ཨབ་གྷན་ནང་དྲག་སྤྱོད་དོན་རྐྱེན་བྱུང་འཇུག་མཁན་ཨ་རི་ཡིན་པའི་སྐྱོན་འཛུགས་བྱས།

ཉེ་སྔོན་ཨབ་གྷན་ནང་འབར་རྫས་འགས་འཐོར་གྱི་དྲག་སྤྱོད་དོན་རྐྱེན་བྱུང་བའི་འཛམ་གླིང་རྒྱལ་ཁབ་མང་པོས་གདུང་སེམས་མཉམ་སྐྱེད་ཞུ་ཡི་ཡོད་ནའང་རྒྱ་ནག་གིས་དོན་རྐྱེན་དེ་ཨ་རིའི་བྱ་སྤྱོད་ལ་བརྟེན་ནས་བྱུང་བ་ཡིན་པའི་སྐྱོན་འཛུགས་བྱས་འདུག

སི་ཨན་ཨན་གསར་ཁང་གིས་གནས་ཚུལ་སྤེལ་བ་ལྟར་ན།  ཉེ་ལམ་ཨབ་གྷ་ནི་སི་ཐན་གྱི་རྒྱལ་ས་ཀ་བྷོལ་ཁུལ་གྱི་བུད་མེད་ཀྱི་སློབ་གྲྭའི་(Sayed Al-Shuhada school) སྒོ་འགྲམ་དུ་རླངས་འཁོར་འགས་གཏོར་དང་འབར་རྫས་འགས་གཏོར་གྱི་དོན་རྐྱེན་བྱུང་སྟེ། དེ་རིང་བར་སློབ་གྲྭ་དེའི་བུ་མོ་ ༨༥ རྐྱེན་འདས་དང་། མི་གྲངས་ ༡༤༧ ལ་རྨས་སྐྱོན་བཟོས་ཡོད་འདུག་ལ། ད་སྔ་བར་དྲག་རྒོལ་དོན་རྐྱེན་དེའི་རྒྱབ་ཀྱི་ཉེས་ཅན་པ་སུ་ཡིན་སོགས་ཀྱི་གནས་ཚུལ་ཁ་གསལ་ཆགས་ཀྱི་མེད་པ་རེད།

འབར་རྫས་འགས་གཏོར་གྱི་དྲག་རྒོལ་དོན་རྐྱེན་བ་དང་གཞུང་གིས་རྒྱལ་སའི་ཁུལ་དུ་ཛ་དྲག་གི་སྐོར་སྲུང་ཉེན་རྟོག་པ་འབོར་ཆེན་འགྲེམས་འཇོག་གིས་ལྟ་སྲུང་ནན་པོ་བྱེད་ཀྱི་ཡོད་ཅིང་། ཨབ་གྷན་གྱི་སྲིད་འཛིན་ (Ashraf Ghani) ལགས་ཀྱིས། ད་ལན་གྱི་འབར་གས་དོན་རྐྱེན་དེ་ཊ་ལེ་བྷན་གྱི་དྲག་སྤྱོད་ཚོགས་པས་སྤེལ་ཡོད་པའི་སྐྱོན་འཛུགས་བྱས་ཀྱང་། ཊ་ལེ་བྷན་གྱི་མགྲིན་ཚབ་པས་ངོས་ལེན་བྱས་མེད་པ་རེད། ཡང་དྲག་སྤྱོད་དོན་རྐྱེན་ཐད་འགྲོ་མིའི་རོགས་སྐྱོར་གནང་མཁན་ (Mohammed Reza Ali) ལགས་ཀྱིས། ངས་མཚན་མོའི་སྐབས་སུ་དུར་ཁྲོད་དུ་སློབ་ཕྲུག་བུ་དང་བུ་མོ་རྣམས་ཀྱི་ཕུང་པོ་འཁྱེར་བ་དང་འབར་གས་འདིའི་ནང་རྨས་སྐྱོན་བྱུང་བ་རྣམས་ཀྱི་ཆེད་དུ་སྨོན་ལམ་འདེབས་ཀྱི་ཡོད། ཅེས་བརྗོད་ཡོད་འདུག

ཨབ་གྷན་གྱི་བུ་མོའི་སློབ་གྲྭར་དྲག་རྒོལ་བྱུང་བའི་དོན་རྐྱེན་ཐད་ཡེ་ཤུ་ཆོས་དཔོན་ཕོག་མཆོག་གཙོས་པའི་ཨ་རི་དང་མཉམ་འབྲེལ་རྒྱལ་ཚོགས། རྒྱ་གར་སོགས་ཀྱིས་སྐྱོན་བརྗོད་བྱས་ཡོད་ཀྱང་། རྒྱ་ནག་གཞུང་གིས་ཨ་རིར་སྐྱོན་བརྗོད་དང་སྦྲགས་ད་ལན་དྲག་རྒོལ་དོན་རྐྱེན་དེ་ནི་ཨ་རིས་ཨབ་གྷན་ནང་ཡོད་པའི་རང་གི་དམག་མི་ཕྱིར་འཐེན་བྱས་སྟབས་དོན་རྐྱེན་ལྷག་པ་ཡིན་པའི་ཉེས་འཛུགས་བྱས་ཡོད་པ་རེད།

ཨབ་གྷན་གྱི་གཞུང་འབྲེལ་གནས་ཚུལ་ལྟར་ན།  རྐྱེན་འདས་སུ་ཕྱིན་པའི་སློབ་ཕྲུག་ཕལ་མོ་ཆེ་བུ་མོ་ཡིན་པ་དང་ཟླ་འདིའི་ཕྱི་ཚེས་ ༡༠ ཉིན་སློབ་ཕྲུག་གི་ཆེད་དུ་མི་མང་པོས་སྨན་ཁང་འཚོལ་བཞིན་ཡོད། འབར་གས་དེ་དག་ལ་གཏོར་ཤུགས་ཆེན་པོ་ཡོད་པ་དང་། སློབ་ཕྲུག་གི་ཉེ་འགྲམ་རང་ནས་འབར་གས་བྱུང་བར་བརྟེན། ད་ལྟ་ད་དུང་ཡང་སློབ་ཕྲུག་ཁ་ཤས་རྙེད་མི་ཐུབ་པར་ལྷག་ཡོད་པ་རེད།

འདས་ལོའི་ཕྱི་ཟླ་ ༡༡ ཚེས་ ༢ ཉིན་ཉེན་རྟོག་པའི་ཆས་གོས་གྱོན་པའི་མི་ཁག་ཅིག་གིས། ཁཱ་བྷོལ་མཐོ་རིམ་སློབ་གཉེར་ཁང་གི་སྒོ་ཆེན་འགྲམ་དུ་གློ་བུར་དུ་འབར་རྫས་གཡུགས་སྐབས། སློབ་ཕྲུག་བརྒྱ་ཕྲག་བརྒལ་བ་ཉེན་ཁ་ལས་ཐར་ཐུབ་ཡོད་ཀྱང་། དགེ་སློབ་མང་པོ་ཞིག་འཛིན་ཁང་ནང་བཙན་བཀག་བྱས་ཏེ། དགེ་སློབ་ ༡༩ ལྷག་རྐྱེན་འདས་དང་ ༢༢ ལ་རྨས་སྐྱོན་བཟོས་ཡོད་འདུག  དེ་བཞིན་ཁ་ཆེའི་དྲག་སྤྱོད་ཚོགས་པ་ (ISIS) ཟེར་བ་དེས། ཁཱ་བྷོལ་མཐོ་སློབ་ཏུ་དྲག་རྒོལ་བྱེད་དགོས་པའི་དམིགས་ཡུལ་གཙོ་བོ་ནི་ཨབ་གྷ་ནི་སི་ཐན་གྱི་སྲིད་གཞུང་ལ་ཁ་གཏད་གཅོག་མཁན་ཁྲིམས་དཔོན་དང་ཉམས་ཞིབ་པ་ཚོར་དམིགས་པ་ཡིན་པའི་འགྲེལ་བརྗོད་བྱས་ཡོད་པ་རེད།

གསར་འགོད་པ། བསྟན་འཛིན་ཕུར་བུ།