ཧང་གྷ་རིའི་རྒྱལ་སའི་སྲང་ལམ་ཞིག་ལ་ཏཱ་ལའི་བླ་མའི་སྲང་ལམ་ཞེས་བཏགས།

ཡང་རྒྱལ་སའི་གྲོང་ཁྱེར་སྤྱི་ཁྱབ་པ་གྷར་གྷི་ཀོ་ར་ཇོ་ནི་ལགས་ཀྱིས། རྒྱལ་སའི་ནང་ཧྥུ་ཏན་གཙུག་ལས་སློབ་ཆེན་གྱི་ལས་གཞི་བྱུང་བ་ལ་བརྟེན། ལོ་ངོ་སུམ་ཅུའི་གོང་བློ་སེམས་བརྟན་པོ་ཡིན་པའི་ཧང་གྷ་རིའི་འགྲོ་བ་མིའི་གཞི་རྩའི་རིན་ཐང་མང་པོ་ཞིག་ད་ལྟ་དོགས་པའི་གནས་སུ་ལྷུང་ཡོད་པ་དང་། རྒྱ་ནག་དམར་ཤོག་གཞུང་གིས་བོད་དང་ཤར་ཏུར་ཀི་སི་ཐན། ཧོང་ཀོང་དང་རྒྱ་ནག་ནང་བཅས་ཀྱི་འགྲོ་བ་མིའི་ཐོབ་ཐང་ལ་རྡོལ་གཏོང་བཞིན་ཡོད་པ་དང་། རྒྱ་ནག་གཞུང་གིས་གནོན་ཤུགས་ཧང་གྷ་རི་གཞུང་གི་ནང་དུ་བསླེབས་ཡོད་པ་མ་ཟད། ལས་འཆར་དེའི་ལས་གཞི་ཁག་ཕྱི་གསལ་ནང་གསལ་མིན་པ་དང་། རྒྱ་ནག་ནས་བུ་ལོན་ས་ཡ་མང་པོ་ལེན་དགོས་པའི་བློ་འཚབ་ཡོད་སྐོར་བརྗོད་དེ་སྐྱོན་བརྗོད་གནང་འདུག

འདི་ལོའི་ཕྱི་ཟླ་ ༤ པའི་ནང་ཧང་གྷ་རིའི་གཞུང་འཛིན་པས་ཤེས་ཡོན་གྱི་གནས་ཚད་གོང་མཐོར་གཏོང་ཐབས་བྱེད་ཀྱི་ཡོད་ཚུལ་བརྗོད་དེ་ཧྥུ་ཏན་གཙུག་ལག་སློབ་ཆེན་གསར་འཛུགས་ཀྱི་ལས་གཞི་ལ་གན་རྒྱ་བཞག་སྟེ། ཕྱི་ལོ་ ༢༠༢༤ ནང་ཚུད་དུ་སྒོ་འབྱེད་བྱ་འཆར་ཡིན་འདུག་ལ། དེའི་ནང་སློབ་ཕྲུག་ ༦༠༠༠ ཙམ་གྱིས་སྒྱུ་རྩལ་དང་སྨན། དཔལ་འབྱོར་རིག་པ་དང་བཟོ་འགོད་རིག་པ་སོགས་སྦྱོང་ཐུབ་ཀྱི་ཡོད་པ་དང་། དགེ་ལས་ ༥༠༠ ཙམ་ལེན་འཆར་ཡོད་འདུག ལས་གཞི་དེའི་འགྲོ་གྲོན་ཨ་སྒོར་དུང་ཕྱུར་ ༡༨ ཙམ་ཡིན་འདུག་པའི་ཁྲོད། ཨ་སྒོར་དུང་ཕྱུར་ ༡༥ ཙམ་རྒྱ་ནག་དངུལ་ཁང་གིས་བུ་ལོན་དུ་གཡར་གྱི་ཡོད་འདུག་ལ། དཔྱད་བརྗོད་པའི་གནས་ཚུལ་ལྟར་ན་ལས་གཞི་དེའི་འགྲོ་གྲོན་ནི་ཕྱི་ལོ་ ༢༠༡༩ ལོའི་ཧང་གྷ་རི་གཞུང་གིས་རྒྱལ་ཡོངས་ཀྱི་མཐོ་རིམ་སློབ་གསོའི་ཐོག་བཏང་བའི་འགྲོ་སོང་ལས་མང་བ་ཡོད་འདུག

ཧང་གྷ་རིའི་ནང་ཧྥུ་ཏན་གཙུག་ལག་སློབ་ཆེན་སྒོ་འབྱེད་བྱུང་ཚེ་དེ་ནི་ཡུ་རོབ་ནང་གི་རྒྱ་ནག་གི་གཙུག་ལག་སློབ་ཆེན་དང་པོ་དེ་ཆགས་ཀྱི་ཡོད་པ་མ་ཟད། ཉེ་ལམ་སྤྱི་མཐུན་ཉམས་ཞིབ་ལྟེ་གནས་ཁང་ (Republikon Institute) གིས་བསམ་ཤོག་ཞིག་བསྡུས་པའི་ནང་། ཧང་གྷ་རིའི་མི་མང་གི་བརྒྱ་ཆའི་ ༦༦ གིས་ལས་གཞི་དེར་འདོད་མོས་མེད་པ་དང་། བརྒྱ་ཆའི་ ༢༧ གྱིས་རྒྱབ་སྐྱོར་བྱེད་ཀྱི་ཡོད་པ་བཀོད་འདུག་ནའང་། ཧང་གྷ་རིའི་གསར་གཏོད་དང་འཕྲུལ་རིག་བློན་ཆེན་གཞོན་པ་ཐཱ་མཱ་སི་སི་ཁན་ཏ་ (Tamas Schanda) ཡིས། ཧྥུ་ཏན་གཙུག་ལག་སློབ་ཆེན་དེ་ནི་འཛམ་གླིང་གི་སློབ་གསོ་བཟང་ཤོས་ཐོབ་ས་ཞིག་ཡིན་ངེས་པ་བརྗོད་དེ་ལས་གཞི་དེ་ཧ་ཅང་གལ་ཆེན་ཡིན་སྐོར་འགྲེལ་བརྗོད་བྱས་འདུག

ཧང་གྷ་རིའི་སྲིད་བློན་ཝེ་ཁི་ཁྲོར་ཨོར་བྷན་ (Viktor Orban) ལགས་ཀྱིས། རྒྱ་ནག་དང་ཨུ་རུ་སུར་ཕྱི་སྲིད་འབྲེལ་ལམ་ཤུགས་ཆེ་རུ་བཏང་སྟེ། ཨ་སྒོར་དུང་ཕྱུར་ ༢༡ ཙམ་གྱི་ལྕགས་ལམ་འཛུགས་པའི་ལས་གཞི་ཞིག་གི་མ་དངུལ་རྒྱ་ནག་ནས་གཡར་ཡོད་པ་དང་། ཡུ་རོབ་མཐུན་ཚོགས་ཀྱིས་ཆོག་མཆན་མ་སྤྲད་པའི་རྒྱ་ནག་གི་འགོག་ཁབ་ ( Sinopharm) ལ་ཉེ་ལམ་ཧང་གྷ་རི་གཞུང་གིས་ངོས་ལེན་བྱས་པ་སོགས་ལ་བརྟེན། གཞུང་འཛིན་ཁ་གཏད་ཚོགས་པས་སྲིད་གཞུང་གིས་རྒྱ་ནག་གཞུང་ལ་སྤྲེལ་ལེད་འཁྲབ་ཀྱི་ཡོད་པའི་སྐྱོན་བརྗོད་བྱེད་ཀྱི་ཡོད་པ་མ་ཟད། ཁྲིམས་དང་གསར་འགོད་རང་དབང་བཅོས་བསྒྱུར་དང་དམ་དྲག་བྱེད་བཞིན་པར་བརྟེན། ཡུ་རོབ་ཀྱི་མཐུན་གྲོགས་རྒྱལ་ཁབ་མང་པོ་ཞིག་ལ་ཁོང་ཁྲོ་བསླངས་ཡོད་པ་རེད། དེ་བཞིན་ཕྱི་ལོ་ ༢༠༡༩ ལོར་ཧང་གྷ་རིའི་སྒེར་བཙུགས་གཙུག་ལག་སློབ་ཆེན་ཆེ་ཤོས་དབུས་ཡུ་རོབ་གཙུག་ལག་སློབ་གྲྭ་ཆེན་མོ་ (Central European University) ཡིས་རྒྱལ་ཁབ་གྱི་གནས་བབ་ཉེན་ཁའི་ནང་གཡུགས་ཀྱི་ཡོད་ཚུལ་བརྗོད་དེ་བསླབ་གཞི་ཕལ་མོ་ཆེ་ཧང་གྷ་རིའི་ནང་སྒོ་བརྒྱབ་དགོས་བྱུང་ཡོད་འདུག

གསར་འགོད་པ། ཀླུ་མགོན་ཐར།