དེ་རིང་སྲིད་སྐྱོང་མཆོག་ནས་གནད་དོན་ཆེན་པོ་བཞིའི་ཐོག་གསར་འགོད་པའི་དྲི་བར་ལན་འདེབས་གནང་།

དེ་རིང་སྲིད་སྐྱོང་མཆོག་ནས་ཏང་གི་ལོ་བརྒྱ་ཟེར་བར་ལན་འདེབས་དང་བོད་རྒྱ་འབྲེལ་མོལ་ལས་དོན་ཚོགས་ཆུང་བཅོས་སྒྲིག སྤྱི་ལྷན་གྱི་དཀའ་ངལ་དང་བཙན་བྱོལ་བོད་མི་ག་ཚོད་ཅིག་ལ་ཏོག་དབྱིབས་འགོག་བརྒྱབ་ཐུབ་ཡོད་མེད་སོགས་ཀྱི་སྐོར་ནས་གསར་འགོད་པའི་དྲི་བར་ལན་འདེབས་གནང་སོང་།

དེ་རིང་སྔ་དྲོ་ཆུ་ཚོད་ ༩།༥༠ ཙམ་གྱི་སྟེང་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། སྲིད་སྐྱོང་སྤེན་པ་ཚེ་རིང་མཆོག་ནས་བོད་ཀྱི་གསར་འགོད་པ་ཚོ་ལྷན་དུ་འདུ་འཛོམས་ཤིག་གནང་སྟེ། རྒྱ་ནག་གུང་ཁྲན་ཏང་དབུ་བརྙེས་ཏེ་ལོ་བརྒྱ་ལོན་ཟེར་བར་ལན་འདེབས་དང་། སྐབས་བཅུ་དྲུག་པའི་བཀའ་ཤག་ངོས་ནས་ཛ་དྲག་གི་དུས་སྐབས་འདིར་བོད་མི་རྣམས་ལ་ཏོག་དབྱིབས་འགོག་ཁབ་བརྒྱབ་དགོས་པའི་ལམ་སྟོན་ཕེབས་པ་ལྟར། བོད་མིའི་སྒྲིག་འཛུགས་ངོས་ནས་བཙན་བྱོལ་བོད་མི་ག་ཚོད་ཅིག་ལ་ཏོག་དབྱིབས་འགོག་ཁབ་བརྒྱབ་ཐུབ་ཡོད་མེད། འཛིན་སྐྱོང་བཀའ་ཤག་ངོས་ནས་བཙན་བྱོལ་བོད་མིའི་ཁྲིམས་བཟོ་ལྷན་ཚོགས་ཀྱི་དཀའ་རྙོག་སེར་ཐབས་སྐོར། དེ་བཞིན། འོས་བསྡུའི་སྐབས་ནས་བོད་རྒྱ་འབྲེལ་མོལ་ལས་དོན་ཚོགས་ཆུང་བཅོས་སྒྲིག་གནང་གི་ཡིན་གསུངས་ཡོད་པ་ལྟར་བོད་རྒྱ་འབྲེལ་མོལ་ལས་དོན་ཚོགས་ཆུང་བཅོས་སྒྲིག་གནང་གི་ཡོད་སྐོར། དེ་བཞིན་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་བསྟན་འཛིན་ལེགས་བཤད་ལགས་བོད་མིའི་སྒྲིག་འཛུགས་ཀྱི་མགྲིན་ཚབ་པར་བསྐོ་གཞག་བྱུང་བ་ལྟར་དེ་རིང་ནས་ལས་ཁུར་ཞུ་ཡི་ཡོད་སྐོར་སོགས་གསར་འགོད་པའི་དྲི་བར་ལན་འདེབས་གནང་སོང་།

སྐབས་དེར་གསར་འགོད་པ་ཞིག་གིས་རྒྱ་ནག་དམར་ཤོག་ཚོགས་པ་དབུ་བརྙེས་ཏེ་ལོ་བརྒྱ་འཁོར་གྱི་ཡོད་ཟེར་བར་བོད་མིའི་སྒྲིག་འཛུགས་ངོས་ནས་བརྡ་ལན་ག་རེ་ཡོད་མེད་དྲིས་པར་སྲིད་སྐྱོང་མཆོག་ནས། དེ་རིང་རྒྱ་ནག་དམར་ཤོག་ཚོགས་པ་དབུ་བརྙེས་ཏེ་ལོ་བརྒྱ་འཁོར་གྱི་ཡོད་ཟེར་བའི་སྲུང་གཙི་ཞུ་ཡི་ཡོད་པ་དང་དེ་མཚུངས་བཞིན། ད་ལོར་བོད་ཞི་བའི་བཅིངས་གྲོལ་བཏང་སྟེ་ལོ་ངོ་བདུན་ཅུ་འཁོར་གྱི་ཡོད་ཟེར་བཞིན་ཡོད་མོད། ལོ་བརྒྱ་འཁོར་ཟེར་བའི་དགའ་དགའ་སྤྲོ་སྤྲོའི་དུས་དྲན་དེ་འདྲ་ཞིག་སྲུང་གཙི་ཞུ་དགོས་པའི་གནས་སྟངས་ཤིག་ཡོད་མེད་རང་བཞིན་གྱི་དྲི་བ་ཆགས་ཡོད། གཞུང་སྲིད་སྐྱོང་མཁན་ཞིག་གི་འགན་གཙོ་བོ་ནི་མི་མང་གི་བདེ་སྡུག་སྒྲུབ་རྒྱུ་དེ་རེད། རྒྱ་ནག་ནང་ལོགས་ཀྱི་རྒྱ་རིགས་མཚོན་པའི་ང་ཚོ་བོད་པ་དང་སོག་པོ། ཧོང་ཀོང་དང་ཡུ་གུར། དེ་བཞིན་ཐའེ་ཝན་གྱི་གནས་སྟངས་ལྟ་བུ་སོགས་ས་ཁུལ་འདི་དག་ནང་གི་མི་མང་ལ་དངོས་གནས་དྲང་གནས་བདེ་སྐྱིད་ཡོད་མེད་ཟེར་བ་དྲི་བ་ཆེན་པོ་ཞིག་ཆགས་བསྡད་ཡོད། གནས་སྟངས་འདི་མངོན་གསལ་ཡིན་པ་ཞིག་ནི་འཛམ་གླིང་རྒྱལ་ཁབ་མང་པོ་ཞིག་གིས་ཕྱིའི་དགྲ་ལས་སྲུང་སྐྱོབ་བྱེད་སླད་འགྲོ་སོན་གང་འཚམ་ཞིག་གཏོང་གི་ཡོད་ཀྱང་། རྒྱ་ནག་གིས་སོ་སོའི་མི་མང་དམ་དྲག་བྱེད་ཐབས་ཐོག་འགྲོ་གྲོན་མང་བ་གཏོང་གི་ཡོད་སྟབས། དེའི་ཐོག་ནས་རྒྱ་ནག་ཁྱོན་ཡོངས་དང་བོད་ནང་གི་གནས་སྟངས་ག་འདྲ་ཡོད་པ་གསལ་བོ་རེད།

དམར་ཤོག་ཚོགས་པ་དབུ་བརྙེས་ཏེ་ལོ་བརྒྱ་དང་བོད་བཅིངས་གྲོལ་ཟེར་བ་བཏང་སྟེ་ལོ་བདུན་ཅུ་འགྲོ་ཡི་ཡོད་ནའང་། བོད་ནང་གི་བོད་མི་ཚོར་བདེ་སྐྱིད་བསྐྲུན་ཐུབ་ཀྱི་མེད་པ་རང་བཞིན་གྱི་གསལ་བོ་རེད། གཙོ་བོ་དེ་བོད་ནང་གི་བོད་མིའི་མངོན་འདོད་ཤེས་པ་དང་ཧ་གོ་རྒྱུ་གལ་ཆེན་པོ་རེད། བོད་མིའི་མངོན་འདོད་ནི་ང་ཚོ་བོད་མི་རིགས་ཀྱི་ངོ་བོ་གཙོ་བོར་གྱུར་བའི་སྐད་ཡིག་དང་ཆོས་རིག་གཞུང་ཉམས་ལེན་བྱེད་ཐུབ་པ་ཞིག་ཡོང་རྒྱུ་དེ་རེད། དེ་དག་བྱེད་ཆོག་གི་མེད་པ་དང་དཀའ་ངལ་ག་རེ་འཕྲད་ཀྱང་། རྒྱ་ནག་གིས་འཛུགས་སྐྲུན་དང་འཛུགས་སྐྲུན་ཟེར་ནས་ཧ་ལམ་འཛུགས་སྐྲུན་བྱས་པ་ཡིན་ན། མི་མང་གི་འདོད་པ་ཁེངས་ཀྱི་ཡོད་པའི་རྣམ་པ་ད་ལྟའི་བར་བསྟན་བསྡད་པ་རེད་ལ། ད་ལྟའང་དེར་འགྱུར་བ་གཏོང་བའི་བསམ་བློ་གང་ཡང་མེད་པ་རེད། རྩ་བའི་བོད་མི་རིགས་ལ་མཚོན་ནའང་ཕྱི་དངོས་པོའི་ཡར་རྒྱས་འགྲོ་དགོས་ཀྱི་ཡོད་སྟབས། ང་ཚོར་དགག་བྱ་གང་ཡང་མེད། ཡིན་ནའང་། ཕྱི་དངོས་པོའི་ཡར་རྒྱས་བཏང་བ་དང་ལྷན་དུ་བོད་མིའི་ནང་སེམས་ཀྱི་བསམ་བློ་དང་མངོན་འདོད་བསྒྲུབ་རྒྱུ་གལ་ཆེན་པོ་རེད། ལྷག་པར་དུ་བོད་ཀྱི་ཁོར་ཡུག་དེ་བོད་མི་ཙམ་མ་ཡིན་པར་ཁྱིམ་མཚེས་རྒྱལ་ཁབ་མང་པོ་ཞིག་ལ་འབྲེལ་བ་ཆགས་བསྡད་ཡོད་པ་དང་དེའི་ནང་ནས་ཀྱང་རྒྱ་ནག་རང་ལ་འབྲེལ་བ་ཆགས་བསྡད་པ་རེད། བོད་ཀྱི་ཆུ་བོ་ཁག་བཞུར་ས་ནི་འཛམ་གླིང་གི་མི་འབོར་མང་ཤོས་ཀྱི་ཁྱིམ་མཚེས་ལུང་པ་ཁག་འཁེལ་ཡོད་དུས། རྒྱ་ནག་གི་སྲིད་ཇུས་དེ་ཚོ་དེང་དུས་ཀྱི་ཚན་རིག་དང་མཐུན་དང་མི་མཐུན་གྱི་གནས་སྟངས་ཆགས་ཡོད་རེད། བོད་ལ་གོ་ལའི་སྣེ་གསུམ་པ་ཞེས་ཡོངས་གྲགས་ཀྱི་གནས་སྟངས་འདིའི་འོག བོད་ཀྱི་ཁོར་ཡུག་ཚད་ལྡན་སྲུང་སྐྱོབ་བྱེད་ཐུབ་ཀྱི་ཡོད་མེད་ཀྱི་གནས་སྟངས་ཆགས་བསྡད་ཡོད། ཁྱོན་ཡོངས་ནས་བཤད་ན་དེ་རིང་དགའ་དགའ་སྤྲོ་སྤྲོ་བྱེད་འོས་པའི་གནས་སྟངས་ཤིག་རྩ་བ་ནས་ཆགས་ཡོད་པ་མ་རེད། གལ་སྲིད་རྒྱ་ནག་གཞུང་གིས་ཞི་བདེ་བསྐྲུན་པ་དང་སོ་སོའི་སྲིད་སྐྱོང་ཡུལ་འོག་གི་མི་མང་ལ་བདེ་བ་བསྐྲུན་ཐུབ་པ་ཡིན་ན། དགའ་དགའ་སྤྲོ་སྤྲོ་བྱེད་འོས་པ་ཞིག་རེད། དུས་ཚོད་དེ་འདྲ་ཞིག་མ་ཤར་བར་དུ་དགའ་དགའ་སྤྲོ་སྤྲོ་བྱེད་འོས་པའི་གནས་བབ་ཅིག་རྩ་བ་ནས་མཐོང་གི་མི་འདུག ཅེས་གསུངས་སོང་།

ཡང་གསར་འགོད་པ་ཞིག་གིས་སྲིད་སྐྱོང་མཆོག་བོད་མིའི་ཆབ་སྲིད་ཀྱི་དབུ་འཁྲིད་ཡིན་པའི་ངོས་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཛ་དྲག་གི་དཀའ་ངལ་དེ་སེལ་ཐུབ་ཐབས་ག་འདྲ་ཡོད་མེད་དྲིས་སྐབས། བཙན་བྱོལ་བོད་མིའི་ལྗིད་མཉམ་སྟངས་འཛིན་གྱི་བཅའ་ཁྲིམས་ཀྱི་སྒྲོམ་གཞིའི་འོག་ཏུ་མང་གཙོའི་ཀ་གསུམ་གྱི་ལས་འགན་དེ་སོ་སོ་སོ་སོར་འགྲེལ་བཤད་བརྒྱབ་བཞག་ཡོད་པ་རེད། དེར་བརྟེན་བཅའ་ཁྲིམས་ཀྱི་ནང་དུ་བཀའ་ཤག་ལ་སྐུལ་བའི་འགན་དབང་གང་ཡང་མི་འདུག་ཅེས་གསལ་པོ་ཞུ་ཡི་ཡོད། གཞུང་གི་འགན་འཛིན་ཞེས་པའི་བཅའ་ཁྲིམས་དོན་ཚན་བཅུ་དགུ་བ་ནས་མར་གཟིགས་པ་ཡིན་ན། ཁྲིམས་ལུགས་དབང་འཛིན་ཞེས་ཆེས་མཐོའི་ཁྲིམས་ཞིབ་ཁང་གི་སྒང་ལ་བཀའ་ཤག་ནས་ཐེ་བྱུས་བྱེད་པའི་དབང་ཆ་མེད་པ་དང་། དེ་བཞིན་ཁྲིམས་བཟོ་ལྷན་ཚོགས་ཞེས་སྤྱི་འཐུས་ལྷན་ཚོགས་ཐོག་བཀའ་ཤག་ནས་ཐེ་བྱུས་བྱེད་པའི་དབང་ཆ་རྩ་བ་ནས་ཡོད་པ་མ་རེད། དེར་བརྟེན། འགན་དབང་མེད་པ་ཞིག་ལ་ཐེ་བྱུས་བྱེད་པར་ཕྱིན་པ་ཡིན་ན། གནས་སྟངས་དེ་ག་འདྲ་ཞིག་ཏུ་ཆགས་སྲིད་པ་དང་མི་སྲིད་པར་བསམ་བློ་གཏོང་དགོས་ཀྱི་ཡོད། ཛ་དྲག་གི་གནས་སུ་ལྷུང་ཡོད་པ་དང་ག་འདྲ་བྱས་ནས་ལྷུང་བ། དེ་བཞིན་སུས་འགན་འཁུར་དགོས་པ་ཚང་མས་མཁྱེན་གྱི་ཡོད་པ་རེད། དེར་བརྟེན། འགན་བཞེས་དགོས་མཁན་ཚོས་འགན་བཞེས་ཏེ་ཁྲིམས་དང་མཐུན་པའི་ཕྱག་ལས་གནང་བ་ཡིན་ན། ད་ལྟའི་དཀའ་ངལ་འཕྲད་གཞི་འདི་ཆགས་ཀྱི་མེད། འཛིན་སྐྱོང་བཀའ་ཤག་ངོས་ནས་གནས་ཚུལ་ག་རེ་ཆགས་ཀྱི་ཡོད་མེད་ཐད་དོ་སྣང་ཆ་ཚང་བྱས་བསྡད་ཡོད། གནས་ཚུལ་མ་ཤེས་པ་ཕལ་ཆེར་མེད་ལབ་ན་འགྲིག་གི་ཡོད་པ་དང་གནས་ཚུལ་ཆ་ཚང་ཤེས་ཀྱི་ཡོད་དེ། ད་ལྟའི་འགན་དེ་སྤྱི་འཐུས་ལྷན་ཚོགས་ལ་ཡོད་སྟབས། བདམས་ཐོན་སྤྱི་འཐུས་དང་སྤྱི་འཐུས་རྣམ་པ་ཚོས་འགན་བཞེས་དགོས་པ་གལ་ཆེན་པོ་ཆགས་བསྡད་ཡོད། སྤྱི་འཐུས་རྣམ་པ་ཚོ་ཡིན་ནའང་མི་མང་གིས་རེ་བ་ཞིག་བཅོལ་ནས་ཡར་བཏང་གནང་ཡོད་པ་རེད། མཚམས་མཚམས་ང་ཚོས་སོ་སོའི་ཁ་གཏད་སུ་ཡིན་ནོར་གྱི་འདུག་བསམ་པ་བྱུང་གི་འདུག ང་རང་ཚོ་ནང་ཁུལ་དུ་ཅིག་བཤད་ཐུབ་པ་དང་སྒྲུབ་ཐུབ་པ་ཡིན་ན་དཔའ་རྟགས་ཡིན་པའི་བཟོ་འདྲ་པོ་འདུག

ད་ལྟའི་དུས་སྐབས་སུ་འཛམ་གླིང་གི་ཆབ་སྲིད་འགྱུར་ལྡོག་གི་གནས་སྟངས་དང་དེའི་འོག་ནས་རྒྱ་ནག་ལ་ལྟ་སྟངས་ག་འདྲ་ཡོད་མེད་དང་། དེ་འདྲ་བའི་ཆབ་སྲིད་ཀྱི་གནས་སྟངས་འོག་བོད་མིའི་སྒྲིག་འཛུགས་དང་བོད་མི་ཚོའི་ངོས་ནས་རྒྱལ་སྤྱིའི་སྟེང་བོད་དོན་ལས་འགུལ་ཤུགས་ཆེན་པོ་སྤེལ་དགོས་པའི་གནས་སྟངས་ཆགས་བསྡད་ཡོད་པ་རེད། ད་ལྟ་ང་རང་ཚོ་ནང་ཁུལ་གྱི་གནས་ཚུལ་དེའི་དབང་གིས་གྲོས་ཚོགས་འཚོགས་མ་ཐུབ་པར་ང་ཚོའི་གོ་སྐབས་བཟང་པ་དེ་དག་ཆུ་ཟོད་དུ་འགྲོ་ཡི་ཡོད་པ་གསལ་བོ་རེད། དེར་བརྟེན། ད་ལྟའི་གནས་བབ་དེར་ཚང་མས་དགོངས་པ་བཞེས་ཏེ་གང་མགྱོགས་མགྱོགས་ཀྱིས་སེལ་ཐུབ་པ་ཡིན་ན། ང་ཚོས་བོད་དོན་རང་གི་ཐོག་དང་བོད་ཆོལ་ཁ་གསུམ་གྱི་མི་རིགས་ཐོག་དཀའ་ལས་བརྒྱབ་སྟེ་ནུས་ཤུགས་འདོན་དགོས་པ་གལ་ཆེན་པོ་རེད། འཛིན་སྐྱོང་བཀའ་ཤག་ངོས་ནས་ཛ་དྲག་གི་གནས་སྟངས་ཡིན་པ་ཤེས་ཀྱི་ཡོད། འོན་ཀྱང་། དེའི་ཐོག་ལག་པ་འཆང་བར་ཁྲིམས་ཀྱི་འགན་དབང་མེད་དུས། མང་གཙོའི་ཐོབ་ཐང་དང་འགན་དབང་མེད་པ་ཞིག་ལ་ཐེ་བྱུས་བྱས་ཚེ། མགོ་ལས་རྨ་ཆེ་བ་བཟོ་བའི་གནས་སྟངས་ཤིག་རིང་བཞིན་གྱི་ཆགས་ཀྱི་ཡོད། དེར་བརྟེན། ཐབས་ལམ་གཅིག་ནི་ཁོང་རྣམ་པ་ཚང་མས་འཛིན་སྐྱོང་བཀའ་ཤག་ངོས་ནས་ཅིག་བྱེད་དགོས་ཀྱི་འདུག་གསུང་བ་ཡིན་ན། ང་ཚོར་ལག་པ་འཆང་རྒྱུ་ཞིག་ཡོང་གི་ཡོད་པ་དང་། གལ་སྲིད་འཛིན་སྐྱོང་བཀའ་ཤག་ངོས་ནས་ལག་པ་འཆང་བ་ཡིན་ན། བཀའ་ཤག་གི་ཐག་གཅོད་དེར་དང་ལེན་ཞུ་རྒྱུ་ཡིན་པའི་ཆ་རྐྱེན་ཞིག་འཇོག་དགོས་ཀྱི་ཡོད། ད་ལྟ་འཛིན་སྐྱོང་བཀའ་ཤག་ཆབ་སྲིད་འདིའི་ནང་འཛུལ་མེད་སྟབས་འཛིན་སྐྱོང་གི་ལས་དོན་དེ་ཚོ་ཏག་ཏག་འགྲོ་ཡི་ཡོད། གལ་སྲིད་འཛིན་སྐྱོང་བཀའ་ཤག་ཀྱང་ཆབ་སྲིད་འདིའི་ནང་མར་འབྲུད་པ་ཡིན་ན། བཀའ་ཤག་ཆབ་སྲིད་ནང་མར་འཐིམས་ཏེ་འཛིན་སྐྱོང་གི་ལས་དོན་ལ་འཐུས་ཤོར་འགྲོ་བའི་ཉེན་ཁ་ཡོད། དེར་བརྟེན། གནད་འགོག་ག་བ་ཡོད་མེད་མཁྱེན་པའི་ཐོག་ནས་ཐབས་ལམ་འཚོལ་རྒྱུ་གལ་ཆེན་པོ་རེད་བསམ་གྱི་ཡོད། ཅེས་གསུངས་སོང་།

དེ་རྗེས་གསར་འགོད་པས་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་འོག་བཀའ་ཤག་ནས་བོད་མི་ག་ཚོད་ཅིག་འགོག་ཁབ་བརྒྱབ་ཐུབ་ཡོད་མེད་དྲིས་པར་སྲིད་སྐྱོང་མཆོག་གིས། ལས་ཁུར་ཞུས་པ་དང་ཏོག་དབྱིབས་ཀྱི་ཛ་དྲག་གནས་སྟངས་ལ་གཞིགས་ཏེ། བོད་མིའི་སྒྲིག་འཛུགས་ཀྱི་ཛ་དྲག་ཚོགས་ཆུང་བཅོས་སྒྲིག་གིས། བོད་མི་རྣམས་ལ་འགོག་ཁབ་བརྒྱབ་རྒྱུའི་ལས་གཞི་བརྩམས་པའི་བརྒྱུད་རིམ་ངོ་སྤྲོད་དང་སྦྲགས། ང་ཚོས་འགོག་ཁབ་བརྒྱབ་རྒྱུའི་ལས་གཞི་བརྩམས་ཏེ་བདུན་ཕྲག་གཅིག་གི་ནང་དུ། འགོག་ཁབ་བརྒྱབ་ཟིན་པའི་མི་འབོར་གང་ལ་གང་འཚམ་ཞིག་རག་བྱུང་། འོན་ཀྱང་། ང་ཚོ་དབུས་ཀྱི་མི་འབོར་གྱི་གྲངས་ཐོ་ཚད་ལྡན་མེད་པ་ལ་བརྟེན་ནས་ས་གནས་ཁག་ཏུ་ཁབ་བརྒྱབ་མེད་པའི་གྲངས་ཐོ་དེ་ཚོ་འབྱོར་བར་ཅུང་ཙམ་འགོར་སོང་། དེར་བརྟེན། སྲིད་སྐྱོང་རང་གིས་ལྷོ་ཕྱོགས་གཞིས་ཆགས་ཁག་ལྔ་དང་དབུས་གཞིས་ཆགས་ཁག་ཅིག རྡོ་རྗེ་གླིང་ནས་བསྟན་འཛིན་སྒང་དང་མེ་འོ་བར་བྱང་ཤར་གྱི་གཞིས་ཆགས་ཁག་ཅིག དེ་བཞིན། ཧི་མ་ཅལ་གྱི་གཞིས་ཆགས་ཁག་ཅིག བལ་ཡུལ་དང་ལ་དྭགས། ཨོ་ཊར་ཁན་དང་ལྡི་ལི་ཁུལ་གྱི་གཞིས་ཆགས་ཁག་ཅིག་བཅས་ཀྱི་ས་གནས་མགོ་འཛིན་དང་སྨན་པའི་འགོ་ལས་ཁག་དང་ལྷན་དུ་ཚོགས་འདུ་ཐེངས་ལྔའི་རིང་འཚོགས་ཏེ། གྲངས་ཐོ་གང་འཚམ་རག་པ་དང་རོགས་སྐྱོར་ཕུལ་གྱི་ཡིན་གསུང་མཁན་ཚོར་འཆར་གཞི་བང་སྒྲིག་ཡོད། དེ་དང་དུས་མཚུངས་སུ་ལྷོ་ཕྱོགས་ནས་ཡིན་ན་རྣམ་གྲོལ་གླིང་དང་སེར་ར། བཀྲ་ཤིས་ལྷུན་པོ། བྱང་ཤར་ལྟ་བུ་ཡིན་ན་སྨིན་གྲོལ་གླིང་སོགས་ཀྱི་དབུ་འཛུགས་ཞུས་ཏེ།  མི་མང་ནང་ཁབ་བརྒྱབ་རྒྱུའི་ལས་གཞི་ཤུགས་ཆེན་པོ་སྤེལ་བ་རེད། དེ་བརྟེན། ཕྱི་ནང་གི་རོགས་ཚོགས་མང་པོས་རོགས་སྐྱོར་གནང་བྱུང་། བླ་མ་དང་གྲྭ་བ། དགོན་པ་ཁག་ནས་སོ་སོའི་མི་མང་ལ་ཁབ་བརྒྱབ་རྒྱུའི་འགྲོ་གྲོན་མཚོན་པའི་ལས་དོན་མང་པོ་ཞིག་ལ་རྒྱབ་སྐྱོར་གནང་བྱུང་། དེ་ལ་བརྟེན་ནས། ད་ལྟའི་ཆར་ང་ཚོར་མི་གྲངས་ ༥༡༠༠༠ ཙམ་ཡོད་པའི་ནང་ནས་ཁབ་གཉི་ག་བརྒྱབ་ཟིན་པ་མི་གྲངས་ ༡༤༧༠༣ དང་ཁབ་གཅིག་བརྒྱབ་ཟིན་པ་ ༢༨༤༨༩། ལོ་བཅོ་བརྒྱད་ཡན་ཁབ་རྩ་བ་ནས་བརྒྱབ་མེད་པའི་མི་གྲངས་ ༨༣༤༨ ཆགས་འདུག དེར་བརྟེན། ཁབ་བརྒྱབ་ཚར་བའི་གྲངས་ཀ་དེ་བརྒྱ་ཆ་ ༨༢ ཆགས་ཀྱི་ཡོད་དུས། ང་ཚོ་འཛམ་གླིང་ནང་གི་ཁབ་བརྒྱབ་པའི་གྲངས་འབོར་མཐོ་ཤོས་ཤིག་ཆགས་ཀྱི་ཡོད། ཅེས་གསུངས་སོང་།

བོད་རྒྱ་འབྲེལ་མོལ་ལས་ཚོགས་ཆུང་བཅོས་སྒྲིག་གནང་གི་ཡོད་མེད་སྐོར་ལ་སྲིད་སྐྱོང་མཆོག་ནས། ད་རེས་དྲི་བ་བསླེབས་པར་བརྟེན་ཞུས་པ་ཡིན་ན་སྐྱོན་གལ་མི་འདུག ད་ལྟ་ང་ཚོས་ཕར་འབྲེལ་བ་ཞུ་རྒྱུ་ལྷག་བསྡད་ཡོད་པ་རེད། བཅོས་སྒྲིག་བྱ་རྒྱུ་ཡིན་པ་འོས་བསྡུའི་སྐབས་ནས་བཟུང་ཞུས་ཡོད་ལ་ད་ལྟའང་དམ་བཅའ་བརྟན་པོ་གནས་བསྡད་ཡོད། བོད་རྒྱ་འབྲེལ་མོལ་ལས་དོན་བྱེད་ཕྱོགས་ཐོག་ཐབས་ཇུས་ཀྱི་བརྟན་འཇགས་ཚོགས་ཆུང་ཞིག་འཛུགས་རྒྱུ་གཏན་འཁེལ་བསྡད་ཡོད། དེའི་ནང་གི་མི་འགྲོར་བོད་མིའི་སྒྲིག་འཛུགས་ཀྱི་ལས་བྱེད་པ་རང་གི་ངོ་བོའི་ཐོག་ནས་གཏན་འཇགས་ཚོགས་ཆུང་ཞིག་འཛུགས་ཀྱི་ཡིན། དེའི་ནང་བདེ་སྲུང་ལས་ཁུངས་ཀྱིས་བོད་དོན་གནས་ཚུལ་མཁོ་སྒྲུབ་བྱེད་པའི་འགན་གཙོ་བོ་བཞེས་རྒྱུ་དང་། གནས་ཚུལ་དེ་དག་འབྱོར་ས་དེ་ཡར་སྲིད་ཇུས་ཉམས་ཞིབ་ཁང་ལ་འབྱོར་འགྲོ་ཡི་ཡོད། ཕྱི་དྲིལ་ལས་ཁུངས་ཀྱིས་རྒྱལ་སྤྱིའི་ཁྱོན་ལ་གནས་ཚུལ་ག་རེ་ཆགས་ཀྱི་ཡོད་པ་དང་རྒྱ་རིགས་འབྲེལ་མཐུད་པ་བརྒྱུད་གནས་ཚུལ་ག་རེ་ཤེས་པ་རྣམས་སྲིད་ཇུས་ཉམས་ཞིབ་ཁང་ལ་སྤུངས་ཏེ། སྲིད་ཇུས་ཉམས་ཞིབ་ཁང་ནས་གནས་ཚུལ་གང་ཡོད་པ་ཚང་མ་མིང་དོན་མཚུངས་པ་ཞིག་སྒྲིག་དགོས་པའི་འགན་ཆགས་བསྡད་ཡོད། དེའི་ནང་བདེ་སྲུང་དྲུང་ཆེ་དང་ཕྱི་དྲིལ་དྲུང་ཆེ། སྲིད་ཇུས་ཉམས་ཞིབ་ཁང་གི་འགན་འཛིན་དང་བཀའ་དྲུང་ཡིག་ཚང་གི་ཆབ་སྲིད་དྲུང་ཆེ་བཅས་ཁོང་རྣམ་པ་བཞི་ཡིས་ཚོགས་ཆུང་གྲུབ་ཡོད། གནས་ཚུལ་གལ་ཆེ་ཆུང་ལ་དཔག་པས་ཚོགས་ཆུང་དེ་ཐད་ཀར་སྲིད་སྐྱོང་འོག་བསླེབས་ཀྱི་ཡོད། དེ་སྔ་ཞུས་མྱོང་། སྲིད་སྐྱོང་གི་ལས་འགན་དེ་བཀའ་བློན་ཚང་མ་བསྐོས་ཟིན་པ་དང་བཀའ་བློན་རྣམ་པས་ལྷན་ཁང་སོ་སོའི་ལས་འགན་དེ་བྱས་འགྲོ་ཡི་ཡོད་པ་རེད། སྲིད་སྐྱོང་གི་ལས་འགན་གསུམ་ནི་གཅིག་བོད་རྒྱ་འབྲེལ་མོལ་གནས་སྟངས་ཐོག་འགན་འཁུར་རྒྱུ་དང་སྲིད་གཞུང་གཞན་དང་མགོ་ཁྲིད་གཞན་ལ་འབྲེལ་བ་འཛིན་རྒྱུ། གསུམ་པ་དེ་བོད་མིའི་སྒྲིག་འཛུགས་དང་མང་ཚོགས་བར་འབྲེལ་བ་དམ་ཟབ་གཏང་རྒྱུ་བཅས་ལས་འགན་གསུམ་འཁུར་རྒྱུ་ཡིན་ལབ་པ་ནང་ལྟར། ད་ལྟ་ང་ཚོས་བོད་རྒྱ་འབྲེལ་མོལ་ལས་དོན་ཚོགས་ཆུང་བཅོས་སྒྲིག་བྱས་མཚམས་ནས། སྔོན་མ་བོད་རྒྱ་འབྲེལ་མོལ་ལས་དོན་ཚོགས་མི་བཅུ་བདུན་ཡོད་པ་རྣམས་རིང་བཞིན་གྱིས་ནུས་མེད་ཆགས་འགྲོ་ཡི་ཡོད་ལ། ང་ཚོས་རིམ་པས་ཁོང་རྣམ་པས་འདས་པའི་ལོ་མང་རིང་ཕྱག་ལས་གནང་བར་ཐུགས་རྗེ་ཆེ་ཞུ་རྒྱུ་དང་འབྲེལ་ཕྱག་ཡིག་ཕུལ་རྒྱུ་ཡིན། ཞེས་གསུངས་སོང་།

གསར་འགོད་པ། སྐལ་བཟང་སྦྱིན་པ།