བོད་རང་སྐྱོང་ལྗོངས་ཟེར་བའི་ལྷ་ས་གྲོང་ཁྱེར་གྱི་བོད་མི་ཚོས་ཕྱི་ལོགས་སུ་ཡོད་པའི་སྤུན་མཆེད་སོགས་ལ་འབྲེལ་བ་བྱས་ན་ཉེས་ཆད་ལྗིད་པོ་གཅོད་རྒྱུ་ཡིན་པའི་བཀའ་རྒྱ་གཏོང་གི་འདུག
འདི་གའི་གསར་འགོད་པར་བོད་ནས་གནས་ཚུལ་མཁོ་སྤྲོད་གནང་བ་ལྟར་ན། ལྷ་ས་ཁྱེར་ཉེན་རྟོག་ཁང་གི་མི་སྣས་ལྷ་སའི་ཁྲོམ་རྩེའི་ཁང་དང་ཇོ་ཁང་ཉེ་འཁྲིས་སུ་ཡོད་པའི་བོད་པའི་དུད་ཁྱིམ་ཁག་གི་མི་མང་བསྡུ་རུབ་བྱས་ཏེ། ད་ནས་བཟུང་ཕྱི་ཕྱོགས་སུ་ཡོད་པའི་སྤུན་མཆེད་དང་ཚོང་ཤག་ག་རེ་ཡིན་ནའང་འབྲེལ་བ་བྱེད་མི་ཆོག་པ་དང་། འབྲེལ་བ་བྱེད་མཁན་ཡོད་ན་རྒྱལ་ཁབ་ཀྱི་རོགས་སྐྱོར་མཚམས་འཇོག་བྱ་རྒྱུ་དང་། ཁྲིམས་ཆད་ནན་པོ་གཅོད་རྒྱུ་ཡིན་པའི་ཁས་ལེན་ཡི་གེར་མིང་རྟགས་བཙན་གྱིས་འགོད་དུ་འཇུག་གི་ཡོད་འདུག
འདི་གའི་གནས་ཚུལ་མཁོ་སྤྲོད་པ་ཞིག་གིས། ལས་འགུལ་དེ་ནི་རྒྱ་ནག་གཞུང་གིས་བཀོད་ཁྱབ་ཞིག་མ་ཡིན་པར་ས་གནས་རང་གི་མགོ་འཁྲིད་ཚོས་གཏན་འབེབ་བྱས་པའི་སྒྲིག་གཞི་ཞིག་ཡིན་སྐོར་བརྗོད་བྱུང་།
གནས་ཚུལ་དེའི་སྐོར་ལ་འདི་གའི་གསར་འགོད་པར་རྒྱ་གར་ལྷོ་ཕྱོགས་སུ་ཡོད་པའི་ཕ་ཡུལ་ལྷ་ས་ནས་ཡིན་པའི་མི་ཞིག་ལ་སྐད་ཆ་དྲིས་པར་ཁོང་གིས། བཀའ་རྒྱ་དེ་འདྲ་ལག་བསྟར་བྱེད་ཀྱི་ཡོད་ས་རེད། ངས་ནམ་རྒྱུན་ལྷ་སར་གྲོགས་པོ་ཞིག་ལ་སྐད་ཆ་བཤད་གི་ཡོད། དེ་རིང་གཟུགས་མཐོང་བཏང་ནས་བདེ་མོ་ཡིན་པས་ལབ་སྐབས། ཁོང་གིས་བདེ་བོ་ཡིན་གནས་སྐབས་བདེ་བོ་ཟེར་ནས་ཁ་པར་ཁ་བཀག་བྱུང་། ངས་ག་རེ་ཡིན་ན་བསམ་ནས་ཡང་བསྐྱར་སྐད་ཆ་ཞིག་བཤད་ཡིན་ཏེ་ཁོས་ང་ནག་ཁུང་ནང་ལ་བཞག་འདུག་ཅེས་བརྗོད་བྱུང་ལ། དེ་མིན་གྱི་ལྷ་སའི་ས གནས་དེ་ཁུལ་ནས་ཡིན་པའི་མི་ཁ་ཤས་ཞིག་ནས་བོད་ནང་འབྲེལ་བ་བྱེད་དུས་ནག་ཁུང་ནང་བཅུག་ཡོད་སྐོར་བརྗོད་བྱུང་།
འདི་གའི་གསར་འགོད་པས་བོད་ནང་གི་གསར་འགྱུར་ལས་དོན་གཉེར་མཁན་ཞིག་ལ་དེའི་སྐོར་དྲིས་པར་ཁོང་གིས། ས་གནས་ཀྱི་བདེ་འཇགས་ཆེད་དུ་དེ་འདྲ་ལས་གཞི་ཞིག་ལག་ལྟར་བྱེད་བཞིན་ཡོད་སྐོར་བརྗོད་བྱུང་།
སྤྱིར་བཏང་རྒྱ་ནག་གཞུང་གིས་འདས་པའི་ལོ་མང་ནས་ཕྱི་ཕྱོགས་ཀྱི་བོད་མིར་འབྲེལ་འདྲིས་མི་ཆོག་པ་དང་། ཐ་ན་ནང་མི་སྤུན་མཆེད་ལའང་འབྲེལ་བ་བྱེད་མི་ཆོག་པའི་བཀའ་བསྒྲགས་ཏེ་དམ་དྲག་ཆེན་པོ་བྱེད་བཞིན་ཡོད་པ་རེད།
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
