དེ་རིང་སྲིད་སྐྱོང་དམ་འབུལ་སྐབས་༧གོང་ས་མཆོག་ནས་དམངས་གཙོའི་ལམ་ནས་འོས་འདེམས་བྱུང་བའི་སྲིད་སྐྱོང་གསར་བར་འཚམས་འདྲི་དང་སྲིད་སྐྱོང་ཟུར་བས་ཧུར་ཐག་འབད་ཐག་གནང་བར་ཐུགས་རྗེ་ཆེ་ཞུ་ཞེས་བཀའ་སློབ་སྩལ་གནང་སོང་།
དེ་རིང་སྔ་དྲོ་ཆུ་ཚོད་ ༩།༥༥ སྟེང་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོམས་ཆེན་དུ། བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་མཆོག་གི་ལས་འཁུར་དང་གསང་རྒྱའི་དམ་འབུལ་མཛད་རིམ་ཐད་གཏོང་བརྒྱུད་གནང་སོང་བ་དང་། མཛད་སྒོའི་ཐོག་༧གོང་ས་མཆོག་ནས་སྲིད་སྐྱོང་གསར་རྙིང་གཉིས་ལ་འཚམས་འདྲི་དང་ཐུགས་རྗེ་ཆེ་ཞུའི་བཀའ་སློབ་བསྩལ་བ་དང་། བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ནས་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་མདུན་ནས་ལས་འཁུར་དང་གསང་རྒྱའི་དམ་འབུལ་གནང་གྲུབ་མཚམས། སྲིད་སྐྱོང་གསར་རྙིང་དབར་བཀའ་ཐམ་སྲིད་ཞི་བདེ་སྐྱིད་རྩིས་སྤྲོད་རྩིས་ལེན་གནང་སོང་།
སྐབས་དེར་ཆེས་མཐོའི་ཁྲིམས་ཞིབ་ཁང་གི་ཁྲིམས་དྲུང་བཀྲ་ཤིས་རྒྱ་མཚོ་ལགས་ཀྱིས་དམ་འབུལ་མཛད་སྒོའི་ལས་རིམ་ངོ་སྤྲོད་གནང་བ་ལྟར་ན། ད་རེས་སྲིད་སྐྱོང་གསར་པའི་དམ་འབུལ་མཛད་སྒོའི་ཐོག་བོད་མི་མང་སྤྱི་འཐུས་རྒྱུན་ལས་ནས་མཉམ་ཞུགས་མི་གནང་བའི་ཐག་གཅོད་བླངས་ཡོད་པ་དང་། དེ་བཞིན། མཛད་སྒོའི་ཐོག་ཁྲིམས་ཞིབ་པ་གཞན་གཉིས་ནས་ཐད་གཏོང་བརྒྱུད་མཉམ་ཞུགས་གནང་ཡོད་ཅིང་། ཁྲིམས་ཞིབ་པ་ཆེ་བ་དང་ལས་འཁྱུར་སྲིད་སྐྱོང་གཉིས་ནས་བདམས་ཐོན་སྲིད་སྐྱོང་མཆོག་ལ་རྟེན་འབྲེལ་མཚོན་བྱེད་བསྒྲོན་འབུལ་དང་རྟེན་འབྱུང་མཇལ་དར་འཐེན་གནང་བ། སྲིད་སྐྱོང་སྤེན་པ་ཚེ་རིང་མཆོག་ནས་དམ་འབུལ་མ་དེབ་ཏུ་མཚན་རྟགས་འགོད་པ་བཅས་གནང་སོང་ལ། ཡང་དེ་རིང་བོད་མི་མང་སྤྱི་འཐུས་ཚོགས་གཞོན་མཆོག་ནས་རྩ་དགོངས་ཞུས་ཡོད་པ་དང་། སྤྱི་འཐུས་སྨོན་ལམ་མཐར་ཕྱིར་ལགས་དང་སྤྱི་འཐུས་གསེར་རྟ་ཚུལ་ཁྲིམས་ལགས། དེ་བཞིན་སྤྱི་འཐུས་བསྟན་པ་ཡར་འཕེལ་བཅས་ནས་སྤྱི་འཐུས་ཚོགས་གཙོ་ཚོགས་གཞོན་མེད་པ་སོགས་རྒྱུན་ལས་ཀྱི་གྲུབ་ཆ་ཚང་གི་མེད་པའི་གནས་སྟངས་འོག་རྒྱུན་ལས་ནས་དགོངས་པ་ཞུས་ཡོད་འདུག
༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་བརྒྱུད་བཙན་བྱོལ་བོད་མི་མང་ཚོགས་ཀྱིས་མང་གཙོའི་ལམ་ནས་བདམས་ཐོན་བྱུང་བའི་སྲིད་སྐྱོང་སྤེན་པ་ཚེ་རིང་མཆོག་གི་དམ་འབུལ་མཛད་སྒོར་དྲ་ལམ་བརྒྱུད་བླང་དོར་བཀའ་སློབ་སྩལ་སྐབས། ང་ཚོ་བཙན་བྱོལ་དུ་འབྱོར་ནས་ལོ་དང་པོའམ་གཉིས་པ་ཞིག་ལ་རྡོ་རྗེ་གདན་དུ་ཚོགས་འདུ་ཚོགས་ཏེ་སྤྱི་འཐུས་བཙུགས་དགོས་ཀྱི་འདུག་ཟེར་ནས་འབོད་སྐུལ་བྱས་ཏེ་བཙུགས་པ་རེད། གང་ལྟར་རིམ་པས་ང་ཚོར་སྒྲིག་འཛུགས་ཤིག་ཡོད་པ་འདི་མང་གཙོའི་ལམ་དུ་འགྲོ་བསྡད་ཡོད་པ་མ་གཏོགས་འཁྲབ་བསྡད་ཡོད་པ་མ་རེད། ཁ་ཞེ་གཉིས་མེད་ཀྱི་ཐོག་ནས་མང་གཙོ་ཡང་དག་པ་ཞིག་བྱེད་བཞིན་ཡོད་རེད། རྒྱ་མི་གུང་ཁྲན་གྱིས་ཞིང་བྲན་ལམ་ལུགས་དང་ལུགས་སྲོལ་རྙིང་པའི་ཐོག་ནས་སྐྱོན་བརྗོད་བྱེད་ཀྱི་ཡོད་པ་རེད། དངོས་ཡོད་གནས་ཚུལ་ལ་བོད་ནང་དུ་རང་དབང་ཡོད་མ་རེད། བཙན་བྱོལ་དུ་ཡོད་པའི་བོད་མི་འབུམ་གཅིག་ལྷག་ཡོད་པ་རྣམས་ལ་རང་དབང་ཡོད་པའི་རྐྱེན་གྱིས་བཙན་བྱོལ་སྒྲིག་འཛུགས་ཡོད་པ་དང་མང་གཙོའི་ལམ་ཁ་མཐར་ཕྱིན་པའི་ཐོག་འགྲོ་ཡི་ཡོད་པ་རེད། དེར་བརྟེན། དེ་རིང་སྲིད་སྐྱོང་གསར་པ་དང་སྲིད་སྐྱོང་ཟུར་པ་གཉིས་ལ་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། གང་ལྟར་ཧུར་ཐག་འབད་ཐག་བྱས་པ་རེད། འབྱུང་འགྱུར་མུ་མཐུད་ནས་ང་ཚོའི་སྒྲིག་འཛུགས་ཀྱི་མང་གཙོའི་ལམ་འདི་སངས་རྒྱས་ཀྱི་ཆོས་ཀྱི་ལྟ་གྲུབ་དང་འབྲེལ་བ་ཡོད་པས་དམིགས་བསལ་ཆགས་ཀྱི་ཡོད་པ་རེད། བཅོམ་ལྡན་འདས་ཀྱི་འདུལ་བའི་ཁྲིམས་ཀྱི་འགྲོ་སྟངས་ཤིག་ཡོད་པ་རེད། འདིའི་སྒང་ལ་མཁན་པོས་ཐག་གཅོད་རྒྱུ་ཡོད་མ་རེད། གསོལ་གཞིའི་ལས་ཟེར་ནས་གསོལ་བ་སྔོན་དུ་བཏང་ནས་བརྗོད་པ་དང་པོ་དང་བརྗོད་པ་གཉིས་པ། བརྗོད་པ་གསུམ་པ་ཟེར་ནས་མང་མོས་རང་གི་ཐོག་ནས་ཐག་གཅོད་རྒྱུ་ཡིན་པ་དེ་འདུལ་བའི་འགྲོ་སྟངས་ཡིན་པ་བཅོམ་ལྡན་འདས་ཀྱིས་ལམ་སྟོན་གནང་ཡོད་པ་རེད།
ང་ཚོའི་ཆབ་སྲིད་ཀྱི་འགྲོ་སྟངས་འདི་དེ་སྔོན་གྱི་གནས་ཚུལ་ཁག་ཁག་རེད། ངོས་རང་གི་ངོས་ནས་ཆ་བཞག་ན་ཆབ་སྲིད་ཀྱི་ལས་འགན་བཞག་པ་རེད། ང་ཚོའི་ཆབ་སྲིད་ཀྱི་འགན་འདི་མང་གཙོའི་འོས་བསྡུའི་ཐོག་ནས་ཡོང་གི་ཡོད་པ་བཟོས་ཏེ་ད་ལྟ་བར་དུ་ཞེ་དྲགས་ཡག་པོ་ཡིན། ཚང་མས་ཧུར་ཐག་འབད་ཐག་བྱས་པ་རེད། དེ་རིང་སྲིད་སྐྱོང་གསར་རྙིང་གཉིས་འཛོམས་པར་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། འབྱུང་འགྱུར་ང་ཚོ་མུ་མཐུད་ནས་འགྲོ་དགོས་ཀྱི་ཡོད་སྟབས་དུས་ཀྱི་འགྱུར་བ་འགྲོ་བསྡད་ཀྱི་འདུག རྒྱ་ནག་ལ་ཆ་བཞག་ན་འགྱུར་བ་འགྲོ་བསྡད་ཡོད་པ་རེད། ང་ཚོ་ཆེ་ས་ནས་བོད་ཀྱི་དོན་དག་དེ་དབུ་མའི་ལམ་གྱི་ཐོག་ནས་འགྲོ་ཡི་ཡོད་རེད། དེར་བརྟེན། རྒྱ་མིའི་ངོས་ནས་བསམ་བློ་ཏོག་ཙམ་གུ་ཡངས་པོ་གཏང་བ་ཡིན་ན། ང་ཚོས་གཉིས་ཕན་གྱི་འགྲོ་སྟངས་ཤིག་ལམ་སྟོན་བྱས་ཡོད་པ་རེད། ང་ཚོ་བཙན་བྱོལ་དུ་ཡོད་པའི་སྒྲིག་འཛུགས་འདི་འཛམ་གླིང་ནང་སུས་བལྟས་པ་ཡིན་ནའང་། དངོས་གནས་དྲང་གནས་ཀྱིས་མང་གཙོ་ཡང་དག་པའི་སྒང་ལ་འགྲོ་བསྡད་ཡོད་པ་དང་། འདིའི་ཐོག་ལ་ང་ཚོ་བཙན་བྱོལ་བ་ཉུང་ཤས་ཤིག་ལས་ཡོད་མ་རེད་དེ་བོད་ཀྱི་ཆོས་དང་རིག་གཞུང་བདག་པོ་རྒྱག་དགོས་པ་རེད། བོད་ནང་དུ་རྒྱ་མིས་དམ་དྲག་བྱེད་ཀྱི་ཡོད་རེད། ས་ཆ་ཁུག་ཀྱོག་ལ་དགོན་པ་བདག་པོ་བརྒྱབ་ནས་གང་ཡོང་ཅི་ཡོང་གིས་སློབ་གཉེར་བྱེད་ཀྱི་ཡོད་རེད་མ་གཏོགས། གཞན་སྤྱི་ཡོངས་ཀྱི་ཐོག་ནས་དམ་དྲག་ཆེན་པོ་རེད།
ང་ཚོ་བཙན་བྱོལ་དུ་ཡོད་མཁན་ཚོས་སོ་སོའི་གཅེས་ནོར་ལྟ་བུ་སངས་རྒྱས་ཀྱི་ཆོས་རིག་པ་ལྡན་པ། ཚན་རིག་དང་མཐུན་པ་ཞིག་བདག་པོ་བརྒྱབ་བསྡད་ཡོད་པ་རེད། གདན་ས་ཚོས་ད་ལྟ་བར་སློབ་གཉེར་ཧུར་ཐག་བྱེད་ཀྱི་ཡོད་པ་རེད། འཛམ་བུ་གླིང་འདིའི་སྒང་ལ་དེ་སྔ་ཡིན་ན་ནུབ་ཕྱོགས་རྒྱལ་ཁབ་ནང་དུ་ནང་ཆོས་ལ་དམིགས་བསལ་དོ་སྣང་བྱེད་མཁན་མེད་པ་དང་འབྲེལ་བའང་ཡོད་མ་རེད། བོད་པའི་སངས་རྒྱས་པའི་ཆོས་ལ་བླ་མ་ཆོས་ལུགས་ཀྱི་མིང་བཏགས་ནས་འགྲོ་ཡི་ཡོད་རེད། ང་ཚོ་བཙན་བྱོལ་དུ་འབྱོར་ནས་རིམ་པས་བདེན་པའི་གནས་ཚུལ་གསལ་པོ་ཆགས་ཡོད་དུས། བོད་ཀྱི་སངས་རྒྱས་པའི་ཆོས་འདི་དཔལ་ནཱ་ལེནྜའི་ཆོས་བརྒྱུད་དྲི་མ་མེད་པ་དང་རིག་པ་དང་ལྡན་པ་རེད་འདུག རྨོངས་དད་ཀྱི་སྐད་ཆ་ཁྱོན་ནས་མ་རེད་ཟེར་ནས་ཤེས་ཡོན་ཅན་མང་པོས་བཤད་ཀྱི་འདུག དེའི་དཔང་པོར་ང་ཚོས་འདས་པའི་ལོ་བཅུ་ཕྲག་ཁ་ཤས་རིང་ཚན་རིག་པ་དང་མཉམ་དུ་གོ་བསྡུར་བྱས་པ་དང་བགྲོ་གླེང་བྱེད་ཀྱི་ཡོད་རེད། ང་ཚོ་གདན་སའི་སློབ་ཚན་ནང་དུ་ཚན་རིག་སློབ་སྦྱོང་བྱ་རྒྱུའི་མགོ་བཙུགས་ཡོད་པ་རེད། དེར་ང་ཚོ་སྤོབས་པ་ཡོད་པ་རེད། ང་ཚོ་རིགས་པའི་ལམ་ནས་འགྲོ་བསྡད་ཡོད་པ་མ་གཏོགས་རྨོངས་དད་བྱས་ནས་འགྲོ་ཡི་མེད།
ང་ཚོ་བཙན་བྱོལ་བ་ཉུང་ཤས་ཤིག་རེད་དེ་གཙོ་བོ་རྒྱ་གར་རང་དབང་ལུང་པ་རེད། བོད་དང་ཐུན་མོང་མ་ཡིན་པའི་འབྲེལ་བ་ཡོད་རེད། ལྷག་པར་དུ་དཔལ་ལྡན་ནཱེ་རུ་ནས་དམིགས་བསལ་གྱིས་ང་ཚོའི་ཐོག་ལ་ཐུགས་སྣང་གནང་སྟེ་ཞེ་དྲགས་བཀའ་དྲིན་ཆེན་པོ་ཡིན། རྒྱ་གར་ནང་དུ་གཙོ་བོ་གདན་ས་ཁག་གིས་ང་ཚོ་བོད་ཀྱི་ཆོས་དང་རིག་གཞུང་། དཔལ་ནཱ་ལེནྜའི་ཆོས་བརྒྱུད་དྲི་མ་མེད་པ། ཚན་རིག་དང་མཐུན་པ་དེ་ཚོ་རྒྱ་གར་ནང་དུ་གཙོ་བོ་གདན་ས་ཁག་གིས་བདག་པོ་བརྒྱབ་བསྡད་ཡོད་པ་རེད། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་པ། །སྒྲུབ་པར་བྱེད་པ་ཁོ་ན་ཡིན། ། ཁོ་ནས་སྒྲས་སློབ་གཉེར་བྱས་པ་དང་སློབ་གཉེར་བྱས་པ་རྣམས་ལག་ལེན་བསྟར་ནས་འགྲོ་རྒྱུ་མ་གཏོགས་གཞན་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་སྟངས་ཡོད་མ་རེད། ཅེས་གསུངས་ཡོད་པ་རེད། དེར་བརྟེན། ང་ཚོས་ད་ལྟ་བར་དུ་ཧུར་ཐག་འབད་ཐག་བྱས་པ་རེད། འབྲེལ་ཡོད་ཚང་མ་ལ་དེ་རིང་གོ་སྐབས་འདི་བཟུང་ནས་སླར་ཡང་ཐུགས་རྗེ་ཆེ་ཞུ་རྒྱུ་ཡིན། སྲིད་སྐྱོང་གསར་པ་ལ་བཀྲ་ཤིས་བདེ་ལེགས་ཞུ་རྒྱུ་དང་སྲིད་སྐྱོང་ཟུར་པས་ད་ལྟ་བར་དུ་ཧུར་ཐག་བྱས་པ་རེད། ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་སོང་།
གསར་འགོད་པ། བསྟན་འཛིན་ཕུར་བུ། སྐལ་བཟང་སྦྱིན་པ།
མ་དགོས་པ་ཁྲིམས་བཟོ་ལྷན་ཚོགས་ཀྱི་བཅའ་ཁྲིམས་འདྲ་བཟོས།ཆོལ་གསུམ་མི་དམངས་ཀྱི་ཐད་ཀར་བདམས་ཡོད་པའི་སྤྱི་འཐུས་རྣམས་ཀྱི་ཐག་གཅོད་བྱས་ཟིན་པའི་བྱ་བ་དེར།ནུས་མེད་དུ་བཏང།བཅའ་ཁྲིམས་རིན་པོ་ཆེ་བཟོས་ནས་ཕྱི་ལ་སྟོན་ཡ་ཙམ་མ་གཏོགས་ཕན་ཐོག་གང་ཡང་མི་འདུག མདོར་བསྡུས་ན་མི་དམངས་དབང་ཆ་མེད་པ་དེ་རེད།
དོན་དམ་ལ་བརྩི་འཇོག་བྱེད་མ་ཐུབ་པ་ཡིན་ན་བཅའ་ཁྲིམས་དགོས་མཁོ་མི་འདུག་ག རྒན་པོ་རྒན་མོ་རྣམས་རུབ་རུབ་བྱེད་ན་ཐག་གཅོད་བྱས་ནས་དགའ་ཡི་རེད།གཅིག་རྒྱལ་གཅིག་ཕམ་གིས་བསམ་བློ་མ་ཐོངས།གྱོང་གུ་དེ་བོད་མི་ཚང་ལ་རག་གི་ཡོག་རེད།ད་བོད་པས་མི་གདོང་རིགས་ངོ་མ་དེ་འཛམ་བུ་གླིང་ལ་སྟོན་སོང་བ།ངོ་ཚ་མ་ཤེས་ནས་ད་དུང་རྒྱལ་ཁ་རེད་བསམ་བྱུང་ངམ།སྙིང་རྗེ།
བོད་རྒྱལ་ལོ།། ད་ནས་ལོ་རྒྱུས་ཀྱི་རྙིག་རོ་རྣམས་རྒྱང་བསྐྱུར་གྱིས་མ་འོངས་ཀྱི་བོད་དང་བོད་མིའི་སྐོར་ལ་འབད་རྒྱུའི་དུས་ཚོད་སླེབས་ཡོད་དོ།། སྨོན་ལམ་ལོག་པའི་དབང་གིས་བོད་དང་བོད་མིར་སྡང་ཟུག་འཆང་མཁན་གྱི་བོད་མི་ཐ་ཤལ་འགའ་ཞིག་དང་། རྒྱ་དམར་གྱི་ལས་བྱེད་རྣམས་ཕམ་པར་གྱུར་ཅིག
ནམ་ཡང་ངོས་ལེན་མེད། ???