རྒྱ་གར་ནང་ཏོག་དབྱིབས་གཉན་རིམས་ཀྱི་འགོག་ཁབ་རིམ་པ་དང་པོ་དང་གཉིས་པ་གཉིས་ཀ་བརྒྱབས་ཟིན་པ་མི་གྲངས་ ༡༤༧༠༣ བྱུང་ཡོད་པ་དང་འགོག་ཁབ་རིམ་པ་གཉིས་ཀ་བརྒྱབས་ཟིན་པ་དང་དང་པོ་ཁོ་ན་བརྒྱབས་ཟིན་པ་བཅས་ནི་རྒྱ་གར་གྱི་བོད་མིའི་བརྒྱ་ཆའི་ ༨༩ ཟིན་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༡ ཉིན་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་འདས་པའི་བདུན་གཅིག་གི་ཏོག་དབྱིབས་གཉན་རིམས་ཀྱི་གནས་སྟངས་སྐོར་ལ་གསར་འགོད་གསལ་བསྒྲགས་ཐེངས་ ༦༦ པ་སྤེལ་སྐབས། བོད་མིའི་སྒྲིག་འཛུགས་འཕྲོད་བསྟེན་དྲུང་གཞོན་བསྟན་འཛིན་ཀུན་བཟང་ལགས་ཀྱིས། ཆེད་མཁས་པ་མང་པོ་ཞིག་གིས་ཏོག་དབྱིབས་གཉན་རིམས་གྱི་ནད་རླབས་གསུམ་པ་དེ་བསླེབ་སྲིད་པའི་ཚོད་དཔག་བྱེད་ཀྱི་ཡོད་པ་དང་། ནད་རླབས་གསུམ་པའི་སྐབས་རང་ཉིད་ལ་སྲུང་སྐྱོབ་ཆེད་གཙོ་ཆེ་ཤོས་ནི་སོ་སོས་ཁ་རས་གྱོན་པ་དང་ཕན་ཚུན་བར་རྒྱང་ཐག་འཛིན་པ། འདུ་འཛོམས་གང་ཉུང་བྱེད་པ་དང་འགོག་ཁབ་རྒྱག་ཐུབ་པ་སོགས་ཀྱི་སྔོན་འགོག་གི་ཐབས་ལམ་ཁག་ལ་བསྟེན་དགོས་པ་དེ་ཡིན་སྐོར་དང་། འགོག་ཁབ་དང་པོ་དང་གཉིས་པའི་བར་ཉིན་གྲངས་ ༨༨ འཇོག་དགོས་པ་དང་། འགོག་ཁབ་མ་ཐོབ་པ་རྣམས་ཀྱི་སྣང་མེད་མི་བྱེད་པར་འགོག་ཁབ་བརྒྱབ་དགོས་པ་དང་། ཏོག་དབྱིབས་གཉན་རིམས་ན་ཚར་བ་ཁག་ལ་ཟླ་གསུམ་གྱི་རིང་འགོག་ཁབ་མི་རྒྱག་པའི་ལམ་སྟོན་གནང་ཡོད་ནའང་། མི་རེ་འགས་སླར་ཡང་ཏོག་ནད་ཕོགས་སྲིད་པའི་ཞེད་སྣང་གནང་གི་ཡོད་སྟབས། དེ་ལ་ཞེད་སྣང་མི་དགོས་པར་ལམ་སྟོན་བཞིན་འགོག་ཁབ་རྒྱག་དགོས་སྐོར་ལམ་སྟོན་གནང་འདུག
ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས། འདས་པའི་བདུན་གཅིག་གི་རིང་རྒྱ་གར་དང་བལ་ཡུལ་གཉིས་ཀྱི་ནང་ནད་གཞི་ཕོག་པའི་བོད་མི་གྲངས་ ༧༢ བྱུང་ཡོད་པའི་ཁྲོད་དགུང་ལོ་མཐོ་ཤོས་དེ་ ༨༢ དང་ཆུང་ཤོས་དེ་བྱིས་པ་ལོ་ ༥ ཡིན། རྐྱེན་འདས་སུ་ཕྱིན་པ་གཅིག་ཀྱང་བྱུང་མེད་པ། ད་ལྟ་བོད་མི་གྲངས་ ༣༦༧ ལ་ཏོག་ནད་ན་བཞིན་ཡོད་སྐོར་སྐོར། དེ་བཞིན་འདས་པའི་བདུན་ཕྲག་གཅིག་རིང་རྒྱ་གར་གྱི་ས་གནས་གྲངས་ ༡༥ དང་བལ་ཡུལ་ནང་གི་ས་གནས་ ༥ བཅས་ཀྱི་བོད་མི་གྲངས་ ༦༦༩ ལ་ནད་གཞི་ཕོག་ཡོད་མེད་བརྟག་དཔྱད་གནང་ཡོད་པ་དང་། བོད་མི་རང་ཁྱིམ་དུ་ཟུར་འདུག་བྱེད་མཁན་གྲངས་ ༤༡༣ དང་བོད་མིའི་སྒྲིག་འཛུགས་ཀྱི་མཐུན་འགྱུར་འོག་བོད་མི་གྲངས་ ༥༢༢ བཅས་ཁྱོན་མི་གྲངས་ ༩༣༥ ཟུར་འཇོག་བྱས་ཡོད་སྐོར་གསུངས་འདུག
ཏོག་དབྱིབས་གཉན་རིམས་ཀྱི་འགོག་ཁབ་དང་འབྲེལ་ནས་སྨན་པ་མཚམས་གཅོད་ལགས་ཀྱིས། ད་ལྟ་བར་དུ་རྒྱ་གར་ནང་རང་ལོ་ ༦༠ ཡན་གྱི་བོད་མི་གྲངས་ ༧༧༦༡ དང་། དེ་བཞིན་རང་ལོ་ ༤༥ ནས་ ༥༩ བར་གྱི་བོད་མི་གྲངས་ ༥༡༥༦། རང་ལོ་ ༡༨ ནས་ ༤༤ བར་གྱི་བོད་མི་གྲངས་ ༡༧༥༡ བཅས་ཁྱོན་འགོག་ཁབ་རིམ་པ་དང་པོ་དང་གཉིས་པ་གཉིས་བརྒྱབས་ཟིན་པ་མི་གྲངས་ ༡༤༧༠༣ དང་། རྒྱ་གར་ནང་རང་ལོ་ ༦༠ ཡན་གྱི་བོད་མི་གྲངས་ ༢༡༡༦ དང་། རང་ལོ་ ༤༥ ནས་ ༥༩ བར་གྱི་བོད་མི་གྲངས་ ༦༢༥༨། རང་ལོ་ ༡༨ ནས་ ༤༤ བར་གྱི་བོད་མི་གྲངས་ ༢༠༡༡༥ བཅས་ཁྱོན་མི་གྲངས་ ༢༨༤༨༩ ཙམ་ལ་འགོག་ཁབ་རིམ་པ་དང་པོ་བརྒྱབས་ཟིན་སྟབས། རྒྱ་གར་ནང་གི་བོད་མིའི་བརྒྱ་ཆ་ ༨༩ ཙམ་ལ་འགོག་ཁབ་རིམ་པ་དང་པོའམ་གཉིས་པ་ཐོབ་ཡོད་སྐོར་བརྗོད་འདུག
དེའི་རྗེས་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་ཀྱིས། ད་ལྟའི་ཆར་རྒྱ་གར་ནང་གི་ཏོག་དབྱིབས་གཉན་རིམས་ ༡༩ ཡི་གནས་སྟངས་དེ་ཅུང་དྲག་ཏུ་འགྲོ་ཡི་ཡོད་པ་དང་། ཉིན་རེའི་དྲག་སྐྱེད་ཀྱི་ཚད་དེ་བརྒྱ་ཆ་ ༩༧ ཙམ་ཡིན་པ་མ་ཟད། ནད་གཞི་གསར་དུ་ཕོག་མཁན་དེ་བརྒྱ་ཆ་ ༢།༥ མ་གཏོགས་མེད་ལ། འདས་པའི་ཉིན་གྲངས་ ༢༤ རིང་ནད་པ་གསར་པའི་བརྒྱ་ཆ་དེ་ ༥ ཡན་ལ་ཐོན་མེད་སྐོར་དང་། རྒྱ་གར་གྱི་སྨན་བཅོས་ཞིབ་འཇུག་ལྷན་ཚོགས་ (ICMR) ཀྱིས་ཨ་མ་སྦྲུམ་མ་ཚོ་ད་ནས་བཟུང་ཏོག་དབྱིབས་སྔོན་འགོག་སྨན་ཁབ་བརྒྱབ་ན་ཆོག་པའི་ལམ་སྟོན་བྱས་ཡོད་པ་དང་། ད་ལྟ་ལོ་ན་ ༢ ནས་ ༡༨ དབར་གྱི་བྱིས་པ་ཚོར་འགོག་ཁབ་བརྒྱབས་ན་ཆོག་མིན་གྱི་བརྟག་དཔྱད་འགྲོ་མུས་ཡིན་ཞིང་། འདི་ལོའི་ཕྱི་ཟླ་ ༩ པའི་ནང་དེའི་ཐད་ཐག་གཅོད་བསླེབ་རྒྱུའི་ཚོད་དཔག་བྱེད་ཀྱི་ཡོད་སྐོར་དང་། ཏོག་དབྱིབས་གཉན་རིམས་ལ་གདོང་ལེན་བྱ་རྒྱུའི་ཐབས་ཇུས་ལྔ་སྟེ། གཉན་རིམས་ཕོག་མིན་བརྟག་དཔྱད་བྱ་རྒྱུ་དང་། ནད་པའི་འབྲེལ་གཏུག་རྩད་གཅོད་བྱེད་པ། ནད་པ་རྣམས་ལ་སྨན་བཅོས་བྱེད་པ། དེ་ནས་ཏོག་དབྱིབས་གཉན་རིམས་ཀྱི་སྔོན་འགོག་སྨན་ཁབ་བརྒྱབ་རྒྱུ་དང་། ཁ་རས་གྱོན་རྒྱུ་ལ་སོགས་པའི་གཉན་རིམས་སྔོག་འགོག་གི་སྤྱོད་པ་བསྟེན་དགོས་པ་བཅས་ལག་བསྟར་ཚགས་ཚུད་དགོས་སྐོར་བརྗོད་འདུག
ཡང་ཁོང་གིས་དེང་སྐབས་གཟའ་མཇུག་སྐབས་བཞུགས་སྒར་དྷ་རམ་ས་ལར་ཡུལ་སྐོར་སྤྲོ་འཆམ་པ་མང་པོ་སླེབས་ཀྱི་ཡོད་པའི་ཁྲོད་ནས། བརྒྱ་ཆ་ ༡༠ མ་གཏོགས་གཞན་ཚང་མས་ཁ་རས་གྱོན་གྱི་མེད་པར་བརྟེན། བཞུགས་སྒར་ཁུལ་དུ་ཚོང་ཁང་གཉེར་མཁན་ཚོས་ཡུལ་སྐོར་སྤྲོ་འཆམ་པ་རྣམས་རང་གི་ཚོང་ཁང་ནང་ཞུགས་དུས་ཁ་རས་གྱོན་དགོས་པའི་སྐུལ་མ་བྱས་ཚེ། རང་ཉིད་ལ་གཉན་རིམས་མི་ཕོག་རྒྱུའི་ཁེ་ཕན་ཡོད་པ་མ་ཟད་རང་གི་སྤྱི་ཚོགས་ལའང་གཉན་རིམས་མི་འགོ་བའི་དགེ་མཚན་ཡོད་སྐོར་དང་། འདས་པའི་ལོ་གཅིག་ནང་རང་རེའི་བོད་མིའི་སྤྱི་ཚོགས་ནང་གི་ཚོགས་པ་ཁག་ནང་ཏོག་དབྱིབས་གཉན་རིམས་ཀྱི་དཀའ་ངལ་ཤུགས་ཆེ་ཤོས་ཐེབས་ཡོད་པར་བརྟེན། སློབ་གྲྭ་དང་དགོན་པས་མཚོན་པའི་ཚོགས་སྡེ་ཁག་གིས་གནས་སྐབས་རིང་དངོས་སུ་འདུ་འཛོམས་ཐོག་ནས་འཛིན་གྲྭ་དང་ཚོགས་འཚོག་པ་སོགས་མི་གནང་རྒྱུའི་འབོད་སྐུལ་ཞུ་ཡི་ཡོད་སྐོར་བརྗོད་འདུག
གསར་འགོད་པ། ཀླུ་མགོན་ཐར།
