརྙེས་ཏེ་ལོ་ངོ་བདུན་ཅུ་འཁོར་བ་དང་བསྟུན། བོད་ཀྱི་གྲོང་གསེབ་ཁག་ཏུ་རྒྱའི་མགོ་ཁྲིད་ཀྱི་པར་སྒྲིག་བཤོམ་དང་དར་ཆ་སྒྲེང་འཛུགས་ལ་ངོ་རྒོལ་གནང་མཁན་བོད་ཀྱི་ཆབ་སྲིད་བཙོན་ཟུར་ནོར་བཟང་ལགས་རྒྱའི་མནར་གཅོད་འོག་ནས་འདས་གྲོངས་སུ་ཕྱིན་ཡོད་འདུག
འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༡༩ ཟླ་ ༩ ནང་དོན་མེད་འཛིན་བཟུང་བཙན་འཁྲིད་བྱས་ཤིང་། ཁམས་ཤག་རོང་པོ་གེ་སོ་སྲ་བྷ་གྲོང་གི་བོད་མི་ནོར་བཟང་ལགས་སུ་རྒྱ་ནག་གཞུང་གིས་རྡུང་རྡེག་མནར་གཅོད་བཏང་རྐྱེན་འོག་འདས་གྲོངས་སུ་ཕྱིན་ཡོད་པ་དང་། དེང་སྐབས་རྒྱ་ནག་གིས་བོད་ནང་ཕྱོགས་ཡོངས་ནས་དམ་དྲགས་ཤུགས་ཆེན་བྱེད་བཞིན་ཡོད་སྟབས། ཆབ་སྲིད་བཙོན་ཟུར་ནོར་བཟང་ལགས་འདས་གྲོངས་སུ་གནས་ཚུལ་ད་ལྟའི་བར་ཕྱིར་འབྱོར་ཐུབ་མེད་པ་རེད།
འདི་གའི་གསར་འགོད་པས་ཆབ་སྲིད་བཙོན་ཟུར་ནོར་བཟང་ལགས་ག་དུས་འདས་གྲོངས་སུ་ཕྱིན་པ་དང་རྒྱ་ནག་གི་བཙོན་ཁང་དང་ཡང་ན་ཀློད་གྲོལ་བཏང་རྗེས་འདས་གྲོངས་སུ་ཕྱིན་པ་ཡིན་མིན་སྐད་ཆ་དྲིས་པར་འབྲེལ་ཡོད་གནས་ཚུལ་མཁོ་སྤྲོད་པས། ནོར་བཟང་ལགས་རྒྱའི་བཙོན་ཁང་དང་ཡང་ན་ཀློད་གྲོལ་བཏང་རྗེས་འདས་གྲོངས་སུ་ཕྱིན་པ་ཡིན་མིན་གནས་ཚུལ་ཁ་གསལ་ཧ་གོ་ཡི་མི་འདུག རྒྱུ་མཚན་ནི་དེང་སང་བོད་ནང་གསར་འགྱུར་བརྒྱུད་ལམ་དང་དྲ་རྒྱར་དམ་བསྒྲགས་ཤུགས་ཆེན་བྱས་ཡོད་སྟབས་འབྲེལ་བ་བྱེད་ས་རག་གི་མི་འདུག ང་ལ་ནོར་བཟང་ལགས་འདས་གྲོངས་སུ་ཕྱིན་པའི་གནས་ཚུལ་ཐད་འབྲེལབ་བྱེད་ས་གཅིག་རག་པ་རེད། ཁོང་གིས་ཀྱང་ནོར་བཟང་ལགས་འདས་གྲོངས་སུ་འགྲོ་ཡུལ་ཏན་ཏན་ཞིག་གསལ་ཁ་བཟོ་ཐུབ་ཀྱི་མི་འདུག ཅེས་བརྗོད་བྱུང་།
བོད་མི་ནོར་བཟང་ལགས་འཛིན་བཟུང་བྱེད་དོན་ནི། ཕྱི་ལོ་ ༢༠༡༩ ལོར་རྒྱ་ནག་དམར་ཤོག་ཚོགས་པ་དབུ་བརྙེས་ཏེ་ལོ་ངོ་ ༧༠ འཁོར་བའི་དུས་དྲན་སྲུང་གཙི་དང་ཏང་ལ་བསྟོད་གླུ་མ་བླངས་པས་ཡིན་པ་དང་། ལོ་དེར་ནོར་བཟང་ལགས་དང་ལྷན་དུ། རྒྱ་ནག་གིས་རྟར་ཆེན་གྲོང་བརྡལ་ཤག་རོང་པོ་དགོན་གྱི་ཡུལ་སྡེ་གེ་སོའི་ཚ་ལྷིས་དང་སྲ་བྷ་གྲོང་ནས་ཡིན་པའི་བོད་མི་ ༦ འཛིན་བཟུང་བཙན་འཁྲིད་བྱས་ཡོད་ཅིང་། བོད་མི་དེ་དག་གིས་རྒྱ་ནག་གི་རྒྱལ་དར་འཕྱར་ཏེ་དམར་ཤོག་ཚོགས་པར་བསྟོད་གླུ་ལེན་དགོས་སྐོར་བཙན་སྐུལ་བྱས་པ་དྭང་ལེན་མ་བྱས་པ་སོགས་ཀྱིས་འཛིན་བཟུང་བྱས་ཡོད་པ་དང་། འཛིན་བཟུང་རྗེས་ནང་མི་སོགས་མི་སུ་གང་ལའང་ཐུག་འཕྲད་བྱེད་དུ་བཅུག་མེད་པ་རེད་ལ། ནང་མི་ཚོས་ཟ་མ་དང་ཉལ་ཆས་སོགས་སྐྱེལ་ཆོག་པའི་རེ་བ་ཞུས་ཡོད་ཀྱང་སྤྲོད་དུ་བཅུག་མེད་པ་མ་ཟད། དེ་ལྟར་བྱས་ཚེ་ཉིན་གྲངས་མང་པོའི་རིང་བཀག་ཉར་བྱ་རྒྱུ་ཡིན་པའི་འཇིགས་སྐུལ་སོགས་བཏང་ཡོད་པ་རེད།
དམིགས་བསལ་ནོར་བཟང་ལགས་འཛིན་བཟུང་བྱེད་སྐབས་རང་ལོ་ ༣༥ ཡིན་པ་དང་ཁྱིམ་དུ་ཁོང་དང་བཟའ་ཟླ་གཉིས་ལ་མངལ་ཆགས་བྱིས་པ་གཅིག་བཅས་ཁྱོན་བྱིས་པ་བདུན་ཡོད་པ་དང་། སྐབས་དེར་རྒྱ་ནག་དམར་ཤོག་ཚོགས་པ་བཙུགས་ནས་ལོ་ངོ་ ༧༠ འཁོར་བའི་དུས་སྟོན་དང་བསྟུན། རྟར་ཆེན་ཡུལ་ཚོའི་སྲིད་གཞུང་གི་ལས་བྱེད་མི་སྣ་འགའ་ཞིག་སྐོར་སྐྱོད་ལ་ཡོང་སྐབས་ནོར་བཟང་ལགས་ཀྱི་རྣམ་འགྱུར་ཡག་པོ་མེད་པར་བསྙད་ནས་གྲོང་བརྡལ་དུ་འབོད་འགུག་བྱས་ཏེ་འཛིན་བཟུང་བྱས་ཡོད་པ་དང་། ནོར་བཟང་ལགས་དང་ལྷན་དུ་འཛིན་བཟུང་བྱས་པའི་བོད་མི་དེ་དག་ནི་སྨན་པ་ཚེ་རྒྱལ་དང་བདུད་འདུལ་ལྷ་རྒྱལ། དབྱངས་འཕེལ། སྲིད་ཐར་དབང་རྒྱལ། ཤེས་དབང་རྣམ་རྒྱས་བཅས་ཡིན་པ་རེད།
གནས་ཚུལ་མཁོ་སྤྲོད་པ་ལྟར་ན། ནོར་བཟང་ལགས་ནི་རྒྱ་ནག་གི་དྲག་གནོན་སྲིད་ཇུས་ལ་མཐའ་གཅིག་ཏུ་ངོ་རྒོལ་གནང་མཁན་ཞིག་ཡིན་པ་མ་ཟད། ནམ་རྒྱུན་གྲོང་ཚོའི་ནང་མངོན་སུམ་འཛེམ་མེད་ཀྱིས་༧གོང་ས་མཆོག་ལ་འགྱུར་མེད་དད་སེམས་སྟོན་ཕོད་པ་དང་བོད་མི་རིགས་ཀྱི་ལ་རྒྱ་གླེང་ཐུབ་མཁན་ཞིག་ཡིན་པར་བརྟེན། རྒྱ་ནག་གིས་ནམ་རྒྱུན་བོད་ཀྱི་གྲོང་ཚོ་ཁག་ཏུ་དམར་ཤོག་ཚོགས་པའི་མགོ་ཁྲིད་ཚོའི་པར་སྒྲིག་བཤོམ་དང་རྒྱའི་དར་ཆ་སྒྲེངས་འཛུགས་བྱེད་པར་ངོ་རྒོལ་གནང་གི་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
