རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་ཐོག་ནུས་པ་མཉམ་དུ་སྤུང་འཆར་འདུག

དེ་རིང་ཕྱི་ཚེས་ ༣༡ ཉིན་ནེའུ་ཛི་ལན་ཌིའི་སྲིད་བློན་ལྕམ་ཇཱེ་སིན་ཌ་ཨར་དི་རེན་ (Jacinda Ardern) ལགས་དང་། ཨོ་གླིང་གི་སྲིད་བློན་སི་ཁོ་ཊི་མོ་རེ་སན་ (Scott Morrison) ལགས་གཉིས་ཀྱིས་ཏོག་དབྱིབས་གཉན་རིམས་འགོས་ཁྱབ་རྗེས་ཐེངས་དང་པོར་དངོས་སུ་ཐུག་འཕྲད་གནང་རྗེས། ཕྱོགས་གཉིས་བར་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། པེ་ཅིན་གཞུང་དང་ཚོང་འབྲེལ་འཛུགས་ཕྱོགས་སོགས་ཀྱི་ཐད་ལངས་ཕྱོགས་མི་མཐུན་པའི་བསམ་ཚུལ་གཅིག་ཀྱང་བྱུང་མེད་པ་དང་མཉམ་འབྲེལ་གདོང་ལེན་བྱ་རྒྱུ་ཡིན་སྐོར་བརྗོད་འདུག

སྲིད་བློན་རྣམ་གཉིས་ནས་མཉམ་འབྲེལ་གསར་འགོད་གསལ་བསྒྲགས་ཤིག་སྤེལ་སྐབས། རྒྱལ་ཁབ་གཉིས་ཀར་ད་ལྟའི་ཧོང་ཀོང་མི་མང་གི་རང་དབང་དང་འགྲོ་བ་མིའི་ཐོབ་ཐང་གི་གནས་སྟངས་དང་། ཤར་ཏུར་ཀི་སི་ཐན་ནང་གི་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་བཅས་གཉིས་ལ་བློ་འཚབ་ཆེན་པོ་ཡོད་སྐོར་དང་། རྒྱ་ནག་གཞུང་གིས་ཡུ་གུར་མི་རིགས་དང་ཁ་ཆེ་བ་གྲངས་ཉུང་མི་རིགས་གཞན་གྱི་ཐོབ་ཐང་ལ་བརྩི་བཀུར་བྱེད་དགོས་པ་མ་ཟད། མཉམ་འབྲེལ་རྒྱལ་ཚོགས་དང་རྒྱལ་སྤྱིའི་རང་དབང་ལྡན་པའི་ཆེད་ལས་མི་སྣར་ཆ་རྐྱེན་གང་ཡང་མེད་པའི་ཐོག་ནས་ས་གནས་ཀྱི་གནས་སྟངས་ལ་རྟོག་ཞིབ་བྱེད་པར་ཆོག་མཆན་སྤྲོད་དགོས་སྐོར་བརྗོད་དེ། རྒྱལ་ཁབ་གཉིས་ནས་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་དུ་གཏོང་བཞིན་པའི་གནད་དོན་ལ་གདོང་ལེན་བྱེད་པར་མཉམ་འབྲེལ་བྱ་རྒྱུ་ཡིན་པ་བརྗོད་འདུག

ཡང་སྲིད་བློན་རྣམ་གཉིས་ཀྱིས། ལྷོ་རྒྱ་ནག་རྒྱ་མཚོའི་ཁུལ་དམག་ས་རུ་བསྒྱུར་ཏེ་རྩོད་རྙོག་ཆེ་རུ་འགྲོ་བཞིན་ཡོད་པ་དང་། བརྟན་ལྷིང་མེད་པའི་ཛ་དྲག་གི་གནས་སྟངས་ལ་བློ་འཚབ་ཆེན་པོ་ཡོད་པ། དེ་བཞིན་མཚོ་ཁུལ་ཁག་ངེས་པར་དུ་འཛམ་གླིང་རྒྱལ་ཚོགས་ཀྱི་ཁྲིམས་སྒྲིག་འོག་གནས་དགོས་པ་མ་ཟད། རྒྱལ་སྤྱིའི་ཁྲིམས་སྒྲིག་ལ་བརྩི་བཀུར་དང་མཚོ་ཁུལ་གྱི་རྩོད་རྙོག་ཁག་ཁྲིམས་སྒྲིག་ལྟར་ཐག་གཅོད་བྱེད་དགོས་སྐོར་དང་། རྒྱ་གར་ཞི་བདེ་རྒྱ་མཚོའི་ཁུལ་གྱི་གནད་དོན་དང་འབྲེལ་རྒྱལ་ཁབ་གཉིས་ཀྱིས་མཉམ་འབྲེལ་བྱེད་པའམ། ཁུལ་དེའི་མཐུན་གྲོགས་རྒྱལ་ཁབ་ཁག་དང་མཉམ་འབྲེལ་བྱས་ཏེ་རྒྱལ་ཁབ་ཀྱི་བདག་དབང་སྲུང་སྐྱོབ་དང་། ཕྱིའི་ཤུགས་རྐྱེན་ལ་གདོང་ལེན་མཉམ་དུ་བྱ་རྒྱུ་དང་། ཤེས་ཡོན་དང་འཛུགས་བསྐྲུན། ཉམས་ཞིབ་དང་འོས་བསྡུ། གསར་འགྱུར་བརྒྱུད་ལམ་སོགས་ཀྱི་ནང་ཕྱིའི་ཤུགས་རྐྱེན་ལ་གདོང་ལེན་བྱེད་པའི་ནུས་པ་སྤུངས་རྒྱུའི་ཐོག་མོས་མཐུན་བྱུང་ཡོད་པ་བརྗོད་འདུག་ནའང་། སྐད་ཆ་དེ་དག་རྒྱ་ནག་ལ་དམིགས་པ་ཡིན་མིན་གསར་འགོད་པ་ཞིག་གིས་དྲིས་པར་སྲིད་བློན་གཉིས་ཀྱིས་དམིགས་བསལ་ལན་འདེབས་བྱས་མི་འདུག

ཡང་ནེའུ་ཛི་ལན་ཌིའི་སྲིད་བློན་ལྕམ་ཇཱེ་སིན་ཌ་ཨར་དི་རེན་ (Jacinda Ardern) ལགས་ཀྱིས། དེ་རིང་ང་ཚོས་གླེང་མོལ་བྱེད་སྐབས་ཚོང་འབྲེལ་དང་འགྲོ་བ་མིའི་ཐོབ་ཐང་གི་གནད་དོན་གྱི་ཐོག་ལངས་ཕྱོགས་བརྟན་པོ་འཛིན་པའི་ཐད་ཕྱོགས་གཉིས་བར་མི་མཐུན་པའི་བསམ་ཚུལ་གཅིག་ཀྱང་བྱུང་མེད་པ་རེད། ཅེས་དང་། ཡང་ཁོང་མོས། ཨོ་གླིང་དང་ནེའུ་ཛེ་ལན་ཌི་གཉིས་བར་འགལ་ཟླ་བཟོས་ཏེ། རྒྱལ་ཁབ་གཉིས་ཀྱི་བདེ་འཇགས་ལ་གནོད་སྐྱོན་བཟོ་འདོད་བྱེད་མཁན་ཡོད་པ་ནི་ཐེ་ཚོམས་མེད་པ་ཞིག་ཡིན་པ་ནའང་། རྒྱལ་ཁབ་གཉིས་བར་འགལ་ཟླ་བཟོ་ཐབས་མེད་སྐོར་དང་། འཛམ་གླིང་འཕྲོད་བསྟེན་སྒྲིག་འཛུགས་ཀྱིས་ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་གཅོད་བྱས་ཏེ་རྙེད་ཐབས་སུ་རྒྱ་ནག་གཞུང་ལ་གནོན་ཤུགས་སྤྲོད་རྒྱུ་ཡིན་སྐོར་སོགས་བརྗོད་འདུག

མཉམ་འབྲེལ་གསར་འགོད་གསལ་བསྒྲགས་དེ་དང་འབྲེལ་དེ་རིང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝིན་པིན་ (Wang Wenbin) གྱིས་གསར་འགོད་ལྷན་ཚོགས་ཤིག་བསྐོངས་ཏེ། སྲིད་བློན་སི་ཁོ་ཊི་མོ་རེ་སན་དང་སྲིད་བློན་ལྕམ་ཇཱེ་སིན་ཌ་ཨར་དི་རེན་གཉིས་ཀྱིས་མཉམ་འབྲེལ་ཐོག་སྤེལ་བའི་གསར་འགོད་གསལ་བསྒྲགས་དེར་ངོས་ལེན་མེད་པ་དང་། མགོ་ཁྲིད་གཉིས་ཀྱིས་འགན་འཁུར་མེད་པའི་ཐོག་ནས་གཏམ་བཤད་སྤེལ་བ་དང་། རྒྱལ་སྤྱིའི་ཁྲིམས་དང་རྒྱལ་སྤྱིའི་འབྲེལ་ལམ་གྱི་སྒྲིག་གཞི་ཁག་ལ་རྩིས་མེད་བཏང་བ་དང་། རྒྱ་ནག་གི་ནང་སྲིད་ལ་ཐེ་བྱུས་བྱས་སྐོར་གྱི་སྐྱོན་བརྗོད་བྱས་འདུག

འདས་པའི་ལོ་གཅིག་ནང་ཨོ་གླིང་གཞུང་གིས་ཧོང་ཀོང་གི་གནད་དོན་དང་། ཏོག་དབྱིབས་གཉན་རིམས། ཤར་ཊུར་ཀི་སི་ཐན་གྱི་ཡུ་གུར་མི་རིགས་ཀྱི་གནད་དོན་སོགས་ཀྱི་ཐོག་ནས་རྒྱ་ནག་ལ་ཡོངས་ཁྱབ་ཀྱི་ཐོག་ནས་སྐྱོན་བརྗོད་དང་འགོག་རྒོལ་ཤུགས་ཆེན་བྱས་རྐྱེན། རྒྱ་ནག་གིས་ཨོ་གླིང་གི་རྒུམ་ཆང་དང་གླང་ཤ་སོགས་ཀྱིས་མཚོན་པའི་ཚོང་ཟོག་ཁག་བཀག་སྡོམ་བྱས་ཡོད་ལ། ནང་འདྲེན་བྱས་པའི་ཚོང་ཟོག་ལ་རྒྱལ་ཁྲལ་སྤར་བ་སོགས་བྱས་ཏེ། འདས་པའི་ལོ་ངོ་བཅུ་ཕྲག་གཅིག་ཙམ་ནང་གི་ཕྱོགས་གཉིས་ཀྱི་འབྲེལ་ལམ་གྱི་གནས་སྟངས་སྡུག་ཤོས་སུ་ལྷུང་ཡོད་ནའང་། འདི་ལོའི་ཕྱི་ཟླ་ ༤ ནང་། ཨ་རི་གཙོས་པའི་མིག་ལྔའི་མནའ་འབྲེལ་རྒྱལ་ཁབ་རྣམས་ཀྱིས་རྒྱ་ནག་གིས་ཞི་བདེ་རྒྱ་མཚོའི་ཁུལ་དུ་སྟོབས་ཤུགས་རྒྱ་སྐྱེད་བྱེད་བཞིན་པར་ཐུན་མོང་གི་འགོག་རྒོལ་སྲིད་ཇུས་ཤིག་འདིང་རྒྱུའི་གླེང་སློང་འབྱུང་བཞིན་པའི་སྐབས་དེར། ནེའུ་ཛི་ལན་ཌིའི་ངོས་ནས་རྒྱ་ནག་ཐོག་སྲིད་ཇུས་ག་རེ་འཛིན་དགོས་མིན་དེ་ནེའུ་ཛི་ལན་ཌི་རང་གིས་ཐག་གཅོད་བྱ་རྒྱུ་ཡིན་སྐོར་བརྗོད་ཡོད་ལ། འདས་ལོའི་མནའ་འབྲེལ་རྒྱལ་ཁབ་ཚོས་རྒྱ་ནག་ལ་སྐྱོན་བརྗོད་ཀྱི་བསྒྲགས་གཏམ་དེར་ཡང་མིང་རྟགས་འགོད་རྒྱུ་མིན་པ་དང་། རྒྱ་ནག་གཞུང་དང་འགལ་ཟླ་བཟོ་འདོད་མེད་པའི་རྣམ་འགྱུར་བསྟན་ཡོད་པ་རེད།