རྒྱ་ནག་གཞུང་གིས་ལྷ་སའི་སྐྱིད་ཆུའི་ངོགས་སུ་རྒྱ་ནག་རང་གི་ཁྱད་ཆོས་ལྡན་པའི་ཀྲུང་ཧཱ་སྤྱི་གླིང་ཞེས་པ་ཞིག་འཛུགས་སྐྲུན་གྱིས་མི་འགྱང་བར་སྤྱི་གླིང་ལེགས་གྲུབ་འབྱུང་གི་ཡོད་སྐོར་བསྒྲགས་འདུག
རྒྱ་ནག་གཞུང་ནས་བསྒྲགས་པའི་གནས་ཚུལ་ལྟར་ན། རྒྱ་ནག་གཞུང་གིས་ལྷ་སའི་སྐྱིད་ཆུའི་འགྲམ་རྒྱུད་དུ་ཆགས་པའི་སྣེའུ་ཁུལ་དུ་རྒྱ་སྒོར་དུང་ཕྱུར་ ༥ ལྷག་བཏང་སྟེ། ཀྲུང་ཧཱ་རིག་གནས་སྤྱི་གླིང་ཞེས་པ་ཞིག་གསར་འཛུགས་ཀྱིས། ཕྱི་ཟླ་ ༦ པའི་ཟླ་མཇུག་ཏུ་སྤྱི་གླིང་ཡོངས་སུ་ལེགས་འགྲུབ་འབྱུང་གི་ཡོད་སྐོར་བསྒྲགས་འདུག
དེ་འབྲེལ་གནས་ཚུལ་ལྟར་ན། སྤྱི་གླིང་གསར་པ་དེ་ནི་ལྷ་སའི་སྐྱིད་ཆུའི་ངོགས་གཉིས་སུ་བཟོས་ཡོད་ཅིང་། དེའི་རིང་ཚད་ལ་སྨི་ ༡༠༩༣ ཡོད་པ་དང་སྨི་ ༢༥༠ ཡི་མཚམས་སུ་སྤྱི་བའི་གསང་སྤྱོད་རེ་བཅས་ཁྱོན་གསང་སྤྱོད་ ༡༦ དང་རླངས་འཁོར་འཇོག་ས་ ༦ དང་། གཞན་ཡང་ད་དུང་ཚོང་ཁང་དང་ཞབས་ཞུའི་སྡེ་ཁག་སོགས་སྒྲིག་བཀོད་མང་པོ་གོ་སྒྲིག་བྱས་ཡོད་པ་རེད་ལ་། སྤྱི་གླིང་དེ་ནི་ཡུལ་སྐོར་བ་གཙོས་པའི་མི་དམངས་ལ་ཆུ་སྟེང་ནས་མཛེས་ལྗོངས་རོལ་མྱོང་དང་། སྤྲོ་གསེང་རོལ་རྩེད་སོགས་བྱེད་ས་ཤིག་ཡིན་སྐོར་བརྗོད་ཡོད་པ་རེད།
སྤྱིར་ཀྲུང་ཧཱ་རིག་གནས་སྤྱི་གླིང་ཞེས་པའི་ལས་གཞི་དེ་ག་དུས་ཤིག་ནས་མགོ་བརྩམས་ཡོད་མེད་སོགས་ཀྱི་གནས་ཚུལ་གསལ་པོར་བཀོད་མེད་ནའང་། ད་ལྟའི་ཆར་སྤྱི་གླིང་ནང་ལྗོན་ཤིང་དང་རྩི་ཤིང་འདེབས་འཛུགས་བྱེད་པ་སོགས་སྐྱེད་ཚལ་གྱི་ལས་རིགས་ཡོངས་གྲུབ་ཡོད་ཅིང་། སྤྱི་གླིང་འཛུགས་སྐྲུན་གྱི་ལས་གཞི་གཉིས་པ་ནི་བརྐོས་བརྙན་རིག་གནས་ཇུས་འགོད་བྱ་རྒྱུ་ཡིན་པའི་ཁྲོད། བཟོ་བསྐྲུན་ཟིན་པའི་བརྐོས་བརྙན་ཡོངས་སྤྱི་གླིང་དུ་དབོར་འདྲེན་ཟིན་ཡོད་ཅིང་ད་ལྟ་བཟོ་འགོད་བྱ་རྒྱུ་ལས་ཙམ་ལས་ལྷག་མེད་པ་དང་། སྤྱི་གླིང་འཛུགས་སྐྲུན་གྱི་ལས་གཞི་དེ་ཀྲུང་གོ་གྲོང་ཁྱེར་འཛུགས་སྐྲུན་ཞིབ་འཇུག་ཁང་ཚད་ཡོད་ཀུང་སི་ཟེར་བས་ཇུས་འགོད་བྱས་ནས་བསྐྲུན་འགན་འཁུར་ཏེ། ད་ལྟ་ལྷ་ས་གྲོང་ཁྱེར་ཀྲུང་ཧྭ་རིག་གནས་སྤྱི་གླིང་གི་ལས་གྲྭའི་སྤྱི་འབོར་གྱི་བརྒྱ་ཆ་ ༧༣ ལེགས་གྲུབ་ཟིན་ཡོད་སྐོར་བརྗོད་འདུག
སྤྱིར་བོད་ཀྱི་རྒྱལ་ས་ལྷ་ས་ནི་བོད་མི་ས་ཡ་དྲུག་གི་དད་པ་དམ་ཚིགས་དང་གནས་སྐོར་མཆོད་མཇལ་སོགས་བྱེད་སའི་ཞིང་ཁམས་ཀྱི་མཆོག་ཏུ་བརྩི་ཡི་ཡོད་མོད། བོད་ས་ཧྲིལ་པོར་རྒྱ་ནག་གིས་བཙན་འཛུལ་བྱས་པ་ནས་བཟུང་རྒྱ་ནག་གིས་བོད་ས་རྒྱ་ས་དང་བོད་མི་རྒྱ་རིགས་ཅན་བསྒྱུར་རྒྱུའི་སྲིད་ཇུས་ངན་པའི་ཐབས་བྱུས་འོག དམིགས་བསལ་བོད་ཀྱི་རྒྱལ་ས་ལྷ་སར་ཆང་ཁང་དང་ནག་མ་ཁང་། གཞང་ཁང་སོགས་ཁྲིམས་མེད་ལུགས་མེད་ངང་འཛིན་བཅུག་སྟེ། གང་ཐུབ་ཅི་ཐུབ་ཀྱིས་མ་ཎི་ཡིག་དྲུག་ཁ་འདོན་དུ་གྱུར་བའི་བོད་མི་རྣམས་ཀྱི་སེམས་ཁམས་བསྒྱུར་ཐབས་བྱེད་མུས་ཡིན་པ་ལྟར། ད་རེས་ལྷ་སའི་སྐྱིད་ཆུའི་ངོགས་སུ་ཀྲུང་ཧཱ་རིག་གནས་སྤྱི་གླིང་ཞེས་བོད་མིང་མ་བཏགས་པར་རྒྱ་ནག་རང་གི་དམར་ཤོག་གི་ལྟ་གྲུབ་མཚོན་པའི་བརྐོས་བརྙན་དང་འཛུགས་སྐྲུན་ལྡན་པའི་སྤྱི་གླིང་ཞིག་གསར་འཛུགས་བྱས་ཡོད་པ་གསལ་པོ་རྟོགས་ཐུབ་ཀྱི་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
