༧སྐུའི་འཁྲུངས་སྐར་སྲུང་གཙི་ཞུ་བར་འགོག་རྐྱེན་བཟོ་ཐབས་བྱས།

ལ་དྭགས་ཀྱི་འབྲོག་སྡེ་བདེ་མཆོག་དང་སྒོ་ཡུལ་བཀག་གཞུང་དུ་༧གོང་ས་མཆོག་གི་འཁྲུངས་སྐར་སྲུང་གཙི་ཞུ་སྐབས་རྒྱ་གཞུང་གིས་འགོག་རྐྱེན་བཟོ་ཐབས་བྱས་འདུག

དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༦ སྟེ་༧གོང་ས་མཆོག་གི་སྐུའི་འཁྲུངས་སྐར་ཉིན་མོར། ལ་དྭགས་ཀྱི་འབྲོག་སྡེ་བདེ་མཆོག་དང་སྒོ་ཡུལ་བཀག་གཞུང་ (Koyul Kakjung)་དུ་སྐུའི་འཁྲུངས་སྲུང་གཙི་ཞུ་སྐབས། རྒྱ་གར་གྱི་སེང་གེ་གཙང་པོའི་ (Indus River) ཕ་རོལ་ནས་རྒྱ་དམག་གིས་རྒྱ་ནག་གི་རྒྱལ་དར་དང་འཕྲེད་དར་དམར་པོ་བཤམས་ཏེ། འཁྲུངས་སྐར་སྲུང་གཙི་ཞུ་བར་འགོག་རྐྱེན་བཟོ་ཐབས་དང་ངོ་རྒོལ་བྱས་ཡོད་འདུག

གནས་ཚུལ་དེ་ཐོག་མར་ཚེ་དབང་ (Urgain Tsewang)ཞེས་པའི་ཡུལ་བཀག་གཞུང་ (Koyul Kakjung) འབྲོག་སྡེའི་མགོ་བ་ཞིག་གིས་བརྙན་དང་བཅས་སྤེལ་ཡོད་པ་དང་།  དེ་ཡང་ཁོང་གིས། ཟླ་འདིའི་ཕྱི་ཚེས་ ༦ ཉིན་མི་མང་རྣམས་ཀྱིས་༧གོང་ས་མཆོག་གི་སྐུའི་འཁྲུངས་སྐར་སྲུང་གཙིའི་ཆེད་རྡོ་ལྷས་འགྲམ་སྒོ་ (Dola Tamgo) རུ་འདུ་འཛོམས་བྱེད་སྐབས། ཞོགས་པའི་ཆུ་ཚོད་ ༡༡ ཐོག་མོ་ཊ་ལྔའི་ནང་དུ་རྒྱ་ནག་གི་དམག་མི་དང་མི་དཀྱུས་མ་འགའ་ཤས་བསླེབས་ཏེ་སྨི་ ༢༠༠ ཅན་གྱི་འཕྲེད་དར་དམར་པོ་བཤམས་པ་དང་། རྒྱ་ནག་གི་རྒྱལ་དར་འཁྱེར་ནས་སྐུའི་འཁྲུངས་སྲུང་གཙི་ཞུ་བར་ངོ་རྒོལ་བྱས་སོང་། འཕྲེད་དར་དམར་པོའི་སྟེང་དུ་ཡི་གེ་གང་བྲིས་པ་ཧ་གོ་མ་སོང་། ཁོང་ཚོས་འཕྲེད་དར་དམར་པོ་བཤམས་ཏེ་ཆུ་ཚོད་ཕྱེད་ཀའི་རིང་བསྡད་བྱུང་། ཞེས་བརྗོད་ཡོད་འདུག

ཡང་ཁོང་གིས། ཉིན་བཅུའི་སྔོན་ལ་ང་ཚོའི་ས་ཁུལ་དུ་ཉི་འོད་ཀྱི་ཆུ་འཐེན་འཕྲུལ་འཁོར་ (Solar Pump) བཙུགས་པའི་སྐབས་སུ་རྒྱ་ནག་གིས་ངོ་རྒོལ་བྱས་སོང་། ཞེས་བརྗོད་ཡོད་འདུག་ལ། རྒྱ་གར་གྱིས་རྒྱ་ནག་གི་དམག་དཔོན་ཚོར་གནས་ཚུལ་དེའི་སྐོར་དྲིས་པར། རྒྱ་ནག་གི་དམག་དཔོན་ནས་ལན་གང་ཡང་སྤྲད་མི་འདུག

ཟླ་འདིའི་ཕྱི་ཚེས་ ༦ ཉིན་རྒྱ་གར་གྱི་སྲིད་བློན་མུ་དྷི་མཆོག་ནས་ཞལ་པར་བརྒྱུད་༧གོང་ས་མཆོག་གི་སྐུའི་འཁྲུངས་སྐར་ཉིན་མོར་འཚམས་འདྲི་ཞུས་ཡོད་པ་དང་། འདི་ནི་མུ་དྷི་མཆོག་ཕྱི་ལོ་ ༢༠༠༤ ལོར་སྲིད་བློན་ཆགས་ནས་ད་ལྟ་བར་༧གོང་ས་རྒྱལ་བ་རིན་པོ་ཆེ་མཆོག་དང་བཀའ་མོལ་གནང་བ་ཡོངས་གྲགས་གནང་བ་ཐོག་མ་དེ་ཆགས་ཡོད་པ་རེད།

ཕྱི་ལོ་ ༢༠༡༩ ཟླ་ ༧ ཚེས་ ༡༢ ཉིན་ (Ladakh in the Media) ཞེས་པའི་ངོ་དེབ་ཚོགས་པའི་ནང་གནས་ཚུལ་སྤེལ་བའི་ནང་དུ། ཕྱི་ཟླ་ ༧ ཚེས་ ༦ ཉིན་གོས་ཡུལ་དང་། བདེ་མཆོག དུང་ཁྲི་བཅས་ཀྱི་མི་མང་རྣམས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་སྲུང་གཙིའི་ཆེད་རྡོ་ལྷས་འགྲམ་སྒོ་ (Dohla) རུ་འདུ་འཛོམས་བྱས་ཡོད། དེ་ནི་འདས་པའི་ལོ་མང་པོའི་ཡར་སྔོན་ནས་སྲུང་གཙི་ཞུ་སྲོལ་ཞིག་ཆགས་ཡོད་པ་མ་ཟད། ཉིན་དེར་ང་ཚོས་རྒྱ་གར་གྱི་རྒྱལ་དར་དང་། ནང་པའི་ཆོས་དར། བོད་ཀྱི་རྒྱལ་དར་ (Tibetan Flag) བཅས་སྒྲེང་གི་ཡོད། ཡིན་ན་ཡང་ཐེངས་འདིར་རྒྱ་ནག་ཕྱོགས་ནས་ཉུང་མཐར་མི་གྲངས་ ༧ དང་སྒེར་འཁོར་ ༣ ཞིག་སྤྱི་ལེ་ ༦ ཙམ་གྱི་རྒྱང་ཐག་ལས་མེད་པའི་ང་ཚོའི་ས་ཐོག་ཏུ་འཛུལ་ཏེ། རྒྱ་ནག་གི་རྒྱལ་དར་གཅིག་དང་། འཕྲེད་དར་དམར་པོ་ཞིག་སྒྲེང་འཛུགས་བྱས་ཏེ། བོད་ཁ་བྲལ་དུ་གཏོང་བའི་ལས་འགུལ་མཚམས་འཇོག་དགོས་པ་དང་། དར་ཆ་སྒྲེང་མི་ཆོག་སྐོར་དང་། གཞན་ཡང་། བྱང་ཐང་ཕྱོགས་ལ་རྒྱང་མཐོང་བཙུགས་ནས་ལྟ་བཤེར་བྱེད་བཞིན་ཡོད་པ་སོགས་གསལ་པོ་མཐོང་གི་ཡོད་སྐོར་བརྗོད་སོང་། ཞེས་དང་། ཁོ་ཚོས་ང་ཚོའི་ས་ཐོག་ཏུ་འཛུལ་ཏེ་རྒྱ་ནག་གི་རྒྱལ་དར་འཕྱར་བ་དེས། ང་ཚོའི་ཕ་མེས་ཡང་མེས་ནས་དགུན་སར་སྤྱོད་བཞིན་པའི་རྩྭ་ས་དག་ཧམ་བཟུང་བྱེད་འདོད་ཡོད་པ་མཚོན་གྱི་ཡོད། རྒྱ་སྐྱེད་བྱེད་རྒྱུ་དེ་རྒྱ་ནག་གི་རང་གཤིས་ཤིག་ཡིན་ཡང་གྱོང་གུད་དེ་སུ་ལ་ཡོད་མེད་ཤེས་རྒྱུ་གལ་ཆེ། དེ་ནི་སྤྱི་ལེ་ ༦ ཙམ་མིན་པར་སའི་རྒྱ་ཁྱོན་སྤྱི་ལེ་གྲུ་བཞི་མ་མང་པོའི་གནད་དོན་ཞིག་ཡིན་སྟབས། དབུས་སའི་མགོ་འཁྲིད་རྣམས་ཀྱིས་རྒྱལ་ཁབ་ཀྱི་བདེ་སྲུང་དང་། བྱང་པ་དང་ཁོ་ཚོའི་ནོར་ལུག་རྣམས་ཀྱི་འཚོ་གནས་བཅས་ལ་གཞིགས་ཏེ་གནད་དོན་འདི་གཙིགས་ཆེར་འཛིན་རྒྱུའི་བརྡ་གཏོང་གི་ཡོད། ཅེས་བརྗོད་ཡོད་པ་རེད།

གསར་འགོད་པ། བསྟན་འཛིན་ཕུར་བུ།