ཁེ་ན་ཌའི་བོད་ཀྱི་སྟག་ཤར་སངས་རྒྱས་སྐྱབས་ལགས་ནས་ཊོ་རན་ཊོ་ནས་རྒྱལ་ས་ཨོ་ཊ་ཝའི་བར་འབོད་སྐུལ་དོན་ཚན་ལྔའི་འོག་བོད་དོན་ཞི་བའི་གོམ་བགྲོ་ལས་འགུལ་ཐེངས་གཉིས་པ་སྤེལ་གྱི་འདུག
ཟླ་འདིའི་ཕྱི་ཚེས་ ༡༢ ཉིན་ནས་སངས་རྒྱས་སྐྱབས་ལགས་ཀྱིས་འབོད་སྐུལ་དོན་ཚན་ལྔའི་འོག་ཁེ་ན་ཌའི་གྲོང་ཁྱེར་ཊོ་རན་ཊོའི་(Toronto) རྒྱ་ནག་གཞུང་ཚབ་མདུན་ནས་ཨོ་ཊ་ཝ་(Ottawa) གྲོང་ཁྱེར་གྱི་རྒྱ་ནག་གཞུང་ཚབ་མདུན་བར་བོད་དོན་ཞི་བའི་གོམ་བགྲོད་ཐེངས་གཉིས་པ་མགོ་བརྩམས་གནང་ཡོད་པ་དང་། ད་རེས་ཀྱི་བོད་དོན་ལས་འགུལ་ཁྲོད་ཁོང་ནས་ཕར་འགྲོ་ཚུར་འོང་གཉིས་ལ་ཁྱོན་སྤྱི་ལེ་ ༩༠༠ ལྷག་གི་ཞི་བའི་གོམ་བགྲོད་དང་ལམ་བར་གྱི་ས་གནས་མི་མང་ལ་བོད་དོན་ངོ་སྤྲོད་དང་ཁྱབ་བསྒྲགས་གནང་རྒྱུ་དང་། ལྷག་པར་དུ་ཊོ་རན་ཊོ་དང་ཨོ་ཊ་ཝར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གཉིས་ནི་ཁོང་གི་ལས་འགུལ་སྤེལ་ཡུལ་ཆགས་ཀྱི་ཡོད་འདུག
དེ་རིང་སངས་རྒྱས་སྐྱབས་ལགས་ཀྱིས་ངོ་དེབ་ཐད་གཏོང་གནང་བའི་ནང་། དེ་རིང་ཆུ་ཚོད་ ༡༢ རིང་སྤྱི་ལེ་ ༥༠ གོམ་བགྲོད་བྱས་ཡོད་པ་དང་། གནམ་གཤིས་ལེགས་པོ་ཡོད་པའི་སྟེང་ལམ་བར་དུ་དཀའ་ངལ་གང་ཡང་འཕྲད་མ་སོང་། ལུས་པོ་བདེ་ཐང་ཡིན་པ་དང་རེ་བར་ཊོ་རན་ཊོའི་ནང་དུ་རང་གི་རྒྱབ་ཁུག་ཁུར་མཁན་ཞིག་ཡོད་ན་གོམ་པ་མང་པོ་རྒྱག་ཐུབ་ཀྱི་ཡོད་པས་ཡག་པོ་འདུག ཤ་ཁྲག་གཅིག་པའི་བོད་རིགས་སྤུན་ཟླ་ཡོངས་ནས་ང་ལ་སེམས་ཁྲལ་མ་གནང་རོགས། བོད་རྒྱ་གཉིས་ཀྱི་དཀའ་རྙོག་མ་སེལ་བར་དུ་དུས་ནམ་ཡང་བོད་མི་ཚོས་སེམས་ཤུགས་མ་ཆགས་པར་རྡོག་རྩ་གཅིག་སྒྲིལ་གནང་དགོས་པ་རེད། ང་ཚོ་བོད་རིགས་གཅིག་པ་ཡིན་པའི་ཆ་ནས་འགན་གཅིག་པ་རེད། ང་ཚོ་ནི་རྒྱལ་ཁབ་གཅིག་དང་མི་རིགས་གཅིག དེ་བཞིན་འཐབ་རྩོད་གཅིག་དང་མ་འོངས་པའི་མདུན་ལམ་གཅིག་རེད། ང་ཚོའི་ཕ་ཡུལ་བོད་རེད། ཚང་མས་རྒྱལ་ཁབ་དང་མི་རིགས་ཀྱི་ཆེད་དུ་བསམ་བློ་གཏང་སྟེ་ལས་འགུལ་སྤེལ་མཁན་སུ་ཡིན་རུང་དེ་ལ་རྒྱབ་སྐྱོར་བྱེད་དགོས་པ་རེད། ངས་ལམ་བར་དུ་དབྱིན་ཇིའི་མི་རིགས་ཐུག་པ་རྣམས་ལ་བོད་དོན་གྱི་གནད་དོན་སྐོར་གོ་རྟོགས་སྤེལ་བ་ཡིན། དེར་བརྟེན་ཚང་མས་ང་ལ་རྒྱབ་སྐྱོར་མུ་མཐུད་ནས་གནང་རོགས་གནང་། ཞེས་བརྗོད་འདུག
ཁོང་གིས་རྒྱ་ནག་དང་ཁེ་ན་ཌའི་སྲིད་བློན་གཙོས་པའི་རྒྱལ་སྤྱིའི་ཚོགས་སྡེ་ཁག་ལ་འབོད་སྐུལ་དོན་ཚན་ལྔ་ཞུ་ཡི་ཡོད་པ་དག་ནི། གཅིག་༧གོང་ས་མཆོག་བོད་ལ་ཆིབས་བསྒྱུར་བསྐྱང་རྒྱུའི་ཐོག་རྒྱབ་སྐྱོར་གནང་རྒྱུ་དང་། གཉིས་བོད་རྒྱ་གཉིས་ཀྱི་དཀའ་རྙོག་སྟེ་ཕན་ཚུན་གྲོས་བསྡུར་དང་ཡིད་ཆེས་ཀྱི་ལམ་ནས་བསྐྱར་གསོ་བྱ་རྒྱུ། གསུམ་༧པན་ཆེན་རིན་པོ་ཆེ་དང་གཞན་བོད་ཀྱི་ཆབ་སྲིད་བཙོན་པ་རྣམས་ངེས་པར་དུ་གློད་ཀྲོལ་གཏོང་དགོས་པ། བཞི་ཕྱི་ལོ་ ༢༠༢༢ ལོའི་རྒྱལ་སྤྱིའི་ཨོ་རྩལ་རྩེད་འགྲན་རྒྱ་ནག་ནས་རྩེད་རྒྱུ་མཚམས་འཇོག་དང་། རྒྱ་ནག་གིས་བཟོས་བའི་ཏོག་དབྱིབས་ནད་ཡམས་ལ་འགན་ལེན་དང་རྒྱལ་སྤྱིས་ཐེར་འདོན་བྱ་དགོས་པ་བཅས་རེད་འདུག
འདས་ལོའི་ཕྱི་ཟླ་ ༦ ཚེས་ ༢༨ ཉིན་ཊོ་རན་ཊོར་ཡོད་པའི་རྒྱ་ནག་གི་གཞུང་འབྲེལ་དོན་ཁང་ནས་ཁེ་ན་ཌའི་རྒྱལ་ས་ཨོ་ཊ་ཝ་བར་དུ་སྤྱི་ལེ་ ༩༠༠ ཙམ་དང་ཁྱོན་ཉིན་ ༢༣ རིང་ཞི་བའི་གོམ་བགྲོད་གནང་ཡོད་པ་ལྟར། སྐབས་དེར་ཁོང་གིས་ཞི་བའི་འབོད་སྐུལ་ལྔ་ཞུས་ཡོད་པ་དག་ནི་༧གོང་ས་རྒྱལ་བ་རིན་པོ་མཆོག་བོད་དུ་གདན་ཞུ་དང་བོད་རྒྱ་གྲོས་མོལ་བསྐྱར་གསོ་དང་བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ། ༧པཎ་ཆེན་རིན་པོ་ཆེ་དང་བཀྲ་ཤིས་དབང་ཕྱུག་གཉིས་གཙོས་པའི་བོད་ནང་གི་ཆབ་སྲིད་བཙོན་མ་ཀློད་གློལ་གཏོང་དགོས་པའི་འབོད་སྐུལ་དང་རྒྱབ་སྐྱོར་ཞུས་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
