ཉེ་སྔོན་གྱི་བོད་ནང་གི་ས་ཡོམ་གོད་ཆག་ཁྲོད་མི་ ༢༠ ལྷག་རྐྱེན་འདས་དང་ཚད་རིམ་མི་འདྲ་བའི་རྨས་སྐྱོན་ཕོག་མཁན་ ༣༠༠ ལྷག་བྱུང་ཡོད་སྐོར་བརྗོད་བྱུང་།
ཉིན་ཤས་གོང་དུ་བོད་མཚོ་སྔོན་ཞིང་ཆེན་དང་ཡུན་ནན་ཞིང་ཆེན་གྱི་ཁོངས་གཏོགས་ས་གནས་མང་པོར་ས་ཡོམ་བྱུང་ཡོད་པ་དང་། རྒྱ་ནག་གཞུང་ཕྱོགས་ཀྱི་གསར་འགྱུར་བརྒྱུད་ལམ་ཁག་ནས་ས་ཡོམ་ཁྲོད་རྨ་སྟོད་ནས་མི་ ༡༨ ལ་རྨས་སྐྱོན་བྱུང་ཡོད་པ་ལས་ཚེ་སྲོག་ཤོར་བའི་གནས་ཚུལ་བྱུང་མེད་སྐོར་བསྒྲགས་ཡོད་ཀྱང་། དེ་རིང་འདི་གར་བོད་ནས་འབྲེལ་ཡོད་ཅིག་གིས་གནས་ཚུལ་མཁོ་སྤྲོད་གནང་བ་ལྟར་ན། བོད་མགོ་ལོག་རྨ་སྟོད་རྫོང་ཁོངས་ནས་མི་ ༢༠ ལྷག་འདས་གྲོངས་དང་། ཚད་རིམ་མི་འདྲ་བའི་རྨས་སྐྱོན་བྱུང་བ་ ༣༠༠ ལྷག་དང་། མི་ ༡༣ ལྷག་གར་སོང་ཆ་མེད་དུ་གྱུར་ཡོད་སྟབས། ས་གནས་སུ་སྨན་པ་དང་དམག་མི་ཧ་ཅང་མང་པོ་ཞིག་འབྱོར་ཡོད་སྐོར་དང་། ཐེངས་འདིའི་ས་ཡོམ་ཁྲོད་རྐྱེན་འདས་སུ་ཕྱིན་པའི་འདས་པོ་རྣམས་ཀྱི་ཁྱིམ་མིར་རྒྱ་སྒོར་ཁྲི་ལྔ་རེ་གུན་གསབ་ཏུ་སྤྲོད་ཀྱི་ཡོད་སྐོར་ཡང་བརྗོད་བྱུང་།
ཡང་གནས་ཚུལ་མཁོ་སྤྲོད་པས། ད་ལྟ་ས་གནས་སུ་གནོད་ཐེབས་མི་མང་ལ་སྡོད་གུར་ ༣༠༠༠ གྲ་སྒྲིག་བྱས་ཟིན་ཡོད་པ་དང་། ད་དུང་རས་གུར་མང་པོ་ཡོང་གི་ཡོད་འདུག་ལ། སྡོད་གུར་ནང་ཡོད་པ་རྣམས་དུས་ཡུན་ཟླ་ ༦ རིང་གུར་ནང་སྡོད་དགོས་ཀྱི་ཡོད་ལ། གཟའ་རེས་ཟླ་བ་ནས་ས་གནས་ཀྱི་སློབ་གྲྭ་རྣམས་ཀྱིས་ཀྱང་གུར་ཕུབ་ནས་སློབ་ཁྲིད་མགོ་འཛུགས་བྱས་ཡོད་འདུག
གཞན་ཡང་། ཟླ་འདིའི་ཕྱི་ཚེས་ ༢༡ ཉིན་གྱི་དགོང་མོར། ཡུ་ནན་ཞིང་ཆེན་གྱི་ (Dali Bai) རང་སྐྱོང་ཁུལ་གྱི་ནང་ཚད་རིམ་ ༦།༤ ཅན་གྱི་ས་ཡོམ་ཞིག་བྱུང་བའི་ཁྲོད། ས་གནས་ཀྱི་གཞུང་འབྲེལ་གསར་ལམ་དུ་ཉུང་མཐར་མི་ ༣ རྐྱེན་འདས་སུ་ཕྱིན་པ་དང་། མི་ ༢༧ ལ་རྨས་སྐྱོན་བྱུང་ཡོད་པའི་གནས་ཚུལ་ཐོན་ཡོད་པ་རེད།
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་གྲུབ་བཀྲིས།
