ཕྱོགས་གཉིས་ཀའི་དམ་འབུལ་ཁྲིམས་འགལ་རེད།
བོད་མི་མང་སྤྱི་འཐུས་ལྷན་ཚོགས་སྐབས་ ༡༧ པའི་སྤྱི་འཐུས་ལས་ཁུར་དམ་འབུལ་བྱེད་སྟངས་མ་འདྲ་བ་གཉིས་བྱུང་བ་རེད། དེ་ནི་བོད་མི་མང་སྤྱི་འཐུས་ལྷན་ཚོགས་སྐབས་༡༦ པའི་ཚོགས་འདུའི་གྲོས་ཆོད་ཡིག་ཆ་ཨང་ ༣༩ པ་ལ་བརྟེན་ནས་ལྷགས་པ་རེད། དེ་ཡིན་ཙང་ཟམ་གདོང་རིན་པོ་ཆེས་གསུངས་པ་བཞིན་ད་ལྟ་བཀའ་སྤྱི་གཉིས་ཀ་བཅའ་ཁྲིམས་དགོངས་དོན་གཞིར་བཟུང་གིས་ཁྲིམས་མཐུན་དམ་འབུལ་བྱེད་ཡུལ་མེད་པ་རེད། དེ་ཡིན་ཙང་སྤྱི་འཐུས་ཕྱོགས་གཉིས་ཀའི་ལས་ཁུར་དམ་འབུལ་དེ་ཁྲིམས་འགལ་རེད། མ་རེད་གསུང་གི་ཡོད་ན་གཤམ་གྱི་རྒྱུ་མཚན་ཁག་བདེན་པ་མིན་པའི་ཁུངས་སྐྱེལ་གནང་དང་། དགའ་བསུ་ཡོད།
ཆོལ་ཁའི་རྩོད་རྙོག་མ་རེད།
ཚང་མས་ཤེས་དགོས་པ་ཞིག་ལ་རྩོད་རྙོག་འདི་ཆོལ་ཁ་དང་། ཆོས་བརྒྱུད་ཀྱི་རྩོད་རྙོག་མ་རེད། ཁྲིམས་མཐུན་ཡིན་མིན་གྱི་རྩོད་རྙོག་རེད། དེ་ཡང་བོད་མི་མང་སྤྱི་འཐུས་ལྷན་ཚོགས་ཀྱིས་ཁྲིམས་ཞིབ་པ་གསུམ་ལས་གནས་ནས་འཕོ་འགྱུར་གཏོང་བའི་གྲོས་ཆོད་ཡིག་ཆ་ཨང་ ༣༩ པ་འཇོག་སྐབས། ད་ལྟའི་བར་བརྒལ་ཚོགས་གཙོ་ཟླ་བ་ཚེ་རིང་གཙོས་ཆོལ་ཁ་དང་། ཆོས་བརྒྱུད་དབྱེ་བ་མེད་པའི་སྤྱི་འཐུས་མི་གྲངས་ ༣༡ གཅིག་གིས་རང་དབང་གི་སྒོ་ནས་གསང་བའི་འོས་ཤོག་འཕངས་ཏེ་གྲོས་ཆོད་བཞག་པ་རེད།འདི་ཡང་ངེས་པར་ཤེས་དགོས་པའི་གནད་དོན་ཧ་ཅང་གལ་ཆེན་པོ་རེད།
ཁྲིམས་འགལ་གྱི་དཔེ་ཚད་མཐོ་ཤོས།
བོད་མི་མང་སྤྱི་འཐུས་ལྷན་ཚོགས་ཀྱིས་གྲོས་ཆོད་ཀྱི་ལམ་ནས་ལས་གནས་ནས་འཕོ་འགྱུར་བཏང་ཟིན་པའི་ཁྲིམས་ཞིབ་པ་ཟུར་པ་གསུམ་སླར་ཡང་ཆེས་མཐོའི་ཁྲིམས་ཞིབ་ཁང་དུ་ཡར་འཛུལ་ཡོང་བ་རེད། འཛུལ་སྟངས་དེ་ཡང་ཁྲིམས་མཐུན་གྱི་བརྒྱུད་རིམ་གང་ཡང་མེད་པར་འཛུལ་ཡོང་བ་རེད། ཁྲིམས་ཁ་ནས་བཤད་མཁན། ཁྲིམས་ཞིབ་པ་ཡིན་ཟེར་མཁན་དེ་ཚོས་རྒྱ་ཆེའི་མི་མང་གི་སྐུ་ཚབ་བོད་མི་མང་སྤྱི་འཐུས་ལྷན་ཚོགས་ཀྱི་མཐར་ཐུག་གི་ཐག་གཅོད་ལ་རྡོག་རོལ་གཏོང་རྐྱང་བྱས་ནས་ཡར་ཕེབས་པ་རེད། མི་མང་གི་སྐུ་ཚབ་ལ་མཐོང་ཆུང་ཁྱད་གསོད་བྱས་ནས་ཡར་ཕེབས་པ་རེད། ཕེབས་སྟངས་འདི་ནི་ཁྲིམས་འགལ་ཟེར་བ་ཞིག་ཡོད་ན་དེའི་དཔེ་ཚད་མཐོ་ཤོས་དེ་རེད། འདི་གང་ཟག་གིས་དབང་བསྒྱུར་ཡིན་པ་ལས། ཁྲིམས་ཀྱིས་དབང་བསྒྱུར་ཞིག་ལ་དུས་ནམ་ཡང་ངོས་ལེན་བྱེད་ཐབས་ཡོད་མ་རེད། ད་དུང་རྒྱ་ཆེའི་མི་མང་གི་སྐུ་ཚབ་སྤྱི་འཐུས་ལྷན་ཚོགས་ལ་རྡོག་རོལ་གཏོང་མཁན་ཁྲིམས་ཞིབ་པ་ཟུར་པ་དེ་ཚོའི་མདུན་དུ་རྒྱ་ཆེའི་མི་མང་གི་སྐུ་ཚབ་ཀྱིས་དམ་བཅའ་གང་འདྲ་བྱས་ནས་ཕུལ་དགོས་རེད། གནང་ཐབས་ཡང་ཡོད་མ་རེད།
གྲོས་ཆོད་ཕྱིར་འཐེན་གནང་མེད་པ།
དེ་ཡང་སྤྱི་འཐུས་ལྷན་ཚོགས་ཀྱི་ཚོགས་འདུའི་ཐོག་བཞག་པའི་གྲོས་ཆོད་ཅིག་ཡིན་ན་ཕྱིར་འཐེན་བྱེད་པར་ལམ་གཅིག་མ་གཏོགས་ཡོད་མ་རེད། དེ་ནི་གྲོས་ཚོགས་ཚོགས་འདུའི་ཐོག་གྲོས་ཆོད་ཡིག་ཆ་ཕྱིར་འཐེན་བྱེད་རྒྱུ་དེ་རེད། དེ་ཡིན་དུས་གྲོས་ཚོགས་ཚོགས་དུས་འཕར་མར་ཚོགས་བཅར་གྱིས་གྲོས་ཆོད་ཡིག་ཆ་ཨང་ ༣༩ པ་ཕྱིར་འཐེན་གནང་ནས་ཁྲིམས་ཞིབ་པ་ཟུར་པ་གསུམ་ཁྲིམས་མཐུན་གྱི་ལམ་ནས་ཡར་ཕེབས་སུ་འཇུག་དགོས་པ་དེ་ལམ་གཅིག་རེད། ཡང་ན་ཁྲིམས་ཞིབ་པ་གསར་པ་བསྐོ་དགོས་རེད།ཡང་ན་ཁྲིམས་ཞིབ་པ་མེད་པའི་སྐབས་སུ་བཀའ་སྤྱི་གཉིས་ཀས་དམ་འབུལ་བྱེད་ཡུལ་ཁྲིམས་གསར་པ་བཟོ་དགོས་རེད། འདི་ཚོ་གཅིག་ཀྱང་མ་བྱུང་བ་རེད། དེ་ལ་བརྟེན་ནས་ད་ལྟའི་དཀའ་ངལ་འདི་འཕྲད་པ་རེད། དེའི་ལོ་རྒྱུས་ཀྱི་འགན་དེ་གྲོས་ཚོགས་ཚོགས་དུས་འཕར་མར་ཚོགས་བཅར་མི་གནང་མཁན་གྱི་སྤྱི་འཐུས་ཚོ་ལ་ཡོད་པ་ལས་གཞན་སུ་གཅིག་ལ་ཡོད་མ་རེད།
བར་བརྒལ་ཚོགས་གཙོ་ལ་ཁྲིམས་མཐུན་དམ་འབུལ་ཞུ་ཡུལ་མེད་པ།
གོང་དུ་ཞུས་པ་བཞིན་ད་ཆ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༤༧ པའི་དགོངས་དོན་འོག་སྤྱི་འཐུས་ལས་ཁུར་དམ་འབུལ་བྱེད་པ་ལ། དང་པོ་བར་བརྒལ་ཚོགས་གཙོ་ལ་ཁྲིམས་མཐུན་དམ་འབུལ་བྱེད་ཡུལ་ཡོད་མ་རེད། ཁྲིམས་མཐུན་དམ་འབུལ་བྱེད་ཡུལ་མེད་པ་དེ་དཀའ་ངལ་རེད་མ་གཏོགས། བར་བརྒལ་ཚོགས་གཙོ་སུ་ཡིན་དཀའ་ངལ་མ་རེད། དེ་བཞིན་བར་བརྒལ་ཚོགས་གཙོ་དེ་བར་བརྒལ་ཚོགས་གཙོ་ལ་ངོས་ལེན་གྱི་མིན་གསུང་གི་ཡོད་མ་རེད། འོ་ན་ག་རེ་གསུང་གི་ཡོད་རེད་ཟེར་ན།བར་བརྒལ་ཚོགས་གཙོས་ཁྲིམས་འགལ་ཡིན་པའི་ཁྲིམས་ཞིབ་པ་ཟུར་པ་གསུམ་གྱི་མདུན་དུ་ལས་ཁུར་དམ་བཅའ་བཞེས་ན། དེ་ལ་ངོས་ལེན་བྱེད་ཐུབ་ཀྱི་མི་འདུག་ཟེར་གྱི་ཡོད་རེད། ངོས་ལེན་བྱེད་མི་ཐུབ་པའི་རྒྱུ་མཚན་དེ་སྤྱི་འཐུས་ལྷན་ཚོགས་ཀྱི་གྲོས་ཆོད་ཡིག་ཆ་ཨང་ ༣༩ པ་ཕྱིར་འཐེན་གནང་མེད་ཙང་རེད་མ་གཏོགས། བར་བརྒལ་ཚོགས་གཙོ་སུ་ཡིན་མིན་མ་རེད་ལ། དེ་བཞིན་བར་བརྒལ་ཚོགས་གཙོ་ལ་གུས་ཞབས་ཞུས་དང་མ་ཞུས་ཀྱི་གནད་དོན་མ་རེད། འོ་ན་གང་རེད་ཟེར་ན། བཅའ་ཁྲིམས་ཀྱིས་བསྐུར་བའི་ཐག་གཅོད་ལ་བརྩི་བཀུར་ཞུས་ཀྱི་ཡིན་དང་མིན་གྱི་གནད་དོན་རེད། དེ་ཧ་གོ་དགོས་པ་དེ་གནད་འགག་ཧ་ཅང་ཆེན་པོ་རེད།
འགན་ཁུར་དང་བསམ་ཤེས་རྩ་བ་ནས་མེད་པ།
གནས་སྟངས་དེ་འདྲ་ཞིག་ཡིན་ན་ཡང་། ནང་ཁུལ་ལ་བསམ་ཤེས་རྩ་བ་ནས་མེད་པའི་གནས་སྟངས་དེ་ནི་དངོས་གནས་ཧ་ལས་དགོས་པ་ཞིག་རེད། དེ་ཡང་དམ་འབུལ་ཐད་ཁྲིམས་དང་། སྒྲིག་གཞི་ལ་འགྲེལ་བཤད་བྱེད་པའི་ཡུལ་ལྷགས་ཡོད་མ་རེད། དེ་ནི་གྲོས་ཆོད་ཡིག་ཆ་ཨང་ ༣༩ པའི་དགོངས་དོན་འོག་ཁྲིམས་ཞིབ་པ་གསུམ་ལས་གནས་ནས་འཕོ་འགྱུར་བཏང་ཟིན་ཙང་རེད། ད་ཆ་ཁྲིམས་སྒྲིག་གི་ཐོག་ནས་ལམ་ཁ་གང་ཡང་ལྷག་མེད་པ་དེ་ཟམ་གདོང་རིན་པོ་ཆེས་གསུངས་པ་ལྟར་རེད། དེ་ལྟ་ན་ཡང་ཁྲིམས་སྒྲིག་དང་མི་མཐུན་བཞིན་དུ་འོས་བསྡུ་ལས་ཁུངས་ཀྱིས་ཐག་གཅོད་འོག་སྤྱི་འཐུས་སྐབས་གཅིག་གི་རིང་སྤྱི་འཐུས་ཚོགས་གཙོ་གཉིས་བསྐོས་པ་རེད། སྐབས་དེར་ཁྲིམས་འགལ་ཡིན་ན་ཡང་དེ་ལྟར་བྱས་པ་རེད། ད་ལན་ཡང་ཕྱོགས་གཉིས་ཀའི་དམ་འབུལ་ཁྲིམས་མཐུན་འོག་བྱེད་རྒྱུའི་ལམ་ཁ་མེད་ན་ཡང་། དེ་སྔ་བཞིན་དང་པོ་ཁྲིམས་འགལ་ཡིན་ན་ཡང་། སྤྱི་ལ་བསམ་བློ་བཏང་བའི་ཐོག་ནས་ཕྱོགས་གཉིས་ཀའི་དམ་འབུལ་བྱེད་སྟངས་ལ་མོས་མཐུན་གནང་། དེ་ནས་གྲོས་ཚོགས་ཚོགས་ནས་ཁྲིམས་ལ་བཟོ་བཅོས་གནང་ན་ལམ་ཁ་གཅིག་རེད། དེ་འདྲ་སྔར་ཡང་གནང་པ་རེད། ད་ལན་མི་ཆོག་པ་ཅི་ཡོད། ཡིན་ནའང་བསམ་ཤེས་རྩ་བ་ནས་གནང་གི་ཡོད་མ་རེད། དེ་ནི་བསམ་བློ་གང་ནས་བཏང་ནས་བོད་ཀྱི་རྩ་དོན་དང་། གཞིས་ལུས་རྒྱ་ཆེའི་མི་མང་ལ་བསམ་བློ་གཏོང་གི་ཡོད་པ་ཞིག་ཏུ་ངོས་འཛིན་ནམ་ཡང་ཐུབ་ཐབས་མི་འདུག་ལ། ལྷག་དོན་དགུང་ན་མཐོན་པོར་ཕེབས་པའི་བོད་ཀྱི་བླ་ན་མེད་པའི་མགོན་སྐྱབས་དང་མཚོན་རྟགས་༧གོང་ས་མཆོག་ལ་འགན་ཁུར་སྟངས་ཤིག་རྩ་བ་ནས་མ་རེད་ལ། ཧ་ལས་པའི་བྱེད་སྟངས་སྐྱོ་པོ་རེད།
གནས་སྟངས་འདི་འདྲའི་སྐབས་སུ་བོད་པའི་གསར་འགྱུར་ཁང་ཁག་གིས་ཕྱོགས་གཅིག་ཁོ་ནའི་གསར་འགྱུར་བཤད། ཕྱོགས་གཅིག་གི་མི་ལ་བཅར་འདྲི་བྱེད། དེ་འདྲ་གནང་ནས་མི་མང་ལ་གནས་ཚུལ་ངོ་མ་ཤེས་སུ་མ་བཅུག དེ་འདྲ་གནང་ཡོང་དུས་རྫ་མ་ཆགས་ན་ཆགས་མཉམ་རེད། དཱ་རྫ་མ་ཆགས་བཅུག་དགོས་ས་རེད་བསམ་པ་དེ་འདྲ་ཡང་དྲན་ཡོང་གི་འདུག འདི་ཡང་ཞོར་འཕྲོས་ཡིན།
Tibet times is under the control of Khampa editors, therefore, this news website will aways be biased toward Khampa militant groups.
སྤྱི་འཐུས་སྐབས་བཅུ་དྲུག་པའི་ཚོགས་དུས་བཅུ་པའི་ཐོག་བཞག་པའི་གྲོས་ཆོད་ཨང་ ༣༨ པ་དེ་བཞིན་སྐྱེ་དུས་ནས་འཆི་ཟིན་པའི་ཕུང་པོ་ཞིག་རེད། ཕུང་ཞིག་ལ་མི་ཡི་འདུ་ཤེས་ཡོད་མཁན་ཞིག་ངོས་ནས་བཤད་གོང་གི་ཆེད་རྩོམ་དེ་ཡང་དག་པ་ཞིག་ཏུ་མཐོང་ཡང་། ཕུང་པོ་ནི་ཕུང་པོ་རང་རེད་དེ་ལ་ནུས་པ་མེད་མཁན་ཞིག་གི་བལྟ་ཚུལ་ནི་གོང་གི་གནས་ཚུལ་ཚང་མ་རྫུན་མ་རྫུན་ཀྱང་ཞིག་ཡིན། མདོར་བསྡུས་ན་གྲོས་ཆོད་ཨང་ ༣༨ པ་གསོན་པོ་ཡིན་དང་གཤིན་པོ་ཡིན་ཁྱད་པར་ཤེས་པར་རག་ལས་པ་ཞིག་ཡིན། ཡང་འགའ་རེའི་ཤི་ཟིན་ཀྱང་སྨན་པས་ཤི་བའི་གསལ་བསྒྲགས་བྱས་མེད་པ་ཟེར་བ་ནི་དེ་བས་ཀྱང་དགོད་མོ་སློང་ཡས་རང་རེད། ཧཧཧཧ
གོང་གི་གནས་ཚུལ་དེ་ལ་བདེན་པའི་ཆ་ཡོད་པ་རེད། བྱས་ཙང་ཕྱོགས་གཉིས་ཀའི་འདོད་མོས་ལ་བརྩི་བཀུར་ཞུས་ནས་ཕན་ཚུན་གཉིས་བློ་ཁེངས་པ་གནང་རྒྱུ་མ་གཏོགས་ཐབས་ལམ་གཞན་མེད་པ་རེད། ཁྲིམས་ཀྱི་འགྲོ་ལུགས་ལ་ནོར་འཁྲུལ་ཕྱོགས་ག་ས་བྱུང་ཡོད་པ་རེད། ་མཐུན་ཐབས་ཁོ་ན་མ་གཏོགས་ལམ་ཁཡོད་པ་མ་རེད།
གོང་གི་རྩོམ་ཡིག་དེའི་ནང་བཅའ་ཁྲིམས་ཀྱི་ཁུངས་བསྐྱེལ་དང་ཁྲིམས་སྒྲིག་གི་ལུང་འདྲེན་གང་ཡང་མེད་པར་རང་གི་འཆར་སྒོ་དང་བསམ་བློའི་ཤུགས་རྐྱེན་འོག་དོན་ཚན་འགའ་ཞིག་བཀོད་འདུག འཇིགས་བྲལ་ནི་རྒྱུན་དུ་སེར་རྟ་ཚུལ་ཁྲིམས་ཀྱི་ལྟ་ཚུལ་གྱི་ཤུགས་རྐྱེན་ཡོད་མཁན་ཆེད་རྩོམ་འགོག་སྤེལ་བྱེད་མཁན་ཞིག་ཡིན་པས་གཟུར་གནས་གཅིག་གཏན་ནས་མིན། དེ་ནི་ཁོ་པས་བྲིས་པའི་རྩོམ་མང་པོ་བོད་ཀྱི་བང་ཆེན་ལ་འགོད་སྤེལ་བྱེད་ཀྱི་ཡོད། སྐབས་བབ་དམ་འབུལ་གྱི་གནད་དོན་ཐོག་གླེང་དགོས་པ་གཅིག་ནི། བར་བརྒལ་ཚོགས་གཙོ་ལ་དམ་འབུལ་ཞུ་མཁན་ཚོས་བཅའ་ཁྲིམས་དགོངས་དོན་དམ་བཅའ་ཕུལ་ཡོད་པ་དང་། ཁྲིམས་ཞིབ་པ་་ཆེ་བའི་མདུན་དམ་འབུལ་ཞུས་པ་དེ་ནི་དེའོ་གོང་སྲིད་སྐྱོང་བློ་བཟང་སེངྒེ་ལགས་མཉམ་ཞུགས་ཐོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དྲྭ་ཐོག་ཕེབས་ཏེ་བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ཀྱིས་གསང་རྒྱ་དང་ལས་འཁུར་དམ་འབུལ་ཞུས་པ་མ་ཟད། ༧གོང་ས་མཆོག་གིས་སྲིད་སྐྱོང་གསར་པར་འཚམས་འདྲི་དང་སྲིད་སྐྱོང་འཕོ་མཁན་ལ་ཐུགས་རྗེ་ཆེ་ཞེས་གསུངས་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་གསར་པའི་ལས་འཁུར་འགོ་འཛུགས་གནང་ཟིན་ཡོད་པ་དེས་ཁྲིམས་ཞིབ་པ་རྣམས་ལས་གནས་སུ་ཕེབས་པ་དེར་ངོས་བཞེས་ཐོན་པ་གཅིག་ཡིན། གལ་སྲིད་དེ་ལ་ངོས་བཞེས་ཐོབ་མེད་གསུངས་ན། ༧གོང་ས་མཆོག་དྲྭ་ཐོག་དམ་འབུལ་མཛད་སྒོར་ཕེབས་པ་དང་སྲིད་སྐྱོང་བློ་བཟང་སེངྒེ་ལགས་ཀྱིས་ལས་འཁུར་རྩིས་སྤྲོད་གནང་བ་དེ་ཁྲིམས་འགལ་རེད་ཅེས་གསུངས་ཀྱི་ཡོད་དམ། དེ་ནས་དམ་འབུལ་གནང་ཕྱོགས་གཉིས་ཀྱི་ཐད། བར་བརྒལ་ཚོགས་གཙོའི་དྲུང་ནས་དམ་བཅའ་འབུལ་མཁན་རྣམས་བཅའ་ཁྲིམས་དགོངས་དོན་དམ་བཅའ་ཕུལ་བར་འོས་བསྡུ་ལས་ཁང་གིས་ངོས་འཛིན་གནང་བ་དེ་ནི་ཕྱི་ཚེས་ ༨ ཀྱི་ཉིན་རྒྱབ་སྤྱི་ཁྱབ་འོས་བསྡུའི་འགན་འཛིན་གྱིས་བར་བརྒལ་ཚོགས་གཙོའི་དྲུང་དུ་དམ་འབུལ་ཞུ་མཁན་ལ་ངོས་འཛིན་གནང་བ་དང་སྐུ་དཔར་དང་བཅའ་ཁྲིམས་མདུན་དམ་བཅའ་འབུལ་མཁན་ཚོར་ངོས་ལེན་མེད་པ་དེ་ནི་དམ་འབུལ་ཞུ་མཁན་སྤྱི་འཐུས་ཀྱི་གྲངས་ཚད་ཀྱིས་ཚོགས་གཙོ་དང་ཚོགས་གཞོན་འོས་འདེམས་བྱེད་པར་སྤྱི་འཐུས་ཀྱི་གྲུབ་ཆ ལོན་གྱི་མི་འདུག་ཅེས་གསུངས་ཡོད་པ་དེས་བར་བརྒལ་ཚོགས་གཙོའི་དྲུང་དུ་དམ་བཅའ་ཕུལ་མཁན་ཚོར་ངོས་འཛིན་གནང་ཡོད། ལར་ནས་༧གོང་ས་མཆོག་གི་སྐུ་དཔར་དང་བཅའ་ཁྲིམས་མདུན་དམ་བཅའ་འབུལ་རྒྱུ་ཞེས་པ་དེ་བཅའ་ཁྲིམས་དང་སྒྲིག་གཞི་གང་གི་ནང་གསལ་ཡོད། ཁྲིམས་དང་སྒྲིག་གཞིར་བར་འདུམ་དང་གྲོས་སྒྲིག་བྱེད་ཅེས་པ་དེ་ནི་སྒྲིག་ཁྲིམས་མེད་པའི་མང་གཙོའི་ལམ་ལུགས་གཅིག་རེད། དེས་ན་འཇིགས་བྲལ་ལགས་ཀྱིས་བཅའ་ཁྲིམས་དང་སྒྲིག་གཞི་གང་གི་འོག་༧གོང་ས་མཆོག་གི་སྐུ་དཔར་དང་བཅའ་ཁྱིམས་ཀྱི་མདུན་དམ་བཅའ་འབུལ་ཆོག་པའི་ཁུངས་བསྐྱེལ་གནང་བ་ཡིན་ན་ཡི་རངས་ཞུ་ཆོག དེ་མིན་རང་གི་འདོད་ཚུལ་ཁྲིམས་ལ་བསྒྱུར་ཐབས་ཙམ་ལས་མ་འདས།
ཀློག་བདེ་ཞིང་གོ་བདེ་བ། ལངས་ཕྱོགས་ཁ་གསལ་བ། ཚིག་དོན་གནད་ལ་འཁེལ་བའི་རྩོམ་ཡིག་ཅིག་བྲིས་འདུག རྗེས་སུ་ཡི་རངས་ཡོད།
ཡིན་ནའང་སྤྱི་འཐུས་ཕྱོགས་གཉིས་ཀའི་དམ་འབུལ་ཁྲིམས་འགལ་ཡིན་ན། སྲིད་སྐྱོང་གསར་བའི་དམ་འབུལ་ཡང་ཁྲིམས་འགལ་ཡིན་དགོས་པ་ཞིག་འདུག རྒྱུ་མཚན་ནི། ཁྱེད་ཀྱི་རིགས་ལམ་ལྟར་ན། “ཟམ་གདོང་རིན་པོ་ཆེས་གསུངས་པ་བཞིན་ད་ལྟ་བཀའ་སྤྱི་གཉིས་ཀ་བཅའ་ཁྲིམས་དགོངས་དོན་གཞིར་བཟུང་གིས་ཁྲིམས་མཐུན་དམ་འབུལ་བྱེད་ཡུལ་མེད་པ་རེད།”
དེས་ན་ཁྲིམས་ཞིབ་པ་ཚོར་ངོས་ལེན་མེད་ཟེར་མཁན་གྱི་སྤྱི་འཐུས་རྣམ་པ་དང་། ཁྱེད་རང་ལྟ་བུའི་རྩོམ་པ་པོ་ཚོས། ཁྲིམས་ཞིབ་པ་ཚོར་ངོས་ལེན་མེད་ན། སྲིད་སྐྱོང་གསར་བའི་དམ་འབུལ་ལ་ངོས་ལེན་ཡོད་མེད་ཁ་གསལ་པོ་བཟོས་ན། སྤྱི་འཐུས་དམ་འབུལ་གྱི་རྙོག་དྲ་འདིའི་ཁུངས་གཏུགས་ས་དེའི་ངོ་བོ་ཇེ་གསལ་དུ་འགྲོ་བར་ཕན་ཐོགས་ཆེ།