ད་ལོ་ནས་དབྱར་རྩྭ་དགུན་འབུའི་ཐོན་ཁུངས་ཡག་པོ་ཚང་མ་རྒྱ་ནག་གཞུང་གིས་བདག་བཟུང་བྱས་ཏེ་ས་གནས་བོད་མིས་དབྱར་རྩྭ་བརྐོ་རྒྱུར་དམ་དྲག་དང་འབུ་ཁྲལ་འཇལ་བའི་སྲིད་ཇུས་ལག་བསྟར་ནན་པོ་བྱེད་བཞིན་འདུག
དེ་ཡང་མིང་བརྗོད་འདོད་མེད་པའི་བོད་ནང་གི་འབྲེལ་ཡོད་མི་སྣ་ཞིག་གིས་འདི་གའི་གསར་འགོད་པར་གནས་ཚུལ་མཁོ་སྤྲོད་གནང་བ་ལྟར་ན། ན་ནིང་ལོ་ནས་རྒྱ་ནག་གཞུང་གིས་མཚོ་སྔོན་དང་སྒ་སྐྱེ་དགུ་མདོ་ཁུལ་དུ་ས་གནས་གཞན་ནས་དབྱར་རྩྭ་དགུན་འབུ་བརྐོ་བར་ཡོང་མཁན་ལ་འབུ་ཁྲལ་འཇལ་དགོས་པ་བཟོས་ཡོད་པ་ལྟར། དེ་སྔོན་དབྱར་རྩྭའི་ཐོན་ཁུངས་བཟང་བའི་ས་གནས་བོད་མི་ཚོས་ཕྱི་ཟླ་བཞི་པ་ནས་དྲུག་པ་བར་ཟླ་བ་གསུམ་རིང་། ཕྱི་ནས་དབྱར་རྩྭ་བརྐོ་བར་ཡོང་མཁན་བོད་རིགས་དང་རྒྱ་རིགས་ནས་ཡོང་འབབ་ཆེན་པོ་གསོག་གི་ཡོད་ཀྱང་། ད་ལོོ་ནས་བཟུང་དབྱར་རྩྭའི་ཐོན་ཁུངས་བཟང་བའི་ས་ཆ་ཚང་མ་རྒྱ་ནག་གཞུང་གིས་བདག་བཟུང་བྱས་ཏེ། ས་གནས་མི་མང་ལ་ཡོང་འབབ་གསོག་པའི་ལམ་ག མེད་པར་བཟོས་ཡོད་འདུག
འདི་གར་གནས་ཚུལ་འབྱོར་བ་ལྟར་ན། ད་ལོར་དབྱར་རྩྭའི་ཐོན་ཁུངས་བཟང་བའི་ས་ཆ་ཚང་མར་རྒྱ་གཞུང་གི་ཉེན་རྟོག་པས་སྒར་བརྒྱབ་སྟེ་ཆོག་མཆན་མེད་པར་དབྱར་རྩྭ་བརྐོ་མི་ཆོག་པ་དང་། དབྱར་རྩྭ་བརྐོ་མཁན་ཚོས་ཞོགས་པ་རྟག་པར་ཉེན་རྟོག་པར་ཐོ་འགོད་བྱེད་དགོས་པ་དང་། ཕྱི་དྲོར་དབྱར་རྩྭ་དགུན་འབུ་གྲངས་ག་ཚོད་རག་ཡོད་མེད་ཐོ་འགོད་བྱེད་དུ་བཅུག་སྟེ། འབུ་ཁྲལ་འཇལ་བའི་ལས་དོན་ཉིན་རེ་བཞིན་སྒྲུབ་དགོས་ཀྱི་ཡོད་པ་མ་ཟད། ས་གནས་སོ་སོའི་འབུ་བརྐོ་བའི་མིང་གཞུང་ཚང་མར་སྤྲད་དེ། ཆོག་མཆན་མེད་པའི་མི་གསར་པ་བསླེབས་ཡོད་མེད་ལྟ་རྟོག་བྱེད་དུ་འཇུག་གི་ཡོད་འདུག
དེང་སང་བོད་ནང་ཡོང་སྒོ་ཡག་ཤོས་དེ་དབྱར་རྩྭ་ཡིན་ལ། ལོ་རེའི་ཕྱི་ཟླ་བཞི་པ་ནས་མགོ་འཛུགས་བྱས་ནས་ཕྱི་ཟླ་དྲུག་པ་བར་དུ། དབྱར་རྩྭ་དགུན་འབུ་བརྐོ་མཁན་བོད་རིགས་འབྲོག་པ་དང་ཞིང་པ། གྲོང་འཁྱེར་གྱི་མི། ད་དུང་རྒྱ་རིགས་བཅས་ལོ་རེ་བཞིན་མང་དུ་འགྲོ་བཞིན་ཡོད་འདུག་ལ། བོད་རིགས་ཚོ་ལྟར་རྒྱ་མིར་དམ་དྲག་བྱེད་ཀྱི་མེད་སྟབས། དབྱར་རྩྭ་དགུན་འབུའི་ས་ཆ་ཉོོ་མཁན་མང་ཆེ་བ་རྒྱ་རིགས་ཚོང་པ་ཡིན་འདུག
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
